MAL᷊AṚṚUUNGNGA 8 - WUKE SUSI WATTI'U AL᷊AL᷊USASSA

Taumata Midian niawaddo

¹ Taumatan Efraim nabbisara si Gideon, “Anio yami tawe niaheanna su tempo i'o inaite mamangalo taumata Midian? Anio inolaannu aroddi si yami?” Etearoddi i mangitou sussawutulla si Gideon.

² Arawe i Gideon sinumimbakka, “Sarangkanambone apan ta'u niola'a tawe gunane isumandinga su apa apan buatte niola'i yamiu. Selaine inolaanni yamiu matul᷊u, arawe wuassu matul᷊u udde maareganna wuassu sarangkanambone apan buatte niola'u tantaran ṛuangangku.

³ Ete i yamiu apan naasomba taṛino wuassu Ruata na'oman sara naapate si Oreb wuṛṛu si Zeeb, ruan katou papunnu Midian udde! Isumandinga isudde apate hessin manara'u?” Napawe i Gideon nabbisara aroddi, i mangitou tate masa'u.

⁴ Su orassa udde i Gideon ringannu siri tallu ṛasutta tantarane na'omate su samba'an Sal᷊ukku Yordan. I mangitou mangke nallome, arawe sidutu ta'e mangngenggenna seetti mangitou.

⁵ Wua'udde i mangitou na'omate su Sukot. Isudde i Gideon nabbisara su tumana'u soa, “Tul᷊unga'a tantara'u onggol᷊en anna addio'a. I mangitou nallomete atonna arawe yami ta'e lai mangngenggenna si Zebah wuṛṛu si Salmuna, manga ratun Midian udde.”

⁶ Arawe manga piaṛa'a su Sukot udde sinumimbakka, “Ah, i yamiu taambe naasametta si Zebah wuṛṛu si Salmuna, i yamiu madorongke anna! Ipa'ura tantaranu iapaanna?”

⁷ Ne unni Gideon, “O, aroddite! Paṛaddote amungkangngu Mawu buatte nangonggolu auntunganna si ya'u wuassi Zebah wuṛṛu si Salmuna, i yamiu sarun ta'u heseṛannu sambokka pia larangnge wuassu wadda'u anne!”

⁸ Wua'udde i Gideon nanassute amatanne ana see na'omate su Pnuel. Poiaroddi lai i tou nadorongnga anna ionggola su tantarane. Arawe sasimbakku taumatan Pnuel nassul᷊ungngu sasimbakku taumatan Sukot.

⁹ Ana waugu udde i Gideon nabbisara si mangitou, “Paṛaddote i ya'u sarun mabelengnga ringannu sal᷊amatta. Wuṛṛu su orassa udde lai ya'u sarun mapaṛa'an candi soa indi!”

¹⁰ Tantal᷊anna udde i Zebah wuṛṛu Salmuna ringannu anambon tantaran mangitou na'omate su Karkor. Wuassu anambon tantara su wadda'u anne, tumba'u pia iraṛangngo 15.000 apan nallambe; 120.000 tantarane natete.

¹¹ I Gideon nirumurukka su passarannu wadda'u anne su samba'a ra'in Nobah wuṛṛu Yogbeha ana see namangalo seetta ringannu namaṛindu'a.

¹² I Zebah wuṛṛu i Salmuna, ruan katou ratun Midian udde tinumal᷊angnga, arawe i Gideon nangenggenna wuṛṛu nanametta sitarua, na'oman sara anambon tantaran pangalon tarua niṛumindu'a.

¹³ Wua'udde sulal᷊ummu amatanne mapul᷊e wuassu napapangalo, I Gideon namile lal᷊anna sumabbi sasaannu Heres.

¹⁴ Isudde i tou nanametta sangkatou umbasanna wuassu Sukot, ana see i tou naiwal᷊o arannu manga taumata papunna su Sukot. Ne taumata udde namoṛettu manga aranna ana see nionggola si Gideon – sarangkanambone 77 su atoune.

¹⁵ Wua'udde i Gideon inaite naisasomban manga papunna su soa udde ana see nabbisara, “Tantu i yamiu ta'e ma'anaungnga manungku i yamiu buatte nanol᷊a'a mantul᷊ungku, ana waugu i ya'u taambe naasametta si Zebah wuṛṛu si Salmuna are? I yamiu tawe nangonggolu anna su tantara'u; sumbal᷊i i mangitou su tempo udde nallomete. Pa'ellege indi i Zebah wuṛṛu i Salmuna.”

¹⁶ Wua'udde i Gideon nanganu laṛangnga su wadda'u anne, ana see namuulla manga papunna su Sukot udde.

¹⁷ Su Pnuel i tou lai naṛaan candi wuṛṛu namate anambon taumata esakka su soa udde.

