MATIUS 19 - WUKE SUSI WATTI'U AL᷊AL᷊USASSA

Al᷊aṛṛa'u Mawu Yesus su ola'u pasasasindo

¹ Napawe Mawu Yesus suete nabbatti'u sarangkanambone udde, I Tou nanantangken Galilea see inaite su wageangngu leta'u Yudea su samba'an Sal᷊ukku Yordan.

² Manambo taumata uatantalongnga si Tou, wuṛṛu i Tou napaapia mangitou isudde.

³ See manga taumatan Farisi nirumanta madea'a sal᷊a-Ne. I mangitou naiwal᷊o, “Tumuṛṛuttu titan agamang kite, wotongnge taumata masasindon awingnge ringannu tawe pinangiananne?”

⁴ Mawu Yesus sinumimbakka, “Apa i yamiu taambe nabbasa sulal᷊ummu Wuke Susi manungku Mandariadi apan suete na'ola'a taumata, ro'en paarorone na'ola'a si mangitou esakka wuṛṛu wawine?

⁵ Wuṛṛu wua'udde i Tou nabbisara, ‘Ana waugu udde, esakka manantangken hagurangnge wuṛṛu naaukke ringannu awingnge, itarua naola'e wadangnga sambau.’

⁶ Nariaddi itarua tate lai ruang katou, arawe naola'e sambau. Ana waugu udde apa apan suete ni'aukku Ruata tate wotongnge iapasasindon taumata.”

⁷ See manga taumatan Farisi naiwal᷊o si Tou, “Amungkangngu aroddi, anio i Musa nandolokku taumata mangngagillu surattu pasasasindo su awingnge apan nisindoanne?”

⁸ Mawu Yesus sinumimbakka, “I Musa namalang kamiu manindo awingngu ana waugu i yamiu tumanite masahada pangaṛṛaanne. Arawe ṛinone wal᷊ine aroddi su paarorone.

⁹ Nariaddi, daringiṛṛe indi: Isai manindo awingnge – wutte'e wawine udde tawe nassal᷊a su esakka waine – wua'udde maawingnga apia ringannu wawine waine, taumata udde sinumandaga.”

¹⁰ Ne manga mallal᷊aṛṛenggennu Mawu Yesus naiwal᷊o si Tou, “Amungkangngu hattom pa'a'aukku sangkawinganna ereudde, mappianne arie pa'awingnga.”

¹¹ Mawu Yesus sinumimbakka, “Tawe anambon taumata wotongnge maasengkamma manga wisara udde, tumba'u manga taumata apan suete tinantunnu Ruata.

¹² Ana waugu pia taumata apan tawe ma'awingnga, ana waugu i mangitou niasungkangnga aroddi. Wuṛṛu pia lai namile sassane tawe ma'awingnga, tadea'u wotongnge mangimbe Ruata. Taumata apan botongnge manengkamma al᷊aṛṛa'a indi, wala'e i tou maddaringikka.”

Mawu Yesus nangal᷊amatta manga al᷊aṛṛana'a

¹³ Pia manga taumata nangapiddu manga al᷊aṛṛana'a ringannu Mawu Yesus tadea'u i Tou mangaddon limane su pua mangitou udde wuṛṛu mangal᷊iomanni mangitou. Arawe mallal᷊aṛṛenggennu Mawu Yesus nasa'u su manga taumata udde.

¹⁴ Ne Mawu Yesus nabbisarate su mallal᷊aṛṛenggen-Ne, “Wala'e manga al᷊aṛṛana'a udde rumanta ringang-Ku! Arie maningaddi mangitou, ana waugu manga taumata ere i mangitou indi apan maola'a lal᷊oṛṛon araratuannu Ruata.”

¹⁵ See Mawu Yesus nangadoten liman Tou su pua manga al᷊aṛṛana'a udde wuṛṛu nangal᷊amatte si mangitou, wua'udde i Tou nangingkatte wua isudde.

