KOLOSE 3 - WUKE SUSI WATTI'U AL᷊AL᷊USASSA

¹ I yamiu suete niapaawiakka apia su sambau ringanni Kristus. Ana waugu udde ṛinone i yamiu mammanara tadea'u maasomba apapia wuassu surga, suapa Kristus uaparenta ringannu Ruata.

² Timmona'a ṛingiṛṛannu su inolaanna isudde, arie su manga inolaanna su runia.

³ Ana waugu i yamiu natete, wuṛṛu wiakku uawuni su sambau ringanni Kristus sulal᷊ummu Ruata.

⁴ Ne, punnu wiakku apan tutune eteudde Kristus wuṛṛu napawe i Tou asiloanna, ne i yamiu lai sarun rumanta suadio'a ringanni Tou sulal᷊ummu atatulide!

Wiakka tabbe wuṛṛu wiakka wakku

⁵ Ana waugu udde, tantanga'e paa'apulun dunia apan maawinasa ririnu, ere sandaga, manga inolaanna apan tawe matataṛṛino, apulu naungnga, tawe masabare, apulu apan lal᷊eo, wuṛṛu awawal᷊iu (ana waugu awawal᷊iu udde nassul᷊ungngu massubba paal᷊uanna).

⁶ Manga inolaanna ereudde mapaal᷊atton wontogu Ruata su manga taumata apan mal᷊awangnga.

⁷ Dorone i yamiu sassane lai tuttuṛṛuta manga apulu udde, su tempo i yamiu paparentannu inolaanna udde.

⁸ Arawe orassa indi ṛinone i yamiu mandammem manga inolaanna lal᷊eo wuassu ririnu; ariete masa'u, ara'e mandona ara'e pia naungnga maddintinu taumata waine. Arie saran paassa sumabangnga wuassu moṛṛongu manga wisara lal᷊ela ara'e wisara apan lal᷊eo.

⁹ Arie pangawusu sangkatou ringannu waine, ana waugu wiakka tabbe ringannu al᷊awo'u pallal᷊agune suete nirammen kamiu.

¹⁰ I yamiu orassa indi suete nionggol᷊annu wiakka wakku. I yamiu taumatate wakku, apan sidutu lallimbakuannu mandiriaddine eteudde Ruata, tumuṛṛuttu pahudde sassane. Pandumanne eteudde tadea'u i yamiu maaillal᷊a Ruata ringannu mapia-pia.

¹¹ Ana waugu wuassu inolaanna udde, nawul᷊ite al᷊awo'u apendamma mappapaṛṛalan taumatan Yahudi wuṛṛu wal᷊ine Yahudi, taumata nisunatta wuṛṛu taumata tawe nisunatta, tate lai paṛṛalane su wallatu taumata raho wuṛṛu taumata woddo; su wallatu allangnga wuṛṛu wal᷊ine allangnga, ana waugu Kristus uddewe uatahuanna sarangkanambone, wuṛṛu i Tou uaaukka ringanni mangitou sarangkanambone!

¹² Eteudde tuṛṛanga sarangkanambone al᷊aṛṛana'u Ruata. Ruata marangngu si yamiu wuṛṛu namile si yamiu maola'a pussa'a-Ne sassane. Ana waugu udde i yamiu ṛinone mapaal᷊iatta'u apapia, i yamiu ṛinone uasasangkapia, masaṛṛionto'a, masaṛṛiologa wuṛṛu mataṛṛanga su asasusa.

¹³ I yamiu ṛinone masabare sangkatou ringannu waine, wuṛṛu maapulu mangampunga sangkatou ringannu waine. Mawu ringannu naungnga mal᷊uassa mangampunga si yamiu, nariaddi yamiu lai ṛinone mangampunga sangkatou ringannu waine.

¹⁴ Wuṛṛu apianne eteudde: I yamiu ṛinone uararangngu ana waugu ete darangngu udde mappaa'aukku manga tuṛṛangnga sarangkanambone ma'oman sara masuungnga.

¹⁵ Ṛinone manga pangudusannu hatto udde insueannu paddarame apan nionggoli Kristus sulal᷊ummu naungngu. Ana waugu Ruata namaggo si yamiu maola'a sambau waddanga, tadea'u i yamiu mabbiakka sulal᷊ummu paddarame wuassi Kristus udde. Ṛinone i yamiu maadiangkamanna.

¹⁶ Ṛinone manga al᷊aṛṛa'i Kristus apan napenen al᷊amatta umusippa sulal᷊ummu naungngu. Ṛinone i yamiu uatatantiro wuṛṛu uaaonggolu al᷊aṛṛa'a lembon apianne. Antaria'e Mazmur wuṛṛu manga daralo see manga antarin Saṛṛani; pangantarite hunan Duata ringannu apendamu aadiangkamanna sulal᷊ummu naungngu.

¹⁷ Al᷊awo'u apa apan a'olaanni yamiu ara'e sulal᷊ummu wisara, ṛinone udde olaanna wuṛṛu iwisara sulal᷊ummu arannu Mawu Yesus. Aal᷊iomante su Ruata Iamangnga ana waugu inolaannu Mawu Yesus si yamiu.

Paa'aukku taumata sulal᷊ummu wiakka apan wakku

¹⁸ Manga tuṛṛangnga apan naola'a awingnga wawine! Paatuṛṛuta su awingngu esakka, ana waugu aroddite pallal᷊agunu ere sangkatou taumatan Saṛṛani.

¹⁹ Manga tuṛṛangnga apan naola'a awingnge esakka! Paarangngue awingngu wawine. Arie manggal᷊usa'a si mangitou.

²⁰ Manga al᷊aṛṛana'a! Eteudde manaran kamiu taumatan Saṛṛani sidutu tuttuṛṛuta hagurangngu, ana waugu eteudde maal᷊uassa naungngu Ruata.

²¹ Manga tuṛṛangnga apan naola'a iamangnga! Arie mapaasusa naungngu manga al᷊aṛṛanangngu ma'oman sara i mangitou masusa naungnge.

²² Manga tuṛṛangnga apan naola'a allangnga! Sulal᷊ummu al᷊awo'u inolaanna, ṛinone i yamiu matuṛṛuta mawunu su runia indi. Arie tumuṛṛutta si mangitou tumba'u su tempo i mangitou uariaga si yamiu, ana waugu i yamiu maapulu raloanna. Paatuṛṛuta si mangitou ringannu naungnga waresi, ana waugu i yamiu mangngaddatta Mawu.

²³ Al᷊awo'u manara apan nionggolla si yamiu, ṛinone manaranni yamiu ringannu ahewallu naungnga, paṛṛimaunnapa eteudde Mawu apan a'imbeanni yamiu, wuṛṛu wal᷊ine tumba'u taumata.

²⁴ Paanaunge manungku i yamiu sarun manengkamma lal᷊antake wuassu Ruata. Apa apan nissaddia Mawu su al᷊aṛṛanang-Nge, eteudde sarun ionggola si yamiu. Ana waugu mawu apan atonna eteudde Kristus sassane.

²⁵ Wuṛṛu isai-sai apan na'ola'a pasasal᷊a, sarun mamasanna manga pasasal᷊ane udde; ana waugu Mawu tawe mamile hati.