MATIUS 21 - WUKE SUSI WATTI'U AL᷊AL᷊USASSA

Mawu Yesus sinumutta su Yerusalem ringannu awawantuga

¹ Su tempo maraniten Yerusalem, i mangitou na'omate su Betfage su Wuiddu Zaitun. Isudde Mawu Yesus nandolokku ruang katou mallal᷊aṛṛenggen-Ne niapal᷊iu ṛoro.

² “Roote su ampungnga apan sasaruananna udde,” tanata Mawu Yesus si mangitou. “Iraddua sarun maasilo keledai sambau ua'iitta su sampunna ringannu anangnge. Wu'ate itarua wuṛṛu apira'e isindi.

³ Amungkangngu pia taumata maiwal᷊o, wal᷊oa'e si tou, ‘Mawu mappandumma si tou.’ Ne taumata udde mal᷊iha-l᷊ihakka mamalan keledai udde iapaapidda siraddua.”

⁴ Olangnge udde nariaddi tadea'u matipusse apa apan suete niapasingkattu nabi ereindi,

⁵ “Wal᷊oa'a su Sion, Ratunu tantal᷊anna rudanta ringanni yamiu I tou masaṛṛionto'a wuṛṛu uasa'e sambau keledai, sambau ana'u keledai saṛṛen tumuwo.”

⁶ Wua'udde ruang katou mallal᷊aṛṛenggen-Ne udde inaite wuṛṛu na'ola'e su ereapa nitanata Mawu Yesus sitarua.

⁷ I mangitou nangapiddu keledai udde ringannu anangnge. See i mangitou nangampakke liuddu keledai darua udde ringannu jubah mangitou. Wua'udde Mawu Yesus sinuma'ete.

⁸ Manambo taumata poiaroddi mammilattu manga jubah mangitou su lal᷊anna, tantal᷊anna taumata waine mangngitingnga manga ranna'ng kalu wuṛṛu ia'ampakka su lal᷊anna.

⁹ Taumata nambo apan u'amatta rorone, wuṛṛu su liuddu Mawu Yesus u'ui, “Awawantuga su Ana'i Daud! Nial᷊amatanna i Tou apan nirumanta ringannu arannu Mawu! Padalote Ruata apan Atanggaṛṛanne!”

¹⁰ See, su tempo Mawu Yesus sinumutta su Yerusalem, anambon lal᷊oṛṛon soa udde naggio. “Isai indi?” aiwal᷊o manga taumata su soa udde.

¹¹ “I Tou Nabi Yesus, wuassu Nazaret su Galilea,” sasimbakku taumata nambo apan uatantalongnga Mawu Yesus.

Mawu Yesus sinumutta su Wal᷊e Ruata

¹² Wua'udde Mawu Yesus sinumuttate su Wal᷊e Mawu wuṛṛu nallimbuakka manga taumata apan uawawalli isudde. I Tou namal᷊insuangngu manga meddam pananu'aranna roitta, wuṛṛu manga wangko mabawal᷊u'u merpati.

¹³ See i Tou nabbisara manga taumata isudde, “Sulal᷊ummu Wuke Susi uawoṛṛetta manungku Ruata nabbisara, ‘Wal᷊e'u sarun isaggo wal᷊e tampa a'al᷊iomananna.’ Arawe niola'i yamiu wal᷊e udde sal᷊akku taumata lal᷊eo!”

¹⁴ Manga taumata wuta wuṛṛu lome nirumanta ringannu Mawu Yesus su Wal᷊e Mawu, wuṛṛu i Tou napaapia mangitou.

¹⁵ Arawe manga imam tembonanne wuṛṛu manga hurun agama nasa'u naasilo manga al᷊aṛṛindu'a niola'u Mawu Yesus. Wuṛṛu i mangitou nasa'u lai naaringikka manga al᷊aṛṛana'a mangke u'ui su Wal᷊e Mawu, “Awawantuga su Ana'i Daud!”

¹⁶ I mangitou nabbisara Mawu Yesus, “I'o naaringikka apa apan iwabbisara mangitou?” “Ore, i Ya'u naaringikka,” sasimbakku Mawu Yesus. “I yamiu taambe naawasa su wageangngu Wuke Susi ereindi: ‘Manga al᷊aṛṛana'a mannattakka wuassu ana'a wakku nariaddi sueten niaṛṛan-Ne maddalon daralo apan nasuungnga’?”

¹⁷ Wua'udde Mawu Yesus nanantangngi mangitou, see sinumabangnga wuassu soa udde watukku Betania wuṛṛu nanaṛṛabbi poiaroddi.

