MATIUS 12 - WUKE SUSI WATTI'U AL᷊AL᷊USASSA

Aiwal᷊o su ola'u allon Sabatta

¹ Su sambau allon Sabatta, su tempo Mawu Yesus sinumabbi sambau waillu gandumma, mallal᷊aṛṛenggen-Ne nanatakke mangngitingnga gandumma, see niante ana waugu mal᷊unussa.

² Su tempo manga taumatan Farisi naasilo udde, i mangitou nabbisara Mawu Yesus, “Pa'ellega! Manga mallal᷊aṛṛenggen-Nu lullawangnga titan agamang kite ringannu ma'ola'a inolaanna apan isassingada su allon Sabatta.”

³ Mawu Yesus sinumimbakka, “I yamiu taambe naawasa saran paassa su ola'u apa apan niola'i Daud su tempo i tou wuṛṛu manga taumatane mal᷊unussa?

⁴ I tou sinumutta sulal᷊ummu Wal᷊en Duata; see inumanna roti apan suete niola'a sasamba su Ruata. Sumbal᷊i tumuṛṛuttu titan agamang kite, i tou wuṛṛu manga taumatane tawe wotongnge umanna roti udde – tumba'u manga imam udde wotongnge.

⁵ Ara'e i yamiu taambe naawasa sulal᷊ummu tita Musa manungku suapan allon Sabatta manga imam apan mammanara su Wal᷊e Mawu, lullawangnga atorannu allon Sabatta, arawe tawe iapaasal᷊a?

⁶ Naunge apa apan iwabbisara-U indi: isindi pia nangillembo ahewal᷊anne wuassu Wal᷊e Mawu.

⁷ Sulal᷊ummu Wuke Susi uawoṛṛetta: Ete pa'a'akanna apan ipaapulu-U, wal᷊ine sasamba wuassu winatangnga. Amungkangngu i yamiu atonna-tonna maasunna wisara indi, natantuna i yamiu tawe mapaasal᷊a manga taumata apan tawe sal᷊ane.

⁸ Ana waugu Ana'u Taumata uaagassa allon Sabatta.”

Taumata limane lome samba'a

⁹ Mawu Yesus nanantangken tampa udde see inaite su sambau wal᷊em pattataṛṛamawuanna.

¹⁰ Isudde pia sangkatou taumata limane lome samba'a. Manga pira taumata apan madea'a pasasal᷊a Mawu Yesus, naiwal᷊o si Tou, “Apa wotongnge mapaapian taumata su allon Sabatta?”

¹¹ Mawu Yesus sinumimbakka, “Unnu wisara pia sangkatou wuassu wallatti yamiu uatahuanna domba sambau, wuṛṛu su allon Sabatta domba udde nanawo su loṛṛangnga apan mal᷊al᷊umma; apa tatahuannu domba udde tawe madea'a mamatunna domba udde wuassu loṛṛangnga?

¹² Ne, taumata maareganne wuassu domba! Nariaddi amungkangngu aroddi wotongnge mantul᷊ungngu taumata su allon Sabatta.”

¹³ Wua'udde Mawu Yesus nabbisarate taumata apan limane lome samba'a udde, “Ul᷊uṛṛa'e limanu.” Taumata udde nangul᷊ukken limane, see lima udde napiate ere lai limane samba'a.

¹⁴ Arawe manga taumatan Farisi nanantangngu wal᷊em pattataṛṛamawuanna udde, see na'irete mamate Mawu Yesus.

Ralol᷊oṛṛanna apan nipilen Duata

¹⁵ Mawu Yesus masingkatte manungku manga taumatan Farisi udde pia ṛingiṛṛanna lal᷊eo su ririn i Tou. Nariaddi Tou inaite wuassu tampa udde wuṛṛu manambo taumata uatantalongnga si Tou. See i Tou napaapia manga taumata apan maradda'a.

¹⁶ Arawe i Tou naningaddi mangitou mamasingkati Tou su taumata waine.

¹⁷ Ringannu aroddi nariaddite apa apan suete niwisaran Duata si Nabi Yesaya,

¹⁸ “Ete indi ralol᷊oṛṛang-Ku apan Ta'u pinile taumata apan arangnguang-Ku wuṛṛu natataṛṛino su naung-Ku. Ghaṛṛaho-U sarun ionggolla si Tou, atatul᷊i-U sarun iapasingkattati si Tou su manga walahanna.

¹⁹ I Tou sarun tawe matatiakka ara'e mangngintul᷊i, ara'e mabbisara su manga lal᷊anna.

