LUKAS 23 - WUKE SUSI WATTI'U AL᷊AL᷊USASSA

Mawu Yesus su saruanni Pilatus

¹ Awada'alla su ammul᷊anna udde dirumarisikka see nangapiddu Mawu Yesus su saruanni Pilatus.

² Isudde i mangitou mapaasal᷊an Tou. I mangitou mabbisara, “I yami naaratingnga taumata indi mangngal᷊iwun lal᷊oṛṛon soa. I Tou mandolokku taumata tadea'u tawe mamaekka wose su Kaisar, ana waugu i Tou mabal᷊o manungku ete i Tou i Kristus, sangkatou ratu.”

³ See i Pilatus naiwal᷊o Mawu Yesus, “Atonna I'o ratun taumatan Yahudi?” Mawu Yesus sinumimbakka, “Aroddi ere su wisaranu.”

⁴ Ne i Pilatus nabbisara manga imam tembonanne wuṛṛu taumata nambo udde, “I ya'u tawe naasomba sal᷊ane saran sambau su taumata indi tadea'u i Tou iṛṛuumanna.”

⁵ Arawe i mangitou lembo mammata'a lai, “Ringannu al᷊aṛṛang-Nge, i Tou mangngal᷊iwun taumata su ahewallu leta'u Yudea; paarorone su leta'u Galilea, wuṛṛu orassa indi na'omate isindi lai.”

Mawu Yesus su saruanni Herodes

⁶ Napawe i Pilatus naaringikka hatto udde, i tou naiwal᷊o, “Apa taumata indi taumatan Galilea?”

⁷ Napawe nipa'asingkatanna manungku Mawu Yesus wuassu leta'u wageangngu taṛṛinon Herodes, i Pilatus nandolokku Mawu Yesus ringanni Herodes, apan tempo udde isudde lai su Yerusalem.

⁸ I Herodes nilumuassa napawe naasilo Mawu Yesus, ana waugu mal᷊annute i tou maaringikka olangnge wuṛṛu maapulu ma'ellega si Tou. I tou mangngantimma wotongnge ma'ellega Mawu Yesus ma'ola'a al᷊aṛṛindu'a.

⁹ Ana waugu udde i Herodes manambonaiwal᷊o si Tou, arawe Mawu Yesus tawe sinumimbakka saran paassa.

¹⁰ Manga imam tembonanne wuṛṛu manga hurun agama sinumaruanna lai isudde wuṛṛu ringannu pia lembone mapaasal᷊a Mawu Yesus.

¹¹ I Herodes wuṛṛu manga tantarane mannalangnga wuṛṛu mangngal᷊uandaga Mawu Yesus, see nilluṛṛeannu laubbu awawantuga, wua'udde i Tou nirolokka apia ringanni Pilatus.

¹² Su allo udde lai Herodes wuṛṛu i Pilatus, apan dorone uasase'etta, naddamete apia.

Mawu Yesus iṛṛuumanna pateanna

¹³ I Pilatus nangammullu manga imam tembonanne, wuṛṛu manga piaṛṛangnge, wuṛṛu lal᷊oṛṛon soa,

¹⁴ see nabbisara si mangitou, “I yamiu nangapiddu taumata indi si ya'u wuṛṛu mabbisara manungku i Tou mangngal᷊iwu manga taumata. Orassa indi su saruanni yamiu i ya'u suete namarikissa si Tou, arawe i ya'u atonna-tonna tawe naasomba saran sambau al᷊al᷊eone apan iaansilli yamiu si Tou.

¹⁵ Aroddi lai addapatti Herodes, ana waugu i tou lai suete napawelengngu Mawu Yesus udde si yami. Taumata indi tawe na'ola'a pasasal᷊a apan botongnge maaṛṛuumanna si tou ma'oman sara mate.

¹⁶ Ana waugu udde ya'u sarun manggesekka si Tou wua'udde i Tou ipallossa.” [

¹⁷ Suapan allo rameam Paskah, i Pilatus ṛinone mammallossu sangkatou taumatan ṛuumanna su tumana'u soa.]

¹⁸ Anambon taumata apan uaammulla isudde mangngintul᷊i, “Patete i Tou! Pallosa'a i Barabas si yami!” (

¹⁹ I Barabas niṛṛuumanna ana waugu namangalo soa wuṛṛu ana waugu pamamate.)

