MATIUS 27 - WUKE SUSI WATTI'U AL᷊AL᷊USASSA

Mawu Yesus niapidda ringanni Pilatus

¹ Ruaallo atonna, manga imam tembonanne wuṛṛu piaṛṛa'u Yahudi naṛṛawesse manungku Mawu Yesus pateanna.

² I mangitou naṛṛapussa si Tou, wuṛṛu nangapiddi Tou, see tinantilla si Pilatus, gubernuren araratuannu Roma.

Apapaten Yudas

³ Napawe i Yudas mandal᷊al᷊eo udde naasilo manungku Mawu Yesus suete nianggil᷊annu ṛuumanna, i tou sinumassille. See i tou nangul᷊eten doitta tallum pul᷊o roitta sal᷊a'a udde su manga imam tembonanne wuṛṛu piaṛṛa'u Yahudi.

⁴ I tou nabbisara, i ya'u suete na'ola'a rosa nandal᷊eo taumata tawe sal᷊ane, na'oman sara i Tou niṛṛuumanna pateanna! Arawe i mangitou sinumimbakka, “Masingkattu apa i yami? Udde singkannu!”

⁵ I Yudas nallombon doitta udde sulal᷊ummu Wal᷊e Mawu, see napul᷊e wuṛṛu nangelen batanganne.

⁶ Manga imam tembonanne namurutta roitta udde wuṛṛu nabbisara, “Roitta indi roitta ṛaṛṛa. Tumuṛṛuttu atorannu agama, roitta indi tawe wotongnge itaṛṛo sulal᷊ummu tampan aonggolla su Wal᷊e Mawu.”

⁷ See napawe i mangitou na'irete, i mangitou nappa'atten doitta udde nipamalli leta'a apan nisaggo Leta'u Maaola'a Urinna. Leta'a udde nipaatta pallabingannu taumata raho.

⁸ Ana waugu udde na'oman sara allo indi leta'a udde nisaggo “Leta'a Ṛaṛṛa”.

⁹ Ringannu aroddi, natipusse apa apan suete niapasingkatti Nabi Yeremia, eteudde, “I mangitou nanengkamma tallum pul᷊o roitta sal᷊a'a, eteudde arega apan suete pina'irem walahannu Israel maola'a wawaekki Tou.

¹⁰ Wuṛṛu roitta udde suete nipaatti mangitou pinamalli leta'u maaola'a urinna, ere apa apan suete niparenta Mawu si ya'u.”

Pilatus namarikissa hatto Mawu Yesus

¹¹ Su tempo Mawu Yesus sinumaruanna Pilatus, gubernure su wanua udde, i Pilatus naiwal᷊o, “Apa i'o ratun taumatan Yahudi?” “Ere su wisaranu,” sinimbakku Mawu Yesus.

¹² Arawe su tempo manga imam tembonanne wuṛṛu piaṛṛa'u Yahudi napasabangngu anambon alae su ola'u Mawu Yesus, i Tou tawe sinumimbakka saran addio'a.

¹³ Ana waugu udde i Pilatus nabbisara si Tou, “Apa I'o tawe maaringikka al᷊awo'u alae mangitou ipangalaeNu?”

¹⁴ Arawe Mawu Yesus tawe sinumimbakka saran addio'a na'oman sara gubernure udde mangke naherangnga atonna.

Mawu Yesus iṛṛuumanna pateanna

¹⁵ Su anambon Rameam Paskah, gubernure inaramanne mammallossu sangkatou ṛuumanna tumuṛṛuttu apulun awada'alla.

¹⁶ Su tempo udde pia sangkatou ṛuumanna apan niasingkatante n taumata nambo. Aranne Yesus Barabas.

¹⁷ Nariaddi, su tempo taumata nambo na'ammulle, i Pilatus naiwal᷊o si mangitou, “Isai su apulun kamiu, ta'u ipallossa? Yesus Barabas ara'e Mawu Yesus apan isassaggo lai Kristus?”

