MARKUS 6 - WUKE SUSI WATTI'U AL᷊AL᷊USASSA

Mawu Yesus tawe tinarimmatta su Nazaret

¹ Wuassu tampa udde, Mawu Yesus napul᷊ete su sampunna ringannu mallal᷊aṛṛenggen-Ne watukku ampungngi Tou.

² Su allon Sabatta i Tou nanattakke mangngaṛṛa'a su wal᷊em pattataṛṛamawuanna. Manambo taumata isudde. Su tempo manga taumata udde naaringikka al᷊aṛṛa'u Mawu Yesus, i mangitou mangke naherangnga. I mangitou nabbisara, “Wuassuapa taumata indi naasomba sarangkanambone udde? Apande ereapa indi si Tou? Ereapa i Tou wotongnge ma'ola'a al᷊aṛṛindu'a?

³ Wal᷊inewe i Tou indi ana'u waseng kalu, ana'i Maria, wuṛṛu tuṛṛangngi Yakobus, i Yoses, i Yudas wuṛṛu i Simon? Ore, manga tuṛṛang-Nge wawine lai udde uatana'a isindi.” Ana waugu udde i mangitou nanol᷊ai Tou.

⁴ See Mawu Yesus nabbisara si mangitou, “Sangkatou nabi aaddatanna su al᷊awo'u tampa, arawe su ampungnge sassane tawe addatanna, wuṛṛu su wallattu manga tuṛṛangnge wuṛṛu walahanne.”

⁵ Su tampa udde Mawu Yesus tawe napa'ola'a saran sambau al᷊aṛṛindu'a, tumba'u napaapian sire pira taumata marada'a ringannu nangandangngu lima-Ne si mangitou.

⁶ I Tou naherangnga i mangitou tawe mangngimanna. Wua'udde Mawu Yesus inaite su manga ampungnga maranine isudde, wuṛṛu mangngaṛṛa'a.

Mawu Yesus nandolokku sire mapul᷊o dua mallal᷊aṛṛenggen-Ne

⁷ I Tou namago sire mapul᷊o dua mallal᷊aṛṛenggen-Ne, see nandolokki mangitou pattaṛṛa ruang katou wuṛṛu inonggol᷊annu taṛṛino si mangitou ipallimbuakka manga ghaṛṛaho lal᷊eo.

⁸ I Tou nangagillu tatantiro indi si mangitou, “Arie pangapiddu apa-apa su amatanna, tumba'u tatumma'inna. Arie pangapiddu anna ara'e pato'am pondi, ara'e lai roitta.

⁹ Palluṛṛeten sapatu, arawe arie pangapiddu laubba ruam parassa.”

¹⁰ I Tou lai nabbisara, “Amungkangngu i yamiu sumutta su sambau wal᷊e, atana'e isudde ma'oman sara i yamiu manantangngu soa udde.

¹¹ Arawe amungkangngu i yamiu ma'oma su sambau tampa, wuṛṛu manga taumata isudde maddiri manarimmatta wuṛṛu maddiri madaringikka si yamiu, tantanga'a tampa udde. Wuṛṛu tontonga'a awu wuassu leddanu maola'a sambau pananaunganna su saruanni mangitou!”

¹² Ne sire mapul᷊o dua mallal᷊aṛṛenggennu Mawu Yesus udde inaite. I mangitou inaite namasingkattu watti'a manungku taumata ṛinone mawal᷊u wuassu paddarosane.

¹³ Manga mallal᷊aṛṛenggennu Mawu Yesus udde nallimbuakke manambo ghaṛṛaho lal᷊eo, wuṛṛu mammuṛṛan lanan zaitun su taumata marada'a wuṛṛu napaapia mangitou.

