MARKUS 14 - WUKE SUSI WATTI'U AL᷊AL᷊USASSA

Mangngaalla su saruannu Mawu Yesus

¹ Rua allo lai Allom Paskah wuṛṛu Ramean Roti Tawe Ragine. Manga imam tembonanne wuṛṛu manga hurun agama tantal᷊anna maddea'a lal᷊anne manametta Mawu Yesus ringannu mal᷊anna-l᷊annaba, wuṛṛu mamate si Tou.

² “Arawe arie i ite ma'ola'a udde su tempon ramea,” wisara mangitou, “ana waugu takka maola'a pagahahio.”

Mawu Yesus niseboṛṛannu lana mawangngi

³ Napawe Mawu Yesus na'omate su Betania, su wal᷊en Simon apan dorone uatataṛṛangnga rada'a paro, sangkatou wawine nirumanta ringanni Tou. I tou uaapiddu sambau wotolla pualam, lal᷊oṛṛoannu lana mawangngi apan maarega, niola'a wuassu ṛamutta mawangngi. Su tempo Mawu Yesus tantal᷊anna u'anna, wawine udde namesangnga wotolla udde wuṛṛu nanebokku lana mawangngi su pua Mawu Yesus.

⁴ Sire pira taumata isudde mangke nasa'u wuṛṛu uawawisara sangkatou ringannu sangkatou, “Apa hunane lana mawangngi udde iasebokka aroddi?

⁵ Lana udde wotongnge iwal᷊u'a ringannu aregane mallebbe wuassu tallu ṛasutta roitta sal᷊a'a, wuṛṛu roinne ionggolla su taumata asiangnga!” Ne i mangitou nasa'ute su wawine udde.

⁶ Arawe Mawu Yesus nabbisara, “Wala'e aroddi i tou! Anio i yamiu mapaasusan tou? I tou ma'ola'a inolaanna mapia, wuṛṛu ma'al᷊uassa si Ya'u.

⁷ Taumata asiangnga sidutu su wallatti yamiu. Suapan tempo amungkangngu i yamiu maapulu, i yamiu wotongnge mantul᷊ungngi mangitou. Arawe i Ya'u tate mal᷊annu su sampunna ringanni yamiu.

⁸ Wawine indi suete na'ola'a apan wotongnge olaanni tou. I tou suete nanaddia lana mawangngi sia'u su tempo i Ya'u taambe nilabingnga.

⁹ Pangimante! Su ahewallu runia, su tampa Watti'u Al᷊al᷊uassa wuassu Ruata iapasingkatta, inolaannu wawine indi sarun iwatti'a lai, maola'a sambau pananaunganna si tou.”

I Yudas inumire mamate Mawu Yesus

¹⁰ See i Yudas Iskariot, sangkatou wuassu sire mapul᷊o dua mallal᷊aṛṛenggennu Mawu Yesus, inaite ringannu manga imam tembonanne ringannu pandumma mamate Mawu Yesus.

¹¹ I mangitou lembon lulluassa naaringikka wisarane udde, wuṛṛu na'ire sarun mangagillu roitta si Yudas. Ne Yudas mannattakke maddea'a tempone mapia mamate Mawu Yesus.

Mawu Yesus inumanna annu Paskah ringannu manga mallal᷊aṛṛenggen-Ne

¹² Su allo paarorone wuassu Allo Wahewan Roti Tawe Ragine – su tempo taumata mammototta domban Paskah – mallal᷊aṛṛenggennu Mawu Yesus naiwal᷊o si Tou, “Suapa tampa ipa'apulun Iamangnga yami manaddia annu Paskah su Iamangnga?”