¹⁸ I Pilatus nabbisara aroddi ana waugu i tou masingkatta manungku manga tembonannu Yahudi nanantillu Mawu Yesus si tou ana waugu i mangitou tawe mal᷊uassa si tou.

¹⁹ Su tempo i Pilatus tantal᷊anna ua'ianna su wal᷊em pamarikisanna, awingnge nananata si tou ereindi, “Arie i'o lumal᷊o'a su hatton taumata apan tawe sal᷊ane udde, ana waugu ete i Tou, i ya'u niwal᷊iawannu wal᷊iawa apan maata'utta allo indi.”

²⁰ Arawe manga imam tembonanne wuṛṛu piaṛṛa'u Yahudi mangke mammata'u taumata nambo udde, iaparorongnga si Pilatus tadea'u i Barabas ipallossa wuṛṛu Mawu Yesus iṛṛuumanna sara mate.

²¹ See gubernure udde naiwal᷊o apia si mangitou, “Wuassu wallatti tarua indi, isai sarun ipallossa tumuṛṛuttu apulung kamiu?” “I Barabas,” sasimbakki mangitou.

²² “Amungkangngu aroddi, i ya'u ṛinone ma'ola'a apa su Mawu Yesus apan isassaggo Kristus?” aiwal᷊om Pilatus si mangitou. “Arussa'a i Tou!” sasimbakki mangitou sarangkanambone.

²³ “Arawe apa al᷊al᷊eone?” aiwal᷊om Pilatus. See i mangitou inumui lembon aikkanne lai, “Arussa'a i Tou!”

²⁴ Panginsueanne i Pilatus naatutukka, manungku i tou tawe wotongnge maaola'a apa-apa lai wuṛṛu manungku manga taumata udde asinungka sarun mamangalo. Nariaddi i tou nanganu ua'e, see su saruannu taumata nambo udde i tou nangukkassa limane wuṛṛu nabbisara, “I ya'u tawe sal᷊ane su apapaten taumata indi! udde manarateng kamiu!”

²⁵ Awada'alla udde sinumimbakka, “Ore, wala'e si yami wuṛṛu manga al᷊aṛṛana'i yami mamasanna ṛuumanna wuassu papate-Ne!”

²⁶ See i Pilatus namallose m Barabas si mangitou, wuṛṛu nandolokku taumata namuulla Mawu Yesus; wuṛṛu nanantilli Tou niapaarussa.

Manga tantara mannalangnga Mawu Yesus

²⁷ Wua'udde manga tantaram Pilatus nangapidde Mawu Yesus sumutta su wal᷊en gubernure, wuṛṛu anambon tantara udde naammulla namal᷊iwutta Mawu Yesus.

²⁸ I mangitou nalluatta laubbu Mawu Yesus, wuṛṛu nilluṛṛeannu jubah ungu.

²⁹ I mangitou na'ola'a sambau araposa mararatu wuassu manga rannang kalu ṛoaanna wuṛṛu niluṛṛe su pua Mawu Yesus. Wua'udde i mangitou nangagillu ta'inna su lima aikkatan-Ne, see inumal᷊intuda su saruan-Ne wuṛṛu mangngal᷊uandaga si Tou. “Tabea ratun taumatan Yahudi!” unni mangitou.

³⁰ I mangitou nangaddu si Tou, wuṛṛu nanganu ta'in-Ne udde, see nipuulla su pua-Ne.

³¹ Napawe suete nannalangnga si Tou, i mangitou nalluatte jubah ungu udde see nilluṛṛeanten laung-Nge apia. Wua'udde i Tou niapidde su liudde ana iarussate.

Mawu Yesus niarussa

³² Su tangngan dal᷊anna, i mangitou nassomban sangkatou wuassu Kirene aranne i Simon. I mangitou namata'u taumata udde mamasanna alu arussa Mawu Yesus.

