KOLOSE 1 - WUKE SUSI WATTI'U AL᷊AL᷊USASSA

^1-2 Manga tuṛṛangnga al᷊aṛṛana'u Ruata su Kolose apan tuttuṛṛuta uaaukka ringanni Kristus! Ere sangkatou rasulli Kristus Yesus, – apan nitenegu Ruata – i ya'u, Paulus, su sambau ringannu tuṛṛangi ite Timotius, mangantimma doronganna Ruata Iamangngi ite mangonggolu al᷊amatta wuṛṛu paddarame si yamiu.

Aal᷊iomannu aadiangkamanna

^3-4 I yamiu suete naaringikka manungku i yamiu mangngimanna Mawu Yesus Kristus wuṛṛu i yamiu marangngu anambon al᷊aṛṛana'u Ruata. Ana waugu udde su tempo i yami u'al᷊iomanni yamiu, i yami sidutu maadiangkamanna su Ruata, Iamangngu Mawun kite Yesus Kristus.

⁵ I yamiu mangngimanna wuṛṛu i yamiu marangngu, ana waugu mangngantimma apa apan suete nissaddian Duata su surga hunan kamiu. I yamiu suete naaringikka su olangnge udde, su tempo Watti'u Al᷊al᷊uassa udde niapaasingkata si yamiu.

⁶ Watti'a wuassu Ruata udde nassal᷊iawukke su ahewallu runia, wuṛṛu wiakku taumata sidutu aal᷊amatannu watti'a udde, ere lai wiakku nial᷊amatanna ro'en su tempo i yamiu naaringikka ola'u darangngun Duata wuṛṛu atonna-tonna nusippa sulal᷊ummu naungngu.

⁷ Olangnge udde niapaasingkati Epafras si yamiu, hawe apan arangnguanni yami. I tou udde allangngi Kristus apan matuṛṛuta mammanara hunan kite.

⁸ Ete wuassi tou i yami naaringikka manungku ringannu taṛṛino wuassu Ghaṛṛahon Duata i yamiu wotongnge maddarangngu.

⁹ Ana waugu udde i yami sidutu u'al᷊iomanni yamiu ro'en i yami naaringikka su ola'i yamiu. I yami naddorongnga su Ruata tadea'u Ghaṛṛahon Duata mangonggolu apande wuṛṛu asingkata si yamiu, na'oman sara i yamiu maasunna apa ipaapulun Duata.

¹⁰ Ringannu aroddi yamiu wotongnge mabbiakka tuttuṛṛuta apulun Duata, wuṛṛu sidutu malluassa naugnge, na'oman sara sulal᷊ummu al᷊awo'u inolaanna i yamiu wotongnge mamasilo manga inolaanna apan mapia. Wuṛṛu asingkati yamiu su ola'u Ruata sarun aatambanna lai.

¹¹ Doronganna ringannu taṛṛinon Duata apan mawantuga, i yamiu tohasanna ma'oman sara i yamiu wotongnge matataṛṛanga ringannu sabbare wuṛṛu naungnga mal᷊uassa

¹² wuṛṛu ringannu wisara adiangkamanna su Iamangnga. Ana waugu ete Iamangnga udde apan nandiaddi si yamiu wotongnge manengkamma apa apan nissaddian Duata su al᷊aṛṛanang-Nge sulal᷊ummu araratuan-Ne apan masemakka.

¹³ I Tou suete namallosi ite wuassu taṛṛinon araranduma wuṛṛu nangingkati ite sulal᷊ummu araratuannu Anang-Nge apan arangnguan-Ne.

¹⁴ Wuassu Anang-Nge udde i ite suete nipallosa; atappasanne manga rosan kite suete niampunganna.

Kristus wuṛṛu manara-Ne

¹⁵ Eteudde Kristus hambaranna apan matualaga wuassu watangannu Ruata apan tawe asiloanna; eteudde Kristus Ana'a pahul᷊une, apianne wuassu manga al᷊awo'u inolaanna.

¹⁶ Ana waugu ete sulal᷊ummi Tou Ruata nandiaddi al᷊awo'u manga apa su surga wuṛṛu su wowon dunia, al᷊awo'u apa apan aasiloanna wuṛṛu apa apan tawe asiloanna, nasutta lai alawo'u ghaṛṛaho apan uataṛṛino wuṛṛu uaparenta. Ahewallu runia indi niola'a sulal᷊ummi Kristus wuṛṛu hunane si Kristus.