¹³ Mawu Yesus nandolokku ruan katou su wallatti mangitou, “Roote su soa, poiaroddi sangkatou esakka apan tantal᷊anna uaapiddu sambau wensada lal᷊oṛṛoannu ua'e, sarun massomban kamiu. Tantalongke si tou,

¹⁴ watukku wal᷊e apan suttanni tou wuṛṛu wal᷊oa'a su tatahuannu wal᷊e udde, ‘Iamangnga Huru ma'iwal᷊o, suapa tampane i Tou wuṛṛu mallal᷊aṛṛenggen-Ne umanna annu Paskah.’

¹⁵ Taumata udde sarun mamantingidu sambau wabo'a ual᷊iu rosone apan bahewa. Wabo'a udde suete niatokka, nasuungnga ringannu lal᷊oṛṛone. Saddiaite sarangkanambone udde poiaroddi si ite.”

¹⁶ See ruang katou mallal᷊aṛṛenggennu Mawu Yesus udde inaite watukku soa. Poiaroddi itarua naaratingnga sarangkanambone ere suete niwalo Mawu Yesus. See i mangitou nanaddiate annu Paskah.

¹⁷ Ṛabbine, Mawu Yesus nirumanta ringannu sire mapul᷊o dua mallal᷊aṛṛenggen-Ne.

¹⁸ Wuṛṛu tantal᷊anna i mangitou ua'ianna u'anna, Mawu Yesus nabbisara, “Padaringikka: pia sangkatou, wuassu wallatti yamiu, apan su orassa indi u'anna ringang-Ku sarun mamate si Ya'u.”

¹⁹ Naaringikka udde, mallal᷊aṛṛenggennu Mawu Yesus mangke nasusa. See sangkatou ringannu sangkatou nanattakke naiwalo Mawu Yesus, “Asinungka wal᷊ine i ya'u apan su pandummi Iamangnga?”

²⁰ Mawu Yesus sinumimbakka, “I Tou sangkatou wuassu wallatti yamiu sire mapul᷊o dua indi, apan u'anna su lama'a sambau ringang-Ku.

²¹ Atonna Ana'u Taumata sarun mate ere uawoṛṛetta su Wuke Susi. Arawe nasilakate taumata apan mamate Ana'u Taumata udde. Mappianne taumata udde tawe niasungkangnga!”

Sal᷊iwangngu Mawu

²² Tantal᷊anna i mangitou u'anna, Mawu Yesus nanganu roti inumal᷊iomante aal᷊iomannu aadiangkamanna su Ruata. Wua'udde i Tou nattahiate roti ringannu lima-Ne, wuṛṛu niaggile su mallal᷊aṛṛenggen-Ne ringannu wisara-Ne, “Sengkampe wuṛṛu ante, indi wadang-Ku.”

²³ Wua'udde i Tou nanganute sambau mangkon anggore. I Tou inumal᷊iomanna aal᷊iomannu aadiangkamanna su Ruata, see nangagille mangko udde su mallal᷊aṛṛenggen-Ne. Wua'udde i mangitou sarangkanambone na'inumma anggore udde.

²⁴ Wua'udde Mawu Yesus nabbisara, “Ete indi ṛaṛṛa-U apan mapaasuungngu pa'airen Duata, ṛaṛṛa apan suete niapaturo hunan taumata nambo.

²⁵ Pangimante: i Ya'u tate ma'inumma anggore indi apia, ma'oman sara tempone i Ya'u ma'inumma anggore wakku su sampunna ringanni yamiu su Runia Wakkun Iamang-Ku.”

²⁶ Wua'udde i mangitou nangantarin sambau antari daralo. Wuṛṛu wua'udde i mangitou inaite su Wuiddu Zaitun.

Papasingkata manungku Petrus sarun massinaaddu Mawu Yesus

²⁷ Wua'udde Mawu Yesus nabbisara si mangitou, “I yamiu sarangkanambone sarun tumal᷊angnga manantang-Ku. Ana waugu sulal᷊ummu Wuke Susi uawoṛṛetta, ‘Ruata sarun mamate mallal᷊u'adde, wuṛṛu ammul᷊annu dombane sarun massal᷊iawukka.’

