MAL᷊AṚṚUUNGNGA 2 - WUKE SUSI WATTI'U AL᷊AL᷊USASSA

Mala'ekattu Mawu su Bokhim

¹ Mala'ekattu Mawu inaite wuassu Gilgal watukku Bokhim wuṛṛu nabbisara su manga taumatan Israel, “Yai buatte napasabbangi yamiu wuassu Mesir, wuṛṛu nangapiddi yamiu watukku wanua apan buatte nipa'ire-U su iupungngu al᷊amonanu. Buatte lai Ta'u niapasingkatta si yamiu, ‘Pa'a'aukku pa'aire-U si yamiu tawe Ta'u wassutanna.

² Ana waugu udde i yamiu tawe wotongnge ma'ola'a pa'aire ringannu tumana'u wanua indi. Manga meddan sasamban mangitou ṛinone ihohakki yamiu.’ Arawe i yamiu tawe tinumuṛutta parenta-U. I yamiu na'ola'a al᷊aṛaene!

³ Nariaddi, orassa indi paddaringikka! I Ya'u sarun tawe mallimbuakka manga taumatam banua indi napawe i yamiu mapapangalon mangitou. I mangitou sarun maola'a manga seennu, wuṛṛu i yamiu sarun awono'anna ma'oman sara i yamiu lai massubbate manga monganni mangitou.”

⁴ Napawe mala'ekatta udde buatte namasingkattu watti'a udde, walahannu Israel sarangkanambone nilumuai ringannu ma'ikkata.

⁵ Ana waugu udde tampa udde nisaggo Bokhim. See lai su tampa udde manga taumatan Israel nangonggolu sasamba su Mawu.

Apapaten Yosua

⁶ Napawe i Yosua namallosu manga taumatan Israel inaiaroddi, i mangitou lai inaite namanua su leta'a apan maola'a wageangngi mangitou sambau-sambau.

⁷ Su al᷊o'engngu allo i Yosua mabbiakka, taumatan Israel sidutu mattaṛamawu Mawu. Napawe i Yosua natete, i mangitou lai ta'e mattaṛamawu Mawu, al᷊annune i mangitou nipiaṛa'u manga taumata apan buatte naasilo sassane al᷊awo'u al᷊aṛindu'a apan niola'u Mawu su taumatan Israel.

⁸ I Yosua ana'i Nun – allangngu Mawu udde – nate su tempo uukke maṛasutta mapul᷊o su tonnane.

⁹ I tou nilabbingnga su leta'a pussaane sassane, eteudde su Timnat-Serah su panenteannu Efraim samba'a sawannaku Wowon Gaas.

¹⁰ Wua'udde anambon taumata salluwane nate lai. Wuṛṛu ingana'a taumata manansunna tate lai maaillal᷊a Mawu, ana waugu i mangitou tawe naapendamma apa apan buatte niola'u Mawu su walahannu Israel.

Israel tate massubba Mawu

^11-14 Wua'udde taumatan Israel narosate su saruannu Mawu. I mangitou lai tate massubba Mawu, Ruata iupungngu al᷊amonan mangitou, eteudde Ruata apan buatte nangapiddi mangitou sinumabbanga wuassu Mesir. I mangitou mannattake massubba si Baal wuṛṛu si Asytoret ana see lai manga monganna waine apan sassubbannu manga walahanna apan uatana'a maranin mangitou. Ne Mawu nasa'u si mangitou wuṛṛu namalaten seetta namangalo wuṛṛu nangaṛṛo darotongngi mangitou. I mangitou tawe naal᷊ore sinumaruanna manga seetta apan uapal᷊iwutta si mangitou.

¹⁵ Napawe i mangitou inaite mapapangalo, Mawu nando'appa si mangitou, ere lai buatte niapasingkatta si mangitou. Ne i mangitou naapendampe asasusa apan lembon wahewalla.

¹⁶ Mawu masokka mangonggolu piaṛṛa'a si mangitou apan mattinsahadda mamallossi mangitou wuassu ammul᷊annu taṛṛa ṛampassa.

¹⁷ Arawe i mangitou tawe maddaringikka manga piaṛangnge udde. I mangitou massubbate manga monganna waine, wuṛṛu maddirite tumuṛutta Mawu. I mangitou tawe mattanno tul᷊addan iupungnga al᷊amonan mangitou apan sidutu tuttuṛutta parentan Mawu.

¹⁸ Amungkangngu Mawu mangonggolu sangkatou piaṛṛa'a su walahannu Israel, Mawu sidutu ual᷊u'adda piaṛṛa'a udde. Su al᷊o'engngu piaṛṛa'a udde mabbiakka, Mawu sidutu mapal᷊iun mangitou wuassu manga seetti mangitou. I Tou u'akkanni mangitou napawe I Tou maaringikka i mangitou sussal᷊iomanna ana waugu pappateanna ara'e tawe maal᷊ore.

¹⁹ Arawe napawe piaṛangnge udde natete, pallal᷊aghun balahanna udde maddal᷊eonna wuassi ngana'a dorone. I mangitou mattaṛamawu manga mawu waine wuṛṛu massubba manga mawu udde. I mangitou nabelengke su inananaramanni mangitou apan lal᷊eo wuṛṛu maddiri mamal᷊u pallal᷊aghun mangitou.

²⁰ Ana waugu udde Mawu tumaniten nasa'u su walahannu Israel, wuṛṛu nabbisara, “I Ya'u buatte nandolokku iupungngu al᷊amonan walahanna indi tadea'u sidutu uaagassa pa'aire-U si mangitou. Arawe walahanna indi namassutta pa'aire udde; i mangitou nilumawanga parenta-U.

²¹ Orassa indi Ya'u maddirite lai mallimbuakka al᷊awo'u walahanna apanta'e uatana'a su wanua indi su tempo i Yosua natete.

²² I Ya'u sarun mappaattu manga walahanna udde ipanal᷊u'atta walahannu Israel, tadea'u i Ya'u maasingkatta tanne walahannu Israel mappulu tumuṛutta manga parenta-U ere lai iupungngu al᷊amonan mangitou, ara'e tawe.”

²³ Ana waugu udde Mawu tawe nangonggolu auntunganna si Yosua su saruannu manga walahanna udde. Nawal᷊elongngawe Mawu namalan mangitou natana'a su wanua udde, wuṛṛu tawe maal᷊limbuakka si mangitou ringannu mal᷊ihakka.