MARKUS 4 - WUKE SUSI WATTI'U AL᷊AL᷊USASSA

Sasumandingngu sangkatou mangangasi'a

¹ Mawu Yesus mangngaṛṛa'a lai su winggin Ranon Galilea. Manambo atonna taumata uapal᷊iwutta si Tou. Ana waugu udde i tou inaite inuma'ianna sulal᷊ummu saalanna apan ual᷊allatto, wuṛṛu taumata nambo uarisikka su winggin dano.

² See Mawu Yesus nangaṛṛa'u al᷊awo'u inolaanna apan mapia si mangitou ringannu sasumandingnga. Ereindi i Tou mangngaṛṛa'a si mangitou.

³ “Paddaringikka! Pia sangkatou mabbawailla inai mangasi'u wualanna.

⁴ Su tempo i tou mangngasi'a, pia bualanna nanawo su lal᷊anna. See manu'a nirumanta wuṛṛu inumanna wualanna udde na'oman sara nasue.

⁵ Pia lai nanawo su tampa mawatu apan letangnge adio'a, manga wualanna udde lapiddu tinumuwo ana waugu letangnge adio'a,

⁶ arawe su tempo matannallo matanggakka, manga tatuwone udde mannattakke tuttolangnga wua'udde naṛṛangu wuṛṛu nate ana waugu ṛamunne tawe nusippa mal᷊al᷊umma.

⁷ Pia lai bualanna apan nanawo su tangngan ahuranganna ṛoaanna. Ahuranganna ṛoaanna udde tinumuwo wuṛṛu namul᷊issa tatuwon bualanna udde na'oman sara tawe nabbua.

⁸ Arawe pia lai bualanna apan nanawo su leta'a masuwukka. Wualanna udde tinumuwo, see nahewalle wuṛṛu nabbua, pia tallum pul᷊o, pia annummu pul᷊o, wuṛṛu pia lai paaṛṛasutta su wageangnge.”

⁹ Napawe suete nabbati'u sasumandingnga udde, Mawu Yesus nabbisara, “Isai pia tal᷊inga, paddaringikka!”

Anio Mawu Yesus mappaattu sasumandingnga

¹⁰ Su tempo Mawu Yesus sassane, manga taumata apan suete naaringikka al᷊aṛṛang-Nge nirumanta ringanni Tou su sampunna ringannu sire mapul᷊o dua mallal᷊aṛṛenggen-Ne. I mangitou madorongnga si Tou manal᷊a'an atappasannu sasumandingnga udde.

¹¹ Ne Mawu Yesus nabbisarate si mangitou, “I yamiu suete nionggol᷊annu al᷊amatta maasingkatta adappingnga su ola'u ereapa Ruata mamarenta. Arawe manga taumata su liudde aaṛṛaannu sasumandingnga,

¹² tadea'u ‘I mangitou sidutu maatutukka arawe wagga apa apan sarun mariaddi, i mangitou sidutu maddaringikka arawe tawe maasunna, olangnge indi mariaddi tadea'u i mangitou tawe maasilo wuṛṛu tawe maasunna wuṛṛu arie i mangitou rumanta ringannu Ruata wuṛṛu Ruata mangampungnga si mangitou.’ ”

Mawu Yesus manal᷊a'an sasumandingngu sangkatou mangangasi'a

¹³ Wua'udde Mawu Yesus nabbisarate si mangitou, “Amungkangngu yamiu tawe maasunna sasumandingnga udde, ereapa i yamiu wotongnge maasunna sasumandingnga waine?

¹⁴ Mangangasi'a udde sangkatou taumata apan mannal᷊iawukku watti'a wuassu Ruata.

¹⁵ Wualanna apan nanawo su lal᷊anna, iassumandingnga su taumata apan uararingikka watti'a su ola'u ereapa Ruata mamarenta. Aroddi naaringikka, Setanna nirumanta wuṛṛu nanganu wualanna apan suete niasi'a sulal᷊ummu naungngi mangitou.

¹⁶ Wualanna apan nanawo su leta'a mawatu, iassumandingnga su taumata apan uararingikka watti'a udde, wuṛṛu ringannu mal᷊ihakka nanengkamma ringannu naungnga mal᷊uassa.

¹⁷ Arawe watti'a udde tawe nakkamutta sulal᷊ummu naungngi mangitou, na'oman sara tawe nataṛṛangnga mal᷊annu. Aroddi i mangitou natataṛṛangnga asasusa ara'e pandal᷊al᷊eo ana waugu watti'a udde, lapiddu i mangitou nassinaaddu Ruata.

¹⁸ Wualanna apan nanawo su tangngan ahuranganna ṛoaanna, iassumandingnga su taumata apan uararingikka watti'a udde,

¹⁹ arawe sussinggawangngu pabbiaṛṛanni mangitou wuṛṛu maapulu mabbiakka lembo nasuungnga. Apulum padarunia sinumuttate sulal᷊ummu naungngi mangitou. Wua'udde watti'u Ruata nawul᷊i wuassu lal᷊ummu naungngi mangitou, na'oman sara tawe nabbua.

²⁰ Wuṛṛu wualanna apan nanawo su leta'a masuwukka udde iassumandingnga su taumata apan naddaringikka watti'a udde wuṛṛu nanengkamma, i mangitou nabbua manambo, pia tallum pul᷊o, pia annummu pul᷊o, pia lai paaṛṛasutta su wageangnge wuane.”

