MATIUS 17 - WUKE SUSI WATTI'U AL᷊AL᷊USASSA

Mawu Yesus niwantuhanna

¹ Napawe annummu allo nal᷊iute Mawu Yesus nangapiddi Petrus, i Yakobus wuṛṛu tuṛṛangnge i Yohanes, nanginsassa su sambau wuidda apan matanggakka.

² Su saruanni mangitou, Mawu Yesus nawal᷊u saṛṛene: Hati-Ne nabal᷊i masemakka ere matannallo wuṛṛu laung-Nge mawira lullendapa.

³ Wua'udde sire tallu mallal᷊aṛṛenggen-Ne udde naasilo si Musa wuṛṛu si Elia uahahatto Mawu Yesus.

⁴ See i Petrus nabbisarate su Mawu Yesus, “Mawu, mapia atonna i ite isindi. Amungkangngu Mawu maapulu, i ya'u sarun mapararisikku rasanna tatallu isindi: sambau su Mawu, sambau si Musa, wuṛṛu sambau lai si Elia!”

⁵ Tantal᷊anna i Petrus ta'e mabbisara, winabbawa apan masemakka atonna nangooppa si mangitou wuṛṛu wuassu winabbawa udde niaringiṛṛanna tingikka apan nabbisara, “Ete indi Ana'a arangnguang-Ku, i Tou ma'al᷊uassa naung-Ku. Daringiṛṛe i Tou!”

⁶ Su tempo manga mallal᷊aṛṛenggennu Mawu Yesus naaringikka tingikka udde, i mangitou nata'utta atonna, na'oman sara hati mangitou naduma'a su leta'a.

⁷ Arawe Mawu Yesus nirumanta wuṛṛu nangeṛṛetta si mangitou. “Pabbangunte,” wisara-Ne, “arie mata'utta!”

⁸ Napawe i mangitou nanutudda, i mangitou tawe naasilo sisai-sai tumba'u Mawu Yesus sassane.

⁹ Su tempo i mangitou sinumossokke wuassu wuidda udde, Mawu Yesus napaanaungnga si mangitou, “Arie pabbatti'a sisai-sai, apa apan suete niasiloanni yamiu tanginna, tantal᷊anna Ana'u Taumata taambe niapawangunna wuassu papate.”

¹⁰ Manga mallal᷊aṛṛenggennu Mawu Yesus naiwal᷊o si Tou, “Anio manga hurun agama mabbisara manungku i Elia ṛinone rumanta dorone?”

¹¹ Mawu Yesus sinumimbakka, “Atonna i Elia rumanta wuṛṛu i tou sarun manuungngu sarangkanambone.

¹² Arawe i Ya'u mabbisara si yamiu, i Elia suete nirumanta, arawe manga taumata tawe maaillal᷊a si tou; i mangitou ma'ola'a si tou ere su apulu mangitou sassane. Wuṛṛu aroddi lai i mangitou sarun ma'ola'a Ana'u Taumata.”

¹³ See manga mallal᷊aṛṛenggen-Ne naasunnate manungku Mawu Yesus uahahatto su ola'i Yohanes Mananaṛṛani.

Mawu Yesus napaapian ana'a niasuttannu ghaṛṛaho lal᷊eo

¹⁴ Su tempo Mawu Yesus wuṛṛu sire tallu mallal᷊aṛṛenggen-Ne nabelengke ringannu taumata nambo udde, sangkatou esakka nirumanta, nassubba su saruannu Mawu Yesus,

¹⁵ wuṛṛu nabbisara, “Iamangnga, akkana'a ana'u. Raddangnge pua. Raddangnge pua udde taṛṛa assa masadatta atonna ma'oman sara i tou taṛṛa assa mabbantingnga su putungnga wuṛṛu taṛṛa assa sulal᷊ummu ua'e.

¹⁶ I Ya'u suete nangapiddi tou ringannu mallal᷊aṛṛenggenni Iamangnga, arawe i mangitou tawe maapia si tou.”

¹⁷ Mawu Yesus sinumimbakka, “Wal᷊ine hampa i yamiu indi! I yamiu atonna tonna taumata apan wengkolla wuṛṛu tawe mangngimanna. Ma'oman sara tingngera i Ya'u ṛinone uatana'a ringanni yamiu wuṛṛu manabare su al᷊al᷊eong kamiu? Apira'e ana'a udde inawarea!”

¹⁸ See Mawu Yesus namarentate ghaṛṛaho lal᷊eo udde sumabangnga wuassu lal᷊ummu ana'a udde. Wuṛṛu ghaṛṛaho lal᷊eo udde sinumabangnga, see ana'a udde napia su orassa udde lai.

¹⁹ Wua'udde manga mallal᷊aṛṛenggennu Mawu Yesus nirumanta ringanni Tou sassane wuṛṛu naiwal᷊o si Tou, “Iamangnga, ana waugu apa i yami tawe maal᷊imbuakka ghaṛṛaho lal᷊eo udde?”

²⁰ Mawu Yesus sinumimbakka, “Ana waugu pangangimanni yamiu lome. Naunge! Amungkangngu i yamiu pia pangangimanna ere ahewallu watun sawi, i yamiu wotongnge mabbisara wuidda indi, ‘Pangingkatta poiaroddi!’ Ne atonna tonna wawone udde sarun ma'ingkatta. Tawe saran sambau manara apan tawe ia'ola'i yamiu! [

²¹ Arawe ghaṛṛaho lal᷊eo ereindi, tumba'u wotongnge limbuaṛṛannu aal᷊iomanna wuṛṛu mappuasa.]”

Mawu Yesus namasingkattu papate-Ne apia

²² Napawe manga mallal᷊aṛṛenggennu Mawu Yesus naammulle su Galilea, Mawu Yesus nabbisara si mangitou, “Tate mal᷊annu lai Ana'u Taumata sarun itantilla su apulun taumata.

²³ I Tou sarun pateanna, arawe su allo atallune i Tou sarun iapawangunna.” Ne manga mallal᷊aṛṛenggen-Ne mangke nasusa atonna.

Pamamaekka wosem Bal᷊e Mawu

²⁴ Su tempo Mawu Yesus wuṛṛu mallal᷊aṛṛenggen-Ne na'omate su Kapernaum, manga maddarorongnga wosem Bal᷊e Mawu nirumanta ringanni Petrus wuṛṛu naiwal᷊o, “Hurunu mammaekka wose Wal᷊e Mawu ara'e tawe?”

²⁵ I Petrus sinumimbakka, “Mammaekka!” Napawe i Petrus napul᷊ete, Mawu Yesus namo'a rorone, “Simon, ereapa su ṛingiṛṛannu? Isai ṛinone mamaekka wose su mararatun dunia indi? Tumanangnge ara'e taumata raho?”

²⁶ “Taumata raho,” sasimbakki Petrus. “Amungkangngu aroddi,” unnu Mawu Yesus, “tumanangnge ariete pamaekka.

²⁷ Arawe arie i ite mapaasusa naungngu manga taumata udde. Nariaddi, roote su rano pamaṛṛungnga. Apira'a inassa paarorone niawaṛṛungannu. Sulal᷊ummu moṛṛongngu inassa udde, i'o sarun maasomba roitta apan botongnge ipamaekka wosen kadua. Anute roitta udde wuṛṛu waeṛṛete si mangitou wosen kite hunan Bal᷊e Mawu.”