Taumata umbasanna apan ala

¹⁶ Su sambau allo sangkatou esakka nirumanta ringannu Mawu Yesus, “Iamangnga Huru,” unni tou, “pallal᷊agu mapia ereapa sarun ta'u olaanna tadea'u maatarimmattu wiakka tutune wuṛṛu ma'oman sara mal᷊annu-l᷊annu?”

¹⁷ Mawu Yesus sinumimbakka, “Anio i'o naiwal᷊o si Ya'u su ola'u apa apan mapia? Tumba'u pia sambau apan mapia. Amungkangngu i'o ma'apulu mabiakka, i'o sarun tuttuṛṛutta al᷊awo'u parentan Ruata.”

¹⁸ “Parenta suapane udde?” aiwal᷊on taumata udde. Mawu Yesus sinumimbakka, “Arie pamate, arie passandaga, arie panna'o, arie pangawusu,

¹⁹ pangaddatta iamangngu wuṛṛu inangngu; wuṛṛu pandangngu taumata sansul᷊ungngu ere i'o mandangngu wadangngu sassane.”

²⁰ “Anambon parenta udde suete tinuṛṛutangku,” sasimbakku taumata umbasanna udde. “Apa lai sarun olaangku?”

²¹ Mawu Yesus nabbisara si tou, “Amungkangngu i'o ma'apulu maola'a taumata nasuungnga, roote wal᷊ua'e manga darotongngu. Onggol᷊a'e roinne su taumata asiangnga, wuṛṛu i'o sarun maasomba darotongnga su surga. Wua'udde rantate tantalongke si Ya'u!”

²² Naaringikka manga wisara udde, taumata umbasanna udde napul᷊ete ringannu naungnga massusa ana waugu i tou taumata tumaniten ala.

²³ See Mawu Yesus nabbisara su manga mallal᷊aṛṛenggen-Ne, “I Ya'u mabbisara si yamiu, masahada atonna taumata ala maola'a lal᷊oṛṛon araratuannu Ruata.

²⁴ Wuṛṛu indi lai Ta'u iwal᷊o si yamiu; malluasanne sambau onta sumutta su loṛṛangngu raraṛṛumma, wuassu sangkatou ala sumutta su Runia Wakkun Ruata.”

²⁵ Napawe manga mallal᷊aṛṛenggen-Ne naaringikka wisara Mawu Yesus udde, i mangitou naherangnga. “Amungkangngu aroddi,” unni mangitou, “isai wotongnge maasomba asasal᷊amatta?”

²⁶ Mawu Yesus nanutudda si mangitou see nabbisara, “Su taumata, olangnge udde tawe mariaddi! Arawe su Ruata sarangkanambone wotongnge mariaddi.”

²⁷ See i Petrus nabbisara, “Pa'ellega, i yami suete nanantangngu al᷊awo'u darotongngi yami tadea'u manantalongnga Iamangnga. Wuṛṛu apa sarun asombanganni yami?”

²⁸ Mawu Yesus nabbisara si mangitou, “Pangimante: Su Runia apan Bakku, Ana'u Taumata sarun uma'ianna su adderan araratuanna apan mawantuga. Su tempo udde i yamiu mallal᷊aṛṛenggeng-Ku sarun uma'ianna su mapul᷊o dua adderan araratuanna wuṛṛu makkuungnga mapul᷊o dua walahannu Israel.

²⁹ Wuṛṛu manga taumata apan suete nanantangngu wal᷊ene, ara'e tuṛṛangnge esakka ara'e wawine, ara'e inangnga iamangnga, ara'e manga al᷊aṛṛanangnge ara'e wawail᷊anne ana waugu i Ya'u, taumata udde sarun manengkamma apia paaṛṛasutta su wageangnge. Wuṛṛu i tou sarun manengkamma lai wiakka tutune ma'oman sara mal᷊annu-l᷊annu.

³⁰ Arawe manambo taumata orassa indi apan paarorone sarun maola'a sal᷊immurine, wuṛṛu su orassa indi sal᷊immurine sarun maola'a paarorone.”