LAL᷊ALLU 2 - WUKE SUSI WATTI'U AL᷊AL᷊USASSA

Mawu nakkuumannu Yerusalem

¹ Mawu nammanara sulal᷊ummu asasa'u, Sion nioossu Mawu ringannu ararandumma. Awawantugu Israel atanggakke ere langitta, buatte niemang-Nge su runia. Sutempo Mawu nasa'u, Wal᷊en-Ne su Sion tate lai nipanduman-Ne.

² Suapan wadda'u nannal᷊o su wanua Yehuda, nihohakku Mawu ringannu tawe napau. Sulal᷊ummu asasa'u-Ne i Tou namela'a sara naṛṛa'a manga tanda'a watu apan ual᷊indumma wanua udde. Araratuanna udde suadio'a ringannu manga piaṛṛangnge niemang-Nge na'oman sara nabbal᷊i addio'a.

³ Sulal᷊ummu asasa'u-Ne apan lukkenggamma, atatohassu Israel nipaddi-Ne. Sutempo i ite nipangaloannu seetta, i Tou mappau mangonggollu aontolla. Naal᷊ihidda putungnga sussal᷊oi mannoṛṛobba al᷊awo'a, etearoddi Mawu nasa'u si ite sarangkanambone.

⁴ Naal᷊ihidda seetta, i Tou nangannatta darangean-Ne wuṛṛu nantarangngu anaan-Ne si ite. Anambon taumata apan maal᷊uassa naungngi ite, nasue nipate-Ne. I Tou nanossokku asasa'u-Ne ere putungnga sulal᷊ummu soa Yerusalem indi.

⁵ Mawu nabbal᷊i ere seetta; i Tou namuulla Israel sara naṛṛa'a. I tou nakkimunsa'a manga tanda'a watu wuṛṛu wal᷊en araratuanna, wuṛṛu nanamba asasusa su tumana'u Yehuda.

⁶ I Tou nakkimunsa'a wal᷊e-Ne tampan uman-Ne maammulla massubba si Tou. I Tou na'ola'a taumata maabul᷊i Sabat wuṛṛu manga allo wahewalla. Ana waugu Mawu lembon nasa'u, imam wuṛṛu ratu buatte nitol᷊ang-Ne.

⁷ Mawu nanol᷊a'u mezbah-Ne apan susi, wuṛṛu nanantangngu Wal᷊en-Ne sassane; niwala-Ne seetta naṛṛa'an manga darandungne. Sutampan kite dorone mattaṛṛamawu wuṛṛu mappesetta, seetta u'ui ana waugu lulluassa.

⁸ Mawu buatte nakkawessa manungku manga darandungngu Sion ṛinone iṛṛa'a. Manga darandungnga udde buatte niuuṛṛan-Ne, tadea'u sarangkanambone wotongnge iṛṛa'a-Ne. Manga darandungnga wuṛṛu manga candi, orassa indi nabbal᷊ite tuidda abbi.

⁹ Manga ngarane niaomboannu leta'a, anambon papal᷊ene napaddi; ratu wuṛṛu tembonannu pamarenta poite su pamuanganna. Titan Mawu tate lai iaṛṛa'a; nabi tate lai manengkamma sondappa wuassu Mawu.

¹⁰ Manga matatimmadu soa ua'ianna nimmoune su leta'a; i mangitou mannal᷊iawukku awu su pua wuṛṛu nalluṛṛen nasa karongnga tatialan massusa. Manga maṛṛuala lai niumaruutu puane sara leta'a.

¹¹ Mata'u hinumanne ana waugu lulluai tawe illol᷊one, ṛimuu'u massusa tawe sumandingnge. Naungku natuno naasilo ahahohakku walahanna; naasilo al᷊aṛṛana'a see bayi ana'a maradio'a napinsanna su manga lal᷊annu soa.

¹² Ringannu nallome i mangitou lulluai maddorongnga anna wuṛṛu ua'e su inangngene. Naal᷊ihidda taumata nal᷊essa, i mangitou nawantingnga su manga lal᷊anna ana see nate su ṛiwan inangngene.

¹³ O Yerusalem, Soa Sion apan arangnguanna, winal᷊alanne ahewalle ere laudda. Apa apan wotongnge ta'u iwisara ipangonggollu bawinalatta? Ana waugu, taambe piaddu natataṛṛangnga asasusa ere i'o. Atonna taweddu wotongnge mamelengngu lal᷊umannangngu.

¹⁴ Apan niapasingkattu manga nabi si'o, tumba'u aawusu wuṛṛu wawahia sassane. I mangitou taambe naasi'attu rosanu, na'oman sara ana waugu udde i'o maddiri mawal᷊u. Nawal᷊i'a i mangitou tumba'u mammasingkatta si'o manga wisara awusu apan maasarootta.

¹⁵ Anambon taumata apan sinumabbi, mangngal᷊uandaga si'o, ana waugu i'o naṛṛimunsa'e abbi. I mangitou uapapa'ilingnga wuṛṛu nabbisara, “Eteudde apan aṛṛansanganne, soa apan raddaloannu runia?”

¹⁶ Anambon see'u ma'ellega hatinu ringannu maddantinna, i mangitou lullagenu wuṛṛu mammansaga. I mangitou mabbisara, “Soa udde buatte nihohakki yami! Panginsueanne nia'omante lai tempone apan mal᷊annute laṛṛaddoanni yami!”

¹⁷ Mawu buatte napaamattu wawansa-Nge apan dorone niṛṛiinna wuṛṛu niapanaung-Nge si ite. I ite niṛṛimunsa-Ne ringannu tawe aakkanna, seetta nionggol᷊an-Ne auntunganna. I Tou na'ola'a si mangitou lulluassa naasilo ananawon kite.

¹⁸ Ei manga darandungngu Yerusalem, sal᷊andete su Mawu! Paturoa'e allon mata ere sal᷊ukka apan mangngelekka allo ṛabbi. Lalluaite sidutu, arie pangillol᷊o ma'oman sara watangannu mallome!

¹⁹ Pasokkate matimpo'u su al᷊o'engngu ṛabbi tadea'u mangintul᷊i mapasabbangngu lal᷊oṛṛon naungngu su Mawu. Paddorongke tadea'u i Tou umakkanna su manga anangngu apan niamal᷊unusanna wuṛṛu napinsanna suapan pabbeṛoannu lal᷊anna.

²⁰ Mawu, ellehete wuṛṛu panutukke i mangitou apan sassansaran-Nu udde! Apa piaddu suete apan niolang-Ngu aroddi? Inangnga niuminassa anangne sidutu apan arangnguanna, imam wuṛṛu nabi nipate sulal᷊ummu Wal᷊en-Nu apan susi.

²¹ Timmadde dario'a nate uatal᷊allada su lal᷊anna, manga saṛṛen tumuwo naten hal᷊ele. Su allo I'o masa'u, I'o naṛṛata si mangitou ringannu tawe apendamma umakkanna.

²² I'o namaggo manga seetta apan iaata'utti yami niapaola'a andeangngu araṛṛagissa su tampan kami. I mangitou namate sarangkanambone apan papadul᷊iananna wuṛṛu arangnguanni yami. Su allo asasa'u-Nu, tawe saran sangkatou apan wotongne tumal᷊angngu watanganne.