MATIUS 14 - WUKE SUSI WATTI'U AL᷊AL᷊USASSA

Papaten Yohanes Mananaṛṛani

¹ Su tempo udde i Herodes, ratum banua Galilea, naaringikka su ola'u Mawu Yesus.

² I Herodes nabbisara su manga tepellene, “Natantunte indi Yohanes Mananaṛṛani nabbiakke apia wuassu papate! Ana waugu udde i tou pia taṛṛino ma'ola'a al᷊aṛṛindu'a.”

³ Ana waugu dorone i Herodes nandolokka napasametti Yohanes wuṛṛu naṛṛapussa si tou see niapasutta sulal᷊ummu tuttupanna. I Herodes na'ola'a aroddi ana waugu i Herodias awingngi tuṛṛangngi tou sidutu, eteudde i Filipus.

⁴ Ana waugu i Yohanes suete nabbisara si Herodes ereindi, “Tawe wotongnge i'o ma'awingngi Herodias!”

⁵ Atonna i Herodes maapulu mamate si Yohanes, arawe i tou matta'uttu manga taumata, ana waugu i mangitou masingkatta i Yohanes udde nabi.

⁶ Su tempo i Herodes na'ola'a ramean allo pananaunganna i tou niasungkangnga i Herodias pia Tanangnge wawine nassal᷊aingnga su saruannu awada'alla. Sal᷊aingnge ma'al᷊uassa naungngi Herodes,

⁷ na'oman sara i Herodes naddiandi si tou ringannu nassalu, manungku al᷊awo'u apa apan doronganne, sarun ionggola.

⁸ Ana waugu niaṛṛaannu inangnge, ana'a udde nabbisara, “I Ya'u maddorongnga puan Yohanes Mananaṛṛani onggol᷊a'a si ya'u orassa indi su wowom baki!”

⁹ Naaringikka darorongnga udde, i Herodes mangke nasusa atonna naungnge. Arawe ana waugu i tou suete nassalu su saruannu rahone, i tou namarenta tadea'u darorongngu ana'a wawine udde watu'anna.

¹⁰ I tou nandolokku taumata inai watukku tuttupanna iapapototta puan Yohanes.

¹¹ Wua'udde puan Yohanes niapidde uarandangnga su baki see nionggole su ana'a wawine udde. See ana'a wawine udde nangapiddu lai inangnge.

¹² Wua'udde mallal᷊aṛṛenggenni Yohanes nirumanta nangal᷊appa winal᷊unanni Yohanes wuṛṛu see nilabingnga. See i mangitou napul᷊ete wuṛṛu nabbal᷊ote olangnge udde su Mawu Yesus.

Mawu Yesus napaannu taumata lima ṛiwu su atoune

¹³ Su tempo Mawu Yesus naaringikka watti'a udde, i Tou sinuma'ete saalanna sassane wuṛṛu nanantangken tampa udde, see inaite su sambau tampa apan mal᷊annaba. Arawe su tempo manga taumata naaringikka olangnge udde, i mangitou nanantangngu manga soa mangitou inaite nanantuṛṛutta Mawu Yesus inumamattu ammaranne.

¹⁴ Su tempo Mawu Yesus nilumintukka wuassu saalanna wuṛṛu naasilote taumata manambo udde, i Tou inumakkanni mangitou. See i Tou napaapian manga taumata maradda'a su wallatti mangitou.

¹⁵ Wawallone, manga mallal᷊aṛṛenggennu Mawu Yesus nirumanta wuṛṛu nabbisara si Tou, “Allo wawallote wuṛṛu tampa indi naṛṛae marau. Mappianne Iamangnga mandolokku manga taumata indi mapul᷊e, tadea'u wotongnge mamalli anna su manga ampungnga.”

¹⁶ “Tawe wotongnge i mangitou iapaapul᷊e,” unnu Mawu Yesus, “I yamiu sassane papaanni mangitou.”

¹⁷ “I yami tumba'u pia limam bau roti wuṛṛu inassa ruam bua!” sasimbakku mallal᷊aṛṛenggennu Mawu Yesus.

¹⁸ “Apira'e udde isindi,” unnu Mawu Yesus.