Apapaten Yohanes Mananaṛṛani

¹⁴ Manga watti'a su ola'u anambon arariadianna udde na'omate lai ringanni Ratu Herodes, ana waugu arannu Mawu Yesus niasingkatante su al᷊awo'u tampa. Pia taumata mabbisara, “I Yohanes Mananaṛṛani nabbiakke apia! Ana waugu udde i tou pia taṛṛino ma'ola'a al᷊aṛṛindu'a udde.”

¹⁵ Arawe manga taumata waine mabbisara, “I tou i Elia.” Pia lai mabbisara, “I tou nabi, ere sangkatou su wallattu manga nabi su tempo paarorone.”

¹⁶ Napawe i Herodes naaringikka hatto udde, i tou nabbisara, “Atonna indi Yohanes Mananaṛṛani apan dorone suete ta'u niapaponggo'a puane. Orassa indi i tou nabbiakke apia!”

¹⁷ Ana waugu tantal᷊anna taambe inolaanne udde, i Herodes suete nandolokku taumata niapasametta si Yohanes, wuṛṛu napaasuttan tou sulal᷊ummu tuttupanna. I Herodes na'ola'a aroddi ana waugu i Herodias, awingngu tuṛṛangnge sidutu, eteudde i Filipus. Ana waugu i Herodes suete naawingngi i Herodias,

¹⁸ wuṛṛu su olangnge udde i Yohanes suete nanagu si Herodes ringannu masokka ereindi, “Tawe wotongnge i'o ma'awingnga ringannu awingngu tuṛṛangngu udde!”

¹⁹ Ana waugu udde i Herodias pia naungnga lal᷊eo si Yohanes wuṛṛu maapulu mamate si Yohanes, arawe i tou tawe mapa'ola'a olangnge udde, ana waugu isassingaddi Herodes.

²⁰ Ana waugu i Herodes suete nandolokku taumata niapariaga mapia-pia asasal᷊amatti Yohanes su tuttupanna, ana waugu i tou matta'utti Yohanes. I tou masingkatta manungku i Yohanes sangkatou taumata mapia apan suete nirolokku Ruata. Wuṛṛu atonna amungkangngu i Yohanes mabbisara, i Herodes mal᷊utu madaringikka si tou, salaiwe i tou sussinggawangnga atonna ana waugu Yohanes.

²¹ Panginsueanne i Herodias naasomba tempone su allo inariadianni Herodes. Tempo udde i Herodes na'ola'a andeangngu manga tembonannu araratuanne, manga perwira wuṛṛu manga piaṛṛa'u tumana'u Galilea.

²² Su andeangnga udde ana'a maṛṛualan Herodias nassal᷊aingnga, wuṛṛu sal᷊aingnge udde mangke naal᷊uassa naungngi Herodes see lai manga rahone. Ne i Herodes nabbisara su ana'a maṛṛuala udde, “Apa ipaapulunu, padorongke. I Ya'u sarun mangonggolu darorongngu udde si'o!”

²³ See i Herodes naddiandi su ana'a udde ringannu sasalu, i Herodes nabbisara, “Al᷊awo'u apa apan dorongannu sarun ta'u ionggolla, salaiwe samba'a wuassu araratuangku indi!”

²⁴ Ne maṛṛuala udde sinumabangnga wuṛṛu naiwal᷊o inangnge, “Inangnga, suapa apan mappianne ta'u doronganna?” Inangnge sinumimbakka, “Padorongke puan Yohanes Mananaṛṛani.”

²⁵ Maṛṛuala udde mal᷊iha-l᷊ihakka nabelengnga ringanni Herodes wuṛṛu nabbisara, “I ya'u madorongnga puan Yohanes Mananaṛṛani ionggolla si ya'u orassa indi uarandangnga su baki!”

²⁶ Naaringikka darorongnga udde, i Herodes mangke nasusa. Arawe i tou tawe mapanol᷊a'u darorongnga udde, ana waugu i tou suete nassalu su pattangngannu manga rahone.

²⁷ Nariaddi i tou lapiddu namarenta sangkatou mandariagane niapaal᷊appa puan Yohanes Mananaṛṛani. Ne tantara udde inaite su tuttupanna see namonggo'e puan Yohanes.

