MARKUS 16 - WUKE SUSI WATTI'U AL᷊AL᷊USASSA

Pabawangunnu Mawu Yesus

¹ Napawe allon Sabatta nal᷊iute, i Maria Magdalena, Maria inangngi Yakobus, wuṛṛu i Salome inaite namalli rampa-rampa ipallana winal᷊unannu Mawu Yesus.

² Rua'allo atonna napawe matannallo sumabangke, su allo paarorone misa udde, i mangitou inaite su lal᷊abinganna.

^3-4 Su tangngan dal᷊anna i mangitou uahahatto sangkatou ringannu sangkatou, “Isai wotongnge mantul᷊ungngi ite mangingkattu watu uaṛṛappingnga loṛṛangngu lal᷊abinganna?” Ana waugu watu udde tumaniten wahewalla. Arawe su raranta mangitou isudde, i mangitou naasilo watu udde nawilingke.

⁵ See i mangitou sinumuttate su lal᷊abinganna udde. Sulal᷊umme su samba'a aikkatanna i mangitou naasilo sangkatou umbasanna ual᷊uṛṛen jubah mawira tantal᷊anna ua'ianna, ne i mangitou mangke niṛṛumoro.

⁶ Taumata umbasanna udde nabbisara, “Arie pa'ata'utta! I ya'u masingkatta i yamiu maddea'a Mawu Yesus taumata Nazaret apan suete niarussa. I Tou tate baddia isindi. I Tou nabangunte! Pa'ellega, indi tampane, i mangitou napal᷊allowangngi Tou.

⁷ Orassa indi roote, wal᷊oa'e watti'a indi su mallal᷊aṛṛenggen-Ne, nasutta lai Petrus. Wal᷊oa'a, ‘I Tou inaite malliu ṛoro si yamiu su Galilea. Poiaroddi yamiu sarun maasilo si Tou, ereapa suete niwal᷊on Tou si yamiu.’ ”

⁸ Ne i mangitou sinumabangke wuassu lal᷊abinganna udde see tinumal᷊angnga ana waugu niṛṛumoro wuṛṛu nata'utta. I mangitou tate nabbati'u watti'a sisai-sai, ana waugu i mangitou nata'utta. [

PANGINSUEANNU WOṚṚETTI MARKUS TUMUṚṚUTTU WOṚṚETTA RO'EN AL᷊AMONANE Mawu Yesus naipasilom batangan-Ne si Maria Magdalena

⁹ Napawe Mawu Yesus nabangunte wuassu papate, rua'allo atonna su allo Misa, i Tou paarorone nattingkapasilom batangan-Ne si Maria Magdalena. (Wuassi Maria udde Mawu Yesus suete napasabangngu sire pitu ghaṛṛaho lal᷊eo.) Manga wawine udde inaite ringanni Petrus wuṛṛu manga hawene, see nabbati'a ringannu maautta anambon apa apan suete niapasingkattu taumata umbasanna udde si mangitou.

¹⁰ Ne i Maria Magdalena inaite namasingkattu arariadianna udde su manga hawe Mawu Yesus, apan tantal᷊anna massusa wuṛṛu lulluai. Wua'udde Mawu Yesus sassane nappaattu mallal᷊aṛṛenggen-Ne nabbati'a wuassu ra'i watukku waṛṛatta, watti'a susi wuṛṛu tawe panginsueanne su ola'u asasal᷊amatta apan saran mal᷊annu-l᷊annu.]

¹¹ Arawe napawe i mangitou naaringikka manungku Mawu Yesus nabbiakke apia, wuṛṛu manungku i Maria naasilote si Tou i mangitou tawe mangngimanna.

Mawu Yesus nattingkapasilom batangan-Ne su ruan katou mallal᷊aṛṛenggen-Ne

¹² Wua'udde Mawu Yesus nattingkapasilom batangan-Ne su ruan katou mallal᷊aṛṛenggen-Ne ringannu olangnge apan paṛṛalane. Udde nariaddi su tempo ruan katou udde tantal᷊anna u'amatta mabatuku sambau ampungnga.

¹³ Nariaddi i mangitou nabelengnga wuṛṛu namasingkattu olangnge udde su manga hawene waine. Arawe i mangitou tawe mangngimanna.

Mawu Yesus nattingkapasilom batangan-Ne su mallal᷊aṛṛenggen-Ne

¹⁴ Panginsueanne, Mawu Yesus nattingkapasilom batangan-Ne su sire mapul᷊o assa mallal᷊aṛṛenggen-Ne, su tempo i mangitou tantal᷊anna u'anna. I Tou namo'a si mangitou ana waugu pangangimanni mangitou lome, wuṛṛu tumanite maattikka puane na'oman sara tawe mangngimanna su manga taumata apan suete naasilo sassane manungku Mawu Yesus nabbiakke apia.

¹⁵ See Mawu Yesus nabbisara si mangitou, “Roote su ahewallu runia wuṛṛu wal᷊oa'e Watti'u Al᷊al᷊uassa wuassu Ruata udde su anambon taumata.

¹⁶ Taumata apan tawe mangngimanna sarun iṛṛuumanna. Arawe taumata apan mangngimanna wuṛṛu saṛṛanianna, sarun masal᷊amatta.

¹⁷ Maola'a sambau tatiala manungku i mangitou mangngimanna, manga taumata udde sarun mallimbuakka ghaṛṛaho lal᷊eo ringannu arang-Ku; i mangitou sarun mabbisara sulal᷊ummu al᷊awo'u wisara apan taambe niasingkatanni mangitou.

¹⁸ Amungkangngu i mangitou mangagassa atoanna ara'e ma'inumma pasangkada, i mangitou tawe masilaka. Amungkangngu i mangitou mangandangngu lima su manga taumata marada'a, manga taumata udde sarun mapia.”

Mawu Yesus nasengkengnga watukku surga

¹⁹ Napawe Mawu Yesus suete nagahatto mangitou, i Tou nasengkengke watukku surga. Poiaroddi i Tou uaparenta su sampunna ringannu Ruata.

²⁰ Ne manga mallal᷊aṛṛenggen-Ne inaite wuṛṛu namasingkattem batti'a wuassu Ruata su al᷊awo'u tampa. Wuṛṛu Mawu lai mammanara su sampunna ringanni mangitou wuṛṛu mapaal᷊iatta'a lai ringannu manga al᷊aṛṛindu'a manungku watti'i mangitou udde atonna.] [