¹⁹ Wua'udde i Tou nandolokku taumata nambo udde niapaa'ianna su leta'a. See i Tou nanganute limam bau roti wuṛṛu inassa ruam bua udde, see i Tou naningngarate langitta wuṛṛu naadiangkamanna su Ruata. Wua'udde i Tou nattahiate roti udde, ringannu lima-Ne wuṛṛu nianggila su mallal᷊aṛṛenggen-Ne niapatahia su taumata nambo udde.

²⁰ I mangitou sarangkanambone inumanna na'oman sara nal᷊aidda. Wua'udde mallal᷊aṛṛenggennu Mawu Yesus nangammullem lamben anna udde: mapul᷊o dua su ul᷊angnge napene-pene.

²¹ Niumanna su tempo udde itatakasere lima ṛiwu su atoune, taambe nireengnga wawine wuṛṛu manga al᷊aṛṛana'a.

Mawu Yesus inumamatta su wowon ua'e

²² Wua'udde Mawu Yesus nandolokku manga mallal᷊aṛṛenggen-Ne sinuma'e saalanna wuṛṛu malliu ṛoro su samba'an dano, tantal᷊anna udde i Tou nandolokku taumata nambo udde niapaapul᷊e.

²³ Napawe taumata nambo udde napul᷊ete, Mawu Yesus sinuma'a su sambau wuidda sassane ana umal᷊iomanna. Allo ṛabbite arawe Mawu Yesus ta'e isudde sassane.

²⁴ Tantal᷊anna udde saalanna apan sasa'eannu mallal᷊aṛṛenggennu Mawu Yesus, maraute su tangngan dano. Saalanna udde mangke ya'untallu lua'a, ana waugu anginna uasomakka monan saalanna.

²⁵ Su wallattu puulla tatallu wuṛṛu puulla annumma rua'allo, Mawu Yesus nirumanta ringanni mangitou u'amatta su wowon ua'e.

²⁶ Su tempo mallal᷊aṛṛenggen-Ne naasilo si Tou u'amatta su wowon ua'e, i mangitou niṛṛumoro atonna. “Setanna!” unni mangitou ringannu atata'unne.

²⁷ Arawe Mawu Yesus lapiddu sinumimbakka, “Paatammuda! I Ya'u indi, arie pa'ata'utta!”

²⁸ See i Petrus nabbisara, “Amungkangngu atonna I'o Mawu Yesus, wala'a i ya'u rumanta umamatta su wowon ua'e.”

²⁹ “Rantate,” sasimbakku Mawu Yesus. Aroddi i Petrus naaringikka i tou nilumintukka wuassu saalanna, niumamatta su wowon ua'e wuṛṛu inaite ringannu Mawu Yesus.

³⁰ Arawe su tempo i Petrus naasilo ma'ikkatta atonna anginna su rano udde, i tou nata'utta wuṛṛu nanattakke nilumakkuba. “Mawu, ontol᷊e!” aintul᷊ine.

³¹ Mawu Yesus lapiddu nangul᷊ukku limane wuṛṛu nanametta si tou, wuṛṛu nabbisara, “Petrus, Petrus, pangangimannu lome atonna. Anio i'o sussinggawangnga si Ya'u?”

³² See itarua sinuma'ete su saalanna udde, wuṛṛu anginna nol᷊ote.

³³ Ne manga mallal᷊aṛṛenggennu Mawu Yesus nassubbate si Tou. I mangitou nabbisara, “Atonna Mawu uddewe Ana'u Ruata!”

Mawu Yesus napaapian taumata maradda'a su Genesaret

³⁴ Napawe i mangitou na'omate su samba'an dano, i mangitou tinumul᷊ite su Genesaret.

³⁵ Wuṛṛu napawe manga taumata isudde naasilo manungku nirumanta udde Mawu Yesus, i mangitou namasingkattu watti'a udde su ahewallu wageangngu leta'a su soa udde. See anambon taumata maradda'a niapidda ringannu Mawu Yesus.

³⁶ Wuṛṛu i mangitou sinumal᷊ande si Tou tadea'u wotongnge mangindingnga jubah-Ne, salaiwe tumba'u pentakke. See sarangkanambone apan nangindingnga udde napiate.