MARKUS 2 - WUKE SUSI WATTI'U AL᷊AL᷊USASSA

Mawu Yesus napaapian sangkatou lome

¹ Manga pira allo wua'udde, Mawu Yesus nabelengke su Kapernaum. Ne tinumelengke watti'a manungku i Tou tantal᷊anna su wal᷊e.

² See manambo taumata nirumanta. I mangitou uaṛṛimpulunna poiaroddi na'oman sara niasueannu tampa. Su ngara taumata mangke lai uasaseppe'a. See Mawu Yesus namasingkattu watti'a wuassu Ruata si mangitou.

³ Tantal᷊anna i Tou mabbisara, pia sire appatta uapasanna sangkatou lome apan ia'apidda ringannu Mawu Yesus.

⁴ Arawe ana waugu taumata tumanite manambo, i mangitou tate naaundani Mawu Yesus. Nariaddi i mangitou nalla'ete atuppa su lantakku Mawu Yesus. Wua'udde i mangitou nangul᷊ukku taumata udde sara wilanne.

⁵ Su tempo Mawu Yesus naasilo tumanitem bahewa pangangimanne, i Tou nabbisara taumata lome udde, “Ana'u, manga rosanu suete niampunganna.”

⁶ Manga pira hurun agama apan ua'ianna isudde, mannattakke uaaiwal᷊o sulal᷊ummu naungnga,

⁷ “Waṛṛani atonna taumata indi mabbisara aroddi! I tou mangngadio'a Ruata. Isai wotongnge mangampungnga rosa, wal᷊inewe tumba'u Ruata sassane?”

⁸ Su tempo udde lai Mawu Yesus naasingkatta ṛingiṛṛanni mangitou. See i Tou nabbisara, “Anio i yamiu ma'iwalo sulal᷊ummu naungngu?

⁹ Suapa malluasanne: mabbisara, ‘Rosanu suete niampunganna’, ara'e mabbisara, ‘Pabbangunte, lappute wilannu wuṛṛu amatte’?

¹⁰ Arawe orassa indi i Ya'u sarun mapaal᷊iatta'a si yamiu, manungku su wowon dunia indi Ana'u Taumata pia taṛṛino mangampungnga rosa.” See Mawu Yesus nabbisara taumata lome udde,

¹¹ “Pabbangunte, lappute wilannu wuṛṛu apul᷊ete!”

¹² I tou nabangunna wuṛṛu mal᷊iha-l᷊ihakka nanganu wilanne see sinumabangnga aellehanni mangitou sarangkanambone. Manga taumata udde naherangnga see nadalote Ruata. Unni mangitou, “Taambe saran paassa i ite naasilo arariadianna ereindi!”

Mawu Yesus namago si Lewi

¹³ Mawu Yesus nabelengnga apia su winggin Danon Galilea. Manambo taumata nirumanta ringanni Tou, ne i Tou nangaṛṛa'e si mangitou.

¹⁴ Tantal᷊anna Mawu Yesus u'aamatta isudde, i Tou naasilo sangkatou madarorongnga wose aranne i Lewi ana'i Alfeus, tantal᷊anna ua'ianna su wal᷊em pammanaranne. “Tantalongke si Ya'u,” unnu Mawu Yesus si tou. Ne i Lewi dirumarisikka wuṛṛu tinumantalongke Mawu Yesus.

¹⁵ Su tempo Mawu Yesus tantal᷊anna u'anna su wal᷊en Lewi, nirumantate manambo manga madarorongnga wose wuṛṛu manga taumata apan su aellegu awada'alla taumata lal᷊eo, u'anna su sampunna ringannu Mawu Yesus wuṛṛu mallal᷊aṛṛenggen-Ne. Ana waugu manambo su wallatti mangitou uatantalongnga Mawu Yesus.

¹⁶ Sire pira hurun agama wuassu wallattu taumatan Farisi naasilo Mawu Yesus u'anna su sampunna ringannu manga madarorongnga wose wuṛṛu manga taumata lal᷊eo. Nariaddi i mangitou na'iwal᷊o su mallal᷊aṛṛenggennu Mawu Yesus, “Anio hurunu u'anna su sampunna ringannu madarorongnga wose wuṛṛu manga taumata apan lal᷊eo udde?”

¹⁷ Mawu Yesus naaringikka aiwal᷊o mangitou udde, see sinumimbakka, “Taumata apan tawe marada'a tawe mappandumma doktere, tumba'u taumata marada'a. I Ya'u nirumanta tawe mamago taumata apan uapendamma ririne mapiate, arawe taumata apan aellehanna aral᷊eoanne.”

Pattatatiakka su ola'u puasa

¹⁸ Su sambau tempo, mallal᷊aṛṛenggenni Yohanes Mananaṛṛani wuṛṛu manga taumatan Farisi tantal᷊anna mappuasa. See pia taumata nirumanta ringannu Mawu Yesus wuṛṛu naiwal᷊o, “Anio mallal᷊aṛṛenggenni Yohanes wuṛṛu mallal᷊aṛṛenggennu taumatan Farisi mappuasa, arawe mallal᷊aṛṛenggennu Iamangnga tawe mappuasa?”

¹⁹ Mawu Yesus sinumimbakka, “Su andeangngu awingnga, apa pia manga raho apan tawe umanna? Amungkangngu ma'aawingnga esakka ta'e su sampunna ringanni mangitou, ṛinone i mangitou umanna.

²⁰ Arawe sarun dumanta tempone maa'awingnga esakka udde al᷊apanna wua dinganni mangitou, su tempo udde i mangitou tate umanna.

²¹ Tawe taumata mandappela laubba tabbe ringannu piṛṛissa wakku. Ana waugu piṛṛissa rarapella udde maarinsutta wuṛṛu manggesa'a laubba udde, na'oman sara hesangnge maola'a nangillembong kahewalle.

²² Aroddi lai tawe taumata mallal᷊innu anggore wakku sulal᷊ummu pato'a pisi tabbe. Ana waugu anggore wakku udde sarun mamesangnga pato'a udde. Panginsueanne itarua mangke maramme abbi. Anggore wakku ṛinone ilal᷊inna sulal᷊ummu patoa'a wakku lai!”

Aiwal᷊o su ola'u allon Sabatta

²³ Su sambau allon Sabatta, su tempo Mawu Yesus sinumabbi su sambau waillu gandumma, mallal᷊aṛṛenggen-Ne nanattakke mangngitingnga gandumma.

²⁴ See manga taumatan Farisi naiwal᷊o Mawu Yesus, “Anio manga mallal᷊aṛṛenggennu lullawangnga titan agamang kite, ringannu ma'ola'a apan isassingadda su allon Sabatta?”

^25-26 Mawu Yesus sinumimbakka, “I yamiu taambe naawasa saran paassa apa apan niola'i Daud, su tempo i Abyatar mammanara naola'a imam bahewa. Su tempo i Daud wuṛṛu manga taumatane mal᷊unussa, wuṛṛu tawe anna, i tou sinumutta su Wal᷊e Mawu, wuṛṛu inumanna roti apan suete niola'a sasamba su Ruata. Wuṛṛu roti udde nianggilla lai su manga taumatane. Sumbal᷊i tumuṛṛuttu atorannu agamang kite, tumba'u manga imam botongnge umanna roti udde.”

²⁷ See Mawu Yesus nabbisara apia, “Allon Sabatta niola'a hunan taumata; wal᷊ine taumata hunan allon Sabatta.

²⁸ Nariaddi Ana'u Taumata pia taṛṛino, see lai uataṛṛino allon Sabatta.”