IMAMATTA 25 - WUKE SUSI WATTI'U AL᷊AL᷊USASSA

Tonna appitune

¹ Su puiddu Wowon Sinai Mawu nabbisara si Musa wuṛṛu nandolokki tou

² niapapasingkattu manga atoranna indi su walahannu Israel. Amungkangngu i yamiu sumuttate watukku wanua apan sarun ionggolu Mawu si yamiu, i yamiu ṛinone mangaddata Mawu ringannu olangnge indi: Suapan tonna appitune i yamiu tawe wotongnge mabbailla ara'e massuanna.

³ Al᷊annune annummu tonna i yamiu ṛinone massuanna manga wawail᷊annu, mamabbassa manga waillu anggore wuṛṛu mangammullu hessin letangngu.

⁴ Arawe suapan tonna appitune niṛṛae su Mawu. Nariaddi su al᷊o'engngu tonna udde leta'a iwala aroddi wuṛṛu tawe wotongnge wail᷊anna. Arie passuanna manga wailla wuṛṛu arie pamabbassa manga punnu anggore.

⁵ Ewe'e lai gandumma apan tinumuwo sassane ara'e anggore wuassu anggorenu apan tawe niwabbassa, tawe wotongnge iammulli yamiu ara'e sahipunanna, ana waugu tonna uddewe tonna pangillol᷊oanna su leta'a.

⁶ Salaiwe aroddi, leta'a udde sarun mangonggolu hessine lai apan maola'a wiakki yamiu, manga allangngu, manga taumatan sewanu, wuṛṛu manga taumata raho apan uatana'a ringanni yamiu.

⁷ See lai su manga winatangnga apan papadul᷊ianannu wuṛṛu manga winatangnga matengnga su wanuanu. Al᷊awo'u hessin leta'a udde wotongnge annananna.

Tonna Pamamelenganna

⁸ Reenga'e paapitu su pitu tonna, anambone appatu pul᷊o sio su tonnane.

⁹ Ana see su allo appul᷊one wul᷊anna appitune, eteudde allo pangampunganna rosa, doloṛṛa'e taumata maniuppa trompeta su al᷊awo'u tampa su ahewallu wanua.

¹⁰ I yamiu ṛinone maṛṛaen tonna al᷊iman pul᷊one udde, wuṛṛu mamasingkattu apapallossa su anambon tumana'u wanua. Sulal᷊ummu tonna udde al᷊awo'u darotongngu apan buatte niwal᷊u'a ṛinone iapawelengnga su tatahuanne paarorone ara'e papapulunne. Isai apan niwal᷊u'a maola'a allangnga ṛinone iapawelengnga su amonanne.

¹¹ Imbaṛṛangnga massuanna wawail᷊annu. Gandumma apan tinumuwo sassane ara'e wuan anggore su wawail᷊annu apan tawe nawabbassa tawe wotongnge iammulli yamiu wuṛṛu sahipunanna.

¹² Tonna udde maola'a tonna apan susi si yamiu. I yamiu tumba'u wotongnge umanna sasuanna apan tinumuwo sassane su wawail᷊annu.

¹³ Sulal᷊ummu tonna udde anambon leta'a apan buatte niwal᷊u'a ṛinone iapawelengnga su tatahuanne paarorone.

¹⁴ Nariaddi amungkangngu i yamiu mabbal᷊u'u leta'a su sansul᷊ungngu taumatan Israel, ara'e mamalli leta'a wuassi tou, imbaṛṛangnga mabbawalli udde ṛingannu tawe su tul᷊idde.

¹⁵ Aregan leta'a ṛinone itantunna tumuṛṛuttu al᷊annune leta'a udde wotongnge mangonggolu hessine maddatingngu Tonna Pamamelenganna manansunna.

¹⁶ Amungkangngu reengannu tonnane manambo, aregan leta'a udde masagadda. Arawe amungkangngu reengannu tonnane addio'a, aregane ṛinone matilluakka, ana waugu iwabbal᷊u'a udde reengannu pangangitingnga.

¹⁷ Imbaṛṛangnga mamahia su sansul᷊ungngu taumatan Israel, arawe ṛinone i yamiu mata'uttu Mawu, Ruatanu.

Hatton tonna appitune

¹⁸ Paatuṛṛutte su anambon tita wuṛṛu parentan Mawu, tadea'u i yamiu mabbiakka ringannu malangnganna su wanua udde.

¹⁹ Leta'u wanua udde sarun mangonggolu hessine na'oman sara i yamiu maatahuanna anna apan manambo wuṛṛu uatana'a poiaroddi ringannu paddarame.

