MARKUS 5 - WUKE SUSI WATTI'U AL᷊AL᷊USASSA

Mawu Yesus napaapian taumata niasutannu ghaṛṛaho lal᷊eo

¹ Wua'udde Mawu Yesus wuṛṛu mallal᷊aṛṛenggen-Ne na'omate su samba'an Ranon Galilea, su wageangngu leta'u Gerasa.

² Aroddi Mawu Yesus nilumintukka wuassu saalanna, i Tou nirantannu sangkatou esakka apan sinumabangnga wuassu manga loṛṛangngu lal᷊abinganna.

³ Taumata udde tatahuanannu ghaṛṛaho lal᷊eo wuṛṛu uatana'a su lal᷊abinganna. I tou tate ia'iitta salaiwe ete ṛateanna.

⁴ Masokkate ledda wuṛṛu limane imantungnga, arawe manga ṛate udde wabbassutanne, wuṛṛu atta'a su leddane pappadianne. I tou matohassa atonna na'oman sara tawedu sangkatou wotongnge maataṛṛangnga si tou.

⁵ Allo ṛabbi i tou lullallele su lal᷊abinganna wuṛṛu su manga wuidda, ringannu aintul᷊ine wuṛṛu mallessa wadangnge ringannu watu.

⁶ Napawe ro'en marau i tou naasilote Mawu Yesus nirumanta, i tou tinumal᷊angnga see nassubba su saruannu Mawu Yesus.

⁷ Ringannu tingikka apan ma'ikkatta i tou inumui, “Yesus, Ana'u Ruata Apan Atanggaṛṛanne! Sarun urannu i ya'u indi? Ringannu arannu Ruata i ya'u sumal᷊ande, arie panansara si ya'u!” (

⁸ Taumata udde nabbisara aroddi ana waugu Mawu Yesus nabbisara si tou, “Ghaṛṛaho lal᷊eo, sabbangke wuassu taumata indi!”)

⁹ See Mawu Yesus naiwal᷊o si tou, “Isai arannu?” Taumata udde sinumimbakka, “Arangku ‘i Legiun’ – ana waugu i yami indi tumanite manambo!”

¹⁰ Masokkate i tou madorongnga ringannu sussal᷊ande, tadea'u Mawu Yesus tawe mandolokku manga ghaṛṛaho lal᷊eo udde massal᷊iu wuassu wageangngu leta'a udde.

¹¹ Maranin tampa udde pia bawi manambo apan tantal᷊anna maddea'a anna su sendekku wuidda.

¹² Manga ghaṛṛaho lal᷊eo udde sinumal᷊ande Mawu Yesus, “Roloṛṛa'e i yami sumutta su manga wawi udde.”

¹³ Mawu Yesus inumire. Nariaddi, manga ghaṛṛaho lal᷊eo udde sinumabangke wuassu taumata udde see sinumuttate su manga wawi udde. Anambon ammul᷊annu manga wawi udde tinumal᷊angnga wuṛṛu tinumumpa wuassu rampissa watukku rano see nilumakkuba – wawi udde sarangkanambone, iraṛṛangngo ruaṛiwu anambone.

¹⁴ Manga mandariaga wawi udde tinumal᷊angnga, wuṛṛu namasingkattu watti'a udde su soa wuṛṛu su ampungnga maranine. See manga taumata nampassabangnga ma'ellega apa apan suete nariaddi.

¹⁵ I mangitou nirumantate ringannu Mawu Yesus, see na'ellega taumata apan tanginna niasuttannu ghaṛṛaho lal᷊eo udde, tantal᷊anna ua'ianna isudde. I tou suete napedetta, wuṛṛu ṛingiṛṛanne lai masemakke. Ne i mangitou sarangkanambone nata'utte.

¹⁶ Manga taumata apan suete naasilo sassane inolaanna su ola'u taumata wuṛṛu manga wawi udde, nabbati'e apa apan suete nariaddi.

¹⁷ See tumana'u wageangngu leta'a udde nadorongnga tadea'u Mawu Yesus manantangngu wageangngu leta'a udde.

¹⁸ Su tempo Mawu Yesus sinuma'ete su saalanna, taumata apan tanginna paparentannu ghaṛṛaho lal᷊eo udde sinumal᷊ande Mawu Yesus, tadea'u i tou wotongnge tumantalongnga.

¹⁹ Arawe Mawu Yesus maddiri, wisara-Ne, “Apul᷊ete wuṛṛu wal᷊oa'e su manga tuṛṛangngu apa apan suete niola'u Mawu si'o wuṛṛu aroddi apiane i Tou si'o!”

²⁰ Ne taumata udde napul᷊ete wuṛṛu nanattakke mabatti'a su wageangngu leta'u Mapul᷊o Soa su ereapa apan suete niola'u Mawu Yesus si tou. Anambon taumata naherangnga naaringikka watti'a udde.

Ana'i Yairus – Wawine apan nangindingnga jubah Mawu Yesus

²¹ Mawu Yesus nabelengke apia su samba'an rano. Su winggin rano udde, manambo taumata uaṛṛimpulunna uapal᷊iwutta Mawu Yesus.