³³ Wua'udde i mangitou na'omate su sambau tampa apan isassaggo Golgota, atappasanne “Tampan Tanggilal᷊a”.

³⁴ Isudde i mangitou napa'inummu anggore su Mawu Yesus apan nilo'annu paddu. Arawe napawe Mawu Yesus naattemma anggore udde, i Tou madiri ma'inumma.

³⁵ Wua'udde i mangitou nangarussaten Tou, wuṛṛu nattahia laung-Nge ringannu niundi.

³⁶ Wua'udde i mangitou inuma'ianna mandiaga si Tou poiaroddi.

³⁷ Su pua-Ne i mangitou nangadon woṛṛetta su ola'u pinangalaen Tou eteudde: “Indiwe Mawu Yesus ratun taumatan Yahudi”.

³⁸ Su sampunna ringanni Tou, i mangitou nangarussan ruang katou lai taṛṛa ṛampassa; sangkatou su samba'a uanan-Ne, wuṛṛu sangkatou lai su samba'a aiṛṛi-Ne.

³⁹ Manga taumata apan sinumabbi isudde mangke uapapa'ilingnga wuṛṛu mangngaddio'a Mawu Yesus.

⁴⁰ I mangitou mabbisara, “I'o apan manggohakku Wal᷊e Mawu, wuṛṛu mapararisikka apia sulal᷊ummu tallu allo! Amungkangngu I'o Ana'u Ruata, lintukke wuassu alu arussa udde, wuṛṛu panal᷊amatte riri-Nu!”

⁴¹ Aroddi lai imam tembonanne wuṛṛu manga hurun agama see lai manga piaṛṛa'u Yahudi mangngal᷊uandaga Mawu Yesus. I mangitou mabbisara,

⁴² “I Tou mannal᷊amatta taumata waine, arawe riri-Ne sassane tawe iasal᷊amatti Tou! Amungkangngu i Tou ratun taumatan Israel, mappianne i Tou orassa indi sumossokka wuassu alu arussa udde, wakkute udde i yami mangngimanna si Tou.

⁴³ I Tou mangngimanna Ruata wuṛṛu mabbisara manungku i Tou Ana'u Ruata. Ne, wette i ite ma'ellega tanne Ruata manal᷊amatta si Tou orassa indi.”

⁴⁴ Manga taṛṛa pate apan uaarussa ringanni Tou udde lai, ewe'e mangngal᷊uandaga lai si Tou.

Apapate Mawu Yesus

⁴⁵ Su allo allatune, al᷊annune tallung ka'orassa ahewallu wanua udde naddandumma.

⁴⁶ Puulla tatallu wawallo, Mawu Yesus nangintul᷊i ringannu tingikka ma'ikkatta, “Eli, Eli, lama sabakhtani?” atappasanne, “Oh Ruata, Oh Ruata-U, anio I'o nanantang-Ku?”

⁴⁷ Sire pira taumata isudde naaringikka aintul᷊i udde, wuṛṛu nabbisara, “I Tou mammaggo si Elia!”

⁴⁸ Sangkatou wuassi mangitou ringannu mal᷊ihakka nanganu wungan sahatta, wuṛṛu inammo sulal᷊ummu anggore mapakkadda. Wua'udde i tou nangusu'u pentakku alu sampaddi su wungan sahatta udde wuṛṛu tinogokka su wiwikku Mawu Yesus.

⁴⁹ Arawe manga taumata waine nabbisara, “Paṛṛado, wette i ite ma'ellega asinungka i Elia rumanta manal᷊amatta si Tou!”

⁵⁰ Wua'udde Mawu Yesus nangintul᷊i apia ringannu tingikka apan ma'ikkatta, see sinumangngon sasangngo panginsueanne.

