MATIUS 4 - WUKE SUSI WATTI'U AL᷊AL᷊USASSA

Mawu Yesus niwono'anna

¹ Wua'udde Mawu Yesus niehettu Ghaṛṛahon Ruata watukku wadda'a, ana see iapawono'a su Setanna.

² Appattu pul᷊o su allone appattu pul᷊o su ṛabbine Mawu Yesus tawe umanna. Wua'udde i Tou naapendampe lunussa.

³ Setanna nirumanta wuṛṛu nabbisara, “I'o Ana'u Ruata? Ana waugu udde doloṛṛa'e manga watu indi maola'a roti.”

⁴ Mawu Yesus sinumimbakka, “Sulal᷊ummu Wuke Susi uawoṛṛetta: Taumata tawe tumba'u mabiakku roti sassane, arawe lai ringannu al᷊awo'u wisara apan niapasingkattu Ruata.”

⁵ Wua'udde Setanna nangapiddu Mawu Yesus watukku Yerusalem, soa na'ukkassa, wuṛṛu nangadoten Tou su wowon sal᷊awon Wal᷊e Mawu.

⁶ See Setanna nabbisara si Tou, “I'o Ana'u Ruata? Amungkangngu aroddi, tumpate; ana sulal᷊ummu Wuke Susi uawoṛṛetta arendi, ‘Ruata sarun mandolokku manga mala'ekanne mandiaga Si'o, i mangitou sarun manal᷊oho Si'o ringannu lima mangitou, tadea'u leddanu tawe mattu'a su watu.’ ”

⁷ Mawu Yesus sinumimbakka, “Arawe sulal᷊ummu Wuke Susi uawoṛṛetta lai, ‘Imbaṛṛangnga i'o mamono'a Mawu Ruatanu.’ ”

⁸ Wua'udde Setanna nangapidde Mawu Yesus su wuidda apan matanggakka atonna wuṛṛu tina'ete si Tou al᷊awo'u araratuanna su runia ringannu al᷊awo'u pa'aalane.

⁹ See Setanna nabbisara Mawu Yesus, “Sarangkanambone indi sarun ionggolla Si'o, amungkangngu I'o umal᷊intudda massubba si ya'u.”

¹⁰ Mawu Yesus sinumimbakka, “Passal᷊iu i'o mamamono'a! Sulal᷊ummu Wuke Susi, uawoṛṛetta: Passubbate Mawu Ruatanu, wuṛṛu pangimbete si Tou sassane!”

¹¹ Panginsueanne Setanna nanantangke Mawu Yesus, wuṛṛu manga mala'ekan-Ne lai nappadantate nangimbe si Tou.

Mawu Yesus nanattakku manara-Ne su Galilea

¹² Su tempo naaringikka manungku i Yohanes nitaṛṛo sulal᷊ummu tuttupanna, Mawu Yesus tinumal᷊angke watukku Galilea.

¹³ I Tou nanantangke Nazaret, see natana'e su Kapernaum su winggin Ranon Galilea su wageangngu leta'u Zebulon wuṛṛu Naftali.

¹⁴ Ana waugu Mawu Yesus na'ola'a olangnge aroddi, nariaddite apa apan suete niwisara Nabi Yesaya:

¹⁵ “Leta'i Zebulon wuṛṛu leta'i Naftali, su lal᷊anna watukku rano, su samba'an Sal᷊ukku Yordan, Galilea, leta'u taumata wal᷊ine Yahudi!

¹⁶ Walahanna apan mabbiakka sulal᷊ummu ararandumma, suete naasilo asasemakka! Su manga taumata apan uatana'a su wanuan ararandummu papate nisabanganten asasemakka!”

¹⁷ Nanattakke su tempo udde Mawu Yesus namasingkatta, “Awal᷊ute wuassu manga paddarosanu, ana waugu Ruata mal᷊ihakke rumanta mamarenta ere sangkatou Ratu!”

Mawu Yesus namaggo sire appatta samakka

¹⁸ Su tempo Mawu Yesus u'amatta su apannu Ranon Galilea, i Tou naasilo ruang katou samakka, eteudde i Simon (apan isassaggo lai i Petrus) ringannu tuarine i Andreas. I mangitou tantal᷊anna mannoma inassa su rano udde.

¹⁹ Mawu Yesus nabbisara si mangitou, “Wette tantalongke si Ya'u. I Ya'u sarun mangaṛṛa'a si yamiu manoma taumata.”

²⁰ I mangitou lapiddu nanantangngu soma, see tinumantalongke Mawu Yesus.

²¹ Mawu Yesus lapiddu inumamata, wua'udde naasilote lai ruang katou sangkatuṛṛangnga apan baine, eteudde i Yakobus wuṛṛu i Yohanes, al᷊aṛṛana'i Zebedeus. I mangitou su sampunna ringanni iamangngi mangitou mannapia soma sulal᷊ummu saalanna. Mawu Yesus namaggo si mangitou lai,

²² wuṛṛu i mangitou lapiddu nanantangngu saalanna wuṛṛu iamangngi mangitou, see tinumantalongke Mawu Yesus.

Mawu Yesus mangngaṛṛa'a, mannase, wuṛṛu mapaapian taumata

²³ Su Galilea, Mawu Yesus namal᷊iwutte ahewallu wanua wuṛṛu mangngaṛṛa'a su anambon bal᷊em pattataṛṛamawuanna. I Tou mabbatti'u Watti'u Al᷊al᷊uassa manungku Ruata sarun mamarenta. Wuṛṛu i Tou lai mapaapian manga taumata apan maradda'a wuṛṛu pia sangkulle.

²⁴ Watti'a su ola'u Mawu Yesus udde naddingikke su al᷊awo'u wanua su Siria, na'oman sara taumatanambo rudanta ringanni Tou. I mangitou uaapiddu manga taumata apan uatataṛṛangnga al᷊awo'u hatin radda'a wuṛṛu asasusa. Manga taumata apan niasuttannu ghaṛṛaho lal᷊eo, apan raddangnge pua, wuṛṛu lome, sarangkanambone udde niapaapia Mawu Yesus.

²⁵ Manambo atonna taumata apan tinumantalongnga Mawu Yesus su tempo udde. Piaddu nirumanta wuassu Galilea, pia lai wuassu Mapul᷊o Soa, wuassu Yerusalem, wuassu Yudea, wuṛṛu pia lai wuassu wanua su samba'an Yordan.