²⁰ Arawe asinungka piaddu maiwal᷊o apate sarun annananna su al᷊annune pitu tonna su tempo leta'a tawe suananna wuṛṛu tawe apanganuanna hessine.

²¹ Su tonna aiannumme Mawu sarun mangal᷊amatta na'aman sara hessine wotongnge ipaatta sulal᷊ummu tallu tonna.

²² Wuṛṛu su tempo i yamiu massuanna wawail᷊annu su tonna aual᷊une, pangitinganna wuassu tonna aiannumme ta'e pia annananni yamiu. Ewe'e lai saddian anni yamiu ta'e wotongnge lai ipaatta su tempo i yamiu mangammullu hessin tonna udde.

Pamamelengngu leta'a wuṛṛu wal᷊en

²³ Letangngu tawe wotongnge iwal᷊u'a sarangkal᷊o'engnge, ana waugu leta'a udde wal᷊ine pussaanu, ewe'e pussa'an Duata. I yamiu tumba'u ere taumata raho apan niwala mappaattu leta'a udde.

²⁴ Amungkangu leta'a santampa iwal᷊u'a, ṛinone tatahuanne rumanta. Ringannu aroddi i tou mapangul᷊en letangnge apia.

²⁵ Amungkangu sangkatou Israel nabbal᷊i asiangnga na'oman sara i tou nabbal᷊u'u latangnge, manga tuṛṛange apan aranianne ṛinone manubbussa leta'a udde.

²⁶ Amungkangu tawe taumata wotongnge manubbussa arawe tatahuanne udde su allo addantane wotongnge mamaekka wuṛṛu naasomba roitta manambo ipanubbussa letangnge,

²⁷ ne i tou ṛinone mamaekka su taumata apan buatte namalli letangnge ringannu areggane hessin leta'a udde al᷊annune manga pira tonna manansunna maddatingngu Tonna Pamelenganna apan addantane. Ringannu aroddi i tou naasomba apia leta'a pussa'ane.

²⁸ Arawe amungkangngu i tou tawe maatubussa letangnge, taumata apan namalli sidutu uaagassa leta'a udde maddatingngu Tonna Pamamelengnga manansunna. Sulal᷊ummu tonna udde leta'a udde ṛinone iul᷊e su tatahuanne paarorone.

²⁹ Amungkangngu sangkatou nabbal᷊u'u wal᷊en sulal᷊ummu soa apan papal᷊iwutannu tanda'a, i tou wotongnge manubbussa wal᷊ene sulal᷊ummu tempo santonna ireengnga wuassu allo nabbal᷊u'a.

³⁰ Arawe amungkangngu wal᷊en udde tawe niatubusanna sulal᷊ummu tempo santonna ne nasuete tempone i tou manubbussa wal᷊en. Wal᷊en udde sidutu tatahuannannu taumata wuṛṛu papapulunne apan namalli. Su Tonna Pamamelenganna, wal᷊en udde tate iapawelengnga.

³¹ Amungkangngu wal᷊en su ampungnga apan tawe papal᷊iwutannu tanda'a atoranne ere lai atorannu leta'a: tatahuanne paarorone wotongnge manubbussa wuṛṛu wal᷊en udde ṛinone iapawelengnga sulal᷊ummu Tonna Pamamelenganna.

³² Arawe taumatan Lewi walate i mangitou manubbussa darotongngi mangitou su al᷊awo'u soa apan nitantunna si mangitou.

³³ Amungkangngu sangkatou Lewi mabbal᷊u'u wal᷊ene su sambau soa udde wuṛṛu i tou tawe manubbussa wal᷊en udde, wal᷊en udde ṛinone iapawelengnga si tou sulal᷊ummu Tonna Pamamelenganna. Ana waugu wal᷊en taumatan Lewi su manga soa mangitou udde sidutu pussa'a mangitou su wallatu walahannu Israel.

³⁴ Arawe wadda'u nannal᷊o maranin manga soa balagu Lewi tawe wotongnge iwal᷊u'a. Udde pussa'an taumatan Lewi saran mal᷊annu-l᷊annu.

Awallassa su taumata asiangnga

³⁵ Amungkangngu taumata sambalahannu apan uatana'a su wallati yamiu nabbal᷊i susa wuṛṛu tawe maawiakka watanganne, i yamiu ṛinone massumbala si tou ere sangkatou taumata raho ara'e rumaranta, tadea'u i tou sidutu mabiakka su wallati yamiu.

^36-37 Imbaṛṛangnga maddorongnga wungane wuassu apa apan niapawallasa si tou, arawe ṛinone i yamiu mata'uttu Ruatanu, wuṛṛu wala'e taumata udde mabbiakka su wallati yamiu. Arie lai manganu auntunganna wuassu anna apan niwal᷊ungngu si tou.

