MANNANASE 8 - WUKE SUSI WATTI'U AL᷊AL᷊USASSA

¹ Al᷊uassawe eteapa taumata pande. I tou masingkattu sasimbakku al᷊awo'u hatto. Asingkatta apan naaola'a si tou lullaggen al᷊al᷊uassa, na'oman sara hatine sidutu matilangnga.

Paatuṛṛutte ratu

² Paddaringikke napawe ratu mamarenta, wuṛṛu arie ma'ola'a riandi apan uasasaṛṛawutta su Ruata.

³ Ratu wotongnge ma'ola'a walate apulun naungnge, amungkangngu i tou tawe mangonggolla, mappianne panginduaten tou.

⁴ Ratu mammanara ringannu saṛṛaungnga; taweddu waṛṛani sumimbakka si tou!

⁵ Taumata apan matuṛṛutta si tou, sarun matammudda wuṛṛu mal᷊angnganna; taumata pande masingkatta tingngera wuṛṛu ereapa tumuṛṛutta ratu.

⁶ Su al᷊awo'u saranapa pia tempone wuṛṛu olangnge sassane, arawe tumba'u addio'a atonna apan asingkatanni ite!

⁷ Tawe saran sangkatou masingkatta pal᷊addu pabbiaṛṛanna ereapa apan uaṛṛaddo, wuṛṛu taweddu wotongnge mabbisara apa apan sarun mariaddi.

⁸ Tawe saran sangkatou apan wotongnge manaṛṛangnga ara'e manoṛṛottu papatene. Udde manara apan tawe iaal᷊inda'i tou, i tou tawe maal᷊iu wuassi tou, salaiwe ringannu aalla wuṛṛu wawahia.

Taumata apan naṛṛino wuṛṛu lal᷊eo

⁹ Sarangkanambone indi ta'u niasiloanna sutempo i ya'u mannutukka al᷊awo'u arariaddianna su runia. Pataṛṛa assa taumata mappaattu taṛṛinone ipanilaka sansul᷊ungnge.

¹⁰ Su paassa i ya'u naasilo taumata lal᷊eo nate wuṛṛu nilabbinga. Arawe sutempo manga taumata napul᷊e wuassu pallal᷊abbinge, i mangitou maddalo si tou su soa su tampa i tou ma'ola'a al᷊al᷊eo. Nariaddi, udde lai tawe gunane.

¹¹ Anio aroddi al᷊uanne taumata ma'ola'a al᷊al᷊eo? Ana waugu ṛuumanne tawe lapiddu ionggolla.

¹² Salaiwe maṛṛasutta al᷊al᷊eo a'olaannu sangkatou marosa, i tou sidutu mabbiakka ewe'e lai uukke mal᷊o'engnga. Naudde, isai apan matuṛṛutta Ruata, al᷊awo'u pabbiaṛṛanne mangke mal᷊uassa.

¹³ Arawe mawal᷊i'a taumata lal᷊eo maasomba manambo asasusa. Pabbiaṛṛanne mal᷊ihakka mal᷊iudda ere lintau. I tou sarun mate ta'e saṛṛen tumuwo ana waugu i tou tawe matuṛṛutta su Mawune.

¹⁴ Arawe sarangkanambone udde mangke awusu atonna. Pa'ellege apa apan tantal᷊anna nariaddi su runia: Pia taumata ma'imanna apan niṛṛuumanna ere taumata lal᷊eo, pia taumata lal᷊eo apan nionggol᷊annu hadiah ere taumata ma'imanna. Nariaddi, udde lai sia-sia.

¹⁵ Inaappuangku eteudde manungku taumata ṛinone lumala'a. Ana waugu sulal᷊ummu pabbiaṛṛanne su runia tawe al᷊al᷊uassa waine si tou tumba'u u'anna, ma'inumma wuṛṛu lullala'a. Tumba'u udde apan nipaanne su pattangngannu inasaharanne, su al᷊o'engngu pabbiaṛṛanna apan nionggollu Ruata si tou.

¹⁶ Sutempo i ya'u mattinsahadda maddea'a asingkatta, wuṛṛu i ya'u mannutukka al᷊awo'u arariaddianna su runia indi, ne i ya'u naatutukke manungku salaiwe i ite mattinsahadda allo ṛabbi ringangu tawe mangillol᷊o,

¹⁷ i ite mangke tawe maasunna manaran Duata. Salaiwe ereapa i ite mattinsahadda, i ite tawe maasunna. Taumata pande mangnga'u manungku i tou masingkatta, arawe atonna i tou wagga.