MAL᷊AṚṚUUNGNGA 12 - WUKE SUSI WATTI'U AL᷊AL᷊USASSA

I Yefta wuṛṛu ruanganni Efraim

¹ Su tempo udde ruanganni Efraim uasasadiate inai mapapangalo, ana see inaite tinumumbe Sal᷊ukku Yordan matudda watukku Zafon. I mangitou nabbisara si Yefta, “Anio i'o inai mamangalo balahannu Amon ringannu tawe mangahe si yami? Orassa indi yami sarun manoṛobba si'o wuṛṛu amonannu.”

² I Yefta nabbisarate, “Suwallatu taumatan Amon wuṛṛu yami taumatan Gilead pia patatiakka apan bahewalla. Yami buatte ta'u niwagoanna iapasumbala tadea'u mapallossa wuassu manga taumatan Amon udde, arawe i yamiu tawe nirumanta.

³ Nariaddi napawe i ya'u naṛingidda, manungku i yamiu tate rumanta massumbala si ya'u, i ya'u nangutullu naungku inaite mamangalo taumatan Amon udde, salaiwe i ya'u sarun mate. Ana see Mawu nangonggolu auntunganna si ya'u wuassi mangitou. Anio i yamiu orassa indi mamangalo si ya'u?”

⁴ Wua'udde i Yefta nangammulu anambon taumatan Gilead, ana see i mangitou namangalo wuṛṛu namaddon taumatan Efraim. (Taumatan Gilead apan uatana'a su Efraim wuṛṛu Manasye, niansil᷊annu taumatan Efraim manungku i mangitou nattingkaṛaen batanganne wuassu Efraim, ruanganne.)

⁵ Manga taumatan Gilead apan uapapangalo udde, namanua su tampa tatumbeanna su Sal᷊ukku Yordan, tadea'u wotongnge maasametta manga taumatan Efraim apan tumal᷊angnga. Su tempo sangkatou taumatan Efraim inaite tumal᷊angnga, maddoronga tumumbe, taumatan Gilead naiwal᷊o si tou, “Apa i'o taumatan Efraim?” Amungkangu i tou sumimbakka, “Wal᷊ine,”

⁶ i mangitou mandolokki tou iapawisara “Syibolet” ana waugu tawe maawisara wisara udde ringannu naṛino. Ana see i mangitou manamette wuṛṛu pateanna susambau tampa tatumbeanna udde. Ne 42.000 su atoune taumatan Efraim niapate su tempo udde.

⁷ Annummu tonna al᷊annune i Yefta uapiaṛa'u taumatan Israel. Wua'udde i tou natete ana see nilabbinga su ampungnge su ampunga niasungkanganne eteudde soa Mizpa su Gilead.

I Ebzan, i Elon wuṛṛu i Abdon

⁸ Napawe i Yefta natete, ruangannu Israel nipiaṛa'i Ebzan wuassu Betlehem.

⁹ Ebzan uatahuanna tallun pul᷊o ana'a esakka wuṛṛu tallun pul᷊o ana'a wawine. Al᷊aṛanangnge wawine udde niapaawingu manga taumata wuassu walahanna waine, wuṛṛu i tou nangal᷊appa tallu mapul᷊o maṛuala wuassu walahanna waine iapaawingngu manga anangnge esakka. Pitu tonna al᷊annune i Ebzan uapiaṛa'u Israel,

¹⁰ wua'udde i tou natete ana see nilabbinga su Betlehem.

¹¹ Wuassi Ebzan, walahannu Israel nipiaṛa'i Elon wuassu ruanganni Zebulon, mapul᷊o tonna al᷊annune.

¹² Wua'udde i tou natete ana see nilabbinga su Ayalon wageangngu leta'i Zebulon.

¹³ Napawe wuassi Elon, walahannu Israel nipiaṛa'i Abdon ana'i Hilel wuassu Piraton.

¹⁴ Anangnge esakka appatu pul᷊o su atoune, wuṛṛu manga pulunne esakka tallun pul᷊o su atoune. I mangitou sambau-sambau uatahuanna keledai sasa'eanna. Ual᷊u tonna al᷊annune walahannu Israel nipiaṛa'i Abdon.

¹⁵ Wua'udde i tou natete ana see nilabbinga su Piraton su leta'a wageangngi Efraim su panenteannu taumatan Amalek.