MATIUS 18 - WUKE SUSI WATTI'U AL᷊AL᷊USASSA

Isai ahewal᷊anne?

¹ Su tempo udde mallal᷊aṛṛenggennu Mawu Yesus nirumanta ringanni Tou wuṛṛu naiwal᷊o, “Isai apan iraṛṛangngo ahewal᷊anne su wallattu al᷊aṛṛana'u Ruata?”

² Mawu Yesus namaggo sangkatou ana'a addio'a, wuṛṛu niapararisikka su saruanni mangitou.

³ See Mawu Yesus nabbisara, “Pangimante! Tumba'u amungkangngu yamiu mawal᷊u wuṛṛu maola'a ere al᷊aṛṛana'a, i yamiu sarun maola'a lal᷊oṛṛon araratuannu Ruata.

⁴ Taumata apan mappaawawon dirine wuṛṛu maola'a ere ana'a addio'a indi, ete i tou ahewal᷊anne su wallattu lal᷊oṛṛon araratuannu Ruata.

⁵ Wuṛṛu taumata apan manarimattu ana'a ereindi ana waugu i Ya'u, udde ere lai nanarimmatta si Ya'u.”

Manga inolaanna apan maarosa taumata

⁶ “Isai napa'ola'a sangkatou taumata wuassu manga taumata apan maraddio'a indi madirite mangngimanna lai si Ya'u, mappianne amungkangngu watu gahilinganna iwa'issa su ullekane see i tou iwontolla su tahal᷊oangnga mal᷊al᷊umma.

⁷ Silakawe eteapa runia indi ana waugu manga pallal᷊agu apan ma'arosa taumata. Atonna manga inolaanna ereudde ṛinone pia, arawe nasilakate taumata apan pallal᷊agune maarosa taumata waine!

⁸ Amungkangngu limanu ara'e leddanu ma'arosa si'o, pototta wuṛṛu rammea'a. Mappianne i'o mabiakka ringannu Ruata tawe lima samba'a ara'e ledda samba'a wuassu i'o iramme sulal᷊ummu putungngu naraka ringannu limanu wuṛṛu leddanu ruam ba'a.

⁹ Wuṛṛu amungkangngu matanu ma'arosa si'o, loetta wuṛṛu rammea'a. Mappianne i'o mabbiakka ringannu Ruata tawe mata samba'a, wuassu i'o iramme sulal᷊ummu putungngu naraka ringannu matanu ruam ba'a.”

Sasumandingngu domba apan nawul᷊i

¹⁰ “Paatehamma! Arie pangaddio'a sangkatou wuassu wallattu taumata maraddio'a indi. Ana waugu naunge, manga mala'ekatti mangitou sidutu su saruannu Iamangku su surga. [

¹¹ Ana waugu Ana'u Taumata nirumanta manal᷊amatta taumata apan nial᷊iwune!]

¹² Ereapa su ṛingiṛṛannu? Unnu wisara pia sangkatou uatahuanna maṛṛasutta domba, see sambau su wallattu manga domba udde nawul᷊i, apa sarun olaannu taumata udde? I tou sarun manantangngu domba siom pul᷊o sio udde su wuidda wuṛṛu inai maddea'a domba sambau apan nawul᷊i udde.

¹³ Wuṛṛu amungkangngu i tou naasombate apia domba udde – pangimanna si Ya'u – i tou sarun lembon lulluassa ana waugu domba sambau wuassu siom pul᷊o sio waine apan tawe nawul᷊i.

¹⁴ Aroddi lai Iamangngu apan su surga, madiri saran sangkatou su wallattu manga taumata wakku mangngimanna si Ya'u indi umal᷊iwu.”

Amungkangngu tuṛṛangngu marosa

¹⁵ “Amungkangngu tuṛṛangngu ma'ola'a rosa su saruannu, roote ringanni tou wuṛṛu tantiroa'e passasal᷊ane. Ola'e udde ringannu mal᷊annaba su wallatti raddua sassane. Amungkangngu i tou tinumuṛṛutta al᷊awo'u wisaranu, i'o naauntungnga naasomba apia tuṛṛangngu udde mabelengnga.

¹⁶ Arawe amungkangngu tawe, apira'e sangkatou ara'e ruang katou lai. Ana waugu sulal᷊ummu Wuke Susi uawoṛṛetta, ‘Mattingkatul᷊ungnga darua ara'e sire tallu sakassi pandumanne mapal᷊iatta'u sangkatou niaṛṛiaannu pasasal᷊a.’

