MARKUS 13 - WUKE SUSI WATTI'U AL᷊AL᷊USASSA

Mawu Yesus nabatti'u ahahohakku Wal᷊e Mawu

¹ Su tempo Mawu Yesus nanantangken Bal᷊e Mawu, sangkatou su wallattu mallal᷊aṛṛenggen-Ne, nabbisara, “Iamangnga Huru, pa'ellega manga wal᷊e udde. Pa'ellega manga watune. Wal᷊ine hampa aṛṛamage!”

² Mawu Yesus sinumimbakka, “I'o ma'ellega manga wal᷊e apan wahewa udde? Tawe saran sambau watu wuassu wal᷊e udde mallambe uaatokka su tampane, sarangkanambone sarun iapaahohakka.”

Asasusa wuṛṛu pananansara

³ Wua'udde Mawu Yesus inaite su Wuiddu Zaitun, wuṛṛu inuma'iante su tampa uasaruanna Bal᷊e Mawu. See i Petrus, i Yakobus, i Yohanes wuṛṛu i Andreas nirumanta ringanni Tou ana maggahatto-Ne sassane.

⁴ “Annama'a wal᷊oa'a si yami Iamangnga,” unni mangitou si Tou, “Angngerate sarangkanambone udde sarun mariaddi? Wuṛṛu manga tanda apa apan mammasingkatta manungku tempone nia'omante?”

⁵ “Paatehamma,” sasimbakku Mawu Yesus, “arie ma'oman sara yamiu aawusuanna.

⁶ Manambo taumata sarun dumanta ringannu arang-Ku see mabbisara, ‘Ete i Ya'u i tou udde!’ see nangawusute taumata nambo udde.

⁷ Amungkangngu i yamiu maaringikka manga tingikku pangalo wuṛṛu manga watti'u pasaseetta, arie pa'ata'utta. Sarangkanambone udde sarun mariaddi, arawe sarangkanambone udde tawe papasingkatta manungku temponete kiamatta.

⁸ Walahanna sambau sarun mamangalo walahanna waine. Araratuanna sambau sarun mamangalo araratuanna waine. Su al᷊awo'u tampa sarun mallinukka wuṛṛu pia al᷊al᷊unussa. Sarangkanambone udde wakkute panattaṛṛanne, ere rada'a apan niapendamannu sangkatou wawine apan mangunsiwe.

⁹ I yamiu ṛinone paatehamma, ana waugu yamiu sarun sametanna wuṛṛu parikisanna su saruannu mallaṛṛuungnga. I yamiu sarun puul᷊anna su manga wal᷊em pattataṛṛamawuanna. I yamiu sarun parikisanna sumaruanna manga tembonanne wuṛṛu manga ratu ana waugu i yamiu mallal᷊aṛṛenggeng-Ku. Wuṛṛu eteudde temponu manganggillu tatiala su ola'u riri-U si mangitou.

¹⁰ Watti'u Al᷊al᷊uassa wuassu Ruata udde sarun iapasingkatta su anambon walahanna.

¹¹ Wuṛṛu napawe yamiu sametanna wuṛṛu parikisanna su saruannu mallaṛṛuungnga, arie passinggawangnga su ola'u apa apan sarun iwisaran kamiu. Amungkangngu nia'omante tempone mabbisara, wal᷊oa'a apa apan suete niapaasingkatta si yamiu su tempone. Ana waugu manga wisara apan iwabbisarang kamiu udde wal᷊ine wisaranu sassane, ewe'e nirumanta wuassu Ghaṛṛaho Ruata.

¹² Taumata sarun mandal᷊eo tuṛṛangnge sassane ma'oman sara pateanna. Udde lai sarun mariaddi su wallattu iamangnga wuṛṛu anangnge. Al᷊aṛṛana'a sarun lumawangnga inangnga iamangnge, wuṛṛu manantilli mangitou pateanna.

¹³ I yamiu sarun iarintinnu anambon taumata ana waugu yamiu mallal᷊aṛṛenggeng-Ku. Arawe taumata apan matataṛṛangnga ma'oman sara panginsueanne sarun masal᷊amatta.”

Al᷊al᷊eo apan maahohakka

¹⁴ “I yamiu sarun maasilo ‘Al᷊al᷊eo apan maahohakka’ uarisikka su tampa apan isassingadda si tou. (Iapasingkatta su mabawasa: Ṛingira'e apa atappasanne!) Su tempo udde taumata apan uatana'a su Yudea ṛinone tumal᷊angnga watukku wuidda.

¹⁵ Taumata apan roso su wowon atuppu wal᷊e arie pallintukka wuṛṛu sumutta su wal᷊e manganu sarannapa.

