MAL᷊AṚṚUUNGNGA 16 - WUKE SUSI WATTI'U AL᷊AL᷊USASSA

I Simson su Gaza

¹ Su allo sambau i Simson inaite watukku Gaza. Poiaroddi i tou nassomban sangkatou wawine masandaga, ana see i tou inaite natiilla ringannu wawine udde.

² Ne tumana'u Gaza naaringikka manungku i Simson poite aroddi. Nariaddi i mangitou nalliwunna tampa udde wuṛṛu uaṛaddote si tou su al᷊o'engngu ṛabbi su ngaran soa. Arawe i mangitou tawe naaola'a apa-apa su ṛabbi udde ana waugu i mangitou maṛingidda, “ṛaddoite napawe matannallo sumabbangke, wakkute udde i ite mamate si tou.”

³ Arawe i Simson tawe natiilla isudde naddatingngu marua allo. Ṛabbi mattangnga i tou napu'o ana see inaite watukku ngaran soa. I tou nanawutta ngara udde sarangkanambone ringannu manga diṛṛine wuṛṛu manga wawarene paassa nianu. Wua'udde i tou namasanna ngara udde su wambange, wuṛṛu niapidda su puiddu wuidda su samba'an Hebron.

I Simson wuṛṛu i Delila

⁴ Wua'udde i Simson piate naungnga su sangkatou wawine wuassu Wawal᷊annu Sorek. Arannu wawine udde i Delila.

⁵ Ne nirumantate siri lima taumata tembonannu Filistin ringannu wawine udde wuṛṛu nabbisara, “Sal᷊oa'a i Simson tadea'u i tou maapulu mamasingkatta si'o apa addapingngu atatihanne udde, wuṛṛu ereapa olangnge mamamul᷊in atatohanne udde. Ringannu aroddi yami wotongnge maaranta wuṛṛu makkapussa si tou tadea'u i tou marugite si yami. Ne yami sangkatou-sangkatou mangonggolu 1.100 roitta sal᷊a'a si'o.”

⁶ Ne unni Delila si Simson, “Simson, anio i'o tumaniten matohassa? Ringannu apa i'o ṛapusanna tadea'u mawul᷊i atatohannu? Wal᷊oa'e addapingnge!”

⁷ I Simson sinumimbakka, “Amungkangu i ya'u ṛapusannu pitu tal᷊in papiti'a wakku apan taambe namara atonna, i ya'u sarun mallome wuṛṛu maola'a ere taumata wiasa.”

^8-9 Ana see manga tembonannu Filistin udde, nangonggolu tal᷊in papiti'a wakku pitu bua wuṛṛu taambe namara si Delila. Wua'udde tantal᷊anna taumatan Filistin ual᷊aṛaddo su wabbo'a waine, i Delila nakkapussa si Simson ringannu manga tal᷊i udde ana see niumui, “I Simson! Taumatan Filistin uddete!” Simson lapiddu namassutta tal᷊in papiti'a udde. Manga tal᷊i udde nabbassutta naal᷊ihidda ere wananna nabbassuta niaṛinoannu putungnga. Addapingngu atatohassi Simson taambe niasingkatanna.

¹⁰ Ana see i Delila nabbisara si Simson, “Ah, i'o nangawusu! I'o tumba'u mannalangnga si ya'u. Otte wattia'e si ya'u ringannu apa i'o wotongnge ṛapusanna!”

¹¹ I Simson sinumimbakka, “Amungkangu i ya'u ṛapusannu tal᷊i wakku apan taambe nipaatta, i ya'u mallome wuṛṛu maola'a ere taumata wiasa.”

¹² Tantal᷊anna taumatan Filistin ual᷊aṛaddo su wabbo'a waine, i Delila nanganu manga pira bua tal᷊i wakku, ana see nakkapussa si Simson. Wua'udde i tou niumui, “I Simson! Taumatan Filistin uddete!” Arawe i Simson namassutta manga tal᷊i apan uaṛapussa limane, naal᷊ihidda taumata namassutta wananna.

¹³ Ana see i Delila nabbisara si Simson, “Ah, i'o nannalangnga si ya'u apia. I'o mangngawusu. Otte wattia'e ringannu apa i'o wotongnge ṛapusanna!” I Simson sinumimbakka, “Amungkangu pitun bua kallassa uta'u nisal᷊apidda ringannu wananna su daradu'a, wua'udde iwa'issa su daradu'a udde, i ya'u mallome wuṛṛu maola'a ere taumata wiasa.”

¹⁴ Ne i Delila napaatilli i Simson ana see i tou nanal᷊apiddu pitun kallassa uta'i Simson su wanannu daradu'a. Wua'udde i tou nangele su alun daradu'a udde ana see niumui, “I Simson! Taumatan Filistin uddete!” I Simson nabangunna wuṛṛu namabbuta utangnge na'oman sara napallossa wuassu daradu'a udde.

¹⁵ Wua'udde i Delila nabbisara si tou, “Ah, i'o mabbisara manungku i'o marangngu si ya'u, wutte'e naungngu marau wuassia'u! Paatallute i'o mannalangnga si ya'u, wuṛṛu orassa indi lai i'o tawe mamasingkatta anio i'o tumaniten matohassa.”

¹⁶ Allo-allo i Delila sidutu mattanonga wuṛṛu mammata'a, na'oman sara i Simson nawusate maddaringikka.