¹⁷ Amungkangngu i tou tawe naddaringikka tatantiro manga taumata udde, wal᷊oa'a hatto udde su tangngan Jamaatta. Wuṛṛu panginsueanne, amungkangngu i tou madiri maddaringikka tatantiron Jamaatta, ellehete i tou ere sangkatou maddarorongnga wose wuṛṛu ere sangkatou apan tawe maaillal᷊a Ruata.”

Apan isassingada wuṛṛu iapa'ola'a

¹⁸ “Asingkatawe: Apa apan isassingadi yamiu su runia, udde lai isassingada su surga. Wuṛṛu apa apan iapa'ola'i yamiu su runia, iapa'ola'a lai su surga.

¹⁹ Wuṛṛu asingkatawe lai: Amungkangngu su wallatti yamiu su runia indi pia duang katou ua'ire al᷊awo'u inolaanna, wuṛṛu iaal᷊iomanna, aal᷊iomanna udde sarun sengkamannu Iamangku su surga.

²⁰ Ana waugu suapa pia darua ara'e sire tallu uaammulla ana waugu i Ya'u, i Ya'u isudde su pattangnganni mangitou.”

Sasumandingngu allangnga apan madiri mangampunga taumata

²¹ Wua'udde i Petrus nirumanta ringannu Mawu Yesus wuṛṛu naiwal᷊o, “Mawu, amungkangngu tuṛṛangku ma'ola'a rosa su saruangku, ma'oman sara paapira i ya'u mangampunga si tou? Ma'oman sara paapitu?”

²² Mawu Yesus sinumimbakka, “Tawe, wal᷊ine paapitu, arawe paapitum pul᷊o wuassu paapitu!

²³ Ana waugu napawe Ruata mamarenta, olangnge ere sulal᷊ummu sasumandingnga indi: Sangkatou ratu ma'apulu mapawaekku al᷊awo'u utangngu manga allangnge.

²⁴ Su tempo i tou nanattakke mamarikissa, niapasaruanna si tou sangkatou allangnga apan pia utangnge ringannu jutane,

²⁵ wuṛṛu tate maawaekka. Nariaddi, ratu namarentate tadea'u allangnga udde iwal᷊u'a su sampunna ringannu al᷊aṛṛanangnge wuṛṛu awingnge, wuṛṛu al᷊awo'u manga rarotongnge ipamaekka utangnge.

²⁶ Allangnga udde inumal᷊ituda su saruannu ratu, wuṛṛu sinumal᷊ande, ‘Mawu, ampunge allangngu. Allangngu sarun mamaekka anambon utangnga udde.’

²⁷ Ratu udde inumakkanni tou, see i tou namapasse al᷊awo'u utangngu allangnga udde.

²⁸ Su tempo allangnga udde sinumabangnga, nassombaten hawene, sangkatou allangnga lai apan pia utangnge si tou manga pira ṛiwu. I tou nanamette hawene udde, nangattongnga, wuṛṛu nabbisara, ‘Waeṛṛe al᷊awo'u utangngu!’

²⁹ See hawene udde inumal᷊intuda su saruanni tou see sinumal᷊ande, ‘Paasabare asuene hawe, sarangkanambone sarun ta'u waeṛṛanna!’

³⁰ Arawe allangnga udde madiri. Ewe'e i tou lai napasuttan tou sulal᷊ummu tuttupanna ma'oman sara i tou maawaekka utangnge udde.

³¹ Su tempo manga allangnge waine naasilo apa apan suete nariaddi, i mangitou nasusa wuṛṛu nangalaen olangnge udde su ratu.

³² Ne ratu udde namaggote allangnga apan lal᷊eo udde wuṛṛu nabbisara si tou, ‘Allangnga lal᷊eo! Al᷊awo'u utangngu tate ta'u niapawaekka ana waugu i'o sinumal᷊ande si Ya'u.

³³ Wal᷊inewe i'o lai umakkannu hawenu ere lai ya'u suete inumakkannu?’

³⁴ Ratu udde mangke nasa'u. Allangnga apan lal᷊eo udde nitaṛṛon tou sulal᷊ummu tuttupanna na'oman sara i tou maawaekka al᷊awo'u utangnge.”

³⁵ Mawu Yesus nanginsue watingnge ringannu wisara indi, “Aroddi lai Iamangku su surga sarun ma'ola'a si yamiu sangkatou-sangkatou ere udde, amungkangngu i yamiu tawe mangampunga tuṛṛangngu ringannu naungnga waresi.”