MIKHA 1 - WUKE SUSI WATTI'U AL᷊AL᷊USASSA

¹ Mikha darantane wuassu sambau soa addio'a arane Moresyet. Sutempo wanua Yehuda paparentannu ual᷊al᷊isansunna eteudde Ratu Yotam, Ahas wuṛṛu Hizkia. Mikha nenengkamma tanatan Mawu su ola'u Samaria wuṛṛu Yerusalem.

Sasangitta su Samaria wuṛṛu Yerusalem

² Paddaringikke, ei manga walahanna! Panutukke, ei tumanangnge su ahewallu runia! Mawu Apan Atanggaṛṛanne rumanta maola'a tialane lumawangnga si yamiu sarangkanambone! Paddaringikke i Tou mabbisara Wuassu Wal᷊en-Ne apan susi su surga.

³ I Tou sinumossokka wuassu atatanaan-Ne apan susi wuṛṛu u'amatta su puiddu manga wowone su runia.

⁴ Manga wowone nonossa su al᷊ungngu pal᷊addu ledda-Ne naal᷊ihidda lilinna sulal᷊ummu putungnga apan lukkenggamma; letangnge nal᷊alladda sinumutta watukku wawal᷊anne, naal᷊ihidda ua'e su wuidda apan mangngelekka watukku wowane.

⁵ Sarangkanambone udde sarun mariaddi ana waugu taumatan Israel marosa wuṛṛu mammangalo su saruannu Ruata. Isaite apan naaola'a Israel marosa? Wal᷊inewe Samaria inangngu soane sassane? Isaite apan naaola'a Yehuda massubba paal᷊uanna? Wal᷊inewe Yerusalem sassane?

⁶ Ana waugu udde Mawu nabbisara, “I Ya'u sarun ma'ola'a Samaria ombon winal᷊alanna su wadda'a, wuṛṛu tampan taumata massuannu punnu anggore. Winal᷊alannu soa udde sarun Ta'u iramme watukku wawal᷊anne, wuṛṛu manga rapappakke sarun isongkakka.

⁷ Manga paal᷊uanne apan maarega sarun ṛimunsaanna, wuṛṛu suapan saranapa apan nionggolla su manga wawine apan mammanara su kuil sarun tutunganna, see al᷊awo'u paal᷊uanne sarun ṛimunsaanna. Manga saranapa uddewe ina'ul᷊en patataṛṛamawune su mongannu asasuwukka. Orassa indi sarangkanambone udde sarun ṛuwoannu manga seetta olanna sasamba aadiangkamanna su manga monganni mangitou.”

⁸ Ana waugu udde i ya'u, Mikha, massusa naungnga wuṛṛu sussal᷊iomanna. I ya'u sarun umamatta ringannu tawe laubba wuṛṛu tawe sapatu tadea'u iapal᷊iatta'a aroddi asusane naungku. I ya'u sarun tumawanna ere asun ahuranganna wuṛṛu maggontol᷊anna, ere manu'a unta.

⁹ Ana waugu manga lessan Samaria tawe aundamanna, wuṛṛu Yehuda sarun aṛṛiannu asasilaka apan uasul᷊ungnga. Asasilaka na'omate su Yerusalem, ngara sasuttanna leta'a inariadiannu walahangku.

Seetta maraniten ma'oma su Yerusalem

¹⁰ Imbaṛṛangnga mamasingkatta su manga seetti ite su Gad su ola'u asasilakan kite; arie mamalan mangitou ma'ellega si yamiu lulluai. Ei tumana'u Bet-Le-Afra, tattal᷊inggite su awu maol'a tatiala sinumassilla!

¹¹ I yamiu tumana'u Safir, roote watukku pamamuanganna ringannu tawe laubba wuṛṛu ringannu apendamma massili! Manga taumatan Zaanan tawe waṛṛini sumabbangnga wuassu soan mangitou. Aintul᷊in tumana'u Bet-Haezel mapal᷊iatta'a si'o manungku poiaroddi taweddu pattallindumanna lai.

¹² Asasilaka wuassu Mawu na'omate su saruannu ngara sasuttanna su Yerusalem! Ana waugu udde, tawe mariaddi taumatan Marot mangantimma aontolla.

¹³ I yamiu tumana'a Lakhis, pasea'e awal᷊o su Keretan pangalo! I yamiu nattanno manga rosa apan niola'a Israel na'oman sara Yerusalem narosa lai.

¹⁴ Orassa indi, tumana'u Yehuda i yamiu sarun awul᷊iannu soa Moresyet-Gad. Manga ratun Israel sarun tawe maasomba sasumbala apia wuassu soa Akhzib.

¹⁵ Ei taumatan Maresya, Mawu sarun manantilli yamiu su seetta apan sarun mamaddo soanu. Manga piaṛṛa'u Israel apan uaparenta sarun ma'imbuni su manga loṛṛangnga su Adulam.

¹⁶ Ei taumatan Yehuda, pol᷊ote utangngu maola'a tatiala lullal᷊o su manga anangngu apan arangnguani yamiu. Iṛṛite puanu ma'oman sara mal᷊unggukka ere manu'u winalanganna apan u'inassa winal᷊unanna, ana waugu manga anangngu sarun ṛuwoanna watukku pamamuanganna.