LUKAS 3 - WUKE SUSI WATTI'U AL᷊AL᷊USASSA

Watti'a wuassi Yohanes Mananaṛṛani

¹ Su tonna apul᷊o limane su pamamarentan Kaisar Tiberius, i Pontius Pilatus naola'a gubernure su Yudea, wuṛṛu i Herodes uaparenta su Galilea, i Filipus, tuṛṛangngi Herodes namarenta su wageangngu Iturea wuṛṛu Trakhonitis, arawe i Lisanias namarenta su Abilene.

² Apan uaumbele manga imam bahewa eteudde i Hanas wuṛṛu i Kayafas. Su tonna udde Ruata nabbisara si Yohanes, ana'i Zakharia su wadda'a.

³ Ne i Yohanes inaite mammal᷊intadu al᷊awo'u tampa su ahewallu wageangngu Sal᷊ukku Yordan wuṛṛu namasingkattu Watti'a wuassu Ruata. I Yohanes u'al᷊iata, “Awal᷊ute wuassu manga rosanu, wuṛṛu i yamiu ṛinone saṛṛanianna, tadea'u Ruata mangampungnga si yamiu.”

⁴ Udde nassul᷊ungngu apa apan uawoṛṛetta sulal᷊ummu wuke Nabi Yesaya: “Pia taumata u'al᷊iata su wadda'a, ‘Saddiaite lal᷊annu Mawu, rataṛṛa'e lal᷊anni Tou.

⁵ Al᷊awo'u liobongnge sarun soopanna, al᷊awo'u wowone wuṛṛu wuidda iapaaratakka. Lal᷊anna apan uawengkolla sarun tul᷊iṛṛanna, wuṛṛu lal᷊anna apan ual᷊iobbo'a sarun iratakka.

⁶ Manga taumata su ahewallu runia sarun ma'ellega Ruata manal᷊amatta taumata!’ ”

⁷ Manambo taumata nirumanta ringanni Yohanes maisaṛṛani. I Yohanes nabbisara si mangitou, “I yamiu taumata lal᷊eo! Isai nabbisara manungku i yamiu wotongnge mal᷊iu wuassu ṛuumannu Ruata apan sarun rumanta?

⁸ Pasiloa'e ringannu pallal᷊agunu manungku i yamiu nawal᷊ute wuassu manga rosanu! Arie mabbisara manungku Abraham udde iupungngu al᷊amonanu. Naunge: Wuassu manga watu indi lai Ruata wotongnge ma'ola'a papapulunni Abraham!

⁹ Wal᷊iungnga nasaddiate ipanuwangnga alu ma'oman sara ṛamunne. Al᷊awo'u alu apan tawe mabbua mapia sarun tuwanganna wuṛṛu iramme sulal᷊ummu putungnga.”

¹⁰ “Nariaddi, apa ṛinone olaanni i yami?” aiwal᷊o manga taumata si Yohanes.

¹¹ I Yohanes sinumimbakka, “Taumata apan laungnge darua ṛinone mangonggolu samparassa su taumata tawe laubba, wuṛṛu taumata pia anna, ṛinone mattahia su taumata tawe anna.”

¹² Manga mallal᷊uṛṛu wose lai nirumanta ringanni Yohanes maisaṛṛani. I mangitou naiwal᷊o, “Iamangnga Huru, apa ṛinone olaanni yami?”

¹³ I Yohanes sinumimbakka, “Arie padorongnga lumebbe wuassu apa apan suete tinantunna.”

¹⁴ Pia lai tantara naiwal᷊o, “Ereapa i yami? Apa ṛinone olaanni yami?” I Yohanes sinumimbakka, “Arie pamaṛṛangnga sisai-sai, wuṛṛu arie pangaṛṛo roitta ringannu aansilla awusu. Wotongngete i'o mabbiakku roitta lal᷊antakku ara'e haddinu!”

¹⁵ Su tempo udde manga taumata mannatakke uaaiwal᷊o, tanne i Yohanes Ratu Punnu Sal᷊amatta apan raṛṛadoanni mangitou.