²⁸ Arawe napawe i Ya'u iapawangunna apia, i Ya'u sarun inai malliu ṛoro si yamiu su Galilea.”

²⁹ “Tawe,” sasimbakki Petrus, “wala'e i mangitou nambo manantangngu Iamangnga, i ya'u atonna-tonna tawe manantangnga.”

³⁰ “Paanaunge,” wisara Mawu Yesus, “ṛabbi indi lai, tantal᷊anna manu'a taambe inumu'u aruane, i'o paatallute massinaadu riri-U.”

³¹ I Petrus sinumimbakka ringannu atonna-tonna, “Wala'e i ya'u mate su sampunna ringannu Iamangnga, saran paassa ya'u tawe mabbisara manungku i ya'u waggan Iamangnga!” Wuṛṛu mallal᷊aṛṛenggen-Ne waine lai nabbisara aroddi.

Mawu Yesus inumal᷊iomanna su Getsemani ( Mat. 26:36-46 ; Luk. 22:39-46 )

³² I mangitou na'omate su sambau tampa aranne Getsemani, wuṛṛu Mawu Yesus nabbisarate mallal᷊aṛṛenggen-Ne, “A'iante isindi tantal᷊anna i Ya'u inai umal᷊iomanna.”

³³ See Mawu Yesus nangahe si Petrus, si Yakobus wuṛṛu si Yohanes inai su sampunna ringanni Tou. I Tou nanattakke massusa wuṛṛu sussinggawangnga.

³⁴ “Naungku massusa atonna,” unnu Mawu Yesus si mangitou, “pendamanna ere mappulute mate. Atana'e isindi wuṛṛu paariagate!”

³⁵ Mawu Yesus inaite nangindau adio'a see inumal᷊intuda su leta'a wuṛṛu inumal᷊iomanna. Sulal᷊ummu aal᷊iomanne i Tou nadorongnga amungkangngu wotongnge, i Tou tawe mamendamma orassu sansara udde.

³⁶ “Iamangnga, o Iamangnga,” wisara-Ne, “tawe saran sambau apan tawe maola'a su Iamangnga. Al᷊appe asasusa indi wuassia-U. Arawe arie tumuṛṛutta apulu-U ewe'e apulun Iamangnga.”

³⁷ Wua'udde Mawu Yesus nabelengke apia wuṛṛu inaratinganna mallal᷊aṛṛenggen-Ne tantal᷊anna mattiilla. I Tou nabbisara si Petrus, “Simon, i'o mattiilla? Tumba'u sangka orassa i'o tawe maariaga?”

³⁸ See Mawu Yesus nabbisara si mangitou, “Pandiagate, wuṛṛu a'al᷊iomanna, tadea'u yamiu tawe maasomba wawono'a. Ghaṛṛahonu ma'apulu ma'ola'a su ṛinone, arawe i yamiu tawe maataṛṛangnga ana waugu pallal᷊agun taumata udde lome.”

³⁹ Paasa lai Mawu Yesus inai umal᷊iomanna ringannu aal᷊iomanne apan uasul᷊ungnga.

⁴⁰ Wua'udde i Tou nabelengke apia ringannu mallal᷊aṛṛenggen-Ne wuṛṛu naaratingnga i mangitou ta'e mattiilla, ana waugu i mangitou tumaniten a'amatiil᷊anna. Ne i mangitou wagga apa apan sarun iwisara mangitou su Mawu Yesus.

⁴¹ Napawe Mawu Yesus nabelengke ringanni mangitou apia su atallune, i Tou nabbisara, “Ta'e lai mattiilla yamiu wuṛṛu uaillol᷊o? Wotongngete! Nia'omante tempone Ana'u Taumata itantilla su liman taumata marosa.

⁴² Pabbangunte, wette i ite inaite. Pa'ellega! Taumata apan mamate Sia'u uddete!”

