MARKUS 1 - WUKE SUSI WATTI'U AL᷊AL᷊USASSA

Nasen Yohanes Mananaṛṛani

¹ Ete indi Watti'u Al᷊al᷊uassa su ola'u Mawu Yesus Kristus, Ana'u Ruata.

² Watti'u Al᷊al᷊uassa udde nanattakka ere suete niwoṛṛetti Nabi Yesaya, arendi, “ ‘Ete indi ralol᷊oṛṛang-Ku,’ wisaran Duata; ‘I Ya'u nandolokki tou malliu ṛoro wuassi'o, tadea'u i tou mamu'a lal᷊an-Nu.’

³ Pia taumata u'al᷊iata su wadda'a, ‘Saddiaite lal᷊annu Mawu rataṛṛa'e manga lal᷊anna apan amatan-Ne.’ ”

⁴ Ere lai uawoṛṛetta udde, aroddi lai Yohanes nirumanta su wadda'a. I tou mannaṛṛani taumata wuṛṛu mammasingkattu watti'a wuassu Ruata. “Awal᷊ute i yamiu wuassu manga rosanu, wuṛṛu ṛinone saṛṛanianna, tadea'u Ruata mangampungnga si yamiu,” aroddi unni Yohanes.

⁵ Anambon taumata wuassu wanuan Yudea wuṛṛu soan Yerusalem matudda maddaringikka si Yohanes. I mangitou nanga'u manga rosa mangitou, see i Yohanes nanaṛṛanite si mangitou su Sal᷊ukku Yordan.

⁶ I Yohanes ualuṛṛen laubba wuassu wambul᷊un unta. Papeṛṛenne wuassu pisim binatangnga, wuṛṛu wiakke al᷊umbati'a wuṛṛu pul᷊an ahuranganna.

⁷ I tou namasingkattu watti'a indi, “Ṛaddoi wuassia'u sarun dumanta taumata apan maggewal᷊anna wuassia'u. Umaruutta mamu'a tal᷊in sapatu-Ne lai ya'u tawe su ṛinone.

⁸ I Ya'u mannaṛṛani si yamiu ringannu ua'e, arawe i Tou sarun mannaṛṛani si yamiu ringannu Ghaṛṛahon Ruata.”

I Yohanes nanaṛṛani Mawu Yesus

⁹ Su tempo udde Mawu Yesus nirumanta wuassu Nazaret su wageangngu leta'u Galilea, wuṛṛu i Yohanes nanaṛṛani si Tou su Sal᷊ukku Yordan.

¹⁰ Aroddi Mawu Yesus nilumapputta wuassu sal᷊ukka udde, i Tou naasilo langitta nawu'a wuṛṛu Ghaṛṛahon Ruata naal᷊ihida ere manu'a merpati inumonto'a si Tou.

¹¹ Wua'udde niaringikka tingikku Ruata nabbisara, “Ete I'o Ana-U apan arangnguang-Ku. I'o ma'al᷊uassa naung-Ku.”

Mawu Yesus niwono'annu Setanna

¹² Wua'udde Ghaṛṛahon Ruata lapiddu nangapiddu Mawu Yesus su wadda'a.

¹³ Appattu pul᷊o su allone i Tou isudde, wabono'annu Setanna. Manga winatangnga matengnga, isudde lai su sampunna ringanni Tou, wuṛṛu manga mala'ekatta sidutu lai mangngimbe si Tou.

Mawu Yesus namago sire appata samakka

¹⁴ Napawe i Yohanes niṛṛuumante, Mawu Yesus inaite su Galilea, wuṛṛu namasingkattu Watti'u Al᷊al᷊uassa wuassu Ruata poiaroddi.

¹⁵ Wisara-Ne, “Tempone nia'omante Ruata mamarenta. Awal᷊ute wuassu manga rosanu, wuṛṛu pangimante Watti'u Al᷊al᷊uassa wuassu Ruata!”

