MATIUS 24 - WUKE SUSI WATTI'U AL᷊AL᷊USASSA

Mawu Yesus nabbatti'u ahahohakku Wal᷊e Mawu

¹ Su tempo Mawu Yesus nanantangngu Wal᷊e Mawu, manga mallal᷊aṛṛenggen-Ne nirumanta ringanni Tou nanta'e watukku manga Wal᷊e Mawu.

² Mawu Yesus nabbisara si mangitou, “Apa i yamiu maasilo sarangkanambone udde? Asingkate, tawedu saran sambau watu wuassu manga wal᷊e udde sarun matana'a uaatokka su tampane. Sarangkanambone sarun iapaahohakka.”

Asasusa wuṛṛu pananansara

³ Wua'udde Mawu Yesus inaite watukku Wuiddu Zaitun, wuṛṛu tantal᷊anna i Tou ua'ianna, mallal᷊aṛṛenggen-Ne nirumanta maggahatton Tou sassane. “Wal᷊oa'e si yami tingngera sarangkanambone udde sarun mariaddi,” unni mangitou si Tou. “Manga tanda apa apan mamasingkattu darantan Iamangnga wuṛṛu pangudusannu runia indi?”

⁴ Mawu Yesus sinumimbakka, “Paatehamma, arie ma'oman sara i yamiu awahianna.

⁵ Ana waugu manambo taumata apan rumanta ringannu arang-Ku see mabbisara, ‘I Ya'u Ratum Punnu Sal᷊amatta!’ I mangitou sarun mamahia taumata nambo.

⁶ I yamiu sarun maaringikka manga tingikku pangalo wuṛṛu manga watti'u pasaseetta, arawe arie i yamiu mata'utta. Ana waugu sarangkanambone udde sarun mariaddi, arawe udde tawe wawal᷊o manungku tempong kiamatta nia'omante.

⁷ Walahanna sambau sarun mamangalo lumawangnga walahanna waine, wuṛṛu araratuanna sambau sarun mamangalo araratuanna waine. Su al᷊awo'u tampa sarun mariaddi al᷊al᷊unussa wuṛṛu linukka.

⁸ Sarangkanambone udde wakkute panattaṛṛanne, ere radda'a apan niapendamannu sangkatou wawine su tempo mangunsiwe.

⁹ Wua'udde i yamiu sarun sametanna wuṛṛu itantilla iapasansara wuṛṛu pateanna. Ahewallu runia sarun marantinni yamiu, ana waugu i yamiu mallal᷊aṛṛenggeng-Ku.

¹⁰ Su tempo udde manambo taumata sarun massinaadu Mawu, wuṛṛu mandal᷊eo see masaseetta sangkatou ringannu sangkatou.

¹¹ Manambo manga nabi awusu sarun dumanta, wuṛṛu mangawusu taumata nambo.

¹² Al᷊al᷊eo sarun ṛumite aroddi ahewalle ma'oman sara manambo taumata tate lai maddarangngu.

¹³ Arawe taumata apan matataṛṛangnga saran pangudusanne, sarun masal᷊amatta.

¹⁴ Wuṛṛu Watti'u Al᷊al᷊uassa su ola'u ereapa Ruata mamarenta sarun iapasingkatta su ahewallu runia, tadea'u anambo n taumata maddaringikka. Wua'udde rumantate kiamatta.”

Al᷊al᷊eo apan ma'ahohakka

¹⁵ “I yamiu sarun maasilo ‘Al᷊al᷊eo apan maahohakka’, ere suete niapasingkatti Nabi Daniel, uarisikka su tampa susi. (Iapasingkatta su mabbawasa: Ṛingira'a apa atappasanne!)

¹⁶ Su tempo udde taumata uatana'a su Yudea sarun tumal᷊angnga watukku panenteanna.

¹⁷ Taumata apan roso su wowon atuppu wal᷊e, arie pasossokka manganu sarannapa sulal᷊ummu wal᷊e.

¹⁸ Taumata apan su wailla arie pabbelengnga manganu jubahne.

¹⁹ Tumanite ma'ata'utta manga allo udde su wawine apan pia illoṛṛo, wuṛṛu su inangnga apan ta'e mappasusun anangnge.

²⁰ Aal᷊iomante tadea'u i yamiu tawe tumal᷊angnga su tempo manguranna ara'e su allon Sabatta!

²¹ Su manga allo apan maata'utta udde sarun pia asasusa wahewa ere apan taambe nariaddi ro'en panattaṛṛannu runia na'oman sara orassa indi, wuṛṛu tate lai mariaddi apia.

²² Unnu wisara, Ruata tawe mangal᷊ihakku tempone; tawe saran sangkatou apan botongnge masal᷊amatta. Arawe ana waugu al᷊aṛṛanang-Nge, Ruata nangautta tempone udde.

²³ Su tempo udde amungkangngu pia sangkatou mabbisara si yamiu, ‘Pa'ellega Ratum Punnu Sal᷊amatta isindi!’ ara'e ‘i Tou isudde!’ – arie pangimanna taumata udde.

²⁴ Ana waugu sarun dumanta manga mananal᷊amatta awusu wuṛṛu manga nabi awusu. I mangitou sarun ma'ola'a al᷊awo'u inolaanna apan bahewalla, wuṛṛu manga al᷊aṛṛindu'a ipangawusu, amungkangngu wotongnge, al᷊aṛṛana'u Ruata lai.

²⁵ Nariaddi, paanaunge! I Ya'u suete namasingkatta si yamiu paarorone tantal᷊anna olangnge udde taambe nariaddi.

