MATIUS 8 - WUKE SUSI WATTI'U AL᷊AL᷊USASSA

Mawu Yesus napaapian sangkatou raddangnge paro apan ma'arantinna

¹ Mawu Yesus sinumossokke wuassu wuidda, wuṛṛu manambo taumata uatantalongnga si Tou.

² Su tempo udde nirumantate sangkatou apan pia raddangnge paro ma'ata'utta. I tou inumal᷊intuda su saruannu Mawu Yesus, see nabbisara, “Iamangnga, amungkangngu Iamangnga maapulu, Iamangnga wotongnge mapaapia'u.”

³ Mawu Yesus namita taumata udde lapiddu nabbisara, “I Ya'u ma'apulu. Apiate!” Orassa udde lai raddangnge nawul᷊i.

⁴ See Mawu Yesus nabbisara si tou, “Naunge! Arie pabbatti'a sisai-sai. Arawe roote ringannu imam, wuṛṛu paddorongnga si tou manantunna manungku i'o napiate. Wua'udde anggil᷊a'e sasamba apan suete nitita Musa, maola'a manga tatiala su taumata manungku i'o napiate atonna!”

Mawu Yesus napaapia mangangimben tembonannu tantaran Roma

⁵ Su tempo Mawu Yesus sinumutta su Kapernaum sangkatou tembonannu tantaran Roma nirumanta naisasomban Tou, wuṛṛu naddorongnga tul᷊unganna si Tou.

⁶ “Iamangnga,” unnu tembonanne udde, “mangangimbe'u maradda'a su wal᷊e. I tou ual᷊allowangnga lome su antila wuṛṛu mangke uatataṛṛangnga.”

⁷ Mawu Yesus nabbisara, “I Ya'u sarun inai mapaapian tou.”

⁸ “Lasa'e Iamangnga,” sasimbakku tembonanne udde, “I ya'u tawe su ṛinone mapaarantan Iamangnga su wal᷊e'u. Iamangnga pamarentate. Ana see mangangimbe'u mapiate.

⁹ Ana waugu i ya'u lai ṛinone massuṛṛubawa su tembonangku. Wuṛṛu mabbawoanna wuassia'u pia lai manga tantara apan sarun massuṛṛubawa su parenta'u. Amungkangngu i ya'u mandolokku sangkatou tantara, ‘Inaite!’ i tou sarun inai. I ya'u mabbisara su tantara waine lai, ‘Wette isindi!’ i tou sarun dumanta; wuṛṛu amungkangngu i ya'u mamarenta allangku, ‘Ola'e indi!’ i tou sarun tumuṛṛutta.”

¹⁰ Su tempo Mawu Yesus naaringikka apa apan niwal᷊on tembonannu tantara udde, i Tou mangke naherangnga. Wua'udde i Tou nabbisara su manga taumata uatantalongnga si Tou, “Wal᷊ine hampa taumata indi. Su wallattu taumatan Israel i Ya'u taambe naasomba taumata pangangimanne aroddi ahewalle!

¹¹ Atonna! Manambo taumata sarun dumanta wuassu samba'an ra'i wuṛṛu waṛṛatta lulluassa su sampunna ringanni Abraham, i Ishak wuṛṛu i Yakub sulal᷊ummu Runia Wakkun Ruata.

¹² Arawe manga taumata apan ṛinone maola'a al᷊aṛṛana'u Ruata sarun iramme su ararandumma su liudde. Isudde i mangitou sarun lumuai wuṛṛu matataṛṛangngu asasusa.”

¹³ See Mawu Yesus nabbisara su tembonannu tantara udde, “Apul᷊ete, apa apan sulal᷊ummu pangangimannu udde sarun mariaddi.” Wuṛṛu su orassa udde lai mangangimbe udde napiate.

Mawu Yesus napaapia manambo taumata

¹⁴ Mawu Yesus inaite watukku wal᷊em Petrus. Isudde i Tou naasilo la'iananni Petrus maradda'a sal᷊iubba su lallowanganna.

¹⁵ Mawu Yesus namita limane lapiddu napia sal᷊iubba udde. I Tou nabangunna wuṛṛu nangimbete Mawu Yesus.

¹⁶ Su tempo wawallote, taumata nangapidde mararadda'a apan niasuttannu ghaṛṛaho lal᷊eo. Wuṛṛu ringannu tumba'u wisara sampaddi, Mawu Yesus nallimbuakka manga ghaṛṛaho lal᷊eo udde wuṛṛu napaapia lai anambon taumata apan maradda'a.

