MARKUS 11 - WUKE SUSI WATTI'U AL᷊AL᷊USASSA

Mawu Yesus sinumutta su Yerusalem ringannu awawantuga

¹ Su tempo maddanin Yerusalem, i mangitou na'omate su Betfage wuṛṛu Betania, su welem Buiddu Zaitun. Isudde ruang katou mallal᷊aṛṛenggen-Ne nirolokku Mawu Yesus niapaṛṛoro.

² “Roote su ampungnga sasaruananna udde,” unnu Mawu Yesus sitarua. “Aroddi iraddua sumutta su ampungnga udde, iraddua sarun maasilo sambau ana'u keledai apan ua'iitta wuṛṛu taambe sina'eannu taumata. Wu'ate keledai udde wuṛṛu apira'e isindi.

³ Wuṛṛu amungkangngu pia taumata maiwal᷊o siraddua, anio iraddua mamu'a keledai udde, wal᷊oa'a, ‘Mawu mappandumma si tou, wuṛṛu i Tou sarun mamelengnga ringannu mal᷊iha-l᷊ihakka.’ ”

⁴ Ruang katou mallal᷊aṛṛenggennu Mawu Yesus udde inaite, wuṛṛu naaratingnga ana'u keledai tantal᷊anna ua'iitta su ngaran wal᷊e su winggin dal᷊anna. Ne itarua namu'ate keledai udde.

⁵ Manga taumata apan uarisikka isudde naiwal᷊o sitarua, “Ei, ma'ura iraddua? Anio iraddua mamu'a ana'u keledai udde?”

⁶ Itarua sinumimbakka ereapa suete niwisara Mawu Yesus sitarua. Ne manga taumata udde namalaten tarua mangapiddu keledai udde.

⁷ Napawe na'omate ringannu Mawu Yesus, tapanna'u keledai udde niampaṛṛanu jubah mangitou see Mawu Yesus sinuma'ete keledai udde.

⁸ Manambo taumata mangngampakku jubah mangitou su lal᷊anna, pia lai mangngampakku rannan kalu su tangngan dal᷊anna apan niapiddi mangitou wuassu wailla.

⁹ Manga taumata apan u'amatta rorone wuṛṛu manga taumata apan ual᷊aṛṛenggenna wuassu liudde, sarangkanambone u'ui, “Paddalote Ruata! Nial᷊amatante i Tou apan nirumanta ringannu arannu Mawu!

¹⁰ Nial᷊amatante araratuan-Ne apan sarun dumanta – araratuanni Ratu Daud, iupungngu al᷊amonang kite! Dalo su Ruata Apan Atanggaṛṛanne!”

¹¹ Panginsueanne Mawu Yesus na'omate su Yerusalem, see sinumutta su Wal᷊e Mawu. Isudde i Tou na'ellega uapal᷊iwutta si Tou. Arawe ana waugu marandumpe, wua'udde i Tou inaite watukku Betania su sampunna ringannu sire mapul᷊o dua mallal᷊aṛṛenggen-Ne.

Mawu Yesus namontoga alu ara

¹² Su tiṛṛabbine tantal᷊anna i mangitou u'amatta nanantangngu Betania, Mawu Yesus niamal᷊unusanna.

¹³ Ro'en marau i Tou naasilote sangkalu alu ara rongnganne masindumunna. Nariaddi Tou inaite ringannu alu ara udde ma'ellega tanne pia buane ara'e tala. Arawe su tempo i Tou na'omate su alu udde, i Tou tawe naasilo apa-apa, tumba'u rongngane sassane, ana waugu tempo udde taambe tempone ara mabbua.

¹⁴ See Mawu Yesus nabbisara alu ara udde, “Manattakka orassa indi tawedu saran sangkatou lai apan umanna wuanu!” Manga mallal᷊aṛṛenggennu Mawu Yesus naaringikka wisara udde.

Mawu Yesus sinumutta su Wal᷊e Mawu

¹⁵ Wua'udde i mangitou na'omate su Yerusalem, wuṛṛu Mawu Yesus inaite lai su Wal᷊e Mawu. Isudde i Tou nanattakke mallimbuakka manga taumata apan uawawalli su tampa udde. I Tou namal᷊insuangngu manga medda mananu'addu roitta, wuṛṛu manga wangko mabawal᷊u'u manu'a merpati.

¹⁶ Wuṛṛu tawe saran sangkatou apan iwala Mawu Yesus mangapiddu manga sarannapa sumabbi passalangannu Wal᷊e Mawu udde.