¹⁶ Taumata apan su wailla arie pabelengnga mangal᷊appa jubahne.

¹⁷ Ma'ata'utta atonna manga allo udde su wawine apan uailloṛṛo, su inangnga apan ta'e mappasusun anangnge.

¹⁸ Aal᷊iomante tadea'u manga olangnge udde tawe mariaddi, su tempo manguranna.

¹⁹ Su manga allo apan ma'ata'utta udde, sarun pia sambau asasusa apan taambe nariaddi, ro'en Ruata nandiaddi runia na'oman sara orassa indi, wuṛṛu tate lai mariaddi apia.

²⁰ Unnu wisara, Ruata tawe nangautta tempone udde, ne tawe saran sangkatou masal᷊amatta. Arawe ana waugu manga taumata apan nipele-Ne, Ruata nangautta tempone udde.

²¹ Su tempo udde amungkangngu piaddu sangkatou-sangkatou mabbisara si yamiu, ‘Ellehete Ratum Punnu Sal᷊amatta udde isindi!’ ara'e ‘Ellehete i Tou isudde!’ – arie pangimanna taumata udde.

²² Ana waugu mananal᷊amatta awusu wuṛṛu manga nabi awusu sarun dumanta. I mangitou sarun ma'ola'a al᷊awo'u inolaanna wahahewa wuṛṛu al᷊awo'u al᷊aṛṛindu'a ipangawusu al᷊aṛṛana'u Ruata amungkangngu wotongnge.

²³ Nariaddi, paatehamma! Sarangkanambone udde suete Ta'u niapaasingkatta si yamiu tantal᷊anna olangnge udde taambe nariaddi.”

Darantan Ana'u Taumata

²⁴ “Napawe tempon asasusa udde nal᷊iudde, matannallo sarun maddandumma, wuṛṛu wul᷊anna tate lai semakke.

²⁵ Manga anumpitanna sarun manawo wuassu langitta, wuṛṛu manga tembonannu winalanganna sarun massongkakka.

²⁶ Su tempo udde Ana'u Taumata sarun iasilo rumanta wuassu winabbawa ringannu taṛṛino apan bahewa wuṛṛu mawantuga.

²⁷ I Tou sarun mandolokku manga mala'ekatta mangammulu al᷊awo'u walahanna wuassu pi'un runia appatta, wuassu manga pentakku runia wuṛṛu manga pentakku langitta.”

Al᷊aṛṛa'a wuassu alu ara

²⁸ “Panganute al᷊aṛṛa'a wuassu alu ara. Amungkangngu manga rongngane nangelompe wuṛṛu lullaukke, wuṛṛu mannattakke mallal᷊uwo, i yamiu masingkatte manungku tempom padissa maranite.

²⁹ Aroddi lai amungkangngu i yamiu maasilo al᷊awo'u olangnge udde mariaddi, i yamiu masingkatte manungku tempone maranite atonna.

³⁰ Asingkate! Anambon arariadianna indi sarun mariaddi tantal᷊anna manga taumata apan wiakka orassa indi sarangkanambone taambe nate.

³¹ Langitta wuṛṛu runia sarun mawul᷊i, arawe wisara-U sidutu ma'oman sara mal᷊annu-l᷊annu.”

Tawedu masingkattu allone wuṛṛu oranne

³² “Salaiwe aroddi, tawedu saran sangkatou masingkattu tempo suapa allone ara'e oranne. Manga mala'ekatta su surga lai wagga, Ana'a lai wagga, tumba'u Iamangnga sassane masingkatta.

³³ Nariaddi yamiu ṛinone paariaga ana waugu i yamiu wagga tingngerate tempone.

³⁴ Olangnge isumandingnga ere sangkatou apan nanantangngu wal᷊ene see inai su tampa marau. I Tou nandolokku manga ralol᷊oṛṛanne mandiaga wal᷊ene, wuṛṛu nangagillu manara si mangitou sangkatou-sangkatou. Su mandariaga ngara, i tou nananata tadea'u mandiaga mapia-pia.

³⁵ Ana waugu udde i yamiu ṛinone paariaga, ana waugu i yamiu wagga tingngerate tatahuannu wal᷊e udde mabelengnga – asinungka wawallo, asinungka allorane, asinungka maraninnallo, ara'e asinungka su sasabangngu matannallo.

³⁶ Amungkangngu i tou nirumanta awagananna, arie ma'oman sara i tou maaratingnga si yamiu tantal᷊anna mattiilla.

³⁷ Apa iwabbisara-U indi si yamiu, iwabbisara-U lai su manga taumata: paariagate!”