MAL᷊AṚṚUUNGNGA 20 - WUKE SUSI WATTI'U AL᷊AL᷊USASSA

Walahannu Israel sulal᷊ummu pangalo

¹ Ne nirumantate walahannu Israel sarangkanambone wuassu Dan su samba'an sawannakka naddatingngu Bersyeba su timukka, wuṛṛu Gilead su ra'i, su ipangitu'a wawago udde. I mangitou na'ammula wuṛṛu naaukka su Mizpa su saruannu Mawu.

² Sarangkanambone nareengnga 400.000 tantara wuassu ammul᷊anna u'amattu ledda. Manga piaṛangnge wuassu al᷊awo'u walahannu Israel nirumanta lai poiaroddi.

^3-4 Tantal᷊anna udde manga taumatan ruanganni Benyamin naaringikke lai manungku anambon taumatan Israel apan baine uaammule su Mizpa. Ne manga taumatan Israel udde naiwal᷊ote su taumatan Lewi apan awingnge nipate udde, “Annama'o wattia'a si yami ereapa al᷊al᷊eo udde nariaddi!” Taumatan Lewi udde sinumimbakka, “I ya'u wuṛṛu awingku niumotonga su Gibea su leta'u wageangngi Benyamin wuṛṛu manaṛabbi poiaroddi.

⁵ Wua'udde manga taumatan Gibea nirumanta sutempo ṛabbi udde maddea'a si ya'u. I mangitou namal᷊iwutta wal᷊en sutampa i ya'u manaṛabbi ringannu pandumma mamate si ya'u, arawe wua'udde i mangitou nassawa awingku na'oman sara nate.

⁶ Ne i ya'u nangapiddu winal᷊unanne ana see ta'u niponggo'a, wua'udde nionggola su mapul᷊o dua ruanganna sulal᷊ummu walahanni ite sambau-sambau passangkabuwu. Olangnge udde ta'u niola'a ana waugu manga taumatan Gibea udde buatte na'ola'a sambau al᷊al᷊eo wuṛṛu ma'asili taumatan Israel.

⁷ I yamiu sarangkanambone isindi eteudde taumatan Israel. Nariaddi orassa indi ya'u maddoronga ṛingidda si yamiu!”

⁸ Ringannu sangkaṛindo'a manga taumata apan uaammula sutampa udde dirumarisikka wuṛṛu nabbisara, “I ite sarangkanambone taweddu mapul᷊e su rasanna ara'e mapul᷊e watukku wal᷊en.

⁹ Ete indi apan olaanni ite: I ite sarun mangundi ipanantunnu manga taumata apan ṛinone mamangalo Gibea.

¹⁰ Sepere mapul᷊o wuassu anambon esakku Israel ṛinone manaddia wiakka anna ipanaru si mangitou apan inai mapapangalo. Ingana'a waine inai mamangalo Gibea, makkuumanni mangitou ana waugu al᷊al᷊eo apan buatte niola'i mangitou suwallatu walahannu Israel.”

¹¹ Etearoddi walahannu Israel naaukka inai mamangalo Gibea.

¹² Wua'udde walahannu Israel nandolokku manga taumata su ahewallu leta'u ruanganni Benyamin iapapasingkattu watti'a indi. “Al᷊al᷊eo apa apan nariaddi si yamiu?

¹³ Tantil᷊a'e manga taumata lal᷊eo wuassu Gibea udde si yami tadea'u yami wotongnge mamate si mangitou, wuṛṛu ringannu aroddi yami napanginsue al᷊al᷊eo udde su pattangngannu Israel.” Arawe taumatan Benyamin tawe maddaringikka wisaran manga taumatan Israel waine udde.

¹⁴ Ewe'e lai wuassu anambon soa su wageangngi Benyamin udde, manga taumatan Benyamin nirumanta su Gibea ana waugu mamangalote taumatan Israel waine.

^15-16 Allo udde i mangitou nangammulu tantara wuassu soan mangitou anambone 26.000 su atoune. Wuṛṛu wua'udde pia lai pia tumana'u Gibea sassane apan buatte nangammulu 700 su atoune apan nipile. Sarangkanambone eteudde taumata apan limane aiṛṛi masingkatta mamaretan batu ringannu mappaattu ali-ali. Amungkangu i mangitou mappaattu ali-ali, tawe saran paassa massal᷊a.

