MATIUS 9 - WUKE SUSI WATTI'U AL᷊AL᷊USASSA

Mawu Yesus napaapian sangkatou lome

¹ Mawu Yesus sinuma'ete su saalanna, nalliu rano, nabelengnga watukku soa inariadianne.

² Isudde taumata nangapiddu sangkatou lome ringanni Tou apan ual᷊allowangnga su wilatta. Su tempo Mawu Yesus naasilo manungku wahewa atonna pangangimanni mangitou udde, i Tou nabbisara su taumata lome udde, “Paasabare ana'u! Manga rosanu suete niampunganna.”

³ Manga pira hurun agama apan isudde lai nabbisara sulal᷊ummu naungnga, “Taumata indi mangngal᷊uandaga Ruata!”

⁴ Mawu Yesus masingkattu ṛingiṛṛanni mangitou, ne i Tou nabbisarate, “Anio ṛingiṛṛannu aral᷊eone aroddi?

⁵ Suapa malluasanna: mabbisara, ‘Rosanu suete niampunganna’, ara'e mabbisara, ‘Darisikke wuṛṛu amatte’?

⁶ Arawe orassa indi Ya'u mappaal᷊iatta'a si yamiu, manungku su wowon dunia indi Ana'u Taumata uataṛṛino mangampunga rosa.” See Mawu Yesus nabbisarate su taumata lome udde, “Darisikke, lappute wilannu wuṛṛu apul᷊ete!”

⁷ Taumata lome udde dirumarisikke wuṛṛu napul᷊ete su wal᷊ene.

⁸ Su tempo manga taumata naasilo olangnge udde, i mangitou nata'utta wuṛṛu naddalote Ruata, ana waugu Ruata suete napal᷊iatta'u taṛṛino-Ne apan aroddi ahewalle su taumata.

Mawu Yesus namaggo si Matius

⁹ Wua'udde Mawu Yesus nanantangken tampa udde. Tantal᷊anna u'amatta i Tou naasilo sangkatou maddarorongnga wose, aranne i Matius, tantal᷊anna ua'ianna su tampa mallal᷊uṛṛu wose. Mawu Yesus nabbisara si tou, “Wette tantalongke si Ya'u!” Ne i Matius nirumarisikke wuṛṛu tinumantalongke Mawu Yesus.

¹⁰ Su tempo Mawu Yesus tantal᷊anna u'anna su wal᷊e Matius, nirumantate manambo maddarorongnga wose wuṛṛu manga taumata apan sassunannu tumanangnge taumata lal᷊eo, u'anna su sampunna ringannu Mawu Yesus wuṛṛu mallal᷊aṛṛenggen-Ne.

¹¹ Pia manga taumatan Farisi apan naasilo olangnge udde. See i mangitou naiwal᷊ote mallal᷊aṛṛenggennu Mawu Yesus, “Anio hurunu u'anna su sampunna ringannu mallal᷊uṛṛu wose wuṛṛu manga taumata lal᷊eo?”

¹² Mawu Yesus naaringikka aiwal᷊o mangitou see sinumimbakka, “Taumata apan tawe maradda'a, tawe mappandumma doktere, tumba'u taumata apan maradda'a.

¹³ Ṛingiṛṛa'o apa atappasannu wageangngu Wuke Susi indi: ‘I Ya'u mappandumma darangngu, wal᷊ine sasamba wuassu winatangnga’. Ana waugu i Ya'u nirumanta wal᷊ine mamaggo taumata apan massunna ririne mapiate, ewe'e taumata apan sassunanna maṛṛusal᷊a.”

Pattatatiakka su ola'u puasa

¹⁴ Wua'udde mallal᷊aṛṛenggenni Yohanes Mananaṛṛani nirumanta ringannu Mawu Yesus. See i mangitou naiwal᷊o, “Anio i yami wuṛṛu manga taumatan Farisi mappuasa arawe mallal᷊aṛṛenggenni Iamangnga tawe?”

¹⁵ Mawu Yesus sinumimbakka, “Ereapa su ṛingiṛṛanni yamiu? Wotongngewe manga raho su andeangngu awingnga massusa naungnge amungkangngu ma'a'awingnga esakka ta'e udde su sampunna ringanni mangitou? Asinungka tawe! Arawe sarun a'omanna tempone maa'awingnga esakka udde al᷊apanna wua dinganni mangitou. Su tempo udde nanattakke i mangitou mappuasa.

¹⁶ Tawe taumata mandappela laubba tabbe ringannu piṛṛissu mal᷊aṛṛenessa wakku. Ana waugu mal᷊aṛṛenessa ipandappela udde sarun ma'uṛṛutta see manggesa'a laubba udde, see hesangnge maola'a lembon bahewalla.

¹⁷ Aroddi lai tawe taumata apan mandal᷊innu anggore wakku sulal᷊ummu pato'am pisi tabbe. Ana waugu pato'a udde sarun mapesangnga wuṛṛu mahohakka, see anggorene mabboso. Anggore bakku sarun ilal᷊inna su pato'a apan bakku lai, tadea'u itarua sidutu mapia.”