Mawu Yesus namontoga alu ara

¹⁸ Tiṛṛabbine ruaallo, su amatanna mabelengnga watukku soa, Mawu Yesus niamal᷊unusanna.

¹⁹ I Tou naasilo sangkalu alu ara su winggin dal᷊anna. I Tou inaite su al᷊ungngu alu udde, arawe tawe naasomba wuane saran sambau, tumba'u rongngane sassane. See Mawu Yesus nabbisarate alu udde, “I'o sarun tate mabbua!” alu ara udde lapiddu tinumolangnga.

²⁰ Su tempo mallal᷊aṛṛenggennu Mawu Yesus naasilo inolaanna udde, i mangitou naherangnga atonna. “Ereapa alu ara udde wotongnge lapiddu naṛṛangu?” aiwal᷊o mangitou.

²¹ “Atonna,” sasimbakku Mawu Yesus, “amungkangngu i yamiu mangngimanna wuṛṛu tawe humago'a, i yamiu maaola'a apa apan suete niola-U su alu ara indi, wuṛṛu tawe tumba'u udde sassane, ewe'e lai yamiu maawisara lai su wuidda indi, ‘Awengkette wuṛṛu awontolle sulal᷊ummu tahal᷊oangnga’: ne olangnge udde sarun mariaddi.

²² Al᷊awo'u apa apan raddoronganni yamiu su aal᷊iomanni yamiu, i yamiu sarun manengkamma, sambal᷊iate i yamiu mangngimanna.”

Aiwal᷊o su ola'u taṛṛino Mawu Yesus

²³ Wua'udde Mawu Yesus nabelengke su Wal᷊e Mawu see sinumuttate wuṛṛu mangngaṛṛa'e isudde. Su tempo i Tou mangngaṛṛa'a, manga imam tembonanne wuṛṛu manga piaṛṛa'u Yahudi nirumanta ringanni Tou wuṛṛu naiwal᷊o, “Apa pinangiananne na'oman sara I'o ma'ola'a sarangkanambone indi? Isai nangonggolu taṛṛino udde Si'o?”

²⁴ Mawu Yesus sinumimbakka, “I Ya'u lai maiwal᷊o si yamiu. Wuṛṛu amungkangngu yamiu sumimbakka, i Ya'u sarun mabbal᷊o si yamiu ringannu taṛṛinon sai Ya'u ma'ola'a manga inolaanna indi.

²⁵ I Yohanes Mananaṛṛani ringannu taṛṛinon sai? Ruata ara'e taumata?” See manga imam tembonanne wuṛṛu manga piaṛṛa'u Yahudi mannattakke ma'ire, su wallatti mangitou. “Amungkangngu i ite mabbisara, ‘Ringannu taṛṛinon Ruata,’ i Tou sarun mabbisara, ‘Amungkangngu aroddi anio i yamiu tawe mangngimanna si Tou?’

²⁶ Arawe amungkangngu i ite mabbisara, ‘Ringannu taṛṛinon taumata’, i ite matta'uttu taumata nambo, ana waugu i mangitou sarangkanambone, mangngantimma Yohanes udde sangkatou nabi.”

²⁷ Nariaddi i mangitou sinumimbakka, “I yami wagga.” See Mawu Yesus nabbisara si mangitou, “Amungkangngu aroddi Ya'u lai tawe mabbal᷊o si yamiu ringannu taṛṛinon sai Ya'u ma'ola'a al᷊awo'u inolaanna indi.”

Sasumandingngu ruang katou ana'a

²⁸ “Su orassa indi ereapa ṛingiṛṛannu su olangnge indi?” unnu Mawu Yesus. “Pia sangkatou iamangnga pia anangnge ruang katou esakka. Timmade udde inaite ringannu anangnge pahul᷊u wuṛṛu nabbisara, ‘Ana'a, roote pammanara su waillu anggore allo indi.’

²⁹ ‘I ya'u madiri,’ sasimbakku ana'a udde. Arawe wua'udde ṛingiṛṛanne nawal᷊u wuṛṛu nanute su waillu anggore udde.

³⁰ Wua'udde hagurangnge inaite ringannu anangnge aruane, wuṛṛu nabbisara lai aroddi. ‘Ore, Iamangnga,’ sasimbakku ana'a aruane udde. Arawe i tou tawe nanu su wailla.