²⁶ Amungkangngu taumata nabbisara si yamiu, ‘Pa'ellega i Tou poiaroddi su wadda'a!’ – arie i yamiu inai. Ara'e amungkangngu i mangitou mabbisara, ‘Pa'ellega, i Tou uaimbuni sulal᷊ummu wabbo'a isindi!’ – arie pangimanna

²⁷ ana waugu rarantan Ana'u Taumata semakke ere sawallo ma'ilatta wuassu punnu ra'i, wuṛṛu semakke na'oman sara punnu waṛṛatta.

²⁸ Suapa pia winatangnga nate, isudde lai pia manu'a u'inassa winal᷊unannu winatangnga nate udde.”

Darantan Ana'u Taumata

²⁹ “Tawe nal᷊annu wuassu asasusa su tempo udde, matannallo sarun maddandumma, wuṛṛu wul᷊anna tate lai semakke. Manga anumpitanna sarun manawo wuassu langitta, wuṛṛu manga tembonannu winalanganna sarun massal᷊iawukka.

³⁰ Wua'udde tandan Ana'u Taumata sarun iasilo su langitta. Su tempo udde manga walahanna su runia sarun lumuai. I mangitou sarun maasilo Ana'u Taumata rumanta wuassu winabbawa ringannu taṛṛino wuṛṛu awawantuga apan bahewa.

³¹ Trompeta wahewa sarun tiupanna wuṛṛu Ana'u Taumata sarun mandolokku manga mala'ekanne mangammullu al᷊aṛṛanang-Nge wuassu pi'un dunia appatta, wuassu punnu langitta sambau ma'oman sara punnu langitta waine.”

Al᷊aṛṛa'a wuassu alu ara

³² “Pattannote al᷊aṛṛa'a wuassu alu ara. Amungkangngu manga rannane nangelompe wuṛṛu lullaukke, wuṛṛu maddannate, i yamiu masingkatte manungku tempom paddissa maranite.

³³ Aroddi lai amungkangngu i yamiu maasilo manga olangnge udde mariaddi, yamiu masingkatta manungku tempone maranite atonna.

³⁴ Asingkate! Manga olangnge udde sarun mariaddi, tantal᷊anna manga taumata wiakka orassa indi taambe nate abbi.

³⁵ Langitta wuṛṛu runia sarun mawul᷊i, arawe wisara-U ma'oman sara mal᷊annu-l᷊annu.”

Tawedu masingkatta allone wuṛṛu oranne

³⁶ “Tawedu masingkatta allone wuṛṛu oranne, manga mala'ekattu Mawu su surga lai wagga, Ana'u Ruata lai wagga, tumba'u Iamangnga sassane masingkatta.

³⁷ Napawe Ana'u Taumata rumanta olangnge naal᷊ihidda ere su tempo i Nuh dorone.

³⁸ Su miallo-miallo taambe nammanawangnga wahewa udde, manga taumata u'anna wuṛṛu ma'inumma wuṛṛu ma'awingnga. Aroddiwe naola'a na'oman sara su allo i Nuh sinumutta su apalla.

³⁹ Su tempo manawangnga udde nangelekki mangitou sarangkanambone, wakkute udde i mangitou naatutukka su ola'u apa apan tantal᷊anna nariaddi udde. Aroddi lai olangnge sarun mariaddi amungkangngu Ana'u Taumata rumanta.

⁴⁰ Su tempo udde pia duang katou apan mammanara su wailla: Sangkatou sarun iapidda, wuṛṛu sangkatou lai itantangnga.

⁴¹ Ruang katou wawine tantal᷊anna manggilingngu gandumma: Sangkatou sarun iapidda, wuṛṛu sangkatou lai itantangnga.

⁴² Nariaddi, paatehamma, ana waugu yamiu wagga tingngera Mawunu sarun dumanta.

⁴³ Paanaunge indi! Unnu wisara tatahuannu wal᷊e masingkatta puulla sangkura su tempo ṛabbi manana'o rumanta, i tou tawe matiilla, tadea'u manana'o tawe maasutta sulal᷊ummu wal᷊ene.

⁴⁴ Ana waugu udde, i yamiu lai ṛinone uariaga. Ana waugu Ana'u Taumata sarun dumanta su orassa apan tawe iaṛṛangngong kamiu.”

Mangangimbe matuṛṛutta wuṛṛu mangangimbe mal᷊awangnga

⁴⁵ Mawu Yesus nabbisara apia, “Amungkangngu aroddi, mangangimbe suapane apan matuṛṛutta wuṛṛu pande? Ete i tou sarun itenegu mawune maola'a tembonannu manga mangangimbe waine, tadea'u i tou mangagillu anna si mangitou su tempone.

⁴⁶ Lal᷊uassa eteapa su mangangimbe udde napawe mawune nabelengke, wuṛṛu naaratingnga si tou tantal᷊anna mammanara manarane.

⁴⁷ Pangimante, mawu udde sarun manantillu pa'a'alane su mangangimbe udde.

⁴⁸ Arawe amungkangngu mangangimbe udde lal᷊eo, i tou sarun mabbisara sulal᷊ummu naungnge,

⁴⁹ ‘Mawu'u ta'e mal᷊annu mabelengnga,’ see i tou nanattakke mammuulla manga mangangimbe waine wuṛṛu u'anna, ma'inumma ringannu manga taumata wu'anna.

⁵⁰ Wua'udde mawune sarun mabelengnga su allone wuṛṛu oranne apan tawe iaṛṛangngo.

⁵¹ Ne mangangimbe udde sarun puul᷊annu mawune wuṛṛu iramme su tampa manga taumata lilangkamal᷊e'a. I mangitou sarun lumuai wuṛṛu matataṛṛangnga poiaroddi.”