LUKAS 18 - WUKE SUSI WATTI'U AL᷊AL᷊USASSA

Sasumandingngu wawine wal᷊u wuṛṛu mallaṛṛuungnga

¹ Wua'udde Mawu Yesus nabbati'u sambau sasumandingnga ipangaṛṛa'a manga mallal᷊aṛṛenggen-Ne tadea'u i mangitou sidutu u'al᷊iomanna wuṛṛu tawe ma'adio'a naungnge.

² Mawu Yesus nabbisara, “Su sambau soa pia sangkatou mallaṛṛuungnga apan tawe matta'uttu Ruata, wuṛṛu tawe lai mappandumma sisai-sai.

³ Su soa udde pia sangkatou lai wawine wal᷊u apan masokkate sumaruanna mallaṛṛuungnga udde, madorongnga hattone sambaanna. ‘Tul᷊ungaawe i ya'u sumaruanna roa'u,’ unnu wawine wal᷊u udde.

⁴ Manga pira tempo al᷊annune mallaṛṛuungnga udde maddiri mantul᷊ungngu wawine wal᷊u udde. Arawe panginsueanne mallaṛṛuungnga udde naṛṛingida, ‘Salaiwe ya'u tawe matta'uttu Ruata wuṛṛu tawe mappandumma sisai-sai,

⁵ arawe ana waugu wawine wal᷊u indi sidutu mallimbatta si ya'u, mappianne i ya'u manamba'a hattone. Amungkangngu tawe, i tou sidutu rudanta wuṛṛu mapaasusa'u.’ ”

⁶ See Mawu Yesus nabbisara, “Inunue'o paapia apa apan iwabbisara mallaṛṛuungnga apan wengkolla udde!

⁷ Ne, apa Ruata tawe manamba'a hatton al᷊aṛṛanang-Nge sassane apan sussal᷊ande si Tou allo ṛabbi? Apa i Tou sarun manoṛṛuttu tempone mantul᷊ungngi mangitou!

⁸ Pangimante: I Tou ringannu mal᷊iha-l᷊ihakka manamba'a hatto mangitou! Arawe napawe Ana'u Taumata rumanta, apa ta'e asombanganna lai taumata apan mangngimanna si Tou su runia indi?”

Sasumandingngu taumatan Farisi wuṛṛu mallal᷊uṛṛu wose

⁹ Mawu Yesus nabbati'u lai sasumandingnga indi apan tuddane su taumata apan mangngadio'a taumata waine, arawe mangngimanna manungku ririne sassane mapiate.

¹⁰ Unnu Mawu Yesus, “Pia ruan katou apan inai su Wal᷊e Mawu umal᷊iomanna. Sangkatou taumatan Farisi, sangkatou lai madarorongnga wose.

¹¹ Taumatan Farisi udde nirumarisikka sassane wuṛṛu inumal᷊iomanna, ‘O Ruata, i ya'u maadiangkamanna Si'o, ana waugu i ya'u tawe ere taumata waine, apan wal᷊iu, taṛṛa l᷊inga ara'e masandaga. I ya'u ma'adiangkamanna ana waugu i ya'u tawe ere madarorongnga wose udde.

¹² I ya'u paarua mappuasa sulal᷊ummu sangkamisa, wuṛṛu i ya'u mangngonggolu sambau wuassu mapul᷊o anambon asombangku!’

¹³ Arawe madarorongnga wose udde nirumarisikka marau-rau wuṛṛu tawe maningngara langitta. Lapiddu mannapu roone, i tou nabbisara, ‘O Ruata, akkanawe i ya'u, taumata marosa indi!’ ”

¹⁴ “Pangimante,” unnu Mawu Yesus, “su tempo napul᷊ete su wal᷊e, ete madarorongnga wose udde tinarimmattu Ruata, wal᷊ine taumatan Farisi udde. Ana waugu taumata apan mannanggakku watanganne sarun iapaawawo, wuṛṛu taumata apan sussallungu watanganne sarun iapaatanggakka.”

Mawu Yesus nangal᷊amatta al᷊aṛṛana'a

¹⁵ Pia sire pira taumata uaapiddu al᷊aṛṛana'a maradio'a ringannu Mawu Yesus tadea'u i Tou mamita wuṛṛu mangal᷊amatta si mangitou. Napawe manga mallal᷊aṛṛenggennu Mawu Yesus naasilo olangnge udde, i mangitou namul᷊o manga taumata udde.

¹⁶ Arawe Mawu Yesus namago al᷊aṛṛana'a udde see nabbisara mallal᷊aṛṛenggen-Ne, “Wala'e aroddi al᷊aṛṛana'a indi rumanta ringang-Ku! Arie isingadda i mangitou, ana waugu taumata ereindi apan maola'a lal᷊oṛṛon araratuannu Ruata.

¹⁷ Naungete! Taumata apan tawe sumaruanna Ruata ere sangkatou ana'a, tawe maola'a lal᷊oṛṛon araratuannu Ruata.”

Su ola'u taumata ala

¹⁸ Sangkatou piaṛṛa'u Yahudi naiwal᷊o Mawu Yesus, “Iamangnga Huru apan mapia, apa sarun olaangku tadea'u ya'u maasomba wiakka tutune wuṛṛu mal᷊annu-l᷊annu?”