²⁰ I Pilatus ma'apulu mamallossu Mawu Yesus, ana waugu udde i tou nabbisara paassa lai su taumata nambo udde.

²¹ Arawe i mangitou mangngintul᷊i, “Arussa'a i Tou! Arussa'a i Tou!”

²² See su atallune i Pilatus nabbisara si mangitou, “Arawe apa pasasal᷊ane? I ya'u tawe naasomba saran sambau pasasal᷊ane apan ṛinone iṛṛuumanna ringannu ṛuumanna pateanna! I ya'u manggesekka si Tou wua'udde ipallossa.”

²³ Arawe i mangitou sidutu u'ui ma'ikka-ikkatta manungku Mawu Yesus ṛinone iarussa. Ne panginsueanne darorongngi mangitou niraringiṛṛanna.

²⁴ Ne i Pilatus nangonggolen ṛuumanna pateanna su Mawu Yesus ere su apulun taumata nambo udde,

²⁵ wuṛṛu namallossu taumata apan radoronganni mangitou, eteudde taumata apan niṛṛuumanna ana waugu namangalo wuṛṛu namate. Wua'udde Mawu Yesus tinantille si mangitou wuṛṛu walate apulu mangitou ma'ola'a si Tou.

Mawu Yesus niarussa

²⁶ Ne Mawu Yesus niapidde mangitou. Su pattangngannu l᷊al᷊anna, i mangitou nassomban sangkatou aranne Simon, wuassu Kirene, apan tantal᷊anna inai su soa. I mangitou nanametta si tou, see namata'i tou niapapasanna arussa su liuddu Mawu Yesus.

²⁷ Manambo taumata uatantuṛṛutta liuddu Mawu Yesus – su wallatti mangitou pia sire pira wawine. Manga wawine udde lulluai wuṛṛu massusa Mawu Yesus.

²⁸ Arawe Mawu Yesus nanaile wuṛṛu nabbisara, “Ei, manga wawinen Yerusalem! I Ya'u arie palluaie. Luaiten watanganni yamiu sassane wuṛṛu al᷊aṛṛanangngu.

²⁹ Ana waugu sarun dumanta tempone taumata sarun mabbisara, ‘Lal᷊umanna'a eteapa su manga wawine apan tawe illoṛṛo, apan tawe naasomba ana'a wuṛṛu tawe mapasusun anangnge!’

³⁰ Su tempo udde taumata sarun mabbisara su manga wowone, ‘Umpisanete i yami!’ Wuṛṛu su manga wuidda, ‘Soopete i yami!’

³¹ Ana waugu amungkangngu matataṛṛino su alu ta'e wiakka, taumata suete na'ola'a ereindi, apa lai sarun olaanni mangitou su alu apan naṛṛangute!”

³² Pia lai ruang katou waine – itarua taumata lal᷊eo – apan niapiddi mangitou iṛṛuumanna lai sara mate su sampunna ringannu Mawu Yesus.

³³ Napawe na'omate su tampa apan isassago “Tanggilal᷊a”, i mangitou nangarussate Mawu Yesus wuṛṛu ruang katou taumata lal᷊eo udde – sangkatou su samba'a uananna wuṛṛu sangkatou lai su samba'a aiṛṛi Mawu Yesus.

³⁴ See Mawu Yesus inumal᷊iomanna, “O Iamang-Ku, ampungewe i mangitou! I mangitou wagga apa apan a'olaanni mangitou.” Laubbu Mawu Yesus nitahia isudde su wallatti mangitou wuṛṛu niundi.

³⁵ Manga taumata uarisikka isudde mabbiala lai, tantal᷊anna manga tembonannu taumatan Yahudi mangngadio'a Mawu Yesus ringannu wisarane, “I Tou suete nanal᷊amatta taumata waine; orassa indi i Tou panal᷊amatta riri-Ne sassane, amungkangngu atonna-tonna i Tou Ratum Punnu Sal᷊amatta apan nipilen Ruata!”

³⁶ Manga tantara lai mangngadio'a si Tou. I mangitou nangundani wuṛṛu nangonggolu anggore mapakkada si Tou

³⁷ lapiddu nabbisara, “Amungkangngu I'o ratun taumatan Yahudi, panal᷊amatte riri-Nu!”