²⁰ Iawanna apan ual᷊a'ukka tawe paddianni Tou, sol᷊o apan u'odo'a tawe padduman-Ne. I Tou sarun mammanara ma'oman sara atatul᷊idda a'omanna;

²¹ al᷊awo'u walahanna sarun pia antimma si Tou.”

Mawu Yesus wuṛṛu i Beelzebul

²² Wua'udde niapidda ringannu Mawu Yesus sangkatou wuta wuṛṛu mou ana waugu niintaṛṛoannu ghaṛṛaho lal᷊eo. Mawu Yesus napaapian taumata udde na'oman sara i tou naawisarate wuṛṛu naasilote.

²³ Anambon taumata naherangnga wuṛṛu nabbisara, “Asinungka i Tou indi Ana'i Daud apan suete pina'ire udde?”

²⁴ Su tempo manga taumatan Farisi naaringikka aroddi, i mangitou sinumimbakka, “Taumata indi tumba'u wotongnge mallimbuakka ghaṛṛaho lal᷊eo, ana waugu i Beelzebul, tembonannu manga ghaṛṛaho lal᷊eo, suete nangagillu taṛṛino udde si Tou.”

²⁵ Mawu Yesus naasingkatta ṛingiṛṛannu manga taumatan Farisi udde. Ne i Tou nabbisarate si mangitou, “Amungkangngu sambau araratuanna nattal᷊ei naola'a pirang kawageanganna apan sarun pasi passeetta, araratuanna udde tawe mal᷊annu. Wuṛṛu sambau wanua ara'e lal᷊oṛṛon bal᷊e sambau apan uataae wuṛṛu uasaseetta sangkatou ringannu sangkatou, sarun mawinasa.

²⁶ Aroddi lai sulal᷊ummu araratuannu Setanna; amungkangngu wageangnge sambau mallimbuakka wageangnge waine, ne araratuannu Setanna udde natahiate wuṛṛu nahohakke.

²⁷ I yamiu mabbisara manungku i Ya'u mallimbuakka ghaṛṛaho lal᷊eo ana waugu taṛṛinon Beelzebul. Amungkangngu aroddi ringannu taṛṛinon sai mallal᷊aṛṛenggennu mallimbuakka ghaṛṛaho lal᷊eo. Mallal᷊aṛṛenggennu udde sassane napal᷊iatta'a manungku i yamiu nassal᷊a!

²⁸ Arawe i Ya'u mallimbuakka ghaṛṛaho lal᷊eo ringannu taṛṛinon Ruata. Wuṛṛu udde atappasanne manungku Ruata mannattakke mamarenta su pattangnganni yamiu.

²⁹ Ereapa taumata wotongnge maasutta sulal᷊ummu wal᷊en sangkatou apan matohassa wuṛṛu mangaṛṛo darotongnge, amungkangngu i tou tawe maṛṛapussa dorone taumata matohassa udde? Wua'udde i tou wotongngete mangaṛṛo darotongnge.

³⁰ Taumata apan tawe manamba'a si Ya'u atonna-tonna i tou lullawangnga si Ya'u. Wuṛṛu taumata apan tawe mallal᷊ima si Ya'u atonna-tonna i tou manggohakku manara-U!

³¹ Ana waugu udde, ana see i'o masingkatta, amungkangngu taumata ma'ola'a rosa wuṛṛu mabbatti'u al᷊uandaga, i tou wotongnge aampunganna! Arawe amungkangngu i tou mangngaddio'a Ghaṛṛahon Ruata, i tou tawe aampunganna!

³² Amungkangngu taumata mabbisara wisara tatompola su Ana'u Taumata, i tou wotongnge ampunganna, arawe amungkangngu i tou mangngaddio'a Ghaṛṛahon Ruata, i tou tawe aampunganna, mapia orassa indi ara'e lai su panginsueanne!”

Alu ringannu manga wuane

³³ “Tadea'u maasomba wua apan mapia, alune ṛinone masuwukka. Amungkangngu alune maṛṛisitta, wuane lai lal᷊eo. Masuwukka ara'e maṛṛisitta alu udde asingkatanna wuassu wuane.

³⁴ I yamiu taumata lal᷊eo, ereapa wotongnge i yamiu maasaggon al᷊awo'u inolaanna apan mapia amungkangngu i yamiu lal᷊eo? Apa apan niwisara moṛṛongnga udde sinumabangnga wuassu lal᷊ummu naungnga!

³⁵ Taumata apan mapia mannaggon inolaanna apan mapia, ana waugu i tou napenen apapia.