¹⁶ Su tempo Mawu Yesus u'amatta su winggin Danon Galilea, i Tou naasilo ruang katou samakka, eteudde i Simon wuṛṛu tuarine i Andreas. Itarua tantal᷊anna mannoma inassa su rano.

¹⁷ Mawu Yesus nabbisara si mangitou, “Tantalongke si Ya'u. I Ya'u sarun mangaṛṛa'a si yamiu mannoma taumata.”

¹⁸ Itarua lapiddu nanantangngu soma mangitou see tinumantalongke Mawu Yesus.

¹⁹ Mawu Yesus lapiddu inumamatta, see naasilote lai rua sangkatuṛṛangnga apan baine eteudde i Yakobus wuṛṛu i Yohanes, al᷊aṛṛana'i Zebedeus. I mangitou sulal᷊ummu saalanna, wuṛṛu tantal᷊anna mannapia soma.

²⁰ Mawu Yesus lapiddu namago sitarua. Ne itarua nanantangken iamangngi mangitou sulal᷊ummu saalanna ringannu manga taumatan sewa mangitou. See itarua inaite tinumantalongnga Mawu Yesus.

Taumata apan niasuttannu ghaṛṛaho lal᷊eo

²¹ Mawu Yesus wuṛṛu manga mallal᷊aṛṛenggen-Ne na'omate su soa Kapernaum. Su allon Sabatta manansunna, Mawu Yesus sinumutta su wal᷊em pattataṛṛamawuanna wuṛṛu nanattakke mangngaṛṛa'a.

²² Manga taumata apan uararingikka si Tou mangke naherangnga su ola'u ereapa i Tou mangngaṛṛa'a. Ana waugu, i Tou mangngaṛṛa'a ringannu saṛṛaungnga, tawe ere pangangaṛṛa'u hurun agama.

²³ Su tempo udde sangkatou apan niasuttannu ghaṛṛaho lal᷊eo sinumutta sulal᷊ummu wal᷊em pattataṛṛamawuanna wuṛṛu u'ui.

²⁴ “Ei Yesus, taumata Nazaret, I'o maapulu ma'ola'a apa ringanni i yami? I'o rumanta mamate si yami? I ya'u masingkatta isai I'o: Ete I'o ralol᷊oṛṛanna apan na'ukkassa wuassu Ruata!”

²⁵ “Paal᷊annaba!” Mawu Yesus nandona ghaṛṛaho udde, “Sabbangke wuassu taumata indi!”

²⁶ Ne ghaṛṛaho lal᷊eo udde nangio'u taumata udde maikka-ikkatta, wua'udde sinumabangnga wuassu taumata udde lapiddu u'ui.

²⁷ Anambon taumata mangke naherangnga, na'oman sara i mangitou nabbisara sangkatou ringannu sangkatou, “Wah apa indi? Sambau al᷊aṛṛa'a apan wakku! Ringannu saṛṛaungnga wuṛṛu taṛṛino i Tou namarenta manga ghaṛṛaho lal᷊eo udde sinumabangnga, wuṛṛu i mangitou tinumuṛṛutta si Tou!”

²⁸ Ne watti'a su ola'u Mawu Yesus tinumelengke ringannu mal᷊ihakka su ahewallu wageangngu leta'u Galilea.

Mawu Yesus napaapian taumata manambo

²⁹ Mawu Yesus wuṛṛu manga mallal᷊aṛṛenggen-Ne nanantangken bal᷊em pattataṛṛamawuanna udde, wuṛṛu inaite su wal᷊en Simon wuṛṛu i Andreas. I Yakobus wuṛṛu i Yohanes inai lai su sampunna ringanni mangitou.

³⁰ La'iananni Simon marada'a sal᷊iubba su tampa atatiil᷊anne. Nariaddi su tempo Mawu Yesus wuṛṛu manga mallal᷊aṛṛenggen-Ne sinumutta su wal᷊e udde, Mawu Yesus niwal᷊oannu olangnge udde.

