MAL᷊AṚṚUUNGNGA 7 - WUKE SUSI WATTI'U AL᷊AL᷊USASSA

I Gideon namaddon taumatan Midian

¹ Su allo sambau i Gideon ringannu anambon al᷊aṛana'a nipiaṛange napu'ote marua allo maṛanggapa. I mangitou inaite wuṛṛu naddasante maranin al᷊imatan ua'e Harod. Paddasanannu taumatan Midian addone su samba'a sawannakka wuassu tampan mangitou, su wawal᷊anne maranin Wuiddu More.

² Mawu nabbisara si Gideon, “Tantaranu tumaniten manambo. I Ya'u maddiri mangonggolu auntunganna si yamiu su taumatan Midian, ana waugu antahanna i mangitou maṛingidda, manungku i mangitou naauntunga ana waugu atatohassi mangitou sassane, na'oman sara i mangitou tawe maddalo si Ya'u.

³ Nariaddi, al᷊iata'e su tantaranu, ‘Isai apan uapendamma matta'utta, paal᷊ihakka manantangngu Wowon Gilead indi mabelengnga su wal᷊ene.’ ” Ne pia 22.000 su atoune apan napul᷊e; wuṛṛu tumba'u 10.000 su atoune apan natana'a.

⁴ Ana see Mawu nabbisara apia si Gideon, “Tantaranu ta'e tumaniten manambo. Apira'e i mangitou watukku sal᷊ukka. Poiaroddi Ya'u sarun mamile suwallati mangitou maola'a taumatanu. Amungkangngu i Ya'u mabbisara si'o, ‘Taumata indi ṛinone inai ringannu,’ i tou ṛinone inai. Arawe amungkangngu i Ya'u mabbisara, ‘Taumata indi tawe wotongnge inai susambau ringannu,’ i tou imbaṛangnga inai.”

⁵ Ne i Gideon nangapiden manga taumata udde su sal᷊ukka, ana see Mawu nabbisara si Gideon, “Taumata apan nallewa ua'e ere asu, ṛinone iṛaenu wuassu taumata apan ma'inumma uarammanga.”

⁶ Ne pia 300 su atoune apan nallewa ua'e wuassu limane; ingana'a waine sarangkanambone na'inumma uarammanga.

⁷ Wua'udde Mawu nabbisara si Gideon, “Ringannu siri tallu ṛasutta su atoune apan nallewa ua'e udde, i Ya'u sarun mamallosi yamiu wuṛṛu iapauntunga su taumata Midian. Doloṛṛa'e popaapulea'a ingana'a waine.”

⁸ Ana waugu udde i Gideon nandolokku taumatan Israel waine niapaapul᷊ea'a, tumba'u ingana'a siri tallu ṛasutta udde. Manga wal᷊unna wuṛṛu trompeta nianu wuassu manga taumata apan niapaapul᷊e udde. Taumata Midian uatana'a su wawal᷊anne, su al᷊ungngu pinaddasanannu taumatan Israel.

⁹ Ṛabbi udde Mawu nabbisara si Gideon, “Apu'ote, Gideon! Inaite pamangalo paddasanannu taumata Midian. I Ya'u sarun mapaauntungi yamiu wuassi mangitou.

¹⁰ Arawe amungkangngu i'o matta'utta, aheite i Pura, allangu udde inai suadio'a watukku paddasanannu seetta.

¹¹ I'o sarun maaringikka manga hatton seetta, wuṛṛu hatton udde sarun maawaṛani si'o inai mamangalo.” Ana see i Gideon wuṛṛu i Pura, inaite watukku passarannu paddasanannu seetta.

¹² Taumatan Midian, Amalek wuṛṛu manga taumata waine wuassu wadda'u anne, uasal᷊iawukka su al᷊awo'u tampa su wawal᷊anne udde. Aellehanna naal᷊ihidda saṛampalanna apan uaammula. Manga untan mangitou tumanite manambo naal᷊ihidda anne su winggin sahatta.

¹³ Napawe i Gideon na'omate poiaroddi, i tou naaringikka sangkatou tantal᷊anna mabatti'u wal᷊iawane su hawene. Taumata udde nabbisara arendi, “I ya'u nabal᷊iawa, pia sampesanga roti tuttal᷊inggi sinumutta su paddasananni ite ana see naasenggekka rasanna sambau. Rasanna udde naṛṛa'a na'oman sara naddatakku leta'a.”