³⁸ Eteudde parentan Duatanu apan buatte nangapiddi yamiu sinumabbangnga wuassu Mesir wuṛṛu nangonggolu wanua Kanaan si yamiu, tadea'u i Tou mabbal᷊i Ruatanu.

Pamamallossu allangnga niwallianna

³⁹ Amungkangngu taumata sambalahannu apan uatana'a su wallati yamiu naasiangnga na'oman sara i tou nabbal᷊u'u watanganne maola'a allangnga si'o, taumata udde tawe wotongnge irolokka iapamanara ere sangkatou allangnga.

⁴⁰ I tou ṛinone matana'a ringannu ere sangkatou taumatan sewa wuṛṛu mammanara ringannu maddatingngu Tonna Pamamelenganna.

⁴¹ Su tempo udde i tou wuṛṛu manga anangnge wotongnge manantangngu wal᷊enu wuṛṛu mabelengnga ringannu amonanne wuṛṛu watukku leta'u iupungngu al᷊amonane.

⁴² Taumatan Israel uddewe manga allangngu Mawu; ete i Tou apan nangapiddi mangitou sinumabbangnga wuassu Mesir, wuṛṛu ana waugu udde i mangitou tawe wotongnge iwal᷊u'a maola'a allangnga.

⁴³ Nariaddi taumatan Israel apan nabbal᷊u'u watanganne si'o tawe wotongnge olaannu lal᷊eo. Ṛinone i yamiu mata'uttu Ruatanu.

⁴⁴ Amungkangngu i yamiu mappandumma allangnga, i yamiu wotongnge mamalli wuassu manga walahanna apan uatana'a maraninu.

⁴⁵ I yamiu lai wotongnge mamalli manga ana'u taumata raho apan uatana'a ringanni yamiu. Manga ana'u taumata raho apan niasungkangnga su wanuanu wotongnge i yamiu maola'a tatahuanne

⁴⁶ wuṛṛu wotongnge lai itantilli yamiu su manga anangngu mabbal᷊i allangngi mangitou su al᷊o'engngu pabbiaṛṛanne. Arawe sansul᷊ungngu taumatan Israel tawe wotongnge olaanni yamiu ringannu maṛṛagissa.

⁴⁷ Amungkangngu sangkatou raho apan uatana'a su pattangnganni yamiu mabbal᷊i ala, wuṛṛu pia sansul᷊ungngu taumatan Israel nabbal᷊i asiangnga na'oman sara nabbal᷊u'u watanganne naola'a allangnga su taumata raho udde ara'e amonanne,

⁴⁸ taumatan Israel udde sidutu pia tempone i tou manubbussa. Sangkatou suwallatu tuṛṛangnge esakka,

⁴⁹ ara'e tuṛṛangngu iamangnge, ara'e tuṛṛangnge sidutu ara'e sangkatou waine wuassu tuṛṛangnge marani, wotongnge manubbussa si tou. Ara'e amungkangngu i tou sassane wotongnge mamaekka, i tou wotongnge manubbussa watanganne sassane.

⁵⁰ Allangnga udde ṛinone maggahatton taumata apan buatte namalli si tou. I mangitou ṛinone mandeengngu anambon tonna ro'en batanganne niwal᷊u'a maola'a allangnga maddatingngu Tonna Pamamelenganna manansunna, ana see manantunnu arega wawaekke. Arega udde ṛinone itantunna tumuṛṛuttu reengannu ṛoitta apan nionggola su taumatan sewa.

^51-52 Allangnga udde ṛinone mamelengngu arega pinamalli watanganne anambone ere ṛoittu sangkatou taumatan sewa al᷊annune pira tonna apan taambe niamatanne,

⁵³ paṛṛimaunnapa i tou buatte nammanara ere sangkatou taumatan sewa apan niwaeṛṛanna santonna. I Tuangnge tawe wotongnge ma'ola'a si tou ringannu maṛṛagissa.

⁵⁴ Amungkangngu i tou tawe atubbusanna ringannu sambau lal᷊anne udde, i tou wuṛṛu manga anangnge ṛinone ipallossa sulal᷊ummu Tonna Pamamelenganna manansunna.

⁵⁵ Sangkatou Israel tawe wotongnge maola'a allangnga su al᷊o'engngu pabbiaṛṛanne ana waugu walahannu Israel uddewe manga allangngu Mawu. Ete Mawu apan nangapiddi mangitou sinumabbangnga wuassu Mesir. Ete i Tou Ruatan mangitou.