IMAMATTA 8 - WUKE SUSI WATTI'U AL᷊AL᷊USASSA

I Musa nanenegi Harun wuṛṛu manga anangnge

¹ I Mawu nabbisara si Musa,

² “Waggoite i Harun wuṛṛu manga anangnge wuṛṛu apira'e laubbu imam, lanan lal᷊aghu, sambau sapi esakka saṛṛen tumuwo maola'a sasamba ipangampunga rosa, darua domba esakka wuṛṛu sangkul᷊a'a roti tawe ragine.

³ Ana see doloṛṛa'e anambon walahannu Israel ma'ammulla su saruannu ngaran Rasang-Ku.”

⁴ I Musa tinumuṛṛutta apa apan nirolokku Mawu. Su tempo anambon taumata naammule su tampa udde,

⁵ i Musa nabbisara si mangitou, “Apan ta'u mammanaranna orassa indi eteudde parentan Mawu.”

⁶ Ana see i tou nandolokki Harun wuṛṛu manga anangnge niaparisikka su saruanne wuṛṛu niapawaresi watanganne.

⁷ Wua'udde i tou nalluṛṛeten laubbu imam si Harun: kemeja, papeṛṛetta wuṛṛu jubah. Wuṛṛu lai laubbu imam apan niwa'issa su lawassa ringannu aiinne wuassu mal᷊aṛṛenessa al᷊ussa.

⁸ Ana see i tou nalluṛṛen lal᷊indumma ro'o si Harun, wuṛṛu sulal᷊ummu lal᷊indumma ro'o udde niapasutta Urim wuṛṛu Tumim.

⁹ Ana see i tou nama'issu paporongnga su puan i Harun, wuṛṛu su paporongnga udde i tou nangelen lal᷊ogakka wul᷊awanna, apan mattiala manungku i Harun naola'e pussa'an Mawu. Sarangkanambone udde niola'i Musa tumuṛṛuttu parentan Mawu si tou.

¹⁰ Ana see i Musa nangangu lana lal᷊aghu wuṛṛu niwuṛṛa su Rasanna Mawu wuṛṛu al᷊awo'u saranapane. Ringannu aroddi sarangkanambone niṛṛae su Mawu.

¹¹ Addio'a wuassu lana udde nialassa paapitu su wowon mezbah wuṛṛu anambon saranapane, see lai su wowon tampan kua'e wuṛṛu apampakke. Ringannu aroddi sarangkanambone niṛṛae su Mawu.

¹² Wua'udde i Musa nanenegi Harun ringannu nallal᷊innu addio'a lanan lal᷊aghu su puane.

¹³ Ana see i tou nandolokku manga ana'i Harun niaparisikka su saruanne. I tou nalluṛṛen kameja wuṛṛu papeṛṛetta. Ana see i tou nama'issu paporongnga su puan mangitou ere buatte niparentan Mawu si tou.

¹⁴ Wua'udde i Musa nanganute sapi esakka saṛṛen tumuwo maola'a sasamba aampunga rosa. I Harun wuṛṛu manga anangnge nangandangngu liman mangitou su puan binatangnga udde.

¹⁵ Ana see i Musa namopotta wuṛṛu nanganu sambageanganna wuassu daṛṛane. Daṛṛa udde niwuṛṛan tal᷊imaddone su manga tatandu'a su manga pabbuuannu mezbah, tadea'u mezbah udde iṛṛae hanan Duata. Daṛṛa lambene niwokkan tou su apampakku mezbah. Etearoddi olangnge mezbah udde niola'a susi wuṛṛu niṛṛae hanan Mawu.

¹⁶ Wuassu sapi apan wakkute nipototta udde, i Musa nanganu anambon aṛiwungkalune apan uaoossa lal᷊oṛṛon tianne, wabbatune ringannu tawane wuṛṛu wageangnge apianne wuassu atene. Sarangkanambone udde nitambunna su wowon mezbah.

¹⁷ Arawe ṛemessu sapi udde, pisine, lal᷊oṛṛon tianne nasutta lai tinaine, nariaddi ahewallu sapi udde tabene'e manga wageangnge apan buatte niṛṛae nitambunni tou su liuddu paddasananna ere buatte niparentan Mawu.

¹⁸ Wua'udde i Musa nanganu domba esakka maola'a sasamba itattambunna, ana see i Harun wuṛṛu manga anangnge nangandangngu lima mangitou su wowon puan domba udde.

¹⁹ I Musa naṛṛata domba udde ana see daṛṛane niwokka su mezbah sandiṛṛanne appata.

