LUKAS 22 - WUKE SUSI WATTI'U AL᷊AL᷊USASSA

Ma'aire mamate Mawu Yesus

¹ Ramean Roti Tawe Ragine apan isassago Paskah maranite.

² Manga imam tembonanne wuṛṛu manga hurun agama tantal᷊anna maddea'a lal᷊anne mamate Mawu Yesus ringannu mal᷊anna-l᷊annaba, ana waugu i mangitou matta'uttu taumata nambo.

I Yudas inumire mamate Mawu Yesus

³ Wua'udde Setanna nangintaṛṛo si Yudas apan isassago lai Iskariot, eteudde sangkatou wuassu sire mapul᷊o dua mallal᷊aṛṛenggennu Mawu Yesus.

⁴ Ana waugu udde i Yudas inaite wuṛṛu na'irete manga imam tembonanne wuṛṛu manga tembonannu mandariaga Wal᷊e Mawu su ola'u ereapa i tou wotongnge manantillu Mawu Yesus si mangitou.

⁵ I mangitou mangke lulluassa wuṛṛu naddiandi mangonggolu roitta si tou.

⁶ I Yudas inumire wuṛṛu i tou nadea'e tempone manantillu Mawu Yesus si mangitou, ringannu tawe asingkatannu taumata.

Mannaddia annu Paskah

⁷ Na'omate allone Ramean Roti Tawe Ragine, manungku domba annu Paskah pototante.

⁸ Ne Mawu Yesus nandolokki Petrus wuṛṛu i Yohanes, “Roote panaddia annu Paskah si ite.”

⁹ “Suapa Iamangnga, i yami manaddia anna udde?” aiwal᷊o mangitou.

¹⁰ Mawu Yesus sinumimbakka, “Su tempo i yamiu sumutta su soa, i yamiu massomban sangkatou esakka uaapiddu sambau wensadda lal᷊oṛṛoannu ua'e. Tantalongke si tou su wal᷊e suttanni tou,

¹¹ wuṛṛu wal᷊oa'e su tatahuannu wal᷊e udde: Iamangnga Huru mappaiwal᷊o, ‘Suapa tampane manga mallal᷊aṛṛenggeng-Ku wuṛṛu i Ya'u umanna annu Paskah?’

¹² Tatahuannu wal᷊e udde sarun mamantingida si yamiu wabbo'a wahewa sambau su ṛengkenne aruane, nasuungngu saranapane. Saddiaite sarangkanambone isudde.”

¹³ Ne inaite i Petrus wuṛṛu i Yohanes, naaratingke sarangkanambone nassul᷊ungnga ere iwabbisara Mawu Yesus. I mangitou nanaddiate annu Paskah isudde.

Sal᷊iwangngu Mawu

¹⁴ Napawe na'omate tempone umanna annu Paskah udde, Mawu Yesus inuma'ianna su sampunna ringannu manga mallal᷊aṛṛenggen-Ne su sal᷊iwangnga udde.

¹⁵ See i Tou nabbisara si mangitou, “I Ya'u ma'apulu atonna umanna annu Paskah indi su sampunna ringanni yamiu, tantal᷊anna i Ya'u taambe matataṛṛangnga susa!

¹⁶ Ana waugu udde, pangimante: i Ya'u tate umanna anna indi apia ma'oman sara atappasannu sal᷊iwangnga indi iapaal᷊iatta'a su Runia Wakkun Ruata.”

¹⁷ Wua'udde Mawu Yesus namengkette mangkon anggore, see inumal᷊iomanna na'adiangkamanna su Ruata, wua'udde nabbisara, “Sengkampe indi, wuṛṛu tahiate;

¹⁸ ana waugu asingkate: manattakka orassa indi i Ya'u tate ma'inumma anggore indi apia ma'oman sara Ruata uataṛṛinote sarangkanambone.”

¹⁹ Wua'udde Mawu Yesus nanganute roti. Wuṛṛu napawe suete na'adiangkamanna, i Tou nattahiate roti udde ringannu lima-Ne, see nionggolla si mangitou, wuṛṛu nabbisara, “Ete indi wadang-Ku [apan tinantilla ana waugu i yamiu. Ola'e indi maola'a sambau pananaunganna si Ya'u.”

