IMAMATTA 21 - WUKE SUSI WATTI'U AL᷊AL᷊USASSA

Asasusin manga imam

¹ Mawu nandolokki Musa niapawal᷊on parenta indi su manga imam papapulunni Harun, “Sangkatou imam tawe wotongnge mandal᷊eo watanganne ana waugu nirumanta nallaghun pallal᷊abingngu manga tuṛṛangnge,

² tabbene'e apan nate udde inangnge, iamangnge, anangnge, tuṛṛangnge esakka,

³ ara'e tuṛṛangnge wawine apan taambe na'awingnga, wuṛṛu uatana'a su wal᷊en sambau ringanni tou.

⁴ I tou tawe wotongnge mandal᷊eo watanganne ringannu rumanta mallaghun pallal᷊abbingngu manga tuṛṛangngu awingnge.

⁵ Sangkatou imam tawe wotongnge mallunggukka sambageanganna wuassu puane wuṛṛu tawe wotongnge mamol᷊o omengnge ara'e mallessa watanganne ringannu saranapa maṛṛoro tadea'u mapal᷊iatta'a manungku i tou tantal᷊anna lullal᷊o.

⁶ I tou pussaa-U apan niṛṛae wuṛṛu tawe wotongnge mandal᷊eo arang-Ku. I tou mangonggolu sasamba anna si Ya'u, nariaddi i tou ṛinone susi.

⁷ Sangkatou imam tawe wotongnge ma'awingngu sangkatou wawine apan buatte sinumandaga ara'e sangkatou wawine apan tate lai susi ara'e buatte nasasindo, ana waugu imam udde tatahuanang-Ku.

⁸ Walahannu Israel ṛinone manga'u imam naola'a sangkatou taumata apan niṛṛae si Ya'u ana waugu i tou mangngonggolu sasamba anna si Ya'u. Ete i Ya'u Mawu; i Ya'u indi susi wuṛṛu i Ya'u napaasusi al᷊aṛṛana-U.

⁹ Amungkangngu sangkatou wawine ana'u imam naola'a sussandaga, i tou nallobbossa iamangnge wuṛṛu i tou itambunna ma'oman sara mate.

¹⁰ Imam Bahewalla buatte nitenega ringannu nallal᷊innu lanan lal᷊aghu su wowon puane wuṛṛu ringannu nalluṛṛen laubbu imam bahewalla si tou. Ana waugu udde i tou tawe wotongnge mamalan utangnge naal᷊impusutta ara'e manggesa'a laungnge maola'a tatiala lullal᷊o.

^11-12 I tou buatte nionggola si Ya'u maola'a pussaa-U, nariaddi tawe wotongnge mandal᷊eo watanganne. I tou lai tawe wotongnge mandal᷊eo Rasang-Ku ringannu sumabbangnga wua'isudde wuṛṛu sumutta watukku wal᷊en apan pia binal᷊unanna, salaiwe udde winal᷊unannu iamangnge ara'e ianangnge sassane.

^13-14 I tou tumba'u wotongnge ma'awingngu sangkatou apan ta'e susi wuassu ṛuanganne sassane. Imbaṛṛangnga i tou ma'awingngu sangkatou inawal᷊uanna ara'e sangkatou wawine sinindoanna, ara'e sangkatou wawine wua sinumandaga.

¹⁵ Amungkangngu i tou nilumawangnga atoranna udde, ne manga anangnge apan ṛinone susi, sarun maola'a lal᷊eo. Ete i Ya'u Mawu wuṛṛu i Ya'u buatte naṛṛaen tou maola'a Imam Bahewalla.”

¹⁶ Mawu namarenta si Musa

¹⁷ iapapasingkattu indi si Harun, “Sangkatou papulunnu apan pia sangkulle wadangnge tawe wotongnge mangonggohe sasamba anna si Ya'u. Udde iappaamatta saran mal᷊annu-l᷊annu.

¹⁸ Taumata apan nangonggolu sasamba tawe wotongnge wadangnge pia sangkulle, eteudde taumata wuta ara'e lome, taumata pia sangkule hatine ara'e wageangngu wadangnge,

¹⁹ apan lome limane ara'e peṛṛo leddane,

²⁰ ual᷊udungnga ara'e panda'a, pia raddangnge mata ara'e radda'a su pisi wuṛṛu apan niwutu.

²¹ Suapan papapulunni Imam Harun apan pia sangkule wadangnge tawe wotongnge mangonggolu sasamba anna si Ya'u.

²² Arawe i tou wotongnge umanna anna apan nionggola, mawae ete sasamba anna apan susi aroddi lai sasamba anna apan lembon susi.

²³ Ana waugu taumata udde wadangnge pia sangkule, i tou tawe wotongnge mangundani pampele apan uawallatta Wabbo'a Susi ara'e mezbah. I tou tawe wotongnge mandal᷊eo manga saranapa apan buatte niṛṛae si Ya'u, ana waugu ete i Ya'u Mawu, wuṛṛu ete i Ya'u naṛṛae manga saranapa udde.”

²⁴ Eteudde manga atoranna apan nipasingkatti Musa si Harun wuṛṛu manga anangnge, wuṛṛu su walahannu Israel sarangkanambone.