Mawu Yesus sinametta

⁴³ Tantal᷊anna Mawu Yesus ta'e mabbisara, nirumantate i Yudas, sangkatou wuassu sire mapul᷊o dua mallal᷊aṛṛenggen-Ne udde. Uaṛṛundinganni si tou lai nirumanta taumata nambo uaapiddu hal᷊ele wuṛṛu papuulla. I mangitou nirolokku manga imam tembonanne, manga hurun agama wuṛṛu manga piaṛṛa'u taumatan Yahudi.

⁴⁴ Taumata taṛṛa pate suete nanantunnu sambau tanda si mangitou. “Taumata apan ta'u ari'anna,” unni tou si mangitou, “eteudde taumata-Ne. Sametta i Tou wuṛṛu apira'a ringannu riagane apan matohassa.”

⁴⁵ Su tempo i Yudas nirumanta, i tou lapiddu inai ringannu Mawu Yesus wuṛṛu nabbisara, “Iamangnga Huru!” wua'udde i tou nangari'a Mawu Yesus.

⁴⁶ See manga taumata nirumanta su sampunna ringanni Yudas nanametta Mawu Yesus wuṛṛu niṛṛapusse i Tou.

⁴⁷ Arawe sangkatou su wallattu taumata isudde nanawutta hal᷊ele wuṛṛu namilitta allangngu imam bahewa, na'oman sara napototta tal᷊ingane.

⁴⁸ See Mawu Yesus nabbisara si mangitou, “Anio i Ya'u indi taumata lal᷊eo, na'oman sara i yamiu nirumanta uaapiddu hal᷊ele wuṛṛu papuulla manametta si Ya'u?

⁴⁹ Miallo-miallo I Ya'u mangngaṛṛa'a su Wal᷊e Mawu su saruanni yamiu arawe i yamiu tawe manametta si Ya'u. Arawe atonna sarun maola'a aroddi, tadea'u matipusse apa apan uawoṛṛetta sulal᷊ummu Wuke Susi.”

⁵⁰ Anambo mallal᷊aṛṛenggen-Ne tinumal᷊angnga nanantangngu Mawu Yesus.

⁵¹ Sangkatou umbasanna tumba'u ualuṛṛen mal᷊aṛṛenessa sanggesa'a ual᷊indumma wadangnge tinumantalongnga Mawu Yesus. Manga taumata maapulu manametta si tou,

⁵² arawe i tou namallossu mal᷊aṛṛenessa udde, see tinumal᷊angnga tantol᷊e.

Mawu Yesus su saruannu Mallaṛṛuungngu Agama

⁵³ Mawu Yesus niapidde su wal᷊e imam bahewa. Poiaroddi anambon imam tembonanne, piaṛṛa'u Yahudi, wuṛṛu hurun agama maammulla.

⁵⁴ Petrus uatantalongnga Mawu Yesus wuassu marau na'oman sara sinumutta su passalangannu wal᷊em imam bahewa. Poiaroddi i tou inuma'ianna mandarangnga maranim putungnga su sampunna ringannu mandariaga.

⁵⁵ Manga imam tembonanne wuṛṛu manga Mallaṛṛuungngu Agama mangke maddea'a maasomba pasasal᷊a Mawu Yesus tadea'u wotongnge maṛṛuumanni Tou ma'oman sara pateanna. Arawe i mangitou tawe naasomba saran sambau pasasal᷊a.

⁵⁶ Manambo mattatiala awusu niwagoanna iapatiala awusu su saruannu Mawu Yesus, arawe sasimbakki mangitou uapapaṛṛala sangkatou ringannu sangkatou.

⁵⁷ See manga pira taumata mattatiala nirumarisikka wuṛṛu nangagillu tattiala awusu su ola'u Mawu Yesus.

