MANNANASE 11 - WUKE SUSI WATTI'U AL᷊AL᷊USASSA

Manaran taumata pande

¹ Addoa'e roinnu salal᷊ummu manara su wanua waine. I'o sarun maasomba auntunganna su allo sal᷊immurine.

² Addoa'e roinnu su al᷊awo'u hatin paddaganganna; paddea'e manara ringangu manambo-nambo. Ana waugu taumata ṛinone uaantagga tantal᷊anna asasilaka taambe naṛṛia'a.

³ Watukkuapa punu alu udde maṛṛa'a, sidutu ta'e lai uawantangnga su tampa i tou naṛṛa'a. Napewe winabbawa pia ua'ene sara nasaddatta, ne uranna mangansalla su runia ringannu masassagga.

⁴ Isai apan maṛṛaddo sara anginna wuṛṛu hatin banua masemakka, sarun tawe massuanna wuṛṛu tawe lai mani'o wuane.

⁵ Ruata na'ola'a manga al᷊awo'a, wuṛṛu taumata mangke tawe maasunna manara-Ne; aroddi lai i tou tawe maasunna tatuwon pabbiaṛṛanna wakku sulal᷊ummu illoṛṛon sangkatou inangnga.

⁶ Pangasi'en bualanna sutempo marua allo wuṛṛu arie pangillol᷊o sutempo ṛabbi. Ana waugu i ite wagga wualanna suapa apan mapia tatuwone. Asinungka darua udde tinumuwo ringannu mapia.

⁷ Semakku matannalo naaola'a al᷊al᷊uassa; lal᷊umanna'awe eteapa amungkangngu wotongnge maatemma.

⁸ Ṛinone i'o maadiangkamanna amungkangngu uukka niatambanna. Arawe naunge, salaiwe i'o mabbiakka mal᷊annu su runia, tempone su runian papate ta'e lembon mallannuanna lai. Nariaddi, apa apan sarun antimanna lai? Sarangkanambone tawe gessine wuṛṛu tawe gunane.

Tantantiro su taumata saṛṛentumuwo

⁹ Paata'e temponu dario'a, ei umbasanna! Lalluasse tantal᷊anna i'o ta'e saṛṛentumuwo. Loṛṛoite al᷊awo'u hol᷊aggu ṛimuuddu, amata'e anambon apulun naungngu. Arawe naunge, Ruata apan su surga, sarun makkuungngu anambon manaranu.

¹⁰ Limbuaṛṛete asasinggawanga wuṛṛu asasusa wuassu naungngu, ana waugu temponu saṛṛentumuwo mal᷊ihakke mal᷊iudda.