MANNANASE 10 - WUKE SUSI WATTI'U AL᷊AL᷊USASSA

¹ Winal᷊anannu lango naawukku'a sambotolla lana mawangngi, addio'a awawoddo naawuli asingkatta apan matanggakka.

² Naṛṛinote amungkangngu taumata pande ma'ola'a apapia, wuṛṛu taumata woddo ma'ola'a alaleo.

³ Awawaddone niasiloanna su al᷊awo'u manarane. wuṛṛu su anambon taumata nipasilone al᷊allongonne.

⁴ Amungkangngu i'o asa'uannu tembonanne, arie paddorongnga mangillol᷊o mammanara. Salaiwe pasasal᷊anu wahewalla, i'o ampunganna amungkangngu maannudda wuṛṛu masabbare.

⁵ Pia al᷊al᷊eo waine apan ta'u niasiloanna su runia, eteudde pananewaddu manga tembonanne.

⁶ Taumata woddo nionggol᷊annu aiananna apan mawantuga, arawe taumata mapapandene tawe naasomba apa-apa.

⁷ Su paassa i ya'u naasilo manga allangnga uasa'e awal᷊o arawe iangana'a papunna u'amattu ledda ere allangnga.

⁸ Isai naal᷊i loṛṛangnga, sarun mawontolla sulal᷊umme; isai manggohakku darandungnga sarun iiannu atoanna mawisa.

⁹ Isai mammanara su paal᷊ianna marandumma, sarun mattumbu'a wuṛṛu mal᷊essa. Isai maṛṛappo alu, asinungka sarun maasomba angngone.

¹⁰ Amungkangngu hal᷊elenu mal᷊umu wuṛṛu tawe niasanu, i'o sarun mammanara ringannu lembon masahadda. Paata'e ṛingirannu apan mapia, wuṛṛu pa'ola'e hol᷊agga paarorone.

¹¹ Amungkangngu atoanna mangi'i tantal᷊anna taambe niapaṛṛaron daroa, ne mandariagga atonna tate lai gunane.

¹² Wisaran taumata pande maaola'a si tou aaddatanna, arawe taumata woddo nate ana waugu manga wisarane sassane.

¹³ I tou mannattakka ringannu wawahia wiasa, arawe panginsueanne wisarane ere taumata wewa.

¹⁴ Atonna, taumata woddo mangke matal᷊imoṛṛongana. Allo addantane uawuni si ite sarangkanambone. Taweddu wotongnge maramallu arariaddianna napawe i ite natete.

¹⁵ Tumba'u taumata woddo apan waggan lal᷊anna watukku wal᷊ene, i tou mammanara maṛṛimadda ringannu tawe illol᷊one.

¹⁶ Nasilakate wanua apan ratune saṛṛentumuwo, wuṛṛu manga tembonanne saṛṛabbi tuudda maddamea.

¹⁷ Lal᷊umanna'a wanua apan ratune pia saṛṛaungnge, apan tembonanne u'anna sutempone, tawe mabbu'anna wuṛṛu pande maṛṛaddannu watanganne.

¹⁸ Atuppu wal᷊en sarun mal᷊assutta amungkangngu tawe apianna, wuṛṛu panginsueanne wal᷊en udde maṛṛenessa sombangngu amamalassa.

¹⁹ Andeangnga maaola'a lal᷊agge, wuṛṛu anggore maaola'a lal᷊ala'a. Salaiwe tawe doitta iapamaekka.

²⁰ Imbaṛṛangnga mamansaggu ratu, salaiwe tumba'u sulal᷊ummu naungnga. Imbaṛṛangnga mallela taumata ala, salaiwe su wabbo'ane sassane. Asinungka sambau manu'u winalanganna maaringikka apa apan iwabbisaranu, ana see mamasingkatta su taumata ia'umbilangngu.