¹⁷ Su samba'an manga taumatan Israel waine buatte nangammulu tantara anambone 400.000 su atoune apan nal᷊atite.

Napapangalon taumatan Benyamin

¹⁸ Tantaran walahannu Israel udde inaite watukku tampa patataramawuanna su Betel, wuṛṛu naiwal᷊o Ruata, “Oh, Mawu, ruanganna suapane wuassu wallati yami apan ṛinone paarorone inai mamangalo taumatan Benyamin?” Mawu sinumimbakka, “Ruanganni Yehuda.”

¹⁹ Tiṛabbine marua'allo i mangitou inaite wuṛṛu naddasante maranin soa Gibea.

²⁰ I mangitou nangatokku barisannu pangalo uasaruanna soa udde, ana see namangalote.

²¹ Ne ammul᷊annu tantaran Benyamin sinumabbanga namangalo lai wuṛṛu namate 22.000 su atoune tantaran Israel su allo udde lai.

^22-23 Ana waugu ararugine udde, walahannu Israel inaite watukku tampa patataṛamawuana ana see nilumuai su Mawu poiaroddi na'oman sara ṛabbite. I mangitou naiwal᷊o, “Mawu, ṛinone yami inai apia mamangalo manga tuṛangngi yami manga taumatan Benyamin udde?” Mawu sinumimbakka, “Ore, roote.” Ana waugu udde ammul᷊annu tantaran Israel nabbal᷊i matohassa apia, na'oman sara i mangitou nangatokku apia tantaran mangitou ere lai su allo paarorone.

²⁴ Su aruane indi i mangitou inai namangalo ammul᷊annu tantaran Benyamin udde.

²⁵ Wuṛṛu su aruane indi lai manga taumatan Benyamin udde sinumabbanga napapangalo. Paassa indi i mangitou namate 18.000 su atoune manga tantaran Israel apan apianne.

²⁶ Ne walahannu Israel inaite apia watukku Betel wuṛṛu nilumuai su Mawu. Poiaroddi i mangitou tawe niumanna naddatingngu ṛabbi wuṛṛu nangonggolu sasamban paddarame see lai sasamba itattambunna su Mawu.

^27-28 Sutempo udde Wantallu Paairen Duata ta'e su Betel, wuṛṛu i Pinehas ana'i Eleazar, pulunni Harun, manarane imam. Ne walahannu Israel naiwal᷊ote Mawu, “Mawu, apa ṛinone i yami inai apia mamangalo manga tuṛangngi yami manga taumatan Benyamin udde, ara'e i yami mangillol᷊on pangalo indi?” Mawu sinumimbakka, “Pangaloite i mangitou! Tiṛabbi i Ya'u sarun mangonggolu auntunganna si yami.”

²⁹ Naaringikka sasimbakku Mawu udde, manga taumatan Israel napatana'u manga tantarane su manga tampa uawuni su Gibea.

³⁰ Ana see su allo atallune i mangitou namangalo ammul᷊annu tantaran Benyamin ringannu atokku tantara niapasaruanna Gibea ere lai buatte niola'a miallo-miallo apan nanangkal᷊iu.

³¹ Manga taumatan Benyamin namangalo lai, wuṛṛu niawono'anna sinumabbanga wuassu soa. Ere lai apan buatte nariaddi, i mangitou mannattakke mammate taumatan Israel su tampa mal᷊alanga su liuddu soa su lal᷊anna mattudda watukku Betel wuṛṛu su lal᷊anna mattudda watukku Gibea. Tallun pul᷊o su atoune taumatan Israel niapate.

³² Ana waugu udde manga taumatan Benyamin massunna manungku i mangitou buatte naparugin taumatan Israel udde lai ere paarorone. Arawe tantaran Israel buatte naṛingidda sumoṛotta tadea'u ipamono'a tantaran Benyamin udde watukku lal᷊anna wahewalla, marau wuassu soa.

³³ Sutempo tantaran Israel apan apianne sinumoṛotta, wuṛṛu nangatokku warisanne apia su Baal-Tamar, manga tantaran mangitou apan niapariaga su Gibea, lapiddu sinumabbanga wuassu manga tampa pa'imbunianni mangitou su liuddu soa.