²⁸ Wua'udde i tou nangapiddu pua udde uarandangnga su baki wuṛṛu tinantille su maṛṛuala udde, see maṛṛuala udde nanantille su inangnge.

²⁹ Napawe mallal᷊aṛṛenggenni Yohanes Mananaṛṛani naaringikka olangnge udde, i mangitou inaite nangal᷊appa winal᷊unanni Yohanes, see nilabingke.

Mawu Yesus napaannu lima ṛiwu su atoune

³⁰ Manga rasul apan suete nirolokku Mawu Yesus, wua'udde nabelengke apia, wuṛṛu naammulle ringannu Mawu Yesus. I mangitou nabal᷊o si Tou al᷊awo'a apan suete nimmanara wuṛṛu niaṛṛa'i mangitou.

³¹ Manambo atonna taumata nirumanta wuṛṛu mappul᷊e, na'oman sara tate lai tempone Mawu Yesus wuṛṛu mallal᷊aṛṛenggen-Ne umanna. Ana waugu udde Mawu Yesus nabbisara mallal᷊aṛṛenggen-Ne, “Wette i ite inaite su tampa apan mal᷊annaba, isudde i ite wotongnge sassane, wuṛṛu yamiu wotongnge mangillol᷊o tal᷊ang kadio'a.”

³² Ne i mangitou inaite ringannu sinuma'e saalanna nabatukku tampa apan mal᷊annaba udde.

³³ Arawe manambo taumata naasilo si mangitou nanantangngu tampa udde, wuṛṛu masingkatta lai isai i mangitou. Nariaddi, wuassu al᷊awo'u soa su wageangngu leta'a udde, manga taumata tuttal᷊angnga wuassu ammaranne malliu ṛoro Mawu Yesus wuṛṛu mallal᷊aṛṛenggen-Ne.

³⁴ Su tempo Mawu Yesus sinumossokka wuassu saalanna, i Tou naasilo taumata manambo. I Tou inumakkanni mangitou, ana waugu i mangitou naal᷊ihidda domba apan tawe mallal᷊u'adde. Ne i Tou nanattakke mangngaṛṛa'u al᷊awo'u al᷊aṛṛa'a si mangitou.

³⁵ Napawe wawallote, mallal᷊aṛṛenggennu Mawu Yesus naiwal᷊o si Tou, “Maranite maṛṛabi wuṛṛu tampa indi marau wuassu soa.

³⁶ Mappianne Iamangnga mandolokku manga taumata indi mapul᷊e tadea'u i mangitou wotongnge mamalli anna su manga soa wuṛṛu ampungnga maranine isindi.”

³⁷ Arawe Mawu Yesus sinumimbakka, “I yamiute sassane papaanni mangitou.” “Uare, apa i yami inai mamalli roti aregane rua ṛasutta roitta sal᷊a'a ana see mapaannu manga taumata indi?” aroddi unnu manga mallal᷊aṛṛenggennu Mawu Yesus.

³⁸ See Mawu Yesus naiwal᷊o, “Pia sangkura roti si yamiu? Roote ellehe.” Napawe i mangitou suete na'ellega, i mangitou nabbisara, “Pia limam bau roti wuṛṛu ruam bua inassa.”

³⁹ See Mawu Yesus nandolokku manga taumata udde niapaa'ianna tumuṛṛuttu manga wageangnge su nannal᷊o ma'elomma.

⁴⁰ Ne manga taumata udde inuma'iante ringannu uaatokka su manga wageangnge. Pia maṛṛasutta su atoune sangkawageanganna wuṛṛu pia lai limam pul᷊o su atoune sulal᷊ummu sangkawageanganna.