Sol᷊o apan niluuwannu wensada

²¹ Wua'udde Mawu Yesus nabbisara apia, “Apa piate taumata nande'omma sol᷊o see niluuwannu wensada, ara'e nangadon sol᷊o udde su al᷊ungngu lallowanganna? Apa i tou tawe nangelen sol᷊o udde su aeleanne?

²² Tawe apa uawuni apan tawe asiloanna; wuṛṛu tawe apa ia'adappingnga apan tawe asingkatanna.

²³ Ana waugu udde, amungkangngu pia tal᷊inga paddaringikka!”

²⁴ See Mawu Yesus nabbisara apia, “Panutukka apa apan radaringiṛṛanni yamiu indi! Uuṛṛanna apan ipaatti yamiu su taumata waine sarun ipaattu Ruata lai si yamiu – wuṛṛu ewe'e lembon anamboanne lai.

²⁵ Ana waugu taumata apan uatahuante, sarun onggol᷊anu anamboanne lai; arawe taumata apan tawe tatahuananne, adio'a apan ta'e si tou sarun anuanna lai.”

Sasumandingngu wualanna apan tinumuwo

²⁶ Mawu Yesus nanassukku wisara-Ne apia, “Napawe Ruata mamarenta ere sangkatou Ratu, olangnge wotongnge isumandingnga ere sangkatou apan mangngasi'a su wawail᷊anne.

²⁷ Ṛabbine i tou mattiilla; napawe allote i tou mabangunna, wuṛṛu tantal᷊anna udde manga wualanna mangkatuwone na'oman sara matanggakke. Arawe ereapa olangnge manga wualanna udde tinumuwo wuṛṛu matanggakke, taumata udde wagga.

²⁸ Ete leta'a udde apan nangagillu wuane sassane; paarorone raene, wua'udde wungane, ana see wuane.

²⁹ Wuṛṛu amungkangngu gandumma udde nal᷊ahate, taumata udde manattakke mangitingnga, ana waugu tempotem pangangitingnga.”

Sasumandingngu watun sawi

³⁰ “Napawe Ruata mamarenta, ringannu apa i ite botongnge manumandingnga?” aiwal᷊o Mawu Yesus. “Tul᷊ada apa apan wotongnge ipaatti ite ipanal᷊a'a?

³¹ Napawe Ruata mamarenta, olangnge ere sasumandingnga indi: Sambau watun sawi nianun sangkatou taumata see sinuanna su leta'a. Watun sawi eteudde watu apan adio'anne su runia.

³² Arawe amungkangngu tinumuwote, i tou maola'a ahewal᷊anne su wallattu manga sinuananna. Manga rannane manambona'oman sara manga manu'a rudanta, wuṛṛu ma'ola'a sal᷊akka su al᷊ungnge.”

³³ Aroddi Mawu Yesus mangngaṛṛa'a taumata ringannu mappaattu sasumandingnga ereudde, tadea'u i mangitou wotongnge maasunna.

³⁴ Mawu Yesus sidutu mappaattu sasumandingnga amungkangngu i Tou mangaṛṛa'a manga taumata udde. Arawe amungkangngu i Tou sassane ringannu mallal᷊aṛṛenggen-Ne, i Tou mannal᷊a'an sarangkanambone si mangitou.

Mawu Yesus napaal᷊enakku tandi'a

³⁵ Su allo wawallo udde lai, Mawu Yesus nabbisara su mallal᷊aṛṛenggen-Ne, “Wette i ite massenggote su samba'an dano.”

³⁶ Ne Mawu Yesus sinuma'ete su saalanna, wuṛṛu mallal᷊aṛṛenggen-Ne nanantangken taumata nambo su winggin dano, see sinuma'ete su saalanna su sambau. Pia lai manga saalanna waine isudde. Wua'udde Mawu Yesus wuṛṛu mallal᷊aṛṛenggen-Ne nassenggotte.

³⁷ Tawe nal᷊annu wua'udde nattandi'e. Lua'a mannattakke mangngema'u saalanna wuṛṛu naasuttate sulal᷊umme na'oman sara saalanna udde maranite mapenen ua'e.

³⁸ Su pangangul᷊inannu saalanna udde Mawu Yesus tantal᷊anna mattiilla uaillul᷊unna su apepessa. Mallal᷊aṛṛenggen-Ne namu'o si Tou. I mangitou nabbisara, “Iamangnga Huru, apa Iamangnga tawe maṛṛingidda i ite masilakate?”

³⁹ Mawu Yesus napu'ote see namul᷊o anginna udde, wuṛṛu nabbisarate rano, “Paal᷊annaba, al᷊enakke!” Ne anginna nol᷊ote, wuṛṛu rano nal᷊enakke atonna.

⁴⁰ See Mawu Yesus nabbisara su mallal᷊aṛṛenggen-Ne, “Anio i yamiu matta'utta? Anio i yamiu tawe mangngimanna si Ya'u?”

⁴¹ Ne i mangitou nata'utte wuṛṛu uawawisarate sangkatou ringannu waine, “Isai ṛinone taumata indi, na'oman sara anginna wuṛṛu lua'a mangke tuttuṛṛutta si Tou.”