³⁴ I mangitou udde manga taumata apan nipile wuassu anambon taumatan Israel; anambone 10.000 su atoune. Nariaddite pangalo apan bahewalla su tempo 10.000 su atoune udde namangalo Gibea. Manga taumatan Benyamin mangke tawe maasunna manungku i mangitou tate mal᷊annu lai sarun marugi.

³⁵ Mawu nangonggolu auntunganna su taumatan Israel wuassu taumatan Benyamin, na'oman sara allo udde taumatan Israel namate 25.100 su atoune tantaran Benyamin.

³⁶ Wakkute udde taumatan Benyamin naatutukka manungku i mangitou narugite. Tantaran Israel apianne ringannu nipattatudda tinumal᷊angngu manga taumatan Benyamin ana waugu i mangitou mangngesakku tantaran mangitou su manga tampa pa'imbunianna su Gibea.

Aalla apan naauntunga taumatan Israel

³⁷ Manga taumata apan uaimbuni udde mal᷊iha-l᷊ihakka sinumutta namangalo Gibea; i mangitou nassal᷊iawukka su al᷊awo'u tampa sulal᷊ummu soa wuṛṛu namate anambon taumata isudde.

³⁸ Arawe i mangitou buatte na'ire paarorone manungku amungkangu pia timbulla manambo sussal᷊oi wuassu pattangngannu soa,

³⁹ ammul᷊annu tantara apianne apan sinumoṛota ṛinone mabbal᷊i'a apia wuṛṛu mamangalo seetta. Su orassa udde manga taumatan Benyamin buatte namate 30 su atoune tantaran Israel wuṛṛu massunna manungku i mangitou naarugite manga taumatan Israel apia ere lai paarorone.

⁴⁰ Arawe inaṛombanganne timbulla mannattakke sussal᷊oi ire'e wuassu pattangngannu soan Gibea. Manga taumatan Benyamin niṛumoro napawe i mangitou nanaile wuṛṛu naasilo ahewallu soan mangitou nasoṛobba.

⁴¹ Wuṛṛu su orassa udde lai tantaran Israel apianne nabbal᷊i'a namangalo, na'oman sara tantaran Benyamin udde nabbal᷊i nassongkakka ana waugu i mangitou naatutukke manungku i mangitou sarun marugite.

⁴² Nariaddi, i mangitou tinumal᷊angngu manga taumatan Israel nattuddan leta'u wadda'a, arawe i mangitou tawe naal᷊inda'a. I mangitou niaṛappinganna suwallatu tantaran Israel apianne wuṛṛu tantara apan orassa udde nirumanta wuassu lal᷊annu soa. Taumatan Benyamin mangke naapendamma ararugi apan lembon ahewal᷊anne.

⁴³ Manga taumatan Israel namangalo wuṛṛu nangenggenna si mangitou na'oman sara su sambau tampa samba'a ra'in Gibea. Tantal᷊anna mangngenggenna i mangitou lapiddu mammate

⁴⁴ 18.000 su atoune tantaran Benyamin apan apianne wuassu ammul᷊annu tantaran Benyamin.

⁴⁵ Tantaran Benyamin waine nabelengke ana see tinumal᷊angnga sinumabbi wadda'a nattudda watukku manga wowon batu su Rimon. Lima ṛiwu su atoune suwallati mangitou niapate su tangngan dal᷊anna. Ingana'a waine nasal᷊a nienggenanna na'oman sara Gideom. Wuassu anambon manga taumata udde pia 2.000 su atoune apan niapate.

⁴⁶ Nariaddi tantaran Benyamin apan niapate allo udde pia 25.000 su atoune – sarangkanambone tantara apan matohassa wuṛṛu waṛani.

⁴⁷ Arawe wuassu wallati mangitou apan tinumal᷊angnga sinumabbi leta'u wadda'a mattudda watukku wowon batu su Rimon pia 600 su atoune apan naatal᷊angnga. I mangitou natana'a su Rimon appatu wul᷊anna al᷊annune.

⁴⁸ Wua'udde taumatan Israel nabelengke apia ana see namangalo wuṛṛu namate anambon taumatan Benyamin lambene – esakka, wawine, al᷊aṛana'a wuṛṛu manga winatanga lai. Anambon soa su wageangnge udde nisoṛobbi mangitou.