MANNANASE 6 - WUKE SUSI WATTI'U AL᷊AL᷊USASSA

¹ I ya'u naasilo lai tawe atatul᷊idda apan lembon mannansara taumata su runia indi.

² Pattaṛṛa paassa Ruata mangonggollu paa'ala, aaddatta wuṛṛu darotongnga su sangkatou, na'oman sara tateddu lai apan ipaapulune. Arawe Ruata tawe namalan tou mappaattu anambon aonggolla udde. Arawe nawal᷊i'a, taumata apan awaganan-Ne sarun mappaattu paa'ala udde. Nariaddi, sarangkanambone udde tawe gunane wuṛṛu maasusa.

³ Salaiwe sangkatou pia ana'a maṛṛasutta su atoune wuṛṛu nabbiakka mal᷊annu na'oman sara naal᷊al᷊appa uukka matanggakka, arawe amungkangngu i tou tawe naapendamma al᷊al᷊uassa wuṛṛu tawe naasomba tampa pallabbinganne apan su ṛinone, ne tumuṛṛuttu addapa'u, ana'a apan niasungkangnga see nate pal᷊addu pabbiaṛṛanne ta'emappianne wuassu taumata udde.

⁴ Ana waugu su ana'a addio'a udde tawe maola'a hatto i tou niasungkangnga ara'e tawe; i tou inai sulal᷊ummu ararandumma, ana see niabbul᷊ianante.

⁵ Taambe saran paassa i tou naasilo semakku matannallo, i tou taambe lai maasunna apa pabbiaṛṛanna indi, na'oman sara i tou wotongnge maatiilla ringannu matammudda.

⁶ Wuṛṛu udde mappianne wuassu taumata apan nabbiakka dua ṛasutta su tonnane, arawe tawe naapendamma al᷊al᷊uassa. Wal᷊inewe itarua inai watukku tampa apan uasul᷊ungnga lai?

⁷ Taumata mammanara tumba'u ana waugu anna, arawe i tou tawe maapendamma mal᷊uassa.

⁸ Nariaddi, apa auntunganne taumata pande isumandingngu taumata woddo? Apa lai hunane amungkangngu taumata asiangnga pallal᷊agune mapia su pattangngannu lal᷊oṛṛon soa?

⁹ Sarangkanambone udde tawe gunane manara mangngenggenna anginna. Mappianne i ite mal᷊uassa ringannu apa apan piate si ite sul᷊ungnge maapulu lembon anamboanne lai.

¹⁰ Al᷊awo'u saranapa apan piate, piate ro'en mal᷊annute. I ite masingkatta manungku taumata tawe maasimbakka taumata apan mattohasanna wuassi tou.

¹¹ Mallannu i tou sussimbakka, lembon tate atappasanne manga wisarane, ewe'e lai i tou tawe naasomba auntunganna apa-apa.

¹² Ereapa taumata maasingkatta apa apan apianne si tou sulal᷊ummu pabbiaṛṛanne apan maautta wuṛṛu tawe gunane, wuṛṛu apan sinumabbi ere lintau? Ereapa sangkatou taumata wotongnge maasunna apa apan sarun mariaddi su runia indi napewe i tou natete?