³¹ Ne su wallattu ana'a darua indi, suapane apan tinumuṛṛutta apulun iamangnge?” “Iapa pahul᷊une,” sinimbakku manga imam tembonanne wuṛṛu piaṛṛa'u Yahudi udde. Ne Mawu Yesus nabbisarate si mangitou, “Pangimante: Maddarorongnga wose wuṛṛu manga wawine masandaga sarun maola'a lal᷊oṛṛon araratuannu Ruata rorone wuassi yamiu.

³² Ana waugu i Yohanes Mananaṛṛani nirumanta, wuṛṛu namasilo si yamiu ola'u mabbiakka apan ipaapulu Mawu, arawe i yamiu madiri mangngimanna al᷊aṛṛangnge; arawe manga mallal᷊uṛṛu wose wuṛṛu manga wawine masandaga mangngimanna si tou. Arawe salaiwe i yamiu suete naasilo sarangkanambone udde, i yamiu tawe namal᷊u ṛingiṛṛanni yamiu wuṛṛu tate mangngimanna lai Mawu.”

Sasumandingngu mammamanara su waillu anggore

³³ “Daringiṛṛe sasumandingnga sambau indi lai,” unnu Mawu Yesus. “Sangkatou tatahuannu leta'a nassuanna su sambau waillu anggore. I tou na'ola'a paggala pinamal᷊iwutta, wuṛṛu na'al᷊i, loṛṛangnga pangadoannu pamamakannu anggore, wua'udde niapararisikke wal᷊em pandariaganna. Wua'udde i tou napasewatem baillu anggore udde su mamamanarane, see i tou nangingkatte su wanua waine.

³⁴ Napawe nia'omante pangangitingngu wuan anggore udde, tatahuannu leta'a nandolokku manga ralol᷊oṛṛanne ringannu mamamanaram bailla udde, iapatarimmatta wageangnge.

³⁵ Arawe manga mamamanaram bailla udde nanametta manga ralol᷊oṛṛannu tatahuannu leta'a udde. Sangkatou nipuulla, waine nipate wuṛṛu waine lai niwaretannu watu.

³⁶ Tatahuannu leta'a udde nandolokke apia lai ralol᷊oṛṛanne waine lai tinambanna anambone wuassu paarorone. Arawe i mangitou niola'a lai ere ingana'a rorone.

³⁷ Panginsueanne tatahuannu leta'a udde nandolokku anangnge sassane. ‘I mangitou sarun mangaddatta ana'u,’ iraṛṛingiddi tou.

³⁸ Arawe su tempo mamamanaram bailla udde naasilo ana'u tatahuannu leta'a udde, i mangitou uawawisara sangkatou ringannu waine, ‘Ei, indete i tou apan manahuanna. Wette i ite mamate si tou tadea'u i ite maasomba wageangnge!’

³⁹ Ne ana'a udde sinamette niramme su liudde, see nipate.”

⁴⁰ Mawu Yesus naiwal᷊o, “Ei, amungkangngu tatahuannu waillu anggore udde mabelengnga, i tou sarun ma'ola'a apa su mammamanarane udde?”

⁴¹ I mangitou sinumimbakka, “I tou sarun mamate manga taumata lal᷊eo udde, see mapasewatem baillu anggore udde su taumata waine apan maapulu mangagillu hessin leta'a udde su tempone.”

⁴² Ne Mawu Yesus nabbisarate si mangitou, “I yamiu taambe naawasa apa apan uawoṛṛetta sulal᷊ummu Wuke Susi? ‘Watu apan tawe ipaattu maaola'a wal᷊e naola'e watu apan paarorone. Ete indi inolaannu Mawu; tumanite maṛṛamaga atonna!’ ”

⁴³ “Nariaddi paanaunge,” unnu Mawu Yesus, “anambon taṛṛino su al᷊aṛṛana'u Ruata sarun ul᷊eanna wuassi yamiu wuṛṛu ionggolla su walahanna apan mapaamattu manga parenta Ruata. [

⁴⁴ Taumata apan nema'a su watu udde, sarun mapussa'a; wuṛṛu taumata apan niaemaannu watu udde, sarun atal᷊inggianne maola'a awu.]”

⁴⁵ Su tempo manga imam tembonanne wuṛṛu manga taumatan Farisi naaringikka sasumandingngu Mawu Yesus udde, i mangitou naasingkatta manungku Mawu Yesus mabbatti'i mangitou.

⁴⁶ Nariaddi i mangitou mangke mappandumma manametta si Tou. Arawe i mangitou matta'uttu taumata nambo, ana waugu taumata nambo udde ma'ellega manungku Mawu Yesus ere sangkatou nabi.