MATIUS 28 - WUKE SUSI WATTI'U AL᷊AL᷊USASSA

Pabawangunnu Mawu Yesus

¹ Napawe allon Sabatta nal᷊iudde, su allo Misa ruaallo atonna, i Maria Magdalena wuṛṛu i Maria apan waine inaite na'ellega lal᷊abinganna udde.

² Inaṛṛombanganne pia linukka apan bahewalla. Sangkatou mala'ekattu Mawu sinumossokka wuassu surga see namilingngu watu lal᷊indumme udde, wuṛṛu inuma'ianna su wowone.

³ Hati Mala'ekatta udde naal᷊ihidda sawallo wuṛṛu laungnge mawira atonna.

⁴ Tantara mandariaga apan uariaga isudde mangke nata'utta na'oman sara i mangitou mangngindo, wuṛṛu naal᷊ihidde ere taumata nate.

⁵ Mala'ekatta udde nabbisara manga wawine udde, “Arie pa'ata'utta! I Ya'u masingkatta i yamiu maddea'a Mawu Yesus apan suete niarussa udde.

⁶ I Tou tate baddi'a isindi. I Tou nabangunte ere suete niapasingkan-Ne rorone. Wette pa'ellega tampa nilallowangan-Ne.

⁷ Orassa indi roote paal᷊iha-l᷊ihakka, pasingkata'a su mallal᷊aṛṛenggen-Ne, ‘I Tou nabangunte, wuṛṛu orassa indi i Tou inaite malliu ṛoro wuassi yamiu su Galilea. Poiaroddi yamiu sarun maasilo si Tou!’ Paanaungete apa apan suete ta'u niwal᷊o si yamiu.”

⁸ Mal᷊iha-l᷊ihakka manga wawine udde nanantangngu lal᷊abinganna udde. Ringannu apendamma matta'utta ual᷊al᷊o'an lal᷊uassa, i mangitou tinumal᷊angnga namasingkattu olangnge udde su mallal᷊aṛṛenggennu Mawu Yesus.

⁹ Inaṛṛombanganne Mawu Yesus nirumanta naisasomba manga wawine udde, wuṛṛu nabbisara, “Tabea!” See i mangitou nirumanta nangundanin Tou, wua'udde naṛṛa'uppa ledda-Ne wuṛṛu nassubba si Tou.

¹⁰ “Arie pa'ata'utta,” wisara Mawu Yesus si mangitou, “roote wal᷊oa'a su manga tuṛṛangku, tadea'u i mangitou inai su Galilea, poiaroddi i mangitou sarun maasilo si Ya'u.”

Tantara mandariaga nangalae su manga imam tembonanne

¹¹ Tantal᷊anna manga wawine udde napul᷊ete, manga pira wuassu tantara mandariaga apan uariaga lal᷊abinganna udde nabelengke watukku soa wuṛṛu nangalae su manga imam tembonanne anambon apa apan suete nariaddi.

¹² Manga imam tembonanne udde na'irete ringannu manga piaṛṛa'u Yahudi, see nangagillen roitta apan manambo su mandariaga lal᷊abinganna udde,

¹³ wuṛṛu nabbisara, “I yamiu ṛinone mabbatti'a manungku mallal᷊aṛṛenggennu Mawu Yesus nirumanta su tempo ṛabbi wuṛṛu nanna'o winal᷊unan-Ne su tempo i yamiu mattiilla.

¹⁴ Wuṛṛu amungkangngu gubernure maaringikka olangnge udde, i yami sarun massal᷊o'i tou tadea'u i yamiu tawe maasomba asasusa apa-apa.”

¹⁵ Ne manga tantara mandariaga udde nanganute roitta, wuṛṛu na'ola'e ere suete nitanata si mangitou. Ana waugu udde watti'a indi sidutu ta'e iwabatti'a su pattangngannu taumatan Yahudi na'oman sara allo indi.

Mawu Yesus natingkapasilom batangan-Ne su mallal᷊aṛṛenggen-Ne

¹⁶ Sire mapul᷊o assa mallal᷊aṛṛenggennu Mawu Yesus udde inaite watukku wuidda su Galilea ere suete nirolokku Mawu Yesus si mangitou.

¹⁷ Su tempo i mangitou naasilo Mawu Yesus poiaroddi, i mangitou inumal᷊intuda nassubba si Tou. Arawe su wallatti mangitou ta'e piaddu lai hugago'a.

¹⁸ Mawu Yesus nangundani mangitou wuṛṛu nabbisara, “Anambon taṛṛino su surga wuṛṛu su runia suete tinantilla si Ya'u.

¹⁹ Ana waugu udde roote su anambon taumata su wowon dunia indi, ola'e i mangitou mallal᷊aṛṛenggeng-Ku. Saṛṛanite i mangitou ringannu arannu Iamangnga, wuṛṛu Ana'a, wuṛṛu Ghaṛṛahon Duata.

²⁰ Aṛṛa'ete i mangitou tuttuṛṛutta anambon parenta apan suete niparenta-U si yamiu. Wuṛṛu paanaunge, i Ya'u sarun maṛṛundinganna si yamiu saran panginsueannu runia indi.”