²⁰ Aroddi lai napawe suete inumanna, i Tou nangonggolu mangkon anggore udde si mangitou wuṛṛu nabbisara, “Mangko indi, eteudde pa'aire Ruata apan wakku, apan nitohassu daṛṛa-U – daṛṛa apan tinantilla ana waugu i yamiu].”

²¹ “Arawe pa'ellega! Taumata apan mamate si Ya'u, isindi lai ringang-Ku!

²² Ana'u Taumata sarun mate su ereapa suete tinantunnu Ruata, arawe nasilakate taumata apan mamate si Tou!”

²³ Ne i mangitou nanattakke uaiwal᷊o sangkatou ringannu sangkatou, isai wuassu wallatti mangitou sarun ma'ola'a olangnge udde.

Pattatatiakka su ola'u isai ahewal᷊anne

²⁴ Su wallattu manga mallal᷊aṛṛenggennu Mawu Yesus nariaddi pattatatiakka su ola'u isai wuassi mangitou apan ṛinone ellehanna lembon ahewal᷊anne.

²⁵ Mawu Yesus nabbisara si mangitou, “Manga ratum walahanna apan tawe maaillal᷊a Ruata mannansara tumanangnge, wuṛṛu manga tembonanne isassago ‘Mallal᷊u'adda Tumanangnge’.

²⁶ Arawe i yamiu tawe wotongnge aroddi. Ewe'e mawal᷊i'a taumata wahewa su wallatti yamiu ṛinone maola'a adio'anne, wuṛṛu piaṛṛangnge ṛinone maola'a ere sangkatou mangangimbe.

²⁷ Isai magewal᷊anne: taumata apan ua'ianna u'anna su medda, ara'e taumata apan mangngimbe si tou? Natantunna taumata apan ua'ianna udde. Arawe i Ya'u isindi ringanni yamiu naola'a ere sangkatou mangangimbe.

²⁸ Sulal᷊ummu al᷊awo'u asasusa-U, yamiu sidutu su sambau ringang-Ku.

²⁹ Ere lai Iamangnga suete nangonggolu taṛṛino si Ya'u ipamarenta, aroddi lai Ya'u sarun mangonggolu taṛṛino udde si yamiu.

³⁰ Ringannu aroddi yamiu wotongnge lumuassa ringang-Ku su tempo i Ya'u maola'a Ratu. Wuṛṛu i yamiu sarun uma'ianna su atanggaṛṛanne su mapul᷊o dua adderan araratuanna wuṛṛu mamarenta mapul᷊o dua walahannu taumatan Israel.”

Papasingkatta manungku i Petrus sarun massinaadu Mawu Yesus

³¹ “Simon, Simon, paddaringikka! Setanna suete niwala mamono'a si yamiu; ere gandumma iṛṛae wuassu wal᷊a'ane na'oman sara apan mappianne iṛṛae wuassu apan dal᷊eo.

³² Arawe i Ya'u suete inumal᷊iomanni yamiu, Simon, tadea'u pangangimannu tawe mallome. Wuṛṛu napawe i'o mabelengke ringang-Ku, i'o sarun manohassa manga tuṛṛangngu.”

³³ I Petrus sinumimbakka, “Mawu, i ya'u uasaddia sumutta su tuttupanna wuṛṛu mate su sampunna ringannu Mawu!”

³⁴ “Pangimante, Petrus,” unnu Mawu Yesus, “tantal᷊anna manu'a taambe inumu'u allo indi, i'o paatallute nassina'a-U.”

Dompetta, pato'a wuṛṛu hal᷊ele

³⁵ Wua'udde Mawu Yesus nabbisarate si mangitou, “Dorone su tempo i Ya'u nandolokki yamiu, tawe namalang kamiu mangapiddu dompetta, pato'a ara'e sapatu, apa auranganni yamiu su tempo udde?” “Tawe!” sasimbakki mangitou.

³⁶ “Arawe orassa indi,” unnu Mawu Yesus, “Isai pia dompetta ara'e pato'a, ṛinone iapidda; wuṛṛu isai tawe hal᷊ele, ṛinone mabal᷊u'u jubahne ipamalli hal᷊ele.

