IMAMATTA 24 - WUKE SUSI WATTI'U AL᷊AL᷊USASSA

Ereapa mabbuwunna sol᷊o

¹ Mawu nandolokki Musa

² niapaonggolu manga parenta indi su walahannu Israel; Pangapiden lanan zaitun tutume wuṛṛu apianne itaṛṛo su sol᷊o sulal᷊ummu Rasannu Mawu, tadea'u re'omanna wuṛṛu sidutu lukkengnggamma.

³ I Harun ṛinone mangatokku manga sol᷊o udde wuassu wawallo maddatingngu marua'allo su tampa Mawu isudde, su liuddu pampele apan ual᷊indumma wuṛṛu uataappa Wantallu Pa'aire su Wabbo'a Lembon Susi. Parenta udde ṛinone iapaamatta saran mal᷊annu-l᷊annu.

⁴ I Harun ṛinone mangatokku manga sol᷊o su leddan sol᷊o wuassu wul᷊awanna tutune tadea'u sidutu lukkenggamma sulal᷊ummu Rasannu Mawu.

Roti ia'imbe

⁵ Panganute mapul᷊o dua su kilone taponna apan apianne wuṛṛu pa'ola'e mapul᷊o dua roti mal᷊imbulunna, sambau-sambau wuassu sangkilo taponna.

⁶ Addoa'e roti udde darua ual᷊isansunna, annumma roti suapan sansunne, su wowon medda lal᷊apisannu wul᷊awanna tutune apan uaraddo su Rasanna Mawu.

⁷ Addoa'e amania tutune suapan al᷊isansunnu roti ipattiala manungku roti udde sasamba anna su Mawu.

⁸ Suapan allon Sabat ṛinone pia doti apan ia'imbe sulal᷊ummu Rasanna Mawu. Eteudde manaran balahannu Israel saran mal᷊annu-l᷊annu.

⁹ Roti uddewe wageangngi Harun wuṛṛu papapulunne. I mangitou ṛinone umanna su tampa apan susi, ana waugu roti udde maola'a wageangnge apan lembon susi wuassu sasamba anna apan nionggola su Mawu wuattu manga imam.

Ṛuumanna su taumata apan mammontoga Ruata wuṛṛu ṛuumanna ipabbal᷊issa

^10-11 Su paddasanannu taumatan Israel pia sangkatou esakka. Iamangnge taumatan Mesir wuṛṛu inangngene taumatan Israel aranne Selomit, ana'i Dibri wuassu walagi Dan. Su sambau allo taumata udde natatiakku sangkatou taumatan Israel su paddasananna. Su tempo natatiakka, i tou namontoga Ruata. Ana waugu udde manga taumatan Israel nangapidi tou sinumaruanna si Musa,

¹² wuṛṛu nanaṛṛangnga si tou apiddu maṛṛaddo ṛaṛṛawessa wuassu Mawu su ola'u apa apan sarun olaanni mangitou si tou.

¹³ Mawu nabbisara si Musa,

¹⁴ “Apira'e taumata udde watukku liuddu paddasananna. Suapan taumata apan buatte naaringikka si tou mammontoga, ṛinone mangandangngu limane su wowon puan taumata udde ipattiala manungku taumata udde nassal᷊a. Ana see anambon walahanna manuntungngu watu si tou ma'oman sara mate.

¹⁵ Wua'udde al᷊iata'e indi su walahannu Israel; Isa-sai apan mamontoga Ruata ṛinone mamasanna pangillul᷊eanne

¹⁶ wuṛṛu iṛṛuumanna pateanna. Isai-sai apan mammontoga Mawu jamaatta ṛinone manuntungngu watu ma'oman sara mate. Ṛuumanna udde iapa'amatta su taumatan Israel wuṛṛu taumata raho apan namanuate su Israel.

¹⁷ Isai apan namate taumata waine ṛinone iṛṛuumanna pateanna.

¹⁸ Isai apan namate winatangngu taumata waine ṛinone i tou mallanna'a. Pangainanne eteudde ‘niawa lannaannu niawa’.

¹⁹ Amungkangngu sangkatou naangngo arae naasilaka taumata waine, sarangkanambone apan buatte niolangnge, ṛinone olaanna lai si tou.

²⁰ Amungkangngu i tou namaddi duṛṛi, ne duṛṛine lai paddianna. Amungkangngu i tou naawuta mata taumata waine samba'a, ne matane lai samba'a iapaawuta. Amungkangngu i tou namuulla taumata waine na'oman sara isine napaddi, ne isine lai ṛinone paddianna. Sarangkanambone apan niolangnge na'oman sara taumata waine pia sangkulle, ṛinone lai olaanna si tou maola'a wawal᷊inne.

²¹ Isai-sai apan namate winatangnga ṛinone mallanna'a, arawe isai-sai apan namate taumata ṛinone iṛṛuumanna pateanna.

²² Ṛuumanna udde maṛia'a si yamiu sarangkanambone wuṛṛu su taumata raho apan uatana'a suwallati yamiu, ana waugu ete i Ya'u Mawu, Ruatanu.”

²³ Napawe i Musa buatte namasingkattu wisara udde su walahannu Israel, i mangitou nangapiddu taumata apan namontoga Ruata udde niapasabbanga su liuddu paddasananna ana see i tou tinuntungannu watu na'oman sara nate. Ringannu olange udde walahannu Israel tinumuṛutta apa apan buatte nirolokku Mawu si Musa.