MARKUS 12 - WUKE SUSI WATTI'U AL᷊AL᷊USASSA

Sasumandingngu mamamanaram baillu anggore

¹ Wua'udde Mawu Yesus nanattakke mangngaṛṛa'a ringannu sasumandingnga su manga imam tembonanne, manga hurun agama wuṛṛu manga piaṛṛa'u Yahudi udde. Mawu Yesus nabbati'e, “Pia sangkatou nassuanna su sambau waillu anggore, see wailla udde pinal᷊iwutannu paggala. Wua'udde i tou naal᷊i loṛṛangnga pa'olaanna pamakkannu anggore, see i tou napararisikku wal᷊em pandariaganna. Wua'udde i tou napasewan waillu anggore udde su sire pira mammamanara, see inaite su wanua waine.

² Napawe nia'omante tempone mangitingnga wuan anggore, taumata udde nandolokku sangkatou allangnge ringannu mammamanaram waillu anggore udde, iapatarimmattu wageangnge.

³ Arawe mamamanara udde nanametta mangangimbe udde. Wua'udde pinuulli mangitou see nandolokki tou niapaapul᷊e ringannu tawe ul᷊ene.

⁴ See tatahuannu wailla udde nandolokku apia sangkatou mangangimbe waine. Arawe mamamanara udde namuulla puan mangangimbe udde see nillimbuaṛṛanna wuṛṛu nipansilianna.

⁵ Tatahuannu wailla udde nandolokka apia sangkatou mangangimbe baine. Arawe i mangitou namate mangangimbe udde. Wuṛṛu ete aroddi lai niola'i mangitou su anambo mangangimbe apan waine: lapiddu nipuulla wuṛṛu piaddu lai nipate.

⁶ Isai lai wotongnge irolokku tatahuannu wailla udde orassa indi? Ete sangkatou, eteudde anangnge sassane apan arangnguanne. Nariaddi panginsueanne i tou nandolokku anangnge ringannu mamamanara udde. ‘Ana'u sarun addatanni mangitou,’ su ṛingiṛṛanne.

⁷ Arawe mammamanara udde nabbisara sangkatou ringannu sangkatou, ‘Ete i tou indi manahuanna, wette i ite mamate si tou, tadea'u i ite maasomba darotongnge!’

⁸ Ne ana'a udde sinametta, see nipate. Winal᷊unanne niramme mangitou su liuddu wailla udde.”

⁹ See Mawu Yesus naiwal᷊o, “Apa sarun olaannu tatahuannu wailla udde? I tou sarun rumanta wuṛṛu mamate manga mabbawailla udde, see manantillu wailla udde su mabawailla waine.

¹⁰ I yamiu asinungka suete naawasa addoanne sulal᷊ummu Wuke Susi, ‘Watu apan tawe ipaattu manga maaola'a wal᷊e naola'e watu apan paarorone.

¹¹ Ete indi inolaannu Mawu; maṛṛamaga atonna!’ ”

¹² Ne manga pira piaṛṛa'u walahannu Yahudi apan naaringikka sasumandingnga udde, mangke maddea'a manametta Mawu Yesus, ana waugu i mangitou masingkatte sasumandingnga udde ipammasendekku Mawu Yesus si mangitou. Arawe i mangitou matta'uttu taumata nambo. Nariaddi, i mangitou inaite nanantangngu Mawu Yesus.

Su ola'u pamamaekka wose

¹³ Manga pira taumatan Farisi wuṛṛu manga pira taumatan Herodes nirolokka maddea'a mapaasal᷊a Mawu Yesus ringannu manga aiwal᷊o.

¹⁴ I mangitou nirumanta ringannu Mawu Yesus wuṛṛu nabbisara, “Iamangnga Huru, i yami masingkatta Iamangnga tawe mangawusu wuṛṛu tawe madaringikka ṛingiṛṛanni sai-sai. Iamangnga mangngaṛṛa'a ringannu masema-semakka su ola'u apulu Ruata su taumata, ana waugu Iamangnga tawe mamile taumata. Ne Iamangnga wotongnge mamasingkatta si yami, ‘Tumuṛṛuttu atorannu agaman kite, wotongnge i ite mamaekka wose su Kaisar ara'e tawe wotongnge? I ite mamaekka wose udde ara'e tawe?’ ”

¹⁵ Mawu Yesus naasingkatta lilangkamal᷊e'i mangitou. I tou sinumimbakka, “Anio i yamiu maddea'a mappaasal᷊a-U? Annama'a paelleha'a si Ya'u sambau roitta sal᷊a'a.”

