LAL᷊ALLU 3 - WUKE SUSI WATTI'U AL᷊AL᷊USASSA

Ṛuumanna, awawal᷊u, pangangantimma

¹ Ete i ya'u taumata apan buatte namendamma asasusa, ana waugu niaṛṛiaannu asasa'un Duata.

² Maddau i ya'u wabbol᷊engan-Ne watukku tampa marandumma wasa tuudda.

³ I ya'u nipuulla masokka-sokka, ringannu tawe aakkanna su al᷊o'engngu allo.

⁴ I Tou na'ola'a waddangku nal᷊essa wahewalla, wuṛṛu manga duṛṛi'u napapaddi.

⁵ I Tou namal᷊iwutta si ya'u ringannu asasusa wuṛṛu asasansara.

⁶ I ya'u niwata'a uatana'a sulal᷊ummu ararandumma ere taumata apan nate su tempo nanangkal᷊iu.

⁷ Ringannu ṛate apan matohassa i ya'u niṛṛapun-Ne, na'oman sara tate dal᷊anna sabbanganna si ya'u.

⁸ I ya'u mangngintul᷊i ma'iontolla, arawe Ruata maddiri maddaringikka.

⁹ I Tou mangke mannal᷊are lal᷊angku ringannu manga darandungnga watu.

¹⁰ Ere beruang i tou uaṛṛaddo, naal᷊ihidda singa i Tou nangampangnga si ya'u.

¹¹ Nienggenan-Ne i ya'u sara sinumewadda wuassu lal᷊anna, ana see i ya'u niwaṛṛangassa wuṛṛu nitantangnga.

¹² I Tou nangannatta darangean-Ne, wuṛṛu i ya'u naola'a tatarangannu anaan-Ne.

¹³ Anaan-Ne nallapassa su waddangku na'oman sara nangusu'a pappuso'u.

¹⁴ Su al᷊o'engngu allo i ya'u ilallagen awadaalla, wuṛṛu naola'a punnu pasendekka.

¹⁵ Tumba'u apapetta apan nionggollu Mawu si ya'u maola'a anna wuṛṛu uae'u.

¹⁶ Hati'u niesoggu Mawu su leta'a, isi'u nitenggokku Mawu su watu sara napaddi.

¹⁷ Mal᷊annute i ya'u tawe maapendamma al᷊al᷊uassa; naabul᷊ite i ya'u ereapa apendammu lal᷊umanna'a.

¹⁸ I ya'u tate lai aranna mapia, antimma su Mawu nawul᷊ite.

¹⁹ Maṛṛingiddu al᷊alallele wuṛṛu asasusa'u ere na'inumma racunna apan mapetta.

²⁰ Olangnge udde sidutu ta'u iraṛṛingidda, na'oman sara naungku naaddio'a.

²¹ Salaiwe aroddi antimma nilumapputta apia, sutempo i ya'u naanaungnga olangnge indi:

²² Tatal᷊antuppu Mawu uatatana'a sarangkal᷊o'enge, darangngu-Ne tawe masue,

²³ sidutu wakku suapan marua allo atonna, Mawu tumaniten satia!

²⁴ Mawu uddewe darotongku tutune. Ana waugu udde, i ya'u uaantimma si Tou.

Antimmu Israel

²⁵ Mawu mapia su taumata uaantimma si Tou, wuṛṛu su taumata apan maddea'a si Tou.

²⁶ Nariaddi, mappianne i ite mallaṛṛado ringannu matammudda ma'oman sara Mawu rumanta mangonggollu aontolla;

²⁷ mappianne i ite massal᷊umma maola'a maaddunna sutempo ta'e saṛṛen tumuwo.

²⁸ Sutempo Mawu mangonggollu asasusa, ṛinone i ite uma'ianna sassane ringannu mal᷊annabba.

²⁹ Wala'e i ite sumallungngu waddangnga wuṛṛu mawala, ana waugu asinungka antimma ta'e pia.

³⁰ Salaiwe peroanna wuṛṛu al᷊uandahanna, ṛinone sarangkanambone udde sengkamanni ite.

³¹ Ana waugu, Mawu sarun tawe manol᷊a'i ite saran mal᷊annu-l᷊annu.

³² Napawe i Tou nangonggollu asasusa i Tou lai mandangngu, ana waugu i Tou sidutu tuttal᷊antuppi ite ringannu darangngu apan tawe pattaal᷊anne.

³³ i Tou tawe ringannu naungnga mal᷊uassa mamalan kite uatataṛṛangnga wuṛṛu massusa.