Ana'u piaṛṛa'u wal᷊em pattataṛṛamawuanna Wawine apan nangindingnga Mawu Yesus

¹⁸ Tantal᷊anna Mawu Yesus uahahatto ringannu manga mallal᷊aṛṛenggenni Yohanes Mananaṛṛani, nirumantate sangkatou piaṛṛa'u wal᷊em pattataṛṛamawuanna. I tou inumal᷊intuda su saruannu Mawu Yesus wuṛṛu nabbisara, “Ana'u wawine wakkute nate. Arawe amungkangngu wotongnge, ranta'o wuṛṛu pamita si tou tadea'u i tou mabiakka apia.”

¹⁹ Mawu Yesus dirumarisikke wuṛṛu inaite su sampunna ringannu mallal᷊aṛṛenggen-Ne mattuddan taumata udde.

^20-21 Su pattangngannu lal᷊anna sangkatou wawine apan maradda'a radda'u wawine mapul᷊ote dua su tonnane al᷊annune, nirumanta nangundani Mawu Yesus wuassu liudde. I tou maṛṛingidda, “Sambal᷊iate i ya'u naa'indingnga jubahne, i ya'u sarun mapia.” See i tou nangindingke pentakku jubah Mawu Yesus.

²² Orassa udde Mawu Yesus nanaile wuṛṛu naasilo wawine udde see nabbisara si tou, “Paatammuda, ana'u! Ana waugu i'o mangngimanna si Ya'u, i'o mapiate!” Orassa udde lai wawine udde napia.

²³ Wua'udde Mawu Yesus na'omate su wal᷊em piaṛṛa'u wal᷊em pattataṛṛamawuanna udde. Napawe i tou naasilo mananalangngu musikku lumal᷊al᷊o wuṛṛu taumata nambo mangke maggio,

²⁴ i Tou nabbisara si mangitou, “Sabangke i yamiu sarangkanambone! Ana'a indi tawe nate; i tou tumba'u mattiilla.” I mangitou sarangkanambone nilumage Mawu Yesus.

²⁵ Napawe manga taumata udde sinumabangke, Mawu Yesus sinumutta sulal᷊ummu wabbo'an ana'a udde wuṛṛu namita limane. See dirumarisikke ana'a wawine udde.

²⁶ Watti'a udde tinumelengke su ahewallu wageangngu leta'a udde.

Mawu Yesus napaapian duang katou wuta

²⁷ Mawu Yesus nanantangken tampa udde wuṛṛu su tangngan dal᷊anna pia ruang katou wuta uatantalongnga si Tou. Itarua mangngintul᷊i, “Ana'i Daud, akkanaawe i yami!”

²⁸ Napawe Mawu Yesus sinumutta sulal᷊ummu wal᷊e, taumata wuta darua udde nirumanta ringanni tou. Mawu Yesus naiwal᷊o si mangitou, “Apa i yamiu mangngimanna manungku i Ya'u wotongnge mangapia siraddua?” “Mangngimanna Iamangnga!” Sasimbakki tarua.

²⁹ See Mawu Yesus namita matan tarua ringannu wisara-Ne, “Ana waugu iraddua mangngimanna, ariadite su ereapa a'antimanni yamiu.”

³⁰ Ne itarua naasilote. Mawu Yesus napanaungnga sitarua, tadea'u tawe mabbatti'u olangnge udde sisai-sai.

³¹ Arawe i mangitou inaite nabbatti'u inolaannu Mawu Yesus su al᷊awo'u wageangngu leta'a isudde.

Mawu Yesus napaapian taumata mou

³² Su tempo ruang katou udde napul᷊ete, sangkatou mou apan niasuttannu ghaṛṛaho lal᷊eo niapidda ringannu Mawu Yesus.

³³ Mawu Yesus nallimbuakke ghaṛṛaho lal᷊eo udde wuṛṛu su orassa udde lai taumata udde naawisarate apia. Taumata nambo isudde niṛṛumindu'a see nabbisara, “I yami taambe naasilo olangnge ereindi su Israel!”

³⁴ Arawe manga taumatan Farisi nabbisara, “Ete manga tembonannu ghaṛṛaho lal᷊eo nangagillu taṛṛino si Tou mallimbuakka manga ghaṛṛaho lal᷊eo udde.”

Mawu Yesus inumakkanna naasilo taumata nambo

³⁵ Aroddiwe Mawu Yesus inaite namal᷊iwutta wuassu soa sambau watukku soa waine wuṛṛu wuassu wanua sambau watukku wanua waine. I Tou mangngaṛṛa'a su manga wal᷊em pattataṛṛamawuanna, wuṛṛu mammasingkattu Watti'u Al᷊al᷊uassa su ola'u ereapa Ruata mamarenta ere sangkatou Ratu. I Tou mapaapian manga taumata apan uapendamma al᷊awo'u radda'a wuṛṛu sangkullu wadangnga.

³⁶ Su tempo Mawu Yesus naasilo taumata nambo udde, i Tou inumakkanni mangitou, ana waugu i mangitou tinumiangnga wuṛṛu lome, ere domba apan tawe mallal᷊u'adde.

³⁷ See Mawu Yesus nabbisara su manga mallal᷊aṛṛenggen-Ne, “Pangitinganna manambo arawe mangangitingnge mattul᷊ungnga.

³⁸ Ana waugu udde paddorongke su tatahuannu wailla udde tadea'u mandolokku mangangitingnga iapa'itingnga.”