¹⁶ Ana waugu udde i Yohanes nabbisara si mangitou sarangkanambone, “I ya'u mannaṛṛani si yamiu ringannu ua'e, arawe paṛṛaddote sarun rumanta sal᷊immurine lembon ahewal᷊anne wuassia'u. Mamu'a tal᷊in sapatune lai ya'u tawe suṛṛinone. I Tou sarun manaṛṛani si yamiu ringannu Ghaṛṛahon Ruata wuṛṛu putungnga.

¹⁷ Su lima-Ne pia niṛṛu ipattappa ammene ma'oman sara mawaresi. Amme sarun iammulla su wal᷊ingkakka, arawe anambon wal᷊aane sarun tutunganna su putungnga apan tawe mapadumma!”

¹⁸ Ete aroddi i Yohanes mannantiro taumata ringannu al᷊awo'u al᷊aṛṛa'a su tempo i tou mabatti'u Watti'u Al᷊al᷊uassa.

¹⁹ Arawe i Herodes tembonanne su Galilea, wino'anni Yohanes su ola'u pa'a'awingnge ringanni Herodias, awingngu tuṛṛangnge, wuṛṛu su ola'u manga al᷊al᷊eo waine apan suete niolangnge.

²⁰ Arawe i Herodes niatambanna al᷊al᷊eone ringannu nantaṛṛon Yohanes sulal᷊ummu tuttupanna.

Mawu Yesus nissaṛṛani

²¹ Napawe manga taumata udde nissaṛṛanite, Mawu Yesus lai nissaṛṛani. Wuṛṛu tantal᷊anna i Tou u'al᷊iomanna, langitta nati'akka,

²² wuṛṛu Ghaṛṛahon Ruata inumonto'a si Tou ere manu'a merpati. See inaringikka tingikku Ruata nabbisara, “Ete I'o Ana'a arangnguang-Ku. I'o ma'al᷊uassa naung-Ku.”

Manga arannu iupungngu al᷊amona Mawu Yesus

²³ Su tempo udde Mawu Yesus nanattakken manara-Ne, uukke iraṛṛangngo tallum pul᷊o su tonnane. Tumuṛṛuttu addapattu taumata, i Tou ana'i Yusuf, ana'i Eli,

²⁴ ana'i Matat, ana'i Lewi, ana'i Malkhi, ana'i Yanai, ana'i Yusuf,

²⁵ ana'i Matica, ana'i Amos, ana'i Nahum, ana'i Hesli, ana'i Nagai,

²⁶ ana'i Maat, ana'i Matica, ana'i Simei, ana'i Yosekh, ana'i Yoda,

²⁷ ana'i Yohanan, ana'i Resa, ana'i Zerubabel, ana'i Sealtiel, ana'i Neri,

²⁸ ana'i Malkhi, ana'i Adi, ana'i Kosam, ana'i Elmadam, ana'i Er,

²⁹ ana'i Yesua, ana'i Eliezer, ana'i Yorim, ana'i Matat, ana'i Lewi,

³⁰ ana'i Simeon, ana'i Yehuda, ana'i Yusuf, ana'i Yonam, ana'i Elyakim,

³¹ ana'i Melea, ana'i Mina, ana'i Matata, ana'i Natan, ana'i Daud,

³² ana'i Isai, ana'i Obed, ana'i Boas, ana'i Salmon, ana'i Nahason,

³³ ana'i Aminadab, ana'i Admin, ana'i Arni, ana'i Hezron, ana'i Peres, ana'i Yehuda,

³⁴ ana'i Yakub, ana'i Ishak, ana'i Abraham, ana'i Terah, ana'i Nahor,

³⁵ ana'i Serug, ana'i Rehu, ana'i Peleg, ana'i Eber, ana'i Salmon,

³⁶ ana'i Kenan, ana'i Arpakhsad, ana'i Sem, ana'i Nuh, ana'i Lamekh,

³⁷ ana'i Metusalah, ana'i Henokh, ana'i Yared, ana'i Mahalaleel, ana'i Kenan,

³⁸ ana'i Enos, ana'i Set, ana'i Adam, ana'u Ruata.