¹⁴ Hawene sinumimbakka, “Ore, udde asinungka hal᷊elen Gideon ana'i Yoas, taumatan Israel udde! Atappasanne manungku Ruata buatte nangonggolu auntunganna si tou su taumatan Midian wuṛṛu su anambon tantaran pangalong kite!”

¹⁵ Napawe i Gideon naaringikka wal᷊iawan taumata udde wuṛṛu atappasanne, i tou lapiddu niumal᷊intudda nassubba Ruata. Wua'udde i tou nabelengke su paddasanannu Israel wuṛṛu nabbisara, “Pasasadiate! Mawu sarun mapauntungi yamiu su tantaran pangalon Midian!”

¹⁶ Ana see i Gideon nattahia tallu ṛasutta tantarane naola'a tallun kawageanganna. Sangkatou-sangkatou nionggol᷊annu trompeta sambau wuṛṛu awo'a pangadoannu sol᷊o.

¹⁷ Unni Gideon si mangitou, “Amungkangngu i ya'u na'omate su passaranna su paddasanannu taumata Midian, panutukka paapia-pia wuṛṛu pattannonte apa ta'u olaanna.

¹⁸ Napawe i ya'u wuṛṛu tantara'u nattiuppa trompeta, i yamiu pattiuppa trompeti yamiu lai, wua'udde i yamiu ṛinone maggahio mamal᷊iwutta paddasananna udde, ‘Ana waugu Mawu wuṛṛu ana waugu i Gideon.’ ”

¹⁹ Ṛabbi mattangnga, i Gideon wuṛṛu manga tantarane na'omate su passaranna su paddasanannu seetta. Su tempo udde taumata apan uariaga paddasananna, wakkute nallalol᷊ossa riaga. Ana see i Gideon wuṛṛu tantarane nattiuppa trompeta wuṛṛu namesangnga manga awo'i mangitou.

²⁰ Darua wageangngu tantara waine na'ola'a aroddi lai. Wua'udde i mangitou sarangkanambone namatten sol᷊on mangitou ringannu limane aiṛṛi, wuṛṛu nattiuppa trompeta su limane aikkatanna. I mangitou uui, “Hal᷊ele hunan Mawu wuṛṛu i Gideon!”

²¹ I mangitou sarangkanambone uarisikka su tampane sambu-sambau uapal᷊iwutta paddasananna udde. Ne anambon tantaran pangalon seetta udde tinumal᷊angnga matta'utta lapiddu uui.

²² Su tempo i Gideon wuṛṛu manga taumatane tantal᷊anna mattiuppa trompeta, na'ola'a manga tantaran seetta uapapangalo rundussa i mangitou, i mangitou uapapilitte sangkatou ringannu waine. I mangitou tinumal᷊angnga watukku Zerera araune maddatingngu Bet-Sita wuṛṛu soa Abel-Mehola maranin Tabat.

²³ Ne ruanganni Naftali, i Asyer, wuṛṛu ruanganni Manasye mawae su samba'an ra'i aroddi lai su samba'an waṛattu Sal᷊ukku Yordan niwagoanna lai. Ana see i mangitou nangenggente tantaran Midian.

²⁴ Wuṛṛu lai su ahewallu panenteannu Efraim, i Gideon napaapiddu watti'a wawago indi, “Wette sossoke mamangalo taumata Midian. Riagaite Sal᷊ukku Yordan wuṛṛu anambion ana'u sal᷊ukka araune sara Bet-Bara. Arie pabbala'a taumata Midian lumewessa poiaroddi.” Ne manga taumatan Efraim niapidda, ana see i mangitou niapariaga Sal᷊ukku Yordan wuṛṛu anambon ana'u sal᷊ukka araune na'oman sara Bet-Bara.

²⁵ Ruan katou papunnu Midian eteudde i Oreb wuṛṛu i Zeeb nisametti mangitou. I Oreb nipate su Watun Oreb wuṛṛu i Zeeb nipate su pamakkannu anggore Zeeb. Manga taumatan Efraim udde sidutu mangngenggenna taumata Midian, ana see nangapiddu puan Oreb wuṛṛu i Zeeb si Gideon su samba'an Yordan wageangngu ra'i.