MANNANASE 1 - WUKE SUSI WATTI'U AL᷊AL᷊USASSA

¹ Manga wisara sulal᷊ummu buke indi darantane wuassu Sangkatou Maṛṛaṛingidda, ana'i Daud, apan sarun mallol᷊ossa si Daud maola'a ratu su Yerusalem.

² Sangkatou Maṛṛaṛingidda nabbisara: Sarangkanambone tawe gunane wuṛṛu tawe gessine! Pabbiaṛṛanna udde tawe pangantimanna, sarangkanambone tawe atappasanne.

³ Su al᷊o'engngu pabbiaṛṛanna i ite mammanara, mappasabbangu liaha. Arawe, suapa hessine apan wotongnge ipamungan kite?

⁴ Papapulunna apan sambau lumapputta wuṛṛu papapulunna waine mawuli, arawe runia sidutu ta'e aroddi.

⁵ Matannallo ta'e sussabbanga wuṛṛu ta'e pia lai umattuppa. Ringannu nallome i tou mabbelengnga su tampane paarorone, ana see sumbbangke apia.

⁶ Anginna tumiuppa watukku timukka, ana see sumingangu watukku sawannakka; i tou mangke tuttiri, ana see mabbelenga apia.

⁷ Manga sal᷊ukka mangangelekka watukku tahal᷊oangnga, arawe tahal᷊oangnga tawe mapene. Ua'ene mabbelengnga watukku pappuannu sal᷊ukka, ana see mannattakke mangngelekka apia.

⁸ Sarangkanambone maawusa wuṛṛu awawusa udde tawe iawisara. Matan kite mangke tawe mal᷊aidda ma'ellega; tal᷊ingan kite tawe mawusa maddaringikka.

⁹ Apa apan buatte nariaddi, sarun mariaddi apia. Apa apan buatte niola'a, sarun olaanna apia. Tawe saran sambau saranapa wakku su runia indi.

¹⁰ Pia taumata mabbisara, “Pa'ellege, indi wakku!” Arawe udde piate tantal᷊anna i ite taambe niasungkanga.

¹¹ Taumata tawe mannaungnga arariaddinna sutempo nanangkal᷊iu. Aroddi lai arariaddianna orassa indi wuṛṛu addantane, tawe naungannu taumata sutempo addantane.

Pengalamannu Sangkatou Maṛṛaṛingidda

¹² I ya'u, Sangkatou Maṛṛaṛingidda, mamarenta su Yerusalem maola'a sangkatou ratun Israel.

¹³ I ya'u mappandumma manaṛṛasidda wuṛṛu massal᷊umma ringannu asingkatta al᷊awo'a apan nariaddi su runia indi. Pal᷊addu pabbiaṛṛanna apan nisaddian Duata si ite maasusa.

¹⁴ I ya'u buatte naasilo al᷊awo'u inolaannu taumata su runia indi. Pangimante, sarangkanambone udde tawe gunane, ere manara mangangenggenna anginna.

¹⁵ Iapa wengkolla tawe iatul᷊idda, wuṛṛu apan tawe baddi'a tawe iareengnga.

¹⁶ I ya'u naṛṛingidda, “I ya'u buatte naola'a taumata mahuna wuṛṛu pande, mappandeanne marau wuassu anambon taumata apan namarenta su Yerusalem naṛṛoro si ya'u. I ya'u nangammullu manambo asingkatta wuṛṛu apande.”

¹⁷ Ne mappandumma tadea'u maasingkatta paṛṛalane suwallattu asingkatta wuṛṛu awawoddo, suwallattu apande wuṛṛu al᷊allongonna. Arawe inauranna i ya'u indi tumba'u ere mangngenggenna anginna.

¹⁸ Ana waugu lembon manambo asingkatti ite, lembon manambo lai asasinggawangngi ite. Lembon aatambanna apanden kite, lembon manambo lai asasusan kite.