⁵¹ Pampele apan ua'ele sulal᷊ummu Wal᷊e Mawu nahesa'a natahia darua, wua'doso na'oman sara wowane. Runia inumio'a wuṛṛu manga wuiddu watu napesangnga.

⁵² Manga lal᷊abinganna nawu'a, wuṛṛu manambo lal᷊oṛṛon araratuannu Ruata apan natete nabbiakka apia.

⁵³ I mangitou sinumabangnga wuassu manga lal᷊abinganna napawe Mawu Yesus nabangunte wuassu papate, wuṛṛu i mangitou sinumuttate su Yerusalem. Wuṛṛu poiaroddi manambo taumata naasilo si mangitou.

⁵⁴ Tembonannu tantara wuṛṛu manga tantara apan tantal᷊anna uariaga Mawu Yesus, mangke matta'utta su tempo naapendamma linukka wuṛṛu al᷊awo'u apa apan suete nariaddi udde. I mangitou nabbisara, “Atonna, i Tou indi Ana'u Ruata!”

⁵⁵ Isudde pia lai manambo wawine apan ua'ellega wuassu marau. Ete i mangitou udde apan suete tinumantalongnga Mawu Yesus, nantul᷊ungngi Tou ro'en wuassu Galilea.

⁵⁶ Su wallatti mangitou eteudde i Maria Magdalena, i Maria inangngi Yakobus wuṛṛu i Yusuf, wuṛṛu inangngu al᷊aṛṛana'i Zebedeus.

Pallal᷊abingngu Mawu Yesus

⁵⁷ Ṛabbi udde nirumantate sangkatou taumata ala wuassu Arimatea, aranne i Yusuf. I tou lai sangkatou mallal᷊aṛṛenggennu Mawu Yesus.

⁵⁸ I tou inaite ringanni Pilatus, wuṛṛu naddorongnga winal᷊unannu Mawu Yesus. See i Pilatus namarentate tadea'u winal᷊unannu Mawu Yesus ionggolla si Yusuf.

⁵⁹ Ne, i Yusuf nanganute winal᷊unanna udde, wuṛṛu pinapi'unnu mal᷊aṛṛenessa wuassu linen apan wakku.

⁶⁰ See i tou nangadoten winal᷊unannu Mawu Yesus sulal᷊ummu lal᷊abinganna wageangnge sassane apan suete niola'a su sambau wowon batu. Wua'udde i tou nanal᷊inggin sambau watu pinalindumma ngaran lal᷊abinganna udde, see napul᷊ete.

⁶¹ I Maria Magdalena wuṛṛu i Maria apan baine tinangngone ua'ianna uasaruanna labingnga udde.

Manga mandariaga su lal᷊abinganna

⁶² Su tiṛṛabbine, su allon Sabatta, manga imam tembonanne wuṛṛu manga taumatan Farisi inaite su sambau sinumaruanna si Pilatus

⁶³ wuṛṛu nabbisara, “Mawu, i yami maanaungnga su tempo taṛṛa awusu udde ta'e wiakka, i Tou suete nabbisara, ‘Napawe tallute allo i Ya'u sarun mabangunna apia.’

⁶⁴ Ana waugu udde roloṛṛa'e taumata mandiaga lal᷊abinganna udde mapia-pia ma'oman sara allo atallune, tadea'u mallal᷊aṛṛenggen-Ne tawe maapanna'o winal᷊unan-Ne see mabbal᷊o manga taumata manungku i Tou nabangunte wuassu papate. Wuṛṛu pangangawusu panginsueanne indi sarun aral᷊eoanne wuassu paarorone.”

⁶⁵ “I yamiu pia tantara mandariaga,” unni Pilatus si mangitou, “roote pandiaga lal᷊abinganna udde paapia-pia.”

⁶⁶ See i mangitou inaite watukku lal᷊abinganna, nanegella watu lal᷊indumme wuṛṛu nangado mandariaga su saruanne, tadea'u tawedu maawu'a lal᷊abinganna udde.