¹⁶ Ne i mangitou nangagillu roitta sal᷊a'a sambau si Tou. See Mawu Yesus naiwal᷊o, “Hambaranna wuṛṛu aranni sai indi?” “Kaisar,” sasimbakki mangitou.

¹⁷ “Ne, amungkangngu aroddi,” wisara Mawu Yesus, “onggol᷊a'a si Kaisar apa apan tatahuanannu Kaisar, wuṛṛu onggol᷊a'a su Ruata apa apan tatahuanannu Ruata.” I mangitou naherangnga naaringikka si Tou.

Su ola'u pabbawangunna wuassu papate

¹⁸ Sire pira taumatan Saduki nirumanta ringannu Mawu Yesus. (I mangitou udde walahannu taumata pia addapatta manungku taumata nate tawe mabangunna apia.)

¹⁹ “Iamangnga Huru,” wisara mangitou su Mawu Yesus, “i Musa namoṛṛettu tita indi si ite: ‘Amungkangngu sangkatou esakka mate wuṛṛu i tou tawe ana'a, ne tuṛṛangnge sarun maawingngu inawal᷊uanne udde tadea'u pia walahanna su taumata apan natete udde.’

²⁰ Suete nariaddi pia sire pitu sangkatuṛṛangnga. Pahul᷊une naawingnga, wua'udde nate tawe naasomba ana'a.

²¹ Wua'udde iapa aruane naawingngu inawal᷊uanne udde, arawe i tou lai nate tawe naasomba ana'a. Olangnge udde nariaddi lai su tuṛṛangnge atallune,

²² wuṛṛu nallal᷊isansunna na'oman sara appitune. Panginsueanne wawine udde lai nate.

²³ Su allon taumata nate mabangunna apia, awingngi sai wawine udde? Ana waugu sire pitu sangkatuṛṛangnga suete naawingngi tou!”

²⁴ Mawu Yesus sinumimbakka, “I yamiu niumal᷊iwu atonna. Ana waugu yamiu tawe maasunna Wuke Susi wuṛṛu lai taṛṛinon Duata.

²⁵ Ana waugu napawe manga taumata nate mabangunna apia, i mangitou tate lai ma'awingnga, arawe i mangitou sarun mabbiakka ere lai mala'ekatta su surga.

²⁶ Wuṛṛu su ola'u taumata nate iapawangunna apia, i yamiu taambe naawasa sulal᷊ummu wuke Musa su ola'u anggaṛṛumunanne lukkenggamma udde? Sulal᷊ummu manga addoanne udde, uawoṛṛetta manungku Ruata nabbisara si Musa, ‘Ete I Ya'u Ruatan Abraham, Ruatan Ishak, wuṛṛu Ruatan Yakub.’

²⁷ Ruata udde wal᷊ine Ruatan taumata nate. I Tou Ruatan taumata wiakka. I yamiu inumal᷊iwu atonna!”

Parenta apan ahewal᷊anne

²⁸ See nirumantate sangkatou hurun agama madaringikka hatto Mawu Yesus wuṛṛu manga taumatan Saduki udde. Hurun agama udde naasilo manungku Mawu Yesus suete sinumimbakka manga taumata udde ringannu mapia-pia. Ne i tou naiwal᷊ote Mawu Yesus, “Parenta suapa apan ahewal᷊anne wuassu al᷊awo'u parenta?”

²⁹ Mawu Yesus sinumimbakka, “Parenta paarorone eteudde: ‘Paddaringikkawe, i yamiu walahannu Israel! Mawu Ruatan kite, Mawu udde tinggassa.

³⁰ Pandangngu Mawu Ruatanu ringannu ahewallu naungngu, ringannu ahewallu apulunu, ringannu ahewallu apendammu, wuṛṛu ringannu al᷊awo'u auatannu.’