¹⁷ Tantal᷊anna taambe nariaddi sarangkanambone, Kristus uddete dorone. Wuṛṛu ana waugu i Tou lai, ne al᷊awo'u inolaanna su tampanete sambau-sambau.

¹⁸ Ete i Tou tembonannu wuassu wadang-Nge, eteudde jamaatta, ana waugu ete i Tou punnu pabbawiakku jamaatta udde. Ete i Tou Ana'a pahul᷊une, apan paarorone niapaawiakka apia wuassu papate, tadea'u i Tou sassane apan maola'a apianne wuassu al᷊awo'u riadianna.

¹⁹ Ruata sassane mappandumma tadea'u alawo'u riadianna sulal᷊ummu wadangngu Ruata, aompaanna lai ringannu nasuungnga su wadangngu Anang-Nge.

²⁰ Wuṛṛu sulal᷊ummu Anang-Nge udde lai Ruata naṛṛingida mandiaddi manga al᷊awo'a maaukka apia ringanni Tou – mawae udde su runia, ara'e lai su surga. Ruata nandiaddi udde wuassu papaten Anang-Nge su alu arussa.

²¹ Dorone i yamiu maraun Duata. I yamiu masseetti Tou ana waugu pallal᷊agunu wuṛṛu ṛingiṛṛannu lal᷊eo.

²² Arawe orassa indi, ringannu papaten Anang-Nge, Ruata na'ola'a paa'aukki yamiu ringanni Tou maola'a mapia apia. Ringannu olangnge udde i yamiu wotongnge iapidda sumaruanna Ruata sulal᷊ummu asasuungnga, atatul᷊idda wuṛṛu tawe sal᷊ane.

²³ Arawe i yamiu ṛinone sidutu matuṛṛutta mangngimanna wuṛṛu matohassa uarisikka su pangangimannu. Imbaṛṛanga i yamiu mamallosu antimma apan suete nionggolla si yamiu su tempo i yamiu nanengkamma Watti'u Al᷊al᷊uassa wuassu Ruata. Watti'a udde suete niapaasingkata su anambon taumata su ahewallu runia. Wuṛṛu ana waugu udde lai ya'u, Paulus, naola'e darol᷊oṛṛan-Ne.

Pangangimben Paulus su jamaatta

²⁴ Orassa indi ya'u mal᷊uassa matataṛṛanga hunan kamiu. Ana waugu ringannu asasusan wadangku, i ya'u manuungngu apa apan ta'e ṛinone niapendamanni Kristus su jamaan-Ne, eteudde wadang-Nge.

²⁵ Ruata nandolo'u maola'a mangangimbe jamaan-Ne hunan kamiu. I ya'u ṛinone mapaasingkatu watti'a wuassu Ruata, sarangkanambone;

²⁶ eteudde watti'a ro'en al᷊amonane apan sidutu iaadappingu Ruata su anambon taumata, arawe orassa indi niapaal᷊iatta'a su al᷊aṛṛanang-Nge.

²⁷ Su al᷊aṛṛanang-Nge udde Ruata maapulu mapaal᷊iatta'a aroddi apiane wuṛṛu awantuge addapinge udde su anambon walahannu taumata. Addapinge eteudde: Kristus udde sulal᷊ummu wadangu, atappasanne i yamiu lai sarun maapendamma awawantugu Ruata.

²⁸ Eteudde Kristus apan iwabbatti'i yami su anambon taumata. I yami mapaanaungnga wuṛṛu mangngaṛṛa'a si mangitou sarangkanambone ringannu al᷊awo'u apande. Tuddan kami eteudde tadea'u suapan taumata wotongnge iapidda ringannu Ruata, ere sangkatou taumata apan nahurangke su pangangimanna, ana waugu suete naaukka ringanni Kristus.

²⁹ Su ipaddea'a olangnge udde i ya'u mammanara ringannu maṛṛimadda. I ya'u mammanara ringannu ahewallu atatohassa apan nionggoli Kristus si ya'u wuṛṛu apan mammanara sulal᷊ummu wadangku ringannu napenen taṛṛino.