¹⁷ Wua'udde Mawu Yesus nangaṛṛa'e manga taumata isudde. I Tou nabbisara, “Sulal᷊ummu Wuke Susi uawoṛṛetta ereindi: Ruata nabbisara, ‘Wal᷊e-U sarun isago wal᷊e tampa pangangal᷊iomanannu al᷊awo'u walahanna.’ Arawe niola'i yamiu sal᷊akku taumata taṛṛa ṛampassa!”

¹⁸ Manga imam tembonanne wuṛṛu manga hurun agama naaringikka wisara udde. Ne i mangitou nanattakke maddea'a lal᷊anne ipamate Mawu Yesus. I mangitou matta'utti Tou, ana waugu awada'alla naherangnga naaringikka al᷊aṛṛang-Nge.

¹⁹ Napawe maranite maṛṛabi, Mawu Yesus wuṛṛu mallal᷊aṛṛenggen-Ne nanantangke n soa udde.

Al᷊aṛṛa'a wuassu alu ara

²⁰ Tiṛṛabbine rua'allo, su tempo i mangitou sumabbi alu ara udde, i mangitou naasilo alu ara udde naṛṛangute na'oman sara ṛamunne.

²¹ See i Petrus naanaungnga apa apan suete nariaddi su allo nal᷊iu. Ne i Petrus nabbisarate Mawu Yesus, “Iamangnga Huru, pa'ellega! Alu ara apan suete nital᷊an Iamangnga udde, naṛṛangute!”

²² Mawu Yesus sinumimbakka, “Pangimante Ruata.

²³ Atonna wotongnge yamiu mabbisara wuidda indi, ‘Awengkette wuṛṛu awontolle su tahal᷊oangnga!’ ne olangnge udde sarun mariaddi si yamiu; sambal᷊iate i yamiu tawe humago'a, wuṛṛu i yamiu mangngimanna manungku apa apan sarun iwisarang kamiu atonna-tonna mariaddi.

²⁴ Ana waugu udde paanaunge indi: Napawe i yamiu umal᷊iomanna wuṛṛu madorongnga sarannapa, pangimante manungku Ruata suete nangonggolla si yamiu apa apan radoronganni yamiu, ne i yamiu sarun manengkamma udde.

²⁵ Wuṛṛu amungkangngu i yamiu umal᷊iomanna; arawe naungngi yamiu tawe mal᷊uassa su sangkatou taumata, ampungnge asuene taumata udde, tadea'u Iamangngu su surga lai mangampungnga manga rosanu. [

²⁶ Amungkangngu yamiu tawe mangampungnga taumata waine, Iamangngu su surga lai maddiri mangampungnga manga rosanu.]”

Aiwal᷊o su ola'u taṛṛino Mawu Yesus

²⁷ I mangitou nabelengke apia su Yerusalem. Wuṛṛu su tempo Mawu Yesus u'amatta mammal᷊iwutta sulal᷊ummu Wal᷊e Mawu, manga imam tembonanne, manga hurun agama wuṛṛu manga piaṛṛa'u Yahudi nirumanta ringanni Tou.

²⁸ I mangitou naiwal᷊o, “Apa pinangiananne I'o ma'ola'a sarangkanambone indi? Isai nangonggolu taṛṛino udde Si'o?”

²⁹ Mawu Yesus sinumimbakka, “I Ya'u lai maiwal᷊o si yamiu. Simbaṛṛete ana see i Ya'u lai mamasingkatta si yamiu ringannu taṛṛinon sai i Ya'u ma'ola'a inolaanna indi.

³⁰ Yohanes mannaṛṛani ringannu taṛṛinon sai, Ruata ara'e taumata?”

³¹ See manga imam tembonanne wuṛṛu manga piaṛṛa'u Yahudi nanattakke na'ire su wallatti mangitou. I mangitou nabbisara, “Amungkangngu i ite nabbisara, ‘ringannu taṛṛinon Ruata,’ i Tou sarun mabbisara, ‘Anio i yamiu tawe mangngimanna si Yohanes?’

³² Arawe masahadda lai mabbisara, ‘Ringannu taṛṛinon taumata,’ ” ana waugu i mangitou matta'uttu taumata nambo, wuṛṛu manambo taumata massunna manungku i Yohanes sangkatou nabi.

³³ Nariaddi i mangitou sinumimbakka, “I yami wagga.” See Mawu Yesus nabbisara si mangitou, “Amungkangngu aroddi, i Ya'u lai tawe mamasingkatta si yamiu ringannu taṛṛinon sai Ya'u ma'ola'a sarangkanambone indi.”