¹⁷ Panginsueanne i Simson nabbatti'u addapingnge. “Uta'u taambe saran paassa nipol᷊o,” unni Simson. “I ya'u buatte tinantilla su Ruata maola'a pussaa-Ne sassane. Ro'en niasungkanga i ya'u naola'e ana'u pa'aire. Amungkangu uta'u pol᷊oanna, atatoha'u sarun mawul᷊i; i ya'u sarun mallome wuṛṛu maola'a ere taumata wiasa.”

¹⁸ I Delila naapendamma manungku i Simson buatte namasingkattu naungnge. Ana waugu udde i tou napaapiddu watti'a indi niapawal᷊o su manga tembonannu Filistin, “Rantate lai paassa indi. I Simson buatte nabbatti'u addapinge si ya'u.” Ne i mangitou nirumantate ringannu uaapiddu roitta ionggola si Delila.

¹⁹ Wua'udde i Delila sinumambe si Simson na'oman sara niamatiil᷊anna suṛiwane, ana see i tou namago taumata wuṛṛu nirolokka niapapol᷊o uta'i Simson apan uasal᷊apidda pitu. Wua'udde i tou nanansara si Simson, ana waugu i Simson niawul᷊ianten atatohanne.

²⁰ Ana see i tou niumui, “I Simson! Taumatan Filistin uddete!” I Simson lapiddu napu'o wuṛṛu mangngantimma manungku naudde i tou wotongnge maatal᷊angnga ere lai tempo nanangkal᷊iu. I tou wagga manungku i tou tinatangken Mawu.

²¹ Ne manga taumatan Filistin nanamette si tou wuṛṛu nallasso'a matane. I mangitou nangapiddi i Simson watukku Gaza wuṛṛu niṛapussu darua ṛate witu'a, ana see nitaṛo su tatupanna. Poiaroddi i tou niapamanara manggilinga.

²² Arawe su al᷊annune udde lai uta'i Simson mannattake tuttuwo apia.

Apapaten Simson

²³ Su allo sambau manga tembonannu Filistin na'ammula ma'ola'a andeangnga wuṛṛu suadio'a mangonggolu sasamba apan wahewalla si Dagon, monganni mangitou. I mangitou mangngantari, “Monganni ite buatte nangonggolu auntunganna si ite i Simson, seetti ite!”

^24-25 Tantal᷊anna i mangitou lullala'a, i mangitou mabbisara, “Apira'e i Simson inawarendi tadea'u i tou maola'a papal᷊agen kite!” Ne i mangitou nangal᷊appe si Simson wuassu tattupanna, wuṛṛu i tou naola'e papal᷊agen mangitou. I mangitou nandolokki tou niaparisikka suwallatu darua diṛṛi apan masallakka. Napawe awada'alla udde naasilo si Simson, i mangitou naddalote si Dagon wuṛṛu mangngantari, “Monganni ite buatte nangonggolu auntunganna si ite wuassu seetta apan buatte nandal᷊eo wanuan kite wuṛṛu namate aroddi anambone taumatan kite!”

²⁶ I Simson nabbisara ana'a esakka apan ua'ehetta si tou, “Pallosa'e lima'u tadea'u i ya'u mapangagassa manga diṛṛi apan uatumpilla wal᷊en wahewalla indi, ana waugu i ya'u mappulu mangunsadakka isudde.”

²⁷ Wal᷊en wahewalla udde nasaddatu taumata. Siri lima tembonannu Filistin isudde lai. Wuṛṛu su ṛengkenne al᷊iurosone pia iraṛangngo 3.000 su atoune. I mangitou sarangkanambone mabbiala wuṛṛu mangngal᷊uandaga si Simson.

²⁸ Su orassa udde i Simson niumal᷊iomanna; i tou nabbisara, “Oh, Mawu Apan Atanggaṛṛanne, antimanna I'o mannaungnga si ya'u. Doronganna onggol᷊aawe atatohassa apia si ya'u paassa indi, oh Ruata, tadea'u ringannu atatohassa indi ya'u wotongnge maawal᷊issa taumatan Filistin apan buatte nalloetta mata'u darua indi.”

²⁹ Wua'udde i Simson nangagassa diṛṛi darua su tangngane apan uatumpilla wal᷊en wahewalla udde. Ana see ringannu nangagassu limane aiṛṛi su diṛṛi sambau wuṛṛu sambau lai ringannu limane aikkatanna su diṛṛi waine,

³⁰ i tou nangintul᷊i, “Wala'e i ya'u mate suadio'a ringannu manga taumatan Filistin indi!” Wuṛṛu ringannu ahewallu atatohanne i tou nanuṛuddu manga diṛṛi udde na'oman sara naṛṛa'a wuṛṛu nangema'a siri lima tembonannu Filistin suadio'a ringannu taumata waine apan sulal᷊ummu wal᷊en udde. I Simson nate lai. Arawe, sutempo i tou nate udde i tou buatte namate taumata mannamboanna wuassu su tempo i tou wiakka.

³¹ Wua'udde nirumantate manga tuṛangnge wuṛṛu anambon amonanne mangal᷊appa winal᷊unanne. I mangitou nangapiddu winal᷊unanne udde napul᷊e, wuṛṛu nilabbinga sulal᷊ummu labbingngi Manoah, iamangnge. Labbingnga udde addone suwallatu Zora wuṛṛu Esytaol. I Simson nabbal᷊i piaṛa'u Israel ruan pul᷊o su tonnane al᷊annune.