³⁸ Su alu arussa Mawu Yesus al᷊iu rosone uawoṛṛetta wisara ereindi: “Ete indi Ratun Taumatan Yahudi.”

³⁹ Sangkatou wuassu wallattu taumata lal᷊eo apan uaarussa isudde mangngadio'a lai Mawu Yesus. I tou nabbisara, “Ete I'o Ratum Punnu Sal᷊amatta udde? Ei, panal᷊amatte riri-Nu wuṛṛu si yami!”

⁴⁰ Arawe taumata lal᷊eo sangkatou lai nanagu hawene udde, unni tou, “Apa i'o tawe matta'uttu Ruata? I'o su sampunna niṛṛuumanna na'oman sara mate ere i Tou.

⁴¹ Tumba'u ṛuumanni addua udde atonna naṛṛino su pallal᷊agung kadua. Arawe i Tou atonna-tonna tawe sal᷊ane!”

⁴² See i tou nabbisara, “Mawu Yesus, naungewe i ya'u, napawe I'o rumantate maola'a sangkatou Ratu!”

⁴³ “Pangimante,” unnu Mawu Yesus si tou, “Allo indi i'o su sampunna lai ringang-Ku su Firdaus.”

Apapate Mawu Yesus

⁴⁴ Iraṛṛangngo puulla mapul᷊o dua allattune, matannallo tawe semakke wuṛṛu ahewallu wanua udde naddandumma na'oman sara puulla tatallu wawallo.

⁴⁵ Pampele apan ua'ele su Wal᷊e Mawu nahesa'a natahia darua.

⁴⁶ See Mawu Yesus inumui ma'ikka-ikkatta, “O Iamang-Ku! Sulal᷊ummu limanu i Ya'u manantillu watangang-Ku!” Napawe suete nabbisara aroddi, i Tou natete.

⁴⁷ Napawe tembonannu tantara naasilo apa apan suete nariaddi, i tou nadalote Ruata. See i tou nabbisara, “Atonna-tonna, i Tou indi tawe sal᷊ane!”

⁴⁸ Taumata nambo apan nirumanta isudde ma'ellega, naasilote apa apan suete nariaddi isudde. I mangitou sarangkanambone napul᷊e ringannu naungnga sinumassilla.

⁴⁹ Wuṛṛu manga hawe Mawu Yesus, nareengnga lai manga wawine apan uatantalongnga si Tou wuassu Galilea uarisikka marau wuṛṛu na'ellega sarangkanambone udde.

Pallal᷊abingngu Mawu Yesus

^50-51 Pia sangkatou aranne i Yusuf, wuassu soa Arimatea su wanua Yudea. I tou sangkatou mapia apan aaddatannu taumata, wuṛṛu nareengnga taumata apan sidutu uaraṛṛaddo tempone Ruata mamarenta ere sangkatou Ratu. Salaiwe i tou nareengnga su wageangngu Mallaṛṛuungngu Agama, i tou maddirin ṛuumanna udde wuṛṛu inolaannu manga mallaṛṛuungnga udde.

⁵² I Yusuf inaite sinumaruanna si Pilatus wuṛṛu nadorongnga tadea'u winal᷊unannu Mawu Yesus ionggolla si tou.

⁵³ Wua'udde i tou nanossokku winal᷊unannu Mawu Yesus udde wuassu arussane, see nipi'unnu kaengnga kafan wuassu linen. Wua'udde i tou nangadoten winal᷊unanna sulal᷊ummu lal᷊abinganna apan niola'a sulal᷊ummu wuiddu watu – lal᷊abinganna udde taambe pinallabinganna.

⁵⁴ Allo udde allo al᷊imane; wuṛṛu allon Sabatta maranite itattakka.

⁵⁵ Manga wawine apan nirumanta ringannu Mawu Yesus wuassu Galilea tinumantalongnga si Yusuf na'ellega lal᷊abinganna udde. I mangitou na'ellega lai ereapa winal᷊unannu Mawu Yesus niaddo sulal᷊ummu lal᷊abinganna.

⁵⁶ Wua'udde i mangitou napul᷊e see nanaddia manga rampa-rampa wuṛṛu lana mawangngi ipamokka winal᷊unannu Mawu Yesus. Su allon Sabatta, i mangitou nangillol᷊o mammanara ipallagun Titan agama.