^20-21 Ana see winatangnga udde nitatadda wuṛṛu lal᷊oṛṛon tianne see leddane niukkassu ua'e. Pua, tawane, wuṛṛu lambene wuassu ṛemessu domba esakka udde nitambunni tou maola'a sasamba itattambunna su wowon mezbah ere buatte niparentan Mawu si tou. Hal᷊urun anna udde ma'al᷊uassa naungngu Mawu.

²² Ana see i Musa nanganu domba esakka sambau lai niola'a sasamba mapatenegu imam. I Harun wuṛṛu manga anangnge nangandangngu liman mangitou su wowon puan domba udde,

²³ ana see i Musa naṛṛata domba udde. Wua'udde i tou nanganu addio'a daṛṛan binatangnga udde, wuṛṛu niwuṛṛa su tal᷊ingan i Harun aikkatanna, wuṛṛu su inangngu lima aikkatanna.

²⁴ Wua'udde i tou napaundanin manga ana'i Harun, ana see i tou lai namuṛṛan addio'a daṛṛan su tal᷊inga mangitou aikkatanna, wuṛṛu su inangngu tal᷊imaddo ledda mangitou. Daṛṛa lambene nialassa su mezbah sandiṛṛanne appata.

²⁵ I Musa nanganu tawan domba udde, tol᷊ene apan matawa, anambon aṛiwungkalu apan uapi'unna lal᷊oṛṛon tianne, wageangnge apan apianne wuassu atene, wabbatune wuṛṛu tawane wuṛṛu leddane aikkatanna.

²⁶ Wuassu ula'a apan lal᷊oṛṛoannu roti apan tawe ragine apan buatte nionggola su Mawu, i Musa nanganu sambau roti maappalla apan niola'u lana wuṛṛu sambau roti manipissa. Roti udde niandangnga su wowon tawa wuṛṛu su palangngu domba aikkatanna.

²⁷ Sarangkanambone niandangnga su liman i Harun wuṛṛu manga anangnge, ana see i mangitou nangonggola maola'a sambau sasamba iattogokka su Mawu.

²⁸ Napawe i Musa buatte nanganu anna udde wuassi mangitou wuṛṛu nitambunna su wowon mezbah, suadio'a ringannu sasamba itattambunna maola'a sasamban patatenega. Hal᷊urun sasamba anna udde ma'al᷊uassa naungngu Mawu.

²⁹ Ana see i Musa nanganu ro'on domba udde wuṛṛu nionggola maola'a sasamba iattogokka su Mawu. Eteudde wageangngi Musa wuassu domba esakka apan nionggola su lal᷊aghun patatenegu imam. Sarangkanambone udde niola'i Musa ere buatte niparentan Mawu si tou.

³⁰ Wua'udde i Musa nanganu sambageanganna wuassu lanan lal᷊aghu wuṛṛu sambageanganna daṛṛa apan uaraddo su wowon mezbah, ana see nialassa si Harun wuṛṛu manga anangnge see lai su laubbi mangitou. Ringannu olangnge aroddi i Musa naṛṛae mangitou wuṛṛu laubbi mangitou su Mawu.

³¹ Wua'udde i Musa nabbisara si Harun wuṛṛu manga anangnge, “Lahate ṛemessu sasamba udde su saruannu ngaran Dasannu Mawu. Tumuṛṛuttu parentan Mawu, ṛinone inasanni yamiu isudde ringannu roti sasamban patatenega apan uaraddo su ul᷊a'a.

³² Ṛemessa wuṛṛu roti lambene ṛinone itambunni yamiu ma'oman sara masue.

³³ Al᷊annune pitu allo imbaṛṛangnga i yamiu manantangngu Rasannu Mawu ma'oman sara lal᷊aghun patatenegu muddussa.

³⁴ Mawu namarenta tadea'u apa apan olaanni ite allo indi lai olaanna sarangkal᷊o'engnge. Ringannu manga lal᷊aghun udde manga rosanu niampunganna.

³⁵ Al᷊annune pitu allo, allo wuṛṛu ṛabbi, yamiu ṛinone uatana'a su saruannu ngaran Dasanna mapaamattu sarangkanambone apan irolokku Mawu. Amungkangngu i yamiu maddiri tumuṛṛutta, i yamiu sarun mate. Eteudde apan nirolokku Mawu si ya'u.”

³⁶ Ana see i Harun wuṛṛu manga anangnge tinumuṛṛutta sarangkanambone apan nirolokku Mawu si Musa.