³⁷ Ana waugu, pangimante, wageangngu Wuke Susi tingikke arendi, ‘I Tou sassunnanna ere sangkatou taumata lal᷊eo,’ ṛinone mariaddi su riri-U. Ana waugu apan uawoṛṛetta su Wuke Susi matataṛṛino si Ya'u tantal᷊anna mattipusse orassa indi.”

³⁸ “Mawu,” unnu mallal᷊aṛṛenggennu Mawu Yesus, “Pa'ellega, isindi pia ruam bua halel᷊e.” “Uddita'e!” sasimbakku Mawu Yesus.

Mawu Yesus inumal᷊iomanna su Wuiddu Zaitun

³⁹ Mawu Yesus nanantangken soa wuṛṛu inaite ere inanaramanne watukku Wuiddu Zaitun, wuṛṛu manga mallal᷊aṛṛenggen-Ne inai lai ringanni Tou.

⁴⁰ Napawe na'omate isudde, i Tou nabbisara si mangitou, “Aal᷊iomante tadea'u i yamiu tawe marosa amungkangngu i yamiu wono'anna!”

⁴¹ Wua'udde i Tou nangindau adio'a wuassi mangitou, iraṛṛangngo araune paassa panuntungannu watu,

⁴² see inumal᷊intuda wuṛṛu inumal᷊iomanna, “Iamangnga,” wisara-Ne, “amungkangngu wotongnge, paaraua'a wuassia-U sansara apan sasaruanang-Ku indi. Arawe arie tumuṛṛuttu apulu-U, ewe'e tumuṛṛuttu apulun Iamangnga.” [

⁴³ Sangkatou mala'ekatta nirumanta ringanni Tou wuṛṛu nanohassa si Tou.

⁴⁴ Mawu Yesus tumaniten uatataṛṛangnga sansara sulal᷊ummu naung-Nge na'oman sara i Tou u'al᷊iomanna atonna-tonna. Liahane naal᷊ihida raṛṛa tutturo su leta'a.]

⁴⁵ Napawe suete inumal᷊iomanna, Mawu Yesus nabelengke apia ringannu manga mallal᷊aṛṛenggen-Ne. I Tou naaratingnga si mangitou tantal᷊anna mattiilla ana waugu massusa.

⁴⁶ See i Tou nabbisara si mangitou, “Anio i yamiu mattiilla? Pabbangunte wuṛṛu a'al᷊iomanna tadea'u i yamiu tawe awono'anna.”

Mawu Yesus nisametta

⁴⁷ Tantal᷊anna Mawu Yesus ta'e uahahatto, nirumantate taumata manambo. I mangitou uapiaṛṛa'a si Yudas, sangkatou wuassu mallal᷊aṛṛenggennu Mawu Yesus. Wua'udde i Yudas inaite natudda Mawu Yesu see nangari'a si Tou.

⁴⁸ Arawe Mawu Yesus nabbisara si tou, “Yudas, apa ringannu aari'a udde i'o mamate Ana'u Taumata?”

⁴⁹ Napawe manga mallal᷊aṛṛenggennu Mawu Yesus apan isudde naasilo apa apan sarun mariaddi, i mangitou nabbisara, “Mawu, i yami mandoappa si mangitou ringannu hal᷊ele!”

⁵⁰ See sangkatou su wallatti mangitou namuulla allangngu imam wahewa ringannu hal᷊ele na'oman sara naṛṛassatta tal᷊ingane aikkatanna.

⁵¹ Arawe Mawu Yesus nabbisara, “Udita'e!” See i Tou namita tal᷊ingan taumata udde see niapaapia.

⁵² Wua'udde Mawu Yesus nabbisara manga imam tembonanne wuṛṛu manga tembonannu mandariaga Wal᷊e Mawu, see manga piaṛṛa'u taumatan Yahudi apan nirumanta isudde, manametta Mawu Yesus, “Apa i Ya'u indi taumata lal᷊eo, na'oman sara i yamiu nirumanta uaapiddu hal᷊ele wuṛṛu papuulla ipanametta si Ya'u?