⁵⁸ “I yami naaringikka taumata indi mabbisara, ‘I Ya'u sarun manggohakku Wal᷊e Ruata indi apan suete niola'u taumata, wuṛṛu napawe tallute allo i Ya'u sarun mapararisikku waine lai, apan wal᷊ine niola'u taumata.’ ”

⁵⁹ Arawe wisara manga taumata udde uapapaṛṛala sangkatou ringannu waine.

⁶⁰ Ne imam wahewa dirumarisikka su saruanni mangitou sarangkanambone wuṛṛu naiwal᷊o Mawu Yesus, “Anio I'o tawe sumimbakka manga aiwal᷊o apan ipa'iwal᷊o Si'o?”

⁶¹ Arawe Mawu Yesus mal᷊annaba. I Tou tawe sinumimbakka saran paassa. See imam bahewa udde naiwal᷊o paassa lai si Tou, “Ete I'o Ratum Punnu Sal᷊amatta, Ana'u Ruata Lembo Naukkassa?”

⁶² “Ete i Ya'u,” sasimbakku Mawu Yesus, “wuṛṛu i yamiu sarangkanambone sarun maasilo Ana'u Taumata uma'ianna su uanannu Ruata Apan Lembo Mataṛṛino wuṛṛu rumanta sulal᷊ummu winabbawa wuassu langitta!”

⁶³ Ne imam wahewa nanggesa'a laungnge wuṛṛu nabbisara, “Ipa'ura lai sakassi!

⁶⁴ I yamiu naaringikke sassane manga wisara-Ne apan ipangngadio'a Ruata. Orassa indi ereapa i'o makkawessu hatto indi?” I mangitou sarangkanambone nakkawessa manungku Mawu Yesus nassal᷊a, wuṛṛu ṛinone iṛṛuumanna ma'oman sara mate.

⁶⁵ See sire pira taumata nanattakke mangngadu Mawu Yesus, wuṛṛu i mangitou nallindumma mata-Ne wuṛṛu namuulla si Tou, see nabbisara, “Si'ata'a, isai namuulla Si'o?” Manga mandariaga lai namero Mawu Yesus.

Petrus nassinaadu Mawu Yesus

⁶⁶ Tantal᷊anna Petrus ta'e su passalanganna, sangkatou wawine allangngu imam wahewa nirumanta isudde.

⁶⁷ Napawe naasilo si Petrus manningikka maranim putungnga, i tou nanutukka mapia-pia hatim Petrus wuṛṛu nabbisara, “Wal᷊inewe i'o lai su sambau ringannu Mawu Yesus taumata Nazaret udde?”

⁶⁸ Arawe Petrus nassinaada. “I Ya'u waga wuṛṛu tawe maasunna apa pandumannu,” unni Petrus su mangangimbe udde. See Petrus inaite su ngaram pasallangannu wal᷊em imam wahewa udde. [Su orassa udde lai manu'a inumu'u.]

⁶⁹ Mangangimbe wawine udde na'ellega si Petrus apia, wuṛṛu nabbisara su manga taumata isudde, “Atonna i tou sangkatou wuassu wallatti mangitou!”

⁷⁰ Arawe Petrus nassinaada apia. Tawe nal᷊annu wua'udde, manga taumata isudde nabbisara apia si Petrus, “Tate maappasinaada lai i'o, atonna i'o sangkatou wuassu wallatti mangitou, ana waugu i'o wuassu Galilea!”

⁷¹ See Petrus nanattakke massalu wuṛṛu nabbisara, “I Ya'u tawe maaillal᷊a taumata apan ipappandummi i yamiu udde!”

⁷² Orassa udde lai manu'a inumu'u aruane. Wuṛṛu Petrus naanaungnga manungku Mawu Yesus suete nabbisara si tou. “Tantal᷊anna manu'a taambe inumu'u paarua, i'o paatallute massinaadu riri-U.” Ne Petrus lulluaite ringannu massusa atonna.