MANNANASE 9 - WUKE SUSI WATTI'U AL᷊AL᷊USASSA

¹ Sarangkanambone udde ta'u niṛṛingidda ringangu maaddunna. Ruata mangngatokku pabbiaṛṛannu taumata apan mapia wuṛṛu pande, ewe'e lai amungkangngu taumata udde maddantinna ara'e mandangngu. Taweddu masingkatta apa apan sarun mariaddi su allon sal᷊immurine.

² Atonna, pal᷊addu pabbiaṛṛannu suapan taumata: Taumata matul᷊idda ara'e lai taumata lal᷊eo, taumata mapia ara'e taumata lal᷊eo, taumata waresi ara'e lai taumata kotore, taumata apan mangngonggollu sasamba ara'e lai tawe. Taumata mapia tawe mallal᷊umannaana wuassu taumata apan marosa, taumata apan massalu uasul᷊ungngu ringannu taumata apan maddiri massalu.

³ Nariaddi, pal᷊addu pabbiaṛṛanna apan uasul᷊ungnga lai sarun maṛṛia'a si mangitou sarangkanambone. Wuṛṛu udde sambau inolaanna apan maasusa ere lai al᷊awo'u arariaddianna su runia. Su al᷊o'engngu pabbiaṛṛanne naungngu taumata napenen al᷊al᷊eo, wuṛṛu ṛingiranne lai napenen awawoddo. Ana see inaṛṛombanganne i tou naasomba papatene.

⁴ Arawe su al᷊o'engngu pabbiaṛṛanna ita'an sumbu, su al᷊annune udde pia antimma. Wal᷊inewe asu lembon mabbiakka su lal᷊umanna'a wuassu singa apan tawe niawane?

⁵ Suapan wotongnge, taumata wiakka masingkatta manungku papate uaṛṛaddo si tou, wuṛṛu taumata nate waggan apa-apa. Si tou tawe baweakke ara'e lal᷊antakke, wuṛṛu aranne tinimbul᷊ianante.

⁶ Apendamma mandangngu, maddantinna see apulune sarangkanambone mate suaddio'a ringanni tou. I tou tate lai manganu wageangnge apa-apa su al᷊awo'u arariaddianna su runia.

⁷ Wette, ante wuṛṛu lalluasse, pa'inumpe anggore ringannu lullala'a. Ruata tawe mamulo, ewe'e i tou lai mandolokka.

⁸ Wala'e hatinu matilangnga wuṛṛu mal᷊aukka.

⁹ Pattemmate pabbiaṛṛannu ringannu awingngu apan arangnguannu su al᷊o'engngu pabbiaṛṛannu apan tawe gunane, apan nionggollu Ruata si'o su runia. Pattemmate suapan allo salaiwe tawe gunane. Ana waugu lal᷊antakku inasaharannu tumba'u udde.

¹⁰ Pammanarate al᷊awo'u manaranu ringannu anambon auatannu. Ana waugu sal᷊immurine tate lai ṛingiranna wuṛṛu manara. Tate apende wuṛṛu asingkatta su runian taumata nate. Wuṛṛu ete poiaroddi i'o sarun inai.

¹¹ Su runia indi piaddu lai apan ta'u niasiloanna: patatalumma tawe sidutu asombangannu tumatal᷊angnga mal᷊ihakka, pangalo tawe sidutu auntungannu taumata apan matohassa. Taumata pande tawe sidutu maasomba manarane. Taumata masiṛṛungnga tawe sidutu maasomba paa'ala. Wuṛṛu lai manga mapapande tawe sidutu tumelengnga. Ana waugu suapan taumata wotongnge aṛṛiaannu pal᷊addu pabbiaṛṛanna lal᷊eo.

¹² Taumata wagga tingngera tempone rumanta. Ere manu'u winalanganna nasongnganna wuṛṛu inassa nasomanna, aroddi lai taumata aṛṛiaannu asasilaka sutempo apan niawagananna.

Ṛingiranna su ala'u Asingkatta wuṛṛu Awawoddo

¹³ Manansunna indi pia sambau sonto apan mapia ereapa taumata mangareggan asingkatta:

¹⁴ Pia sambau soa addio'a apan matul᷊ungnga tumanangnge. Su allo sambau sangkatou ratu wahewalla nirumanta namangalo soa udde. I tou namangalote wuṛṛu uariahite manggohakku darandungnge.

¹⁵ Su soa udde pia sangkatou asiangnga apan pande. I tou wotongnge napanal᷊amatta soa udee. Arawe ana waugu i tou asingnga, sahadde lapiddu tinimbul᷊iananna wuṛṛu tawe saran sangkatou apan mannaungnga si tou.

¹⁶ Nariaddi, atonna addapa'u manungku asingkatta nangillembo wuassu atatohassa. Salaiwe aroddi, asingkattu taumata asiangnga tawe daringiṛṛanna. Manga wisarane taweddu maddaringikka.

¹⁷ Mappianne maddaringikka manga wisara maannudda sangkatou pande wuassu aintul᷊in sangkatou Tembonanne sulal᷊ummu ammul᷊annu manga taumata longonna.

¹⁸ Asingkatta lembon mahuna wuassu lutangnga, arawe sukkatta santiti'a maarusa susu sangkurinna.