³¹ Ne Mawu Yesus nattudan la'iananni Simon, wuṛṛu namita limane, see nantul᷊ungngi tou niapawangunna. Sal᷊iubbe nawul᷊i wuṛṛu i tou lapiddu nangimbe si mangitou.

³² Su wawallone, napawe matannallo nattupe, manga taumata nangapidde ringannu Mawu Yesus anambon taumata marada'a wuṛṛu taumata apan niasuttannu ghaṛṛaho lal᷊eo.

³³ Anambon lal᷊oṛṛon soa udde uaṛṛimpulunna su passalangannu wal᷊e udde.

³⁴ See Mawu Yesus napaapiaten anambon taumata apan uatataṛṛangnga al᷊awo'u hatin rada'a, wuṛṛu nallimbuakke lai manga ghaṛṛaho lal᷊eo. I Tou tawe nangagillu tempone su manga ghaṛṛaho lal᷊eo udde mabbisara, ana waugu i mangitou masingkatte isai i Tou udde.

Mawu Yesus nannase su Galilea

³⁵ Rua'allone, su tempo ta'e maṛṛanggapa atonna, Mawu Yesus nabangunte see nanantangken bal᷊e. I Tou inaite su tampa apan mal᷊annaba su liuddu soa, wuṛṛu inumal᷊iomante poiaroddi.

³⁶ Arawe i Simon wuṛṛu manga ringanne inai nadea'a si Tou.

³⁷ Wuṛṛu napawe i mangitou naasombate si Tou, i mangitou nabbisara, “Manambo taumata maddea'a Iamangnga.”

³⁸ Arawe Mawu Yesus sinumimbakka, “Wette i ite manassukku amatanni ite su manga soa waine apan maranine isindi. I Ya'u sarun mannase lai poiaroddi, ana waugu eteudde pandumanne i Ya'u nirumanta isindi.”

³⁹ Ana waugu udde Mawu Yesus inaite su al᷊awo'u tampa su ahewallu Galilea, wuṛṛu mannase su manga wal᷊em pattataṛṛamawuanna, see mallimbuakka manga ghaṛṛaho lal᷊eo.

Mawu Yesus napaapian sangkatou pia radangnge paro apan ma'arantinna

⁴⁰ Sangkatou apan pia radangnge paro apan ma'arantinna nirumanta ringannu Mawu Yesus. Taumata udde inumal᷊intuda, wuṛṛu nabbisara, “Amungkangngu Iamangnga maapulu, Iamangnga wotongnge mangapia si ya'u.”

⁴¹ Mawu Yesus inumakkannu taumata udde. Nariaddi i Tou namita taumata udde lapiddu wisara-Ne, “I Ya'u maapulu, apiate!”

⁴² Orassa udde lai radangnge nawul᷊i wuṛṛu i tou napiate.

⁴³ See Mawu Yesus nandolokki tou napul᷊e ringannu tanata indi,

⁴⁴ “Naunge, arie mabatti'a sisai-sai, arawe roote ringannu imam wuṛṛu padorongnga si tou manantunna manungku i'o napiate. See matataṛṛino su inapiannu wuassu radangngu udde, pangapidden sasamba tumuṛṛuttu ere suete niparenta Musa, maola'a sambau pananaunganna su manga taumata manungku i'o atonna-tonna napiate.”

⁴⁵ Arawe taumata udde inaite, wuṛṛu mangke tawe illol᷊one mabatti'u inolaanna udde su al᷊awo'u tampa, na'oman sara Mawu Yesus tate naasutta su soa ringannu mal᷊uassa. I Tou tumba'u uatana'a su liuddu soa su tampa apan mal᷊annaba. Arawe taumata sidutu lai rudanta ringanni Tou wuassu al᷊awo'u tampa.