¹⁷ Mawu Yesus na'ola'a sarangkanambone udde, wuṛṛu ringannu aroddi natipusse apa apan niwisara Nabi Yesaya, eteudde, “I Tou mamasanna asasusang kite wuṛṛu mapaapian radda'i ite.”

Manga taumata apan maapulu maola'a mallal᷊aṛṛenggennu Mawu Yesus

¹⁸ Manambo atonna taumata uapal᷊iwutta Mawu Yesus. Su tempo Mawu Yesus naasilo si mangitou nambo udde, i Tou nandolokku mallal᷊aṛṛenggen-Ne malliu lumewessa rano.

¹⁹ See sangkatou hurun agama nirumanta ringanni Tou wuṛṛu nabbisara, “Iamangnga Huru, i ya'u ma'apulu tumantalongnga Iamangnga suapan tampa Iamangnga umamatta!”

²⁰ Mawu Yesus sinumimbakka, “Serigala pia loṛṛangnge wuṛṛu manu'u winalanganna pia sal᷊akke, arawe Ana'u Taumata tawe tampa lallalowanganne.”

²¹ See sangkatou mallal᷊aṛṛenggen-Ne waine nabbisara, “Iamangnga, wala'a i ya'u mapul᷊e dorone mallabingngu iamangku.”

²² Arawe Mawu Yesus sinumimbakka, “Tantalongke si ya'u, wuṛṛu wala'e taumata nate mallabingngu taumatane nate udde sassane.”

Mawu Yesus napaal᷊enakku tandi'a

²³ Mawu Yesus sinuma'ete saalanna wuṛṛu mallal᷊aṛṛenggen-Ne tinumantalongke su sampunna ringanni Tou.

²⁴ Inaṛṛombanganne tandi'a apan ma'ikkatta tinumiuppa su rano na'oman sara saalanna ilalenggeten lua'a. Su tempo udde Mawu Yesus tantal᷊anna mattiilla.

²⁵ Ne manga mallal᷊aṛṛenggen-Ne inaite ringanni Tou wuṛṛu namu'o si Tou. “Iamangnga! Ontol᷊e! I ite masilakate!” unni mangitou.

²⁶ “Anio i yamiu matta'utta?” unnu Mawu Yesus. “Pangangimanni yamiu si Ya'u mattul᷊ungnga!” Wua' udde Mawu Yesus dirumarisikka wuṛṛu nandona anginna wuṛṛu rano udde. See rano udde nabbal᷊ite nal᷊enakka atonna.

²⁷ Manga mallal᷊aṛṛenggennu Mawu Yesus naherangnga. I mangitou nabbisara, “Taumata ereapa i Tou indi, na'oman sara anginna wuṛṛu lua'a tinumuṛṛutta apulu-Ne!”

Mawu Yesus napaapian ruang katou apan niasuttannu ghaṛṛaho lal᷊eo

²⁸ Mawu Yesus na'omate su samba'an rano su wageangngu leta'u Gadara. Poiaroddi ruang katou apan niasuttannu ghaṛṛaho lal᷊eo nirumanta ringanni Tou. Ruang katou udde tumanite maṛṛagissa, ana waugu udde tawe saran sangkatou waṛṛani sumabbi isudde.

²⁹ I mangitou sinumabangnga wuassu manga liangngu lal᷊abinganna wuṛṛu mangngintul᷊i, “Ana'u Ruata sarun olaannu ereapa i yami? Apa I'o mappulute mannansara si yami salaiwe taambe tempone?”

³⁰ Tawe marau wua'isudde, pia bawi manambo atonna tantal᷊anna madea'a anna.

³¹ Manga ghaṛṛaho lal᷊eo udde sinumal᷊andete Mawu Yesus, “Amungkangngu I'o mandolokki yami sumabangnga, roloṛṛa'a i yami sumutta sulal᷊ummu manga wawi udde.”

³² “Roote!” unnu Mawu Yesus. Manga ghaṛṛaho lal᷊eo udde sinumabangke wuassu taumata darua udde, see sinumuttate sulal᷊ummu manga wawi. Wuṛṛu manga wawi udde lapiddu tinumal᷊angnga wuṛṛu tinumumpa wuassu winggin rampissa nabatukku rano, see nilumakkuba.

³³ Mandariaga wawi udde tinumal᷊angnga watukku soa, wuṛṛu nabbatti'u anambon arariadianna udde, wuṛṛu lai su ola'u taumata darua apan niasuttannu ghaṛṛaho lal᷊eo udde.

³⁴ Ne anambon taumata su soa udde inaite naisasomba Mawu Yesus. Su tempo i mangitou naasilo Mawu Yesus, i mangitou sinumal᷊ande tadea'u i Tou manantangngu wageangngu leta'i mangitou.