⁴¹ Wua'udde Mawu Yesus nanganute limam bau roti wuṛṛu inassa ruam bua, see naningngara langitta wuṛṛu na'adiangkamanna su Ruata. Wua'udde, i Tou namesangke roti udde ringannu lima-Ne wuṛṛu nianggille su mallal᷊aṛṛenggen-Ne iapatahia su taumata nambo udde, wuṛṛu inassa lai ruam bua nitahia si mangitou nambo udde.

⁴² I mangitou inumanna na'oman sara nal᷊aidda.

⁴³ Wua'udde lamben anna udde niammullu mallal᷊aṛṛenggennu Mawu Yesus – sarangkanambone mapul᷊o dua su ul᷊angnge napene-pene.

⁴⁴ Taumata esakka apan inumanna roti udde iraṛṛangngo lima ṛiwu su atoune.

Mawu Yesus niumamatta su wowon ua'e

⁴⁵ Wua'udde ringannu mal᷊ihakka Mawu Yesus nandolokku mallal᷊aṛṛenggen-Ne nassenggotte ringannu saalanna malliu ṛoro si Tou su Betsaida su samba'an dano, tantal᷊anna i Tou nandolokku taumata nambo udde niapaapul᷊e.

⁴⁶ Napawe suete nanondon taumata nambo udde, Mawu Yesus inaite su wuidda umal᷊iomanna.

⁴⁷ Napawe ṛabbite, saalannu mallal᷊aṛṛenggennu Mawu Yesus su pattangnganten dano, arawe Mawu Yesus ta'e su ammaranne.

⁴⁸ I Tou naasilote si mangitou mammundalla ringannu masahadda atonna, ana waugu anginna uasomakka saalanna. Ana waugu udde, iraṛṛangngo su wallattu puulla tatallu wuṛṛu annumma rua'allo, i Tou nirumantate ringanni mangitou u'amatta su wowon ua'e. Wuṛṛu i Tou sidutu u'amatta ere ola'u sumabbi si mangitou.

⁴⁹ Napawe i mangitou naasilo manungku i Tou u'amatta su wowon ua'e, i mangitou massunna i Tou setanna,

⁵⁰ na'oman sara i mangitou mangngintul᷊in atata'utta. Ana waugu i mangitou naasilo si Tou wuṛṛu i mangitou lapiddu niṛṛumoro atonna. Arawe Mawu Yesus lapiddu namo'a si mangitou, “Paatammuda! I Ya'u Mawu Yesus. Arie pa'ata'utta!”

⁵¹ See i tou sinuma'ete saalanni mangitou, wuṛṛu anginna nol᷊ote. Mallal᷊aṛṛenggennu Mawu Yesus mangke naherangnga atonna.

⁵² Al᷊aṛṛindu'a ringannu roti limam bau udde, taambe lai niasunnanni mangitou. Masahadda i mangitou massunna.

Mawu Yesus napaapia manga taumata marada'a su Genesaret

⁵³ Napawe na'omate su samba'an rano, i mangitou nabal᷊angote su tatul᷊iannu Genesaret.

⁵⁴ Napawe i mangitou sinumossokke wuassu saalanna, manga taumata naasilote manungku nirumanta udde Mawu Yesus.

⁵⁵ See i mangitou tinumal᷊angke su al᷊awo'u tampa su wageangngu leta'a udde, wuṛṛu nangapidde manga taumata marada'a uarandangnga su wilatta inaite ringannu Mawu Yesus. Amungkangngu i mangitou maaringikka manungku Mawu Yesus su sambau tampa, i mangitou mangapiddu manga taumata marada'a lai isudde.

⁵⁶ Suapan tampa Mawu Yesus rumanta – mapia ete su ampungnga, su soa ara'e su ampungnga maradio'a – isudde sidutu taumata rudanta wuṛṛu mangngaddon rumarada'a su pasakka. See i mangitou sussal᷊ande tadea'u manga taumata marada'a udde iwala mangindingnga jubah Mawu Yesus, salaiwe tumba'u pentakke. Sarangkanambone apan naaindingnga jubah udde mangke mapia.