²² Nirumantate sangkatou aranne i Yairus. I Tou sangkatou piaṛṛa'u wal᷊em pattataṛṛamawuanna su soa udde. Napawe i tou naasilo Mawu Yesus, i tou inumal᷊intuda su saruan-Ne,

²³ wuṛṛu sinumal᷊ande, “Iamangnga, ana'u wawine'u marada'a masaddatta. Wotongnge Iamangnga rumanta mamita si tou, tadea'u i tou mapia wuṛṛu tawe mate!”

²⁴ Ne Mawu Yesus inaite su sampunna ringanni Yairus. Manambo taumata uatantalongnga si Tou wuṛṛu mannesse'i Tou wuassu al᷊awo'u tampa.

²⁵ Su wallatti mangitou udde pia lai sangkatou wawine apan mapul᷊ote dua su tonnane marada'a a'amatannu ṛaṛṛa ara'e rada'u wawine.

²⁶ Anambon darotongnge nasuete nipaatta pinamaekka manga doktere, arawe tawedu naapia si tou, ewe'e radangnge mangke a'atambanna awakkanne.

²⁷ Wawine udde naaringikke manambo su ola'u Mawu Yesus. Ne su wallattu taumata nambo udde i tou nangundani Mawu Yesus wuassu liudde,

²⁸ ana waugu i tou maṛṛingidda, “Sambal᷊iate i ya'u naaindingnga jubah-Ne, i ya'u sarun mapia!”

²⁹ I tou nangindingnga jubah Mawu Yesus, wuṛṛu orassa udde lai radangnge nattaalla. I tou naapendamma manungku i tou napiate.

³⁰ Su orassa udde lai Mawu Yesus naapendamma manungku pia auatanna apan nasabangnga wuassu wadang-Nge. Ne i Tou nanaile taumata nambo udde wuṛṛu naiwal᷊o, “Isai nangindingnga jubah-U?”

³¹ Manga mallal᷊aṛṛenggen-Ne nabbisara, “Iamangnga pa'ellega sassane aroddi anambone taumata apan uasasuṛṛuda. Wuṛṛu Iamangnga ta'e ma'iwal᷊o, isai nangindingnga Iamangnga?”

³² Arawe Mawu Yesus sidutu ma'ellega taumata uapal᷊iwutta si Tou wuṛṛu maddea'a taumata apan nangindingnga si Tou.

³³ Wawine udde masingkatte apa apan suete nariaddi su wadangnge, ringannu mangngindo wuṛṛu matta'utta i tou nassubba su saruannu Mawu Yesus wuṛṛu nanga'u al᷊awo'u inolaanne.

³⁴ See Mawu Yesus nabbisara wawine udde, “Ana'u, ana waugu i'o mangngimanna si Ya'u, i'o napiate! Roote ringannu asasal᷊amatta. I'o napiate atonna!”

³⁵ Tantal᷊anna Mawu Yesus ta'e mabbisara, manga pira ralol᷊oṛṛanna nirumanta wuassu wal᷊en Yairus, “Ana'i Tuangnga maṛṛuala natete,” wisara mangitou si Yairus, “Ariete i Tuangnga mapaasusan Iamangnga Huru.”

³⁶ Ringannu tawe naddaringikka apa apan iwabbisaran taumata nambo udde, Mawu Yesus nabbisara si Yairus, “Arie pa'ata'utta, pangimante!”

³⁷ See Mawu Yesus inumamatta, arawe i Tou tawe namalan saran sangkatou tumantalongnga si Tou, tumba'u i Petrus see i Yakobus wuṛṛu i Yohanes sangkatuṛṛangnga.

³⁸ Napawe i mangitou na'omate su wal᷊en Yairus, Mawu Yesus naasilo mangke uahahio, wuṛṛu naaringikka lal᷊uai wuṛṛu lal᷊allu apan ma'ikkatta.

³⁹ See Mawu Yesus sinumutta wuṛṛu nabbisara si mangitou, “Anio yamiu uahahio wuṛṛu lulluai? Ana'a udde tawe nate; i tou tumba'u mattiilla!”

⁴⁰ I mangitou nilumage Mawu Yesus. Ne i Tou nandoloke mangitou nambo niapaasabangnga. See i Tou nangapidden inangnga iamangngu ana'a udde wuṛṛu sire tallu mallal᷊aṛṛenggen-Ne sinumutta sulal᷊ummu wabbo'an ana'a udde.

⁴¹ Mawu Yesus namita limang kana'a udde see nabbisara si tou, “Talita kum,” atappasanne, “Ana'a wawine, i Ya'u mabbisara si'o: pabbangunte!”

⁴² Ana'a maṛṛuala udde mal᷊iha-l᷊ihakka nabangunna wuṛṛu inumamatta. (Uukke mapul᷊ote dua su tonnane.) Anambon taumata apan naasilo arariadianna udde, mangke tinumiangnga!

⁴³ Arawe Mawu Yesus mangke manningaddi mangitou mabatti'u olangnge udde sisai-sai. See i Tou nabbisara, “Onggol᷊eten anna ana'a udde.”