³⁶ Nariaddi, paanaunge: su Allong Kiamatta, sangkatou-sangkatou ṛinone sumimbakka manga wisara apan tawe gunane apan suete niwisaran tou.

³⁷ Ana waugu wisarang kamiu sassane apan sarun ipaatta ipaṛṛawessa apa i'o nassal᷊a ara'e tawe.”

Manga taumatan Farisi maddorongnga Mawu Yesus ma'ola'a al᷊aṛṛindu'a

³⁸ Wua'udde manga pira hurun agama wuṛṛu manga taumatan Farisi nabbisara, “Iamangnga Huru, i yami ma'apulu ma'ellega Iamangnga Huru ma'ola'a al᷊aṛṛindu'a.”

³⁹ “Aral᷊eo wuṛṛu al᷊awangnga eteapa, manga taumata su tempo indi!” sasimbakku Mawu Yesus. “I yamiu maddorongnga i Ya'u ma'ola'a al᷊aṛṛindu'a? I yamiu tawe onggol᷊annu sambau al᷊aṛṛindu'a udde, tumba'u al᷊aṛṛindu'a wuassi Nabi Yunus.

⁴⁰ I Yunus uatana'a tallu allo tallu ṛabbi sulal᷊ummu tiannu inassa masallaka. Aroddi lai Ana'u Taumata sarun matana'a tallu allo tallu ṛabbi sulal᷊ummu tiannu runia.

⁴¹ Su Allong Kiamatta, lal᷊oṛṛo Niniwe sarun mabangunna su sambau ringannu manga taumatan tempo indi wuṛṛu mapaasal᷊a mangitou. Ana waugu manga taumata Niniwe udde nawal᷊u wuassu rosa mangitou, su tempo Yunus nannase si mangitou. Arawe orassa indi pia maggewal᷊anne wuassi Yunus!

⁴² Su tempo Allong Kiamatta, ratu wuassu wanuan Timukka sarun mabangunna su sampunna ringannu manga taumatan tempo indi wuṛṛu mapaasal᷊a mangitou. Ana waugu tadea'u maddaringikka al᷊aṛṛa'i Salomo apan pande, ratu udde na'ola'a amatanna apan marau atonna wuassu pentakku runia. Arawe isindi orassa indi piaddu maggewal᷊anne wuassi Salomo!”

Pabbawelengngu ghaṛṛaho lal᷊eo

⁴³ “Napawe ghaṛṛaho lal᷊eo nanantangken sangkatou, ghaṛṛaho udde namal᷊iwutte manga tampa apan mamara, madea'a tampa pangngillol᷊oanna arawe i tou tawe naasomba.

⁴⁴ Ana waugu udde i tou nabbisara, ‘I ya'u sarun mabelengnga su wal᷊e apan suete nitantangku.’ Su tempo i tou na'omate isudde, wal᷊e udde tawe loṛṛone, waresi wuṛṛu uaatokka.

⁴⁵ See i tou inaite wuṛṛu nangapiddu pitu ghaṛṛaho waine apan nangillembon aral᷊eone wuassi tou. Wua'udde i mangitou sinumuttate sulal᷊ummu taumata udde, see natana'a isudde. Wuṛṛu panginsueanne taumata udde niatambanna aral᷊eone wuassu paarorone. Udde lai sarun mariaddi su manga taumata lal᷊eo su tempo indi.”

Inangnga wuṛṛu manga tuṛṛangngu Mawu Yesus

⁴⁶ Tantal᷊anna Mawu Yesus ta'e uahahatto ringannu taumata nambo udde, nirumantate inangnga wuṛṛu manga tuṛṛang-Nge. I mangitou uarisikka su liudde lapiddu madea'a ana see wotongnge maahahatton Tou.

⁴⁷ Sangkatou wuassu wallattu taumata nambo udde nabbisara su Mawu Yesus, “Iamangnga, inangnga wuṛṛu tuṛṛangngi Iamangnga wowa su liudde. I mangitou maapulu maggahatton Iamangnga.”

⁴⁸ See Mawu Yesus sinumimbakka, “Isai inang-Ku? Isai manga tuṛṛang-Ku?”

⁴⁹ See i Tou nanta'e manga mallal᷊aṛṛenggen-Ne wuṛṛu nabbisara, “Indi inangnga wuṛṛu manga tuṛṛang-Ku.

⁵⁰ Taumata apan ma'ola'a apulun Iamangku su surga, i tou tuṛṛang-Ku esakka, tuṛṛang-Ku wawine wuṛṛu inang-Ku.”