⁵³ Miallo-miallo i Ya'u su sambau ringanni yamiu su Wal᷊e Mawu, arawe i yamiu tawe manametta si Ya'u. Arawe indite tempone i yamiu manametta, su tempo taṛṛinon ararandumma mappaamattu manarane.”

I Petrus nassinaadu Mawu Yesus

⁵⁴ I mangitou nanamette Mawu Yesus see niapidda su wal᷊em imam wahewa. I Petrus tinumantalongnga ro'en marau.

⁵⁵ Su pattangngannu rallakku wal᷊e udde piate putungnga apan suete nire'omanna wuṛṛu i Petrus inaite inuma'ianna su sampunna ringannu manga taumata ua'ianna uapal᷊iwutta putungnga udde.

⁵⁶ Sangkatou mangangimbe wawine naasilo si Petrus ua'ianna su winggim putungnga udde; see mangangimbe wawine udde mannutukka si Petrus, wua'udde nabbisara, “Taumata indi lai tanginna su sambau ringannu Mawu Yesus!”

⁵⁷ Arawe i Petrus nassinaada. I tou nabbisara, “I ya'u atonna-tonna waggan taumata udde!”

⁵⁸ Tawe nal᷊annu wua'udde, sangkatou waine naasilo si Petrus wuṛṛu nabbisara, “I'o lai sangkatou su wallatti mangitou!” Arawe i Petrus sinumimbakka, “Tawe, wal᷊ine i ya'u!”

⁵⁹ Iraṛṛangngo sangka orassa nal᷊iudda, sangkatou waine lai nabbisara ma'ikkatta, “Atonna-tonna taumata indi mallal᷊aṛṛenggennu Mawu Yesus, ana waugu i tou lai taumatan Galilea!”

⁶⁰ Arawe i Petrus sinumimbakka, “Apa pandumannu, i ya'u wagga!” Orassa udde lai, tantal᷊anna i Petrus ta'e mabbisara, manu'a inumu'u.

⁶¹ Mawu Yesus nanaile wuṛṛu na'ellega si Petrus. See i Petrus naanaungke Mawu Yesus suete nabbisara si tou, “Tantal᷊anna manu'a taambe inumu'u allo indi, i'o paatallute massina'a-U.”

⁶² Ne sinumabangke i Petrus wua'isudde wuṛṛu nilumuaite.

Mawu Yesus ninalangnga wuṛṛu nipuulla

⁶³ Manga taumata apan ualu'adda Mawu Yesus, mannalangnga wuṛṛu mamuulla si Tou.

⁶⁴ I mangitou nanutuba matane wuṛṛu naiwal᷊o si Tou, “Si'ata'a isai namuulla Si'o?”

⁶⁵ Manambo lai manga wisara aal᷊uandaga apan iwabbisara mangitou su Mawu Yesus.

Mawu Yesus su saruannu Mallaṛṛuungngu Agama

⁶⁶ Su rua'allone, manga piaṛṛa'u taumatan Yahudi, manga imam tembonanne, wuṛṛu manga hurun agama naammulla, see Mawu Yesus niapidda su saruannu Mallaṛṛuungngu Agama mangitou.

⁶⁷ “Pasingkata'a si yami,” unni mangitou si Tou, “atonna I'o indi Ratum Punnu Sal᷊amatta?” Mawu Yesus sinumimbakka, “Amungkangngu i Ya'u mabal᷊o si yamiu, yamiu tawe mangngimanna.

⁶⁸ Wuṛṛu amungkangngu i Ya'u maiwal᷊o si yamiu, i yamiu lai tawe sumimbakka.

⁶⁹ Arawe manattakka orassa indi, Ana'u Taumata sarun uma'ianna su uanannu Ruata Lembo Mataṛṛino.”

⁷⁰ I mangitou sarangkanambone nabbisara, “Amungkangngu aroddi, I'o indi Ana'u Ruata?” Mawu Yesus sinumimbakka, “Aroddi ere su wisarang kamiu.”

⁷¹ Ne i mangitou nabbisara, “Ipa'ura lai sakassi! I ite naaringikke wuassu moṛṛongnge sassane!”