³¹ Parenta aruane eteudde, ‘Pandangngu sansul᷊ungngu taumata ere i'o lai mandangngu ririnu sassane.’ Tate parenta waine apan nangillembon ahewalle wuassu parenta darua udde.”

³² See hurun agama udde nabbisara Mawu Yesus, “Naṛṛino atonna, Iamangnga Huru! Atonna su wisaran Iamangnga: Ruata apan tinggassa, wuṛṛu tawe Ruata lai waine.

³³ Wuṛṛu ṛinone taumata mandangngu Ruata ringannu ahewallu naungnge, wuṛṛu ringannu anambon ṛingiṛṛanne see lai ringannu anambon auatanne. Wuṛṛu i tou lai ṛinone umakkannu sansul᷊ungnge ere lai ririne sassane. Udde mappianne wuassu mangngonggolu sasamba itatambunna wuṛṛu manga sasamba waine su Ruata.”

³⁴ Mawu Yesus naasilo manungku hurun agama udde suete sinumimbakka ringannu mapia atonna. Wuṛṛu Mawu Yesus nabbisara si tou, “I'o maranite maola'a lal᷊oṛṛon araratuannu Ruata.” Wua'udde tate saran sangkatou lai apan waṛṛani mapaasabangngu aiwal᷊o su Mawu Yesus.

Su ola'u Ratum Punnu Sal᷊amatta

³⁵ Tantal᷊anna mangngaṛṛa'a su Wal᷊e Mawu, Mawu Yesus naiwal᷊o, “Ereapa manga hurun agama wotongnge mabbisara manungku Ratum Punnu Sal᷊amatta udde wuassu papapulunni Daud?

³⁶ Wutte'e Daud sassane – ana waugu nirantannu Ghaṛṛaho Ruata – nabbisara, ‘Mawu nabbisara su Mawu-U: a'iante su samba'an uanang-Ku ma'oman sara i Ya'u ma'ola'a manga seennu massuṛṛubawa si'o.’

³⁷ Nariaddi amungkangngu i Daud mannagon Ratum Punnu Sal᷊amatta udde ‘Mawu’, ereapa wotongnge i tou papapulunni Daud?” Taumata nambo apan su Wal᷊e Mawu udde mal᷊uassa naungnge madaringikka Mawu Yesus mangngaṛṛa'a.

Iapaanaungnga tadea'u paatehamma su saruannu manga hurun agama

³⁸ I Tou nabbisara si mangitou, “Paatehamma su saruannu manga hurun agama. Apulu mangitou u'amatta ualuṛṛen jubah apan mal᷊o'e wuṛṛu apulune a'addatanna su manga pasakka.

³⁹ Apulu mangitou su manga tampa mawantuga sulal᷊ummu wal᷊em pattataṛṛamawuanna wuṛṛu su manga andeangnga.

⁴⁰ I mangitou mallinga manga wawine wal᷊u wuṛṛu mangngaṛṛo wal᷊ene. Wuṛṛu ana see maapamunin al᷊al᷊eo mangitou udde, i mangitou u'al᷊iomanna mal᷊o'e-l᷊o'engnga. Ṛuumanni mangitou sal᷊immurine udde mawakkatta!”

Aonggolu wawine wal᷊u

⁴¹ Su tempo ua'ianna uasasaruanna tampam pondi su Wal᷊e Mawu, Mawu Yesus mannutudda manga taumata mantaṛṛon roitti mangitou sulal᷊ummu tampan roitta udde. Manambo taumata ala nantaṛṛon roitti mangitou aroddi anambone;

⁴² see sangkatou wawine wal᷊u apan asiangnga nirumanta lai. Tou nantaṛṛon darua roitta witu'a, eteudde roitta aregane awawoanne.

⁴³ Ne Mawu Yesus namago manga mallal᷊aṛṛenggen-Ne see nabbisara si mangitou, “Paanaunge indi: Wawine wal᷊u asiangnga udde suete nantaṛṛo su tampam pondi udde nilumebe anambone wuassu tinaṛṛo manga taumata waine.

⁴⁴ Ana waugu i mangitou sarangkanambone suete nangonggolu leben darotongnge. Arawe wawine wal᷊u udde salaiwe tumaniten asiangnga nangonggolu sarangkanambone apan tatahuananne – eteudde apan pia gunane su pabiaṛṛanne.”