LAL᷊ALLU 1 - WUKE SUSI WATTI'U AL᷊AL᷊USASSA

Asasusan Yerusalem

¹ Aroddi al᷊annabbe Yerusalem orassa indi, soa apan al᷊amonane rame atonna. Dorone tinumelengnga wuassu al᷊awo'u manga walahanna, orassa indi naola'e ere wawine wal᷊u. Dorone soa apan mangke raddaloanna, orassa indi niola'e allangnga.

² Su al᷊o'engngu ṛabbi i tou lulluai massusa, allon matane mangngelekka su wambala. Tawe saran sangkatou wuassu arangnguanne apan mappulu maminalatta si tou. I tou nil᷊al᷊eon manga hawene apan nabbal᷊i'e nabbal᷊i ro'appa.

³ Tumana'u Yehuda nanantangngu wanuane, ana waugu niallangnga wuṛṛu tumaniten nasansara. Orassa indi i mangitou uatna'a suwallattu manga walahanna tawe tampa apan mangonggollu paddarame see al᷊al᷊uassa. Seetta nalliwunna si mangitou sutempo i mangitou su asasusa.

⁴ Su manga allo wahewalla tawe saran sangkatou apan nirumanta su Wal᷊en Duata. Manga maṛṛuala mangangantari poiaroddi uatataṛṛanga susa, wuṛṛu manga imam sussal᷊ande. Tawe taumata su manga ngara wahewalla, Soa Sion papal᷊iwutannu asasusa.

⁵ Manga seenne lullala'a ana waugu napamarenta si mangitou. Mawu na'ola'a i tou uatataṛṛangnga, ana waugu tumaniten manambo rosane. Tumanangnge buatte nitawanna, wuṛṛu niapidda su pamuanganna.

⁶ Paa'alan soa Yerusalem tumba'u watti'u tempon dorone. Manga piaṛṛangnge naola'e lome ere rusa tumaniten mal᷊unussa. I mangitou tawe naal᷊ore su saruannu seetta apan mangngenggena.

⁷ Napawe nanawote wuṛṛu nasansarate, Yerusalem nanaungnga tempo nanangkal᷊iu, sutempo i tou ta'e manambo darotongnga; ereapa tumanangnge nanawo su liman seetta, wuṛṛu tawe saran sangkatou nirumanta massumbala. Manga ro'amme tumba'u lullage maasilo ananawone.

⁸ Yerusalem malluhudda watanganne sassane ringannu ma'ola'a manambo rosa apan maarantinna. Sarangkanambone apan dorone mangngaddatta si tou, orassa indi mangngal᷊uandaga ana waugu naasilo uatantol᷊ene. I tou sussal᷊iomanna, ana waugu inawul᷊ianten hatine.

⁹ Al᷊al᷊eone aasiloanna ringannu matualaga arawe i tou tawe pandumma su apa apan sarun mariaddi su watanganne. Tumaniten bahewalla ahahohakke, arawe tawe saran sangkatou malluassa si tou. Ne i tou naddorongnga tatal᷊antuppa wuassu Mawu, ana waugu manga seenne naauntungke.

¹⁰ Al᷊awo'u darotongnge buatte niaṛṛon manga seenne. I tou ewe'e lai ṛinone ma'ellega si mangitou sumutta Wal᷊en Duata, sambau inolaanna apan isassingaddu Mawu su taumata apan wal᷊ine uman-Ne.

¹¹ Ringannu sussal᷊iomanna tumanangne maddea'a anna; saranapa maarega ipannal᷊iun mangitou roti, tumba'u tadea'u i mangitou sidutu wiakka wuṛṛu tawe mate. Yerusalem sinumal᷊ande, “Oh Mawu, ellehete i ya'u, intannoi'o al᷊awo'u asasusa'u.”

Yerusalem sinumal᷊ande

¹² “Ei manga taumata apan niumamatta su lal᷊anna, pa'ellege wuṛṛu panutukke! Piawe asasusa apan ahewalle ere papasannanangku orassa indi, asasusa apan niṛṛia'u Mawu si ya'u, ana waugu asasa'u-Ne apan tumatine nilumambalanna udde?

¹³ Wuassu langitta i Tou nanossokku putungnga apan manoṛṛoba sara lal᷊ummu naungku. I Tou nantaingngu sedda su saruangku na'oman sara i ya'u nul᷊ussa. Ana see niwala-Ne i ya'u sassane uatataṛṛangnga su al᷊o'engngu allo.

¹⁴ I Tou nanganu anambon rosa'u, wua'udde niwa'issa nabbal᷊i sambau, ana see nipul᷊issa su ullekka'u, na'oman sara awakkanne naal᷊ome si ya'u. Mawu nananti'u su seetta; i ya'u tawe ikkatta lumawangnga si mangitou udde.

¹⁵ Mawu ma'ellega mawawo anambon tumannaṛṛangku apan waṛṛani. I Tou nangeṛṛon tantara tadea'u taumata'u saṛṛen tumuwo nate. I Tou mangke maṛṛinda walahangku na'oman sara naṛṛimunsa'a, naal᷊ihidda taumata mammakkan wuan anggore.

¹⁶ Ana waugu udde allon mata'u mappinapi, taweddu mangonggollu sasasa ara'e al᷊al᷊uassa. Walahangku niawul᷊ianten al᷊awo'a, ana waugu seetta lembon uataṛṛino.

¹⁷ I ya'u namatten lima maddorongnga sasumbala, arawe taweddu nangonggollu al᷊al᷊uassa. Wuassu al᷊awo'u pappi'uanne, Mawu nangirimmu seetta; i mangitou nirumanta namangalo si ya'u. I ya'u niola'a ere sapadda, saranapa apan maarantinna su pattangnganni mangitou.

¹⁸ Arawe ete Mawu apan naṛṛino, ana waugu parenta-Ne ta'ute nil᷊awanganna. Daringiṛṛewe i ya'u, ei manga walahanna, ellehete i ya'u apan uatataṛṛangnga. Manga umbasanna wuṛṛu maṛṛuala'u niatawanna, wuṛṛu niapidda watukku pamuanganna.

¹⁹ I ya'u namaggo manga hawe'u ate arawe i mangitou namontol᷊osanna si ya'u. Manga imam wuṛṛu piaṛṛa'u walahanna sarangkanambone natete su manga lal᷊annu soa. Sutempo maddea'a wiakka ipandalukka niawa.

²⁰ O, Mawu! Ellehewe i ya'u, naungku sussinggawanga wuṛṛu uasongkakka, naṛṛimunsa'a ana waugu al᷊al᷊eo'u dorone. Su manga lal᷊anna pia pamamate, sulal᷊ummu wal᷊en pia papate.

²¹ O, Mawu! Daringiṛṛewe sasal᷊iomangku, taweddu malluassa si ya'u. Manga see'u lulluassa, ana waugu I'o na'ola'a si ya'u nasilaka. Rantate allo apan pina'ire-Nu udde; ola'ewe i mangitou matataṛṛangnga ere lai i ya'u.

²² Ellehete anambon al᷊al᷊eon mangitou udde, wuṛṛu ola'e i mangitou ere lai I'o na'ola'a si ya'u, ana waugu anambon rosa apan ta'u niola'a su saruan-Nu. I ya'u sussal᷊iomanna sulal᷊ummu radda'a, naungku massusa wuṛṛu maddunde.”