MANNANASE 12 - WUKE SUSI WATTI'U AL᷊AL᷊USASSA

¹ Pannaungke Mandariaddinu tantal᷊anna i'o ta'e saṛṛentumuwo, tantal᷊anna taambe nia'omanna manga tonna napenen asasansara. Sutempo udde i'o sarun mabbiasara, “Pabbiaṛṛangku tawe al᷊al᷊uassa.”

² Napewe nia'omante tempo udde matanu tate lai masemakka, na'oman sara mal᷊abbukke semakku matannallo, wul᷊anna wuṛṛu anumpitanna. Winabbawa pia rallamme uaapiddu uranna, sidutu uarundinganna si'o ere asasilaka.

³ Ta'iakku mangngiladda tate lai mapangonggollu tatilla'uppa. Leddanu apan matohassa sarun humolle wuṛṛu mallome. Isine tate nasuungnga ipanappa anna. Matanu mal᷊abbukka na'oman sara naarandumma aellegga.

⁴ Ramea su lal᷊anna na'oma su tal᷊inganu ringannu nunnenne'a. Tingikku musikka wuṛṛu hahilinganna maranin tawe aringiṛṛanna. I'o tawe maatiilla mal᷊angnga. Tingikku manu'u winalanganna lai naapu'o si'o.

⁵ I'o matta'utta suma'a su tampa apan matanggakka wuṛṛu ṛinone umamatta ringannu maaddunna. Utangngu pia owanne wuṛṛu leddanu wawol᷊enganna sutempo umamatta. Ne nawul᷊ite al᷊awo'u naungnga wuṛṛu apulu. I ite mattuddate tampa tatanaanni ite apan panginsueanne, manga taumata lullal᷊o wuṛṛu sussangitta su al᷊o'engngu lal᷊anna.

⁶ Ṛate sal᷊a'a sarun mabbassutta wuṛṛu maṛṛae; sol᷊o wul᷊awanna nanawo wuṛṛu napesangnga; tal᷊in sasia nabassutta wuṛṛu nahoakka; wensadda naṛṛimunsa'a wuṛṛu nattal᷊eṛṛongnga.

⁷ Waddangngi ite sarun mawelengnga apia, mabbal᷊i awu su runia. Sasangngon pabbiaṛṛanni ite sarun mabbelengnga ringannu Ruata. Ete i Tou apan nangonggolla naola'a al᷊amatta.

⁸ Wisara'u, atonna sarangkanambone udde tawe gunane, sarangkanambone tawe gessine, tawe atappasanne.

Aunne

⁹ Sangkatou Maṛṛaṛingidda udde pande wuṛṛu masingkatta. Ana waugu udde niaṛṛangnge su umatta al᷊awo'u asingkanne. Manambo sasanato'a nisal᷊umanne ana see i tou nanal᷊u'atta apapiane.

¹⁰ I tou maddea'a maasangkalla manga wisara lal᷊imbatta, wuṛṛu manga wisara apan niwoṛṛenne udewe atonna.

¹¹ Wisaran taumata pande udde naal᷊ihidda ta'innu sangkatou mallal᷊u'adda apan maṛṛoro, ta'inna apan nipaanne ipanahekku manga dombane. Ammul᷊annu sasanato'a wuṛṛu tatantiro, naal᷊ihidda pa'u apan uapansakka matohassa. Sarangkanambone udde aonggollu Ruata lai, mallal᷊u'addi ite apan sambau.

¹² Ana'u, su ola'u sambau inolaanna ṛinone i'o paatehamma. Pamamoṛṛettu buke tawe panguddusanne, Wuṛṛu tumaniten manambo massal᷊umma maal᷊otakka ṛimuudda wuṛṛu waddangnga.

¹³ Napewe sarangkanambone buatte ta'u niṛṛingidda, eteindi aunne apan ta'u niasombanganna. Ata'utten Duata wuṛṛu tuṛṛutte al᷊awo'u parenta-Ne. ana waugu tumba'u udde taumata niriaddi-Ne.

¹⁴ Ruta sarun makkuungngu al᷊awo'u inolaanni ite; apan mapia wuṛṛu apan lal᷊eo, ewe'e apan uawuni lai.