¹⁸ Wua'udde i Gideon naiwal᷊o si Zebah wuṛṛu Salmuna, “Ereapa hatin manga taumata apan nipaten kamiu su Tabor udde?” I Zebah wuṛṛu i Salmuna sinumimbakka, “I mangitou sarangkanambone naal᷊ihida ere hatinu, ere papapulunnu mararatu.”

¹⁹ “Udde manga tuṛangku – al᷊aṛana'i inangku,” unni Gideon. “Unnu wisara iradua tawe namate si mangitou, mangke ipassalu i ya'u lai tawe mamate siradua.”

²⁰ Ana see unni Gideon si Yeter, ana'a pahul᷊une, “Patete itarua!” Arawe i Yeter ta'e dario'a. Nariaddi i tou matta'utta na'oman sara tawe nasawutta hal᷊elene ipamate.

²¹ Unni Zebah wuṛṛu i Salmuna si Gideon, “Otte amungkangngu i'o esakka, iambua patete ringannu limanu sassane!” Ne i Gideon namatete sitarua ana see nanganu al᷊awo'u lal᷊ogakka su ullekka untan tarua.

²² Wua'udde walahannu Israel nabbisarate si Gideon, “I'o buatte namallossi yami wuassu parentan taumatan Midian. Ana waugu udde i'o ṛinone maola'a piaṛa'i yami – i'o wuṛṛu papapulunnu.”

²³ Sasimbakki Gideon, “Tawe. I ya'u maddiri maola'a piaṛangu, ana'u lai tawe wotongnge. Tumba'u Mawu piaṛangu.”

²⁴ Arawe wua'udde i Gideon nabbisara apia, “Tumba'u sambau darorongku; ngante-ngante apan niaaṛon kamiu su seetta, ṛinone sarangkanambone itantilli yamiu si ya'u.” (Taumata Midian inanaramanne mappaattu ngante-ngante wul᷊awanna; ere lai manga taumata waine apan uatana'a su wada'u anne.)

²⁵ “Ore” sasimbakki mangitou, “ringannu naungnga mal᷊uassa yami mangonggola si'o.” Wua'udde i mangitou namilattu mal᷊aṛenessa, wua'udde suapan taumata nirumanta wuṛṛu nangaddon ngante-ngante apan buatte niaron mangitou wuassu seetta.

²⁶ Anambon ngante-ngante wul᷊awanna apan tinantilla si Gideon su tempo udde awakkanne maranin ruan pul᷊o sukilone, taambe nasutta manga lal᷊ogakka, wul᷊ele, mal᷊aṛenessa ungu apan ialluṛen manga ratun Midian, wuṛṛu wul᷊ele apan ua'ele su ullekkan manga utan mangitou.

²⁷ Wuassu wul᷊awanna udde, i Gideon na'ola'a sambau paal᷊uanna sassubbanna, ana see niaddo su ampungnge, eteudde su Ofra. Anambon taumatan Israel inaite poiaroddi massubba paal᷊uanna udde, na'oman sara i mangitou naabul᷊iten Ruata. Wuṛṛu olangnge udde maola'a sambau wal᷊ati'a si Gideon wuṛṛu al᷊aṛanangnge.

²⁸ Taumata Midian tawe naal᷊ore; i mangitou niawadon taumatan Israel. Ne wanua udde mal᷊angngante appatu pul᷊o su tonnane al᷊annune sutempo i Gideon ta'e wiakka.

Papaten Gideon

²⁹ Napawe pangalo udde nasuete, i Gideon nabelengke su ampunga niariadianne wuṛṛu natana'e poiaroddi.

³⁰ I tou pia ana'a esakka siri tallun pul᷊o su atoune, ana waugu awingnge manambo.

³¹ I tou lai pia awingnge su Sikhem; wuṛṛu wuassu awingnge indi i tou naasomba sangkatou ana'a esakka aranne i Abimelekh.

³² Napawe i tou timmadete atonna wakkute udde i Gideon ana'i Yoas nate. I tou nilabbinga su lal᷊abinganni Yoas, iamange. Labbinga udde su Ofra, eteudde soan abonanni Abiezer.

³³ Napawe i Gideon natete, taumatan Israel tatewe tumuṛutta Ruata. I mangitou massubbate manga monganni Baal wuṛṛu Baal-Berit niola'a monganni mangitou.

³⁴ I mangitou tate mattaṛamawu Ruata, Mawu mangitou, apan buatte namallossi mangitou wuassu taṛinon anambon seetta apan uapal᷊iwutta si mangitou.

³⁵ I mangitou lai tate mabbal᷊issa apapian naungngu amonanni Gideon su al᷊awo'u sahaddi Gideon su walahannu Israel.