³⁴ Amungkangngu ṛimuuddi ite sassansaranna sulal᷊ummu tattupanna,

³⁵ amungkangngu i ite niawul᷊iannu hakka apan nionggollu Mawu,

³⁶ ana waugu atatul᷊idda niwal᷊elongnga, Mawu sarun maasingkatta wuṛṛu uatantannudda.

³⁷ Amungkangngu Mawu maddiri maapulun manga apa, taumata sarun tawe mapa'ola'a apa-apa su pandumma udde.

³⁸ Apapia wuṛṛu al᷊al᷊eo niapaamatta tumba'u su parentan Mawu.

³⁹ Anio taumata sidutu sussal᷊iomanna napawe i tou iṛṛuumanna ana waugu manga rosane?

^40-41 Mappianne i ite manaṛṛassidda wiakki ite, wuṛṛu mabbelengnga ringannu Mawu Ruata su surga. Wette i ite mamu'a naungnga wuṛṛu umal᷊iomanna,

⁴² “I yami na'ola'a rosa wuṛṛu nilumawangnga Si'o, oh Mawu, wuṛṛu I'o tawe mangonggollu ampungnga.

⁴³ I yami nienggenan-Nu wuṛṛu nipate-Nu, darangngu-Nu uawuni sulal᷊ummu asasa'u-Nu.

⁴⁴ Asasa'u-Nu ere winabbawa apan maappalla atonna na'oman sara tawe al᷊appasannu aal᷊iomanni yami.

⁴⁵ I yami buatte niolang-Ngu ere sapadda su mata su ahewallu runia.

⁴⁶ I yami aal᷊uandahannu anambon seetti yami wuṛṛu ilallagge;

⁴⁷ i yami niaṛṛiaannu asasilaka wuṛṛu ahahohakka, see mabbiakka sulal᷊ummu asasilaka wuṛṛu atata'utta.

⁴⁸ Allon mata'u mangngelekka ere sal᷊ukka ana waugu walahangku naṛṛimunsa'e.

⁴⁹ I ya'u sarun lumuai ringannu tawe illol᷊one,

⁵⁰ maddatingngu I'o, oh Mawu su surga, ual᷊u'adda si yami.

⁵¹ Naungku massusa maasilo pal᷊addu manga wawine su soan kami.

⁵² Naal᷊ihidda manu'u winalanganna, i ya'u a'enggenannu seetta ringannu tawe pangiananne maddantingku.

⁵³ Watukku lal᷊ummu paṛṛihi apan mamara i mangitou nandamme'u ta'e wiakka wua'udde i ya'u nisoopannu watu.

⁵⁴ Ua'e niumawitta naddatingngu pua'u, wuṛṛu i ya'u naṛṛingidda, – ‘Nia'omante papate'u!’

⁵⁵ Oh Mawu, i ya'u sumal᷊ande Si'o, wuassu wantan paṛṛihi apan mal᷊al᷊umma udde.

^56-57 I ya'u maddorongnga ringannu atonna ariewe manappingnga tal᷊inga-Nu su saruannu darorongku tadea'u I'o mantul᷊ungku. Ne aal᷊iomangku niraringiṛṛan-Nu, wuṛṛu I'o nirumanta nangundani'u; I'o nabbisara, ‘Arie passinggawanga.’

⁵⁸ I'o nirumanta manahekku hatto'u, oh Mawu, niawa'u I'o buatte nanal᷊amatta.

^59-60 I'o ma'ellega al᷊al᷊eo apan niola'a su saruangku, hol᷊aga lal᷊eo wuassu seetta apan maddantingku. Ana waugu udde, oh Mawu, sambaaite hatto'u.

⁶¹ I'o, Mawu, naaringikka si ya'u haggeloanna; I'o masingkattu anambon hol᷊agi mangitou.

⁶² I mangitou uahahatton wia'u su al᷊o'engngu allo. Tadea'u manilaka si ya'u, i mangitou makkiinnu hol᷊aga lal᷊eo.

⁶³ Wuassu marua allo maddatingngu ṛabbi, i ya'u niola'a punnu aal᷊uandaga.

⁶⁴ Ṛuumana'e i mangitou uasul᷊ungngu inolaanni mangitou, oh Mawu.

⁶⁵ Wontohete i mangitou, wuṛṛu wala'e i mangitou uatana'a sulal᷊ummu asasusa.

⁶⁶ Enggenete wuṛṛu patete i mangitou sarangkanambone ma'oman sara i mangitou mahangginna abbi wuassu runia.”