¹⁹ “Anio i'o nabbisara i Ya'u mapia?” unnu Mawu Yesus. “Tawedu apa apan mapia tumba'u Ruata sassane.

²⁰ I'o masingkatte manga parentan Ruata: ‘Arie passandaga, arie pamate, arie panna'o, arie mattiala awusu, wuṛṛu pangaddatta iamangngu wuṛṛu inangngu.’ ”

²¹ “Anambon parenta udde suete ta'u niola'a ro'en i ya'u ta'e dario'a,” unnu taumata udde.

²² Naaringikka udde, Mawu Yesus nabbisara, “Ta'e pia lai sambau sarun olaannu: Wal᷊ua'e anambon darotongngu, onggol᷊a'e roinne su taumata asiangnga, ne i'o sarun maasomba darotongnga su surga. Wua'udde rantate wuṛṛu tantalongke si Ya'u.”

²³ Arawe napawe taumata udde naaringikka wisara aroddi, i tou mangke nasusa ana waugu i tou ala marasai.

²⁴ Mawu Yesus masingkatta manungku taumata udde nasusa naungnge, ana waugu udde i Tou nabbisara, “Masahadda atonna taumata ala maola'a lal᷊oṛṛon araratuannu Ruata!

²⁵ Malluasanna sambau onta sumuṛṛi su loṛṛangngu raraṛṛumma, wuassu sangkatou ala sumutta su Runia Wakku Ruata.”

²⁶ Manga taumata apan naaringikka Mawu Yesus nabbisara aroddi, i mangitou naiwal᷊o, “Amungkangngu aroddi, isai wotongnge masal᷊amatta?”

²⁷ Mawu Yesus sinumimbakka, “Apa tawe ia'ola'u taumata, udde wotongnge su Ruata!”

²⁸ See i Petrus nabbisara, “Pa'ellega! I yami suete nanantangngu lal᷊oṛṛon bal᷊eng kami ana waugu tumantalongnga Iamangnga.”

²⁹ “Pangimante!” wisara Mawu Yesus, “Taumata apan suete nanantangngu wal᷊ene, ara'e awingnge wawine, ara'e tuṛṛangnge, ara'e iamangnge wuṛṛu inangnge, ara'e al᷊aṛṛanangnge ana waugu mangngimbe Ruata,

³⁰ taumata udde sarun bal᷊isanna paarua wuassu tempo indi, wuṛṛu su tempo addantane i tou sarun onggol᷊annu pabbawiakka apan tutune wuṛṛu saran mal᷊annu-l᷊annu.”

Mawu Yesus nabbisara atallune su ola'u papate-Ne

³¹ Mawu Yesus nangammullu sire mapul᷊o dua mallal᷊aṛṛenggen-Ne su sambau see nabbisara, “Padaringikka! I ite orassa indi mabatukku Yerusalem. Poiaroddi, sarangkanambone apan niwoṛṛettu manga nabi su ola'u Ana'u Taumata sarun matipussa.

³² I tou sarun itantilla su manga taumata apan wal᷊ine Yahudi, apan sarun mangal᷊uandaga, mangngadio'a wuṛṛu mangaddu si Tou.

³³ I mangitou sarun manansara wuṛṛu mamate si Tou, arawe su allo atallune, i Tou sarun mabangunna.”

³⁴ Sarangkanambone udde tawe niasunnannu manga mallal᷊aṛṛenggennu Mawu Yesus udde saran kadio'a. Atappasannanu manga wisara-Ne udde ia'adappingnga wuassi mangitou. I mangitou wagga apa pandumannu wisara-Ne.

Mawu Yesus napaapian sangkatou madarorongnga matane wuta

³⁵ Napawe Mawu Yesus maranite ma'oman Yerikho, pia sangkatou wuta tantal᷊anna ua'ianna madoro-rorongnga su winggin dal᷊anna.

³⁶ Napawe i tou naaringikka manambo taumata sinumabbi, i tou naiwal᷊o, “Pia apa?”

³⁷ “Mawu Yesus taumata Nazaret udde, sumabbi,” unni mangitou si tou.

³⁸ Ne taumata wuta udde nangintul᷊i, “Yesus, Ana'i Daud! Akkanaawe i ya'u!”

³⁹ Manga taumata apan su saruanne, namul᷊o wuṛṛu nandolokki tou niapaal᷊annabba. Arawe i tou sidutu mangngintul᷊i lembon aikkanne lai, “Ana'i Daud! Akkanaawe i ya'u!”

⁴⁰ Mawu Yesus natta'alla wuṛṛu nandolokku taumata niapaapiddu taumata wuta udde ringanni Tou. Napawe i tou na'omate, Mawu Yesus naiwal᷊o,

⁴¹ “Apa ipaapulunu olaang-Ku si'o?” “Mawu,” sasimbakku taumata wuta udde, “i ya'u ma'apulu maasilo.”

⁴² See Mawu Yesus nabbisara, “Amungkangngu aroddi, pa'ellege! Ana waugu i'o mangngimanna si Ya'u, i'o napiate.”

⁴³ Orassa udde lai i tou naasilote, see i tou tinumantalongke Mawu Yesus ringannu ma'adiangkamanna su Ruata. Napawe taumata nambo udde naasilote olangnge udde, i mangitou nambo nadalote Ruata.