IMAMATTA 22 - WUKE SUSI WATTI'U AL᷊AL᷊USASSA

Asasusin sasamba

¹ Mawu nandolokki Musa

² niapawal᷊on parenta indi si Harun wuṛṛu manga anangnge, “Manarate ringannu suṛṛinone sasamba apan nionggolu walahannu Israel apan niṛṛae si Ya'u, tadea'u i yamiu tawe mallobbossa arang-Ku apan susi. Ete i Ya'u Mawu.

³ Amungkangngu sangkatou wuassu papapulunnu ta'e ia'arantinna nangundani manga sasamba susi apan niṛṛaen balahannu Israel si Ya'u, i tou tawe wotongnge lai mangimbe su mezbah. Atoranna indi ipaatta saran mal᷊annu-l᷊annu. Ete i Ya'u Mawu.

⁴ Sangkatou papapulunni Harun apan uapendamma radda'a su pisi apan ma'ata'utta, ara'e rada'a su awa'u esakka na'oman sara sussabbangke nana, imbaṛṛangnga umanna sasamba susi amungkangngu i tou taambe niwal᷊o waresi. Sangkatou imam mabbal᷊i lal᷊eo amungkangngu i tou nangindingnga sambau apan dal᷊eo ana waugu niaeṛṛetannu winal᷊unanna. I tou lai ma'arantinna amungkangngu sari'a sinumabbangnga,

⁵ ara'e nangindingnga winatangnga ara'e taumata ma'arantinna.

⁶ Sangkatou imam ringannu olangnge ereapa mabbal᷊i ma'arantinna, uatatana'a ma'arantinna maddatingngu matannallo umattuppa. Wuṛṛu napawe matannallo nattuppe i tou wotongngete umanna anna apan nionggola su Mawu amungkangngu i tou taambe nandeno.

⁷ Napawe matannallo nattuppe i tou waressite wuṛṛu wotongngete umanna, ana eteudde anni tou.

⁸ I tou imbaṛṛangnga uminassa ṛemessu winatangnga apan nate sassane ara'e nate niaṛṛattu winatangnga mal᷊aṛṛaga. Amungkangngu i tou niuminassa, i tou mabbal᷊i ma'arantinna. Ete i Ya'u Mawu.

⁹ Anambon imam ṛinone tumuṛṛutta manga atoranna apan Ta'u nionggolla. Amungkangngu tawe, i mangitou nassal᷊a wuṛṛu sarun mate, ana waugu nilumawangnga manga atoranna apan susi. Ete i Ya'u Mawu, wuṛṛu ete i Ya'u Mawu apan naṛṛae mangitou huna-U.

¹⁰ Sasamba apan niṛṛae si Ya'u tumba'u wotongnge annanannu amonannu imam udde sassane; taumata waine tawe wotongnge, salaiwe taumata udde wal᷊en sambau ringannu imam ara'e taumatan sewane.

¹¹ Arawe manga allangnga apan niwalliannu imam udde ringannu roinne sassane ara'e niasungkangnga sulal᷊ummu wal᷊ene wotongnge umanna anna wageangngu imam udde.

¹² Sangkatou ana'u imam bawine apan na'awingngu sangkatou wal᷊ine imam, tawe wotongnge umanna sasamba udde.

¹³ Arawe ana'u imam wawine imam apan inawal᷊uante ara'e sinindoanna wuṛṛu tawe ana'a ana see mabelengnga watukku wal᷊en iamangnge wuṛṛu maola'a papaddul᷊iananne, botongnge umanna anna wageangngu iamangnge. Tumba'u amonannu imam apan botongnge umanna sasamba udde.

¹⁴ Amungkangngu sangkatou apan bal᷊ine reengannu amonannu imam apan ringannu tawe nipattatudda niumanna anna apan nionggola su Mawu, i tou ṛinone mangonggolu lal᷊annangnge su imam wuṛṛu tambannu lai ruan pul᷊o wuassu anna nianni tou.

¹⁵ Manga imam tawe wotongnge ma'ola'a ma'arantinna sasamba apan niṛṛae si Ya'u

¹⁶ ringannu mamala annanannu sangkatou apan tawe su tampane umanna anna udde. Olangnge udde maaola'a taumata udde nassal᷊a wuṛṛu mandantan ṛuumanna si tou. Ete i Ya'u Mawu, wuṛṛu i Ya'u apan napaasusin sasamba udde.”

¹⁷ Mawu nandolokki Musa

^18-19 niapaonggola si Harun, manga anangnge, wuṛṛu anambon balahannu Israel manga atoranna indi. Amungkangngu sangkatou Israel ara'e sangkatou raho apan uatana'a namanua su Israel nangonggolu sasamba ipamaekka riandi, ara'e maola'a sasamba tawe niwata'a, winatangnga udde ṛinone esakka wuṛṛu tawe sangkulle tadea'u sengkamanna.

²⁰ Imbaṛṛangnga mangonggolu sasamba winatangnga apan pia sangkulle, ana waugu Mawu maddiri manengkamma.

²¹ Amungkangngu sangkatou mangonggolla su Mawu sasamban paddarame ipamaekka riandine ara'e sasamba tawe niwata'a, winatangnga udde imbaṛṛangnga pia sangkulle, tadea'u wotongnge sengkamanna.

²² Imbaṛṛangnga mangonggola su Mawu winatangnga apan buta matane, napaddi duṛṛine ara'e nal᷊essa, apan pia pinsulle pia nanane, apan uapendamma radda'a su pisi ara'e akke. Winatangnga aroddi imbaṛṛangnga olaanna sasamba anna su wowon mezbah.

²³ Su sasamba walate apulu i yamiu wotongnge mangonggolu winatangnga apan tawe natipussa wadangnge; arawe su ipamaekka riandi, winatangnga aroddi tawe sengkamanna.

²⁴ Imbaṛṛangnga mangonggola su Mawu winatangnga apan wabbatun lalleone naṛṛepessa, niwutu, ara'e lessa nawabballa ara'e niramme. Olangnge udde imbaṛṛangnga mariaddi su wanuanu.

²⁵ Winatangnga apan niasombanganna wuassu taumata raho tawe wotongnge ionggola maola'a sasamba anna. Winatangnga udde ere pia sangkulle wuṛṛu tawe wotongnge sengkamanna.

^26-27 Ana'u sapi, ana'u domba ara'e ana'u ambinga apan wakkute niasungkangnga ṛinone matana'a ringannu inangnge al᷊annune pitu allo. Wakkute udde winatangnga udde wotongnge sengkamanna maola'a sasamba anna.

²⁸ Imbaṛṛangnga mangonggolu mangngu sapi ara'e domba ara'e ambinga suadio'a ringanu anangnge su allo apan uasul᷊ungnga.

²⁹ Amungkangngu i yamiu mangonggolu sasamba aadiangkamanna su Mawu, ola'e udde tumuṛṛuttu atoranna, tadea'u sasambanu sengkamanna.

³⁰ Ante sasamba su allo udde lai, wuṛṛu imbaṛṛangnga manantangngu lambene maddatingngu taṛṛabbi marua'allo.

³¹ Mawu nabbisara, “Paatuṛṛute manga parenta-U; ete Ya'u Mawu.

³² Imbaṛṛangnga mandal᷊eo arang-Ku apan susi. Ahewallu walahannu Israel ṛinone massubba si Ya'u Apan Lembon Susi. Ete i Ya'u Mawu wuṛṛu i Ya'u na'ola'a si yamiu susi.

³³ I yamiu nangapiddi yamiu sinumabbangnga wuassu Mesir, tadea'u i Ya'